1. Ngiliphi ibanga elenza uJehova wasinikela isipho somtjhado?

 UJEHOVA ‘nguZimu othabako,’ ufuna nathi sithabe. (1 Thim. 1:11) Usinikele izipho ezinengi bona sithabele ukuphila. (Jak. 1:17) Esinye sezipho asiphe zona mtjhado. Indoda nomfazi nabatjhadako, bafunga ukuthi bazokuthandana, bahloniphane bebaphathane kuhle. Indoda nomfazi nabahlala benza ngokwesifungo sabo bayathaba.—IzA. 5:18.

2. Injani imitjhado yanamhlanjesi?

² Okudanisako kukuthi abantu abanengi abatjhadileko namhlanjesi balibala iinthembiso abazenzako ngelanga labo lomtjhado. Ngebanga lalokho, abakathabi. Umbiko ovela ku-World Health Organization uveza ukuthi amadoda amanengi atlhorisa abomkawo ngokubabetha, ukukhuluma amagama ahlabako, nokungabaphathi kuhle. Indoda eyenza izintwezi ingaphatha umkayo kuhle phambi kwabantu kodwana imphathe kumbi ngendlini. Amanye amadoda abukela zomseme begodu lokhu kwenza umfazi azizwe angathandwa begodu kuyamgandelela.

3. Khuyini eyenza amadoda angaphathi kuhle abafazi bawo?

³ Yini eyenza amanye amadoda ahlunguphaze abomkawo? Kungenzeka akhuliswa bobaba abanenturhu begodu nawo akubona kuyinto elungileko ukuba nenturhu. Amanye amadoda ngebanga lokuthi ahlala lapho kujayeleke khona ukuthi amadoda amanengi atlhorise abomkawo, lokho kwenza amadoda aphathe abomkawo kabuhlungu nangesandla esiqinileko ukwenzela bona bawahloniphe. Amanye amadoda khenge afundiswe ukulawula indlela azizwa ngayo, okuhlanganisa ukuba nelaka namkha ukukwata. Amanye amadoda abukela zomseme lokho kuwenza angaqali  abafazi nokuya emabhayini ngendlela efaneleko. Ukungezelela kilokho, izazi ezinengi zifumene ukuthi hlangana nesindabelaphi i-COVID-19, amadoda amanengi athoma ukutlhorisa abomkawo. Kuliqiniso ukuthi zoke izintwezi aziphi indoda ilungelo lokutlhorisa umkayo.

4. Khuyini amadoda amaKrestu ekufuze ayitjheje begodu kubayini?

⁴ Amadoda alotjha uJehova kufuze atjheje, angavumeli umbono ongakalungi ngabafazi osephasineli uwenze angahloniphi abafazi. a Kubayini? Kungebanga lokuthi indlela umuntu acabanga ngayo imenza aziphathe ngendlela ethileko. Umpostoli uPowula wayelelisa amaKrestu azesiweko weRoma wathi “nilise ukubunjwa liphaseli.” (Rom. 12:​1, 2) UPowula nakatlolela abantu beRoma, labo ebebasebandlenelo besele kusikhathi eside bamaKrestu. Nanyana kunjalo, amezwi kaPowula atjengisa ukuthi abanye ebandleni bebasabunjwa masiko nokucabanga kwephasi, kungebangelo abakhuthaza ukuthi batjhugulule indlela abacabanga nebenza ngayo. Iselulekwesi sisasebenza nemadodeni amaKrestu namhlanjesi. Okudanisako kukuthi amanye wawo abunjwe liphaseli begodu atlhorisa nabomkawo. b UJehova ulindele ukuthi indoda imphathe njani umkayo? Sifumana ipendulo emtlolweni wesihlokwesi.

5. Ngokweyoku-1 kaPitrosi 3:​7, indoda kufuze imphathe njani umkayo?

⁵ Funda yoku-1 kaPitrosi 3:7. UJehova uyala amadoda bona ahloniphe abomkawo. Indoda ehlonipha umkayo izomphatha ngendlela enomusa etjengisa ukuthi iyamthanda. Esihlokwenesi sizokucoca ngokuthi indoda ingamhlonipha njani umkayo. Kokuthoma, akhe sicoce ngendlela eyenza abafazi bazizwe bangathandwa begodu bangahlonitjhwa.

UNGENZI INTO EZOKUZWISA UMKAKHO UBUHLUNGU

6. UJehova uzizwa njani ngendoda ebetha umkayo? (Kolose 3:19)

⁶ Indoda akukafuzi ibethe umkayo. UJehova umhloyile umuntu onenturhu. (Rhu. 11:5) UJehova uwahloye khulu amadoda abetha abomkawo. (Mal. 2:16; funda kwebeKolose 3:19.) Umtlolo ekusekelwe kiwo isihlokwesi yoku-1 kaPitrosi 3:7 ithi, nange indoda ingamphathi kuhle umkayo, ilimaza ubuhlobo bayo noZimu. UJehova angeze ayilalele nemithandazwayo.

7. Ngokwebe-Efesu 4:​31, 32, yikulumo enjani amadoda ekufuze ayibalekele? (Funda “Ihlathululo Yamagama.”)

⁷ Indoda akukafuzi ikgharameje umkayo namkha ikhulume amezwi ahlabako. Amanye amadoda atlhorisa abomkawo ngokutjho amagama ahlabako, bewatjho nezinto ezibazwisa ubuhlungu. UJehova ukuhloye khulu ‘ukusilingeka, ilaka, ukuphudlhelana, nekulumo elimazako.’ c (Funda kwebe-Efesu 4:​31, 32.) Uzwa yoke into. UJehova unendaba khulu nendlela indoda ekhuluma ngayo nomkayo, ngitjho nanyana kunganamuntu obabonako. Indoda ekhuluma kumbi nomkayo ayimotjhi kwaphela umtjhadwayo kodwana imotjha nobuhlobo bayo noJehova.—Jak. 1:26.

8. UJehova uzizwa njani ngokubukela zomseme begodu kubayini?

⁸ Indoda akukafuzi ibukele zomseme. UJehova uzizwa njani ngokubukela zomseme? Ukuhloyile. Yeke indoda ebukela zomseme ilimaza  ubuhlobo bayo noJehova begodu itjengisa ukuthi ayimhloniphi umkayo. d UJehova ulindele indoda bona ihlale ithembekile kumkayo ingasi ngezenzo kwaphela kodwana nangalokho ekucabangako. UJesu wathi nanyana ngubani osolo aqale umfazi bekamkhanukele sekafebe naye “ngehlizwenakhe.” e—Mat. 5:​28, 29.

9. Kubayini uJehova angathandi lokha indoda nayikatelela umkayo ukuthi enze izinto ezimenza azizwe ahlunguphazwa nabahlanganyela amabhayi?

⁹ Indoda akukafuzi ikatelele umkayo ukuthi enze into angafuni ukuyenza namkha emenza azizwe ahlunguphazwa nabahlanganyela amabhayi. Indoda akukafuzi ikatelele umkayo bona enze izenzo zomsemse ezimenza azizwe ahlunguphazwa namkha ezitshwenya unembezakhe. UJehova uyihloye khulu indlela embi, enesihlungu nengacabangeliko efana nale. Ulindele ukuthi indoda ithande beyiphathe kuhle umkayo, ihloniphe nendlela azizwa ngayo. (Efe. 5:​28, 29) Kuthiwani nange indoda emKrestu ingaphathi kuhle, ibethe umkayo namkha ibukele zomseme? Indoda le ingakutjhugulula njani ukucabanga nezenzo zayo?

INDLELA INDODA ENGALISA NGAYO UKUZIPHATHA KUMBI

10. Amadoda angafundani esibonelweni sakaJesu?

¹⁰ Khuyini engasiza indoda bona ilise ukutlhorisa namkha ukuphatha umkayo ngendlela etjengisa ukuthi ayimhloniphi? Ingenza koke okusemandlenayo bona ilingise uJesu. Nanyana uJesu angakhenge atjhade, indlela ebekaphatha ngayo abalandeli bakhe ibeka isibonelo sokuthi amadoda kufuze abaphathe njani abafazi bawo. (Efe. 5:25) Ngokwesibonelo, cabanga ngalokho amadoda angakufunda endleleni uJesu ebekaphatha ngayo abapostoli bakhe nangendlela ebekakhuluma ngayo nabo.

11. UJesu bekabaphatha njani abapostoli bakhe?

¹¹ UJesu waphatha abafundi bakhe ngendlela enomusa nebanikela ihlonipho, akhenge abaphudlhele namkha abenze bazizwe bangahlonitjhwa. Nanyana uJesu bekanamandla ukudlula bona, akhenge asebenzise amandlakhe ukubenza bazizwe bangasililitho namkha bamsabe. Kunalokho bekunguye obekabenzela izinto. (Jwa. 13:​12-17) Wathi ebafundini bakhe: ‘Fundani kimi ngombana nginomoya ophasi nehliziyo ethobekileko, nizozifumanela ukuphumula.’ (Mat. 11:​28-30) Tjheja ukuthi uJesu bekanomoya ophasi. Umuntu onomoya ophasi akasisibaga. Kunalokho, amandlakhe asekutjengiseni ukuzibamba. Lokha nakunento emtshwenyako uba nomoya ophasi begodu alawule indlela azizwa ngayo.

12. UJesu bekakhuluma njani nabanye?

¹² UJesu wasebenzisa amezwakhe bona aduduze bekakhuthaze abanye. Akhenge akhulume amezwi ahlabako ebalandelini bakhe. (Luk. 8:​47, 48) Nanyana abantu bebamhlunguphaza bebamthuke, “akhenge abuyisele ngehlamba.” (1 Pit. 2:​21-23) Ngezinye iinkhathi, uJesu wakhetha ukuthula kunokuthi aphendule kabuhlungu. (Mat. 27:​12-14) Qala bona sibonelo esihle kangangani lesi emadodeni amaKrestu!

13. Njengombana kutjengiswe kuMatewu 19:​4-6, indoda ‘inganamathela kumkayo’ njani? (Qala nesithombe.)

¹³ UJesu wayala amadoda bona ahlale athembekile kibomkawo. Wadzubhula amezwi kaYise owathi indoda kufuze “inamathele kumkayo.” (Funda uMatewu 19:​4-6.) Ibizo lesiGirigi elisetjenziswe lapha elithi ‘ukunamathela’ lingatjho ‘ukunamathisela.’ Yeke isibopho somtjhado hlangana kwendoda nomfazi kufuze siqine kube ngasuthi banamathiselwe ndawonye. Nange omunye enza into ebuhlungu komunye umlingani bobabili bazokuzwa ubuhlungu. Indoda enamathela kumkayo izokubalekela  nanyana ngiliphi ihlelo lezomseme begodu msinyana izokwenza amehlwayo angaqali ‘okungasizi ngalitho.’ (Rhu. 119:37) NjengoJobho izozimisela ukungaqali nanyana ngimuphi umfazi ngendlela engakafaneli.—Job 31:1.

14. Ngimaphi amagadango indoda etlhorisa umkayo ekufuze iwathathe bona ilungise ubuhlobo bayo noJehova nomkayo?

¹⁴ Indoda ebetha umkayo namkha engakhulumisi kuhle umkayo kufuze ithathe amagadango afaneleko wokulungisa ubuhlobo bayo noJehova nomkayo. Ngimaphi amagadango lawo? Kokuthoma, kufuze ilemuke ukuthi inomraro begodu ayikho into efihlekileko kuJehova. (Rhu. 44:21; UMtj. 12:14; Heb. 4:13.) Kwesibili, kufuze ilise ukutlhorisa umkayo begodu itjhugulule indlela eziphatha ngayo. (IzA. 28:13) Kwesithathu, kufuze ibawe ukulitjalelwa kumkayo nakuJehova. (IzE. 3:19) Kufuze ibawe uJehova bona ayiphe isifiso sokutjhuguluka nesizo lokulawula indlela ecabanga, ekhuluma nenza ngayo izinto. (Rhu. 51:​10-12; 2 Kor. 10:5; Flp. 2:13) Kwesine, kufuze ifunde ukwenza ngokuvumelana nemithandazwayo ngokuzifundisa ukuhloya yoke imihlobo yenturhu okuhlanganisa ukulwa nekulumo engasiyihle. (Rhu. 97:10) Kwesihlanu, kufuze iyokubawa isizo kubadala bona bakghone ukuyisiza. (Jak. 5:​14-16) Kwesithandathu, izokuhlela ukuthi khuyini ezoyenza bona ibalekele ukuziphatha okunjalo esikhathini esizako. Indoda ebukela zomseme kufuze nayo ilandele amagadango afanako. UJehova uzoyibusisa imizamo indoda eyenzako yokutjhugulula indlela eziphatha ngayo. (Rhu. 37:5) Kodwana akukaneli bona indoda ilise ukwenza izinto ezilimaza umkayo, kufuze ifunde nokumhlonipha. Ingakwenza njani lokhu?

UNGAMHLONIPHA NJANI UMKAKHO?

15. Indoda ingatjengisa njani ukuthi iyamthanda umkayo?

¹⁵ Tjengisa umkakho ukuthi uyamthanda. Abafowethu abathabileko emtjhadwenabo benza izinto ezihle qobe langa ukutjengisa abomkabo ukuthi babathanda kangangani. (1 Jwa. 3:18) Indoda kufuze itjengise umkayo ukuthi iyamthanda ngitjho nangezinto ezincani njengokumbamba ngesandla namkha  ukumsingatha. Ingamthumela umlayezo imtjele ukuthi, “ngikukhumbulile” namkha imbuze ukuthi “likhamba njani ilanga lakho?” Ingakwenza umukghwa ukumtlolela ikarada imtjele ngendlela emthanda ngayo begodu ikhethe amezwi amnandi azomthabisa. Indoda nayenza izintwezi itjengisa ukuthi iyamthanda umkayo begodu iqinisa umtjhadwayo.

16. Kubayini indoda kufuze ibuke umkayo?

¹⁶ Tjela umkakho ukuthi uligugu kuwe. Indoda ehlonipha umkayo iyamqinisa begodu iyamkhuthaza. Enye indlela yokwenza lokhu kukhumbula ukumthokoza ngakho koke akwenzako bona ayisekele. (Kol. 3:15) Lokha indoda nayibuka umkayo, yenza ihliziywakhe ithabe. Uzizwa avikelekile, athandwa begodu ahlonitjhwa.—IzA. 31:28.

17. Indoda ingatjengisa njani ukuthi iyamhlonipha umkayo?

¹⁷ Yiba nomusa bewumhloniphe umkakho. Indoda ethanda umkayo iyamhlonipha begodu iyambuka. Imqala njengesipho esihle esivela kuJehova. (IzA. 18:22; 31:10) Ngebanga lalokho imphatha ngomusa nangehlonipho ngitjho nalokha naziza ekuhlanganyeleni amabhayi. Angekhe igandelele umkayo bona enze izinto ezizomenza azizwe angakatjhaphuluki, azizwe angasililitho namkha ezizokutshwenya unembezakhe. f Indoda ngokwayo angekhe yafuna ukwenza nanyana yini ezokutshwenya unembezayo nabahlanganyela amabhayi.—IzE. 24:16.

18. Khuyini amadoda ekufuze azimisele ukuyenza? (Funda ibhoksi elithi “ Iindlela Ezine Zokuba Yindoda Ehloniphako.”)

¹⁸ Madoda, ningaqiniseka bona uJehova uyathaba nakanibona nenza koke okusemandlenenu ukutjengisa abomkenu ukuthi niyabahlonipha kikho koke enikwenzako nenikutjhoko. Zimiseleni ukuhlonipha abomkenu ngokubalekela ukuziphatha okungabazwisa ubuhlungu, nibe nomusa nehlonipho nitjengise ukuthi niyabathanda. Ngokwenza njalo, nitjengisa ukuthi niyabathanda nokuthi nibaqala njengabaqakathekileko. Nawuhlonipha umkakho uzokuvikela ubuhlobo obuqakatheke khulu, ubuhlobo bakho noJehova.—Rhu. 25:14.