1. Khuyini esingayenza bona sithabise uJehova?

 ZICABANGE upha umuntu omthandako isipho esikhethekileko, esihle nesizokuba lisizo. Kungakudanisa nange umuntu loyo angathatha isiphweso asifake ngebhoksini, angasisebenzisi namkha asibeke endaweni ethileko kunokobana asisebenzise. Ngakelinye ihlangothi ungathaba khulu nawumbona asisebenzisa begodu akuthokoze ngaso. Ngiliphi iphuzu esilifumanako? UJehova usiphe iNdodanakhe. Yeke kumthabisa khulu nakabona ukuthi siyathokoza ngesipho esiligugwesi, nangethando lakhe elimenze wasipha isihlengo.—Jwa. 3:16; Rom. 5:​7, 8.

2. Sizokucoca ngani esihlokwenesi?

² Njengombana isikhathi sikhamba, kungenzeka sitjengise ukuthi asisasithokozi kangako isihlengo. Kuzokuba ngasuthi sibeka isipho sakaZimu ebhoksini namkha endaweni ethileko. Kuyasithabisa ukuthi sinaso kodwana asisisebenzisi. Bona sikubalekele lokho, kufuze sihlale sivuselela indlela esithokoza ngayo ngalokho uKrestu noZimu abasenzele khona. Isihlokwesi sizosisiza senze njalo. Sizokucoca ngokuthi sizuza njani esihlengweni nje nokuthi sizokuzuza njani kiso esikhathini esizako. Sizokucoca nangokuthi singatjengisa njani ukuthi siyathokoza ngethando lakaJehova, khulukhulu hlangana neemveke zangaphambi nezangemva kwesiKhumbuzo.

INDLELA ESIZUZA NGAYO NAMHLANJESI

3. Isihlengo sisizuzisa ngayiphi indlela namhlanjesi?

³ Siyazuza ngebanga lomhlatjelo wesihlengo sakaKrestu. Ngokwesibonelo, ngebanga lesihlengo uJehova ulibalela izono zethu. Akakakateleleki bona asilibalele kodwana uyafuna ukusilibalela.  Umrhubi waveza indlela athokoza ngayo ngokulibalela kwakaJehova nakathi: “Maye! Jehova, umuhle, ukulungele nokulibalela.”—Rhu. 86:5; 103:​3, 10-13.

4. UJehova wenzele abobani isihlengo? (Lukasi 5:32; 1 Thimothi 1:15)

⁴ Abanye bangazizwa bangakufanelekeli ukulitjalelwa nguJehova. Kuhlekuhle soke akusifaneli ukulitjalelwa nguJehova. Umpostoli uPowula wakuzwisisa lokho nakathi “akukangifaneli ukubizwa ngokuthi ngimpostoli.” Waraga wathi: “Kodwana ngomusa omkhulu kaZimu ngingilokhu engingikho.” (1 Kor. 15:​9, 10) Nasitjhuguluka ezonweni zethu uJehova uyasilibalela. Kubayini? Akusingebanga lokuthi kufuze asilibalele kodwana ukwenza ngombana uyasithanda. Nasizizwa sidanile namkha sizizwa singafaneleki ukulitjalelwa nguJehova, kufuze sikhumbule ukuthi uJehova usiphe isihlengo nasitjhugulukako ezonweni zethu.—Funda uLukasi 5:32; neyoku-1 kaThimothi 1:15.

5. Kghani uJehova ukatelelekile bona asitjengise umusa? Hlathulula.

⁵ Akunamuntu okufuze azizwe anelungelo lokufumana umusa kaJehova, ngitjho nanyana angamlotjha iminyaka eminengi. Liqiniso ukuthi kuyamthabisa uJehova ukusibona simlotjha ngokuthembeka. (Heb. 6:10) Usiphe iNdodanakhe njengesipho sasimahla, ingasi ukuthi uyasibhadela ngebanga lokuthi siyamlotjha. Yeke akukalungi ukucabanga ukuthi uJehova kufuze asilibalele ngebanga lezinto esimenzela zona. Nange sikholelwa lokho kutjho ukuthi sicabanga bona asisitlhogi isihlengo.—Madanisa nekwebeGalatiya 2:21.

6. Kubayini uPowula asebenzela uJehova budisi?

⁶ UPowula bekazi ukuthi nanyana angasebenzela uZimu, uJehova bekangakakateleleki bona amlibalele. Kubayini-ke asebenzela uJehova budisi? Ngombana bekafuna ukutjengisa ukuthi uyathokoza ngokuthi uJehova unomusa. (Efe. 3:7) NjengoPowula siragela phambili sisebenza budisi, ingasi ngoba sifuna umusa kaJehova kodwana ngebanga lokutjengisa ukuthi sithokoza khulu ngawo.

7. Umhlatjelo wesihlengo usizuzisa njani namhlanjesi? (Roma 5:1; Jakopo 2:23)

⁷ Enye indlela isihlengo esisizuzisa ngayo kukuthi sikghona ukuba nobuhlobo obutjhideleneko noJehova. a Njengombana sifundile esihlokweni esidlulileko, ukuthi akhenge sibelethwe sinobuhlobo noZimu. Ngebanga lesihlengo sikghona ukuthabela “ukuthula noZimu” begodu sikghona ukutjhidelana naye.—Funda kwebeRoma 5:1; noJakopo 2:23.

8. Kubayini kufuze sithokoze uJehova ngelungelo lokuthandaza?

⁸ Ukuthandaza kuJehova yinto eqakatheke khulu esingayenza bona sitjhidelane naye. UJehova akalaleli kwaphela imithandazo yesifundweni namkha ethandazwa ngokuzwakalako, uzwa nemithandazwethu yangemsithelweni yomuntu ngamunye. Ukuthandaza kusenza sehlise umoya singatshwenyeki khulu. Kodwana asizuzi lokho kwaphela nasithandazako. Kunalokho umthandazo ungaqinisa ubuhlobo bethu noZimu. (Rhu. 65:2; Jak. 4:8; 1 Jwa. 5:14) Nakasephasini uJesu bekathandaza qobe ngombana bekazi ukuthi uJehova bekamlalele, umthandazo loyo bewumtjhideza kuBabakhe. (Luk. 5:16) Sithokoza khulu ukuthi ngomhlatjelo kaJesu, sikghona ukuba bangani bakaJehova besikhulume naye ngomthandazo.

 SINENGOMUSO ELIHLE NGEBANGA LESIHLENGO

9. Abantu abathembekileko bazokufumanani esikhathini esizako ngebanga lesihlengo?

⁹ Abantu abathembekileko abalotjha uJehova bazokufumanani esikhathini esizako ngebanga lesihlengo? Bazokufumana ukuphila okungapheliko. Abantu abanengi bacabanga ukuthi angekhe kwakghoneka ngabantu bona baphile bangahlongakali. Kodwana loyo bekumnqopho kaJehova kusukela ekuthomeni ukuthi abantu baphile ngokungapheliko. Ngathana u-Adamu akhenge enze isono woke umuntu bekazokuphila ngokungapheliko. Ngitjho nanyana kungaba budisi nje ukucabanga ukuthi singaphila ngokungapheliko, singakukholelwa lokho ngombana uJehova ubhadele inani eliphezulu okukuphila kweNdodanakhe ebelethwe yodwa ukwenzela bona siphile ngokungapheliko.—Rom. 8:32.

10. Abazesiweko nalaba bezinye izimvu khuyini abaqale phambili kiyo?

¹⁰ Nanyana sizokufumana ukuphila okungapheliko esikhathini esizako, uJehova ufuna sicabange ngalokho nje. Abazesiweko baqale phambili emnqophwenabo wokuphila ezulwini babuse iphasi noKrestu. (IsAm. 20:6) Ezinye izimvu zizokuphila ephasini ngaphandle kokuzwa ubuhlungu namkha ukulila. (IsAm. 21:​3, 4) Kghani ungomunye wezinye izimvu ezinethemba lokuphila ephasini ngokungapheliko? Loyo akusimvuzo omncani nawumadaniswa newokuphila ezulwini. Kusukela ekuthomeni umnqopho kaJehova nakabumba abantu bekukuthi baphile ngokungapheliko. Ukuphila ephasini kuzosenza sithabe khulu.

11-12. Ngiziphi ezinye iimbusiso esingaqala phambili kizo ePharadesi? (Qala neenthombe.)

¹¹ Cabanga ukuthi ukuphila kuzokuba njani ephasini ePharadesi. Angekhe utshwenyeke ngokugula namkha ukufa. (Isa. 25:8; 33:24) UJehova uzokunikela koke okuhle okufunako. Khuyini ongathanda ukufunda ngayo ephasini elitjha? Kghani ziinlwana, umbhino namkha ukudweba? Siyaqiniseka ukuthi epharadesini kuzokuba nabantu abazokutlama  bebakhe izindlu, abazokulima nabazokulungisa ukudla. Kuzokuba nabazokwenza amathulusi wokusebenza, abazokutjala bebatlhogomele isimu. (Isa. 35:1; 65:21) Ngebanga lokuthi sizokuphila ngokungapheliko, sizokuba nesikhathi esinengi sokwenza izintwezi nokwenza okunengi.

¹² Kuzokuba lithabo ukwamukela abavusiweko. (IzE. 24:15) Cabanga ukuthi kuzokuba lithabo kangangani ukufunda okungeziweko ngoJehova nangezinto azidalileko. (Rhu. 104:24; Isa. 11:9) Okumnandi khulu, kuthabela ukufunda okunengi ngoJehova singanasono kungatlhogeki sibawe bona asilibalele. Kghani uzokuphundwa zizintwezi ezihle ngebanga ‘lokuthatjiswa sisono kwesikhatjhana’? (Heb. 11:25) Awa angekhe! Iimbusiswezi esizozifumana zingcono khulu kunanyana yini esingayifumana ephasineli. Khumbula ukuthi ipharadesi elisephasini angekhe lihlale liyinto ezokwenzeka ngengomuso. Kodwana ngokukhamba kwesikhathi, kuzokuba kuphila esikuphilako. Zoke izintwezi bengekhe zenzeka ngathana uJehova akhenge asithande, asinikele isipho esiyiNdodanakhe.

THOKOZA NGETHANDO LAKAJEHOVA

13. Khuyini esingayenza ukutjengisa ukuthi siyalithokoza ithando lakaJehova? (2 Korinte 6:1)

¹³ Khuyini engatjengisa ukuthi siyathokoza ngesihlengo uJehova asiphe sona? Ngokwenza isiqinisekiso sokuthi ukumlotjha kuza qangi ekuphileni kwethu. (Mat. 6:33) Ngaphezu kwakho koke uJesu “wafela boke bona labo abaphilako bangasaziphileli kodwana baphilele loyo owabafelako begodu wavuswa.” (2 Kor. 5:15) UJehova unomusa kithi begodu wasilibabela. Ngokwenza koke esingakwenza bona simlotjhe sitjengisa ukuthi siyakuzwisisa koke asenzele khona begodu sithokoza khulu.—Funda yesi-2 kwebeKorinte 6:1.

14. Singakholelwa njani esinqophisweni sakaJehova?

¹⁴ Singatjengisa ukuthi siyathokoza ngethando lakaJehova ngokuba nokukholwa nangokulalela isinqophiso sakhe. Njani? Nakufuze sithathe iinqunto ezinjengokuthi kufuze siyithuthukise kangangani ifundwethu namkha msebenzi onjani ekufuze siwukhethe. Kufuze sicabange ukuthi uJehova ufuna ukuthi senzeni. (1 Kor. 10:31; 2 Kor. 5:7) Nasithatha iinqunto sidzimelelise ukukholwa kwethu kuJehova, ukukholelwa kwethu kuye nobuhlobo bethu naye buyaqina. Ithemba lethu lokuphila ngokungapheliko liba ngelamambala.—Rom. 5:​3-5; Jak. 2:​21, 22.

15. Singatjengisa njani ukuthi siyamthokoza ngesikhathi sesiKhumbuzo?

¹⁵ Kusesenokhunye okunengi esingakwenza ukutjengisa ukuthi siyathokoza ngethando lakaJehova. Ngokusebenzisa isikhathi sesiKhumbuzo ukutjengisa ukuthi simthokoza kangangani uJehova ngesihlengo. Ukungezelela ekuhleleni ukuthi sibe khona esiKhumbuzweni kukuthi simeme nabanye  bona babe khona. (1 Thim. 2:4) Hlathululela abantu obamemako ukuthi kwenzekani esiKhumbuzweni. Kuzokuba lisizo ukubabukelisa ividiyo ethi, Kubayini UJesu Afa? nethi, Khumbula Ukufa KwakaJesu? Abadala kufuze baqiniseke ukuthi bamema nalabo abangasezi esifundweni. Cabanga ngethabo elizokuba khona ezulwini nephasini, nange imvu kaJehova elahlekileko ifuna ukubuyela kuye. (Luk. 15:​4-7) EsiKhumbuzweni kufuze singalotjhisi abafowethu nabodadwethu kwaphela kodwana silotjhise nalabo abavakatjhileko namkha esele banesikhathi bangezi esifundweni. Sifuna boke bazizwe bamukelekile.—Rom. 12:13.

16. Kubayini kufuze sicabangele ukwenza okungeziweko ngesikhathi sesiKhumbuzo?

¹⁶ Kghani ungenza okungeziweko ekusebenzeleni uJehova ngeemveke ezingaphambi nezingemva kwesiKhumbuzo? Ukwenza njalo kutjengisa ukuthokoza ngalokho uJehova noJesu abasenzele khona. Nasiragela phambili nokwenza okungeziweko sizokubona isekelo lakaJehova, lokho kuzosenza bona simthembe khulu. (1 Kor. 3:9) Qiniseka nangokuthi ukhambisana nokufundwa kweBhayibheli kwesiKhumbuzo okusencwajaneni ethi, Ukuhlolisisa Imitlolo Qobe Langa namkha itjhadi elifumaneka encwajaneni yepilo nomsebenzi wobukrestu. Ungakhetha ukusebenzisa amanye wamavesi lawo bona ufunde ngawo esifundweni sakho somuntu mathupha.

17. Khuyini ethabisa uJehova? (Funda ibhoksi elithi, “ Indlela Yokuthokoza Ithando LakaJehova.”)

¹⁷ Ngebanga lobujamo bakho, kungenzeka ungakghoni ukwenzela uJehova okungeziweko. Khumbula ukuthi uJehova akakumadanisi nabanye begodu uyathokoza ngethando onalo ngaye. Uthatjiswa yindlela omthanda ngayo. Uyathaba nakabona indlela othokoza ngayo ngesipho sesihlengo akuphe sona.—1 Sam. 16:7; Mar. 12:​41-44.

18. Kubayini sithokoza uJehova noJesu Krestu?

¹⁸ Ngebanga lesihlengo sikghona ukulitjalelwa izono zethu, ukuba bangani bakaJehova begodu siba nethemba lokuphila ngokungapheliko. Kwanga singahlala sithokoza ngethando lakaJehova, elimenze wasipha iimbusiswezi. (1 Jwa. 4:19) Kwanga singatjengisa indlela esimthokoza ngayo uJesu owasithandako bewanikela ngokuphila kwakhe ngebanga lethu.—Jwa. 15:13.