1. Ngisiphi isitjhijilo soke esiqalana naso?

 QOBE langa kufuze senze iinqunto, ezinye kubulula ukuzenza njengokuthi sizokudlani nokuthi sizokulala nini, ezinye zibudisi. Zingathinta ipilwethu, ithabo lethu, abantu esibathandako nendlela esilotjha ngayo uJehova. Sifuna iinqunto zethu zizuzise thina nemindenethu. Ngaphezu kwakho koke, sifuna iinqunto zethu zithabise uJehova.—Rom. 12:​1, 2.

2. Khuyini engasisiza senze iinqunto ezihlakaniphileko?

² Ungenza iinqunto ezihlakaniphileko, nange (1) ufumana imininingwana (2) ucabanga ukuthi uJehova uyiqala njani indaba ethileko, (3) ucabangisisa ngemiphumela engaba khona. Isihlokwesi sizokucoca ngezinto ezintathwezi ekufuze sizenze begodu sizosisiza sibone ukuthi singawabandula njani amandlethu wokuzwisisa nokuhlukanisa okuhle nokumbi.—IzA. 2:11.

FUMANA IMINININGWANA

3. Kubayini kutlhogeka ufumane imininingwana nawenza isiqunto? Fanekisa.

³ Nawuzakwenza isiqunto esihle, kufuze ufumane imininingwana efaneleko. Kubayini kuqakathekile lokho? Cabanga ngomuntu ogulako otjhinga kudorhodera. Kghani udorhodera angenza isiqunto ngaphambi kobana ahlolisise umuntu ogulako nokuthi ambuze imibuzo efaneleko? Awa, angeze enze njalo. Udorhodera owazi umsebenzakhe uzokwenza isiqunto esihle nange afumana imininingwana efaneleko malungana nokugula  okuphethe umuntu loyo. Nawe ngendlela efanako uzokufuna imininingwana efaneleko nawenza isiqunto. Ungakwenza njani lokho?

4. Ngokuvumelana nezAga 18:​13, khuyini ongayenza ukuqinisekisa ukuthi ufumana imininingwana efaneleko? (Qala nesithombe.)

⁴ Ungafumana imininingwana efaneleko ngokuthi ubuze imibuzo. Akhe sithi umenywe emnyanyeni othileko. Kghani uzokuya? Nange ungakamjayeli umuntu ohlele umnyanya loyo namkha ungazi bona khuyini ezokwenzeka lapho, kungatlhogeka ubuze imibuzo enjengokuthi, “Umnyanya lo uzokuba kuphi, nini, uzokuba mkhulu kangangani? Ngubani ozabe aqinisekisa bona yoke into ikhamba kuhle? Bobani abamenyiweko? Ngiziphi izinto ezizokwenziwa lapho? Kghani kuzokuba notjwala?” Iimpendulo zemibuzo le, zizokusiza wenze isiqunto esihlakaniphileko.—Funda izAga 18:13.

5. Ngemva kobana sele ufumene yoke imininingwana, khuyini ekufuze uyenze?

⁵ Nasele uyazi yoke imininingwana, cabangisisa ngobujamo sele buboke. Ngokwesibonelo, uzokwenzani nange ufumana ukuthi abanye abantu abazokuba semnyanyeni loyo abaphili ngeenkambisolawulo zakaJehova? Uzokwenzani nakunotjwala kodwana kunganamuntu ozokuqinisekisa bona abantu basela ngendlela efaneleko? Ucabanga bona umnyanya lo ungaba ngongalawulekiko? (1 Pit.  4:3) Ngakwelinye ihlangothi, kuthiwani nange umnyanya loyo uzokwenza bona ungabi khona esifundweni namkha esimini? Nasele ubone ubujamo buboke, uzokukghona ukwenza isiqunto esihlakaniphileko. Kodwana kunelinye igadango ekufuze ulithathe. Nasele wazi ukuthi ubujamo buzokuba njani, zibuze bona uJehova uzizwa njani ngalokho?—IzA. 2:6.

CABANGA UKUTHI UJEHOVA UZIZWA NJANI

6. NgokwakaJakopo 1:5 kubayini kufuze sibawe isizo lakaJehova?

⁶ Bawa uJehova akusize uzwisise indlela azizwa ngayo ngobujamo obuthileko. UJehova uthembisa ukusinikela ukuhlakanipha bona sikghone ukwenza isiqunto esizomthabisa. Unikela ukuhlakanipha okunjalo “ngomusa ngaphandle kokusola.”—Funda uJakopo 1:5.

7. Ungafumana njani ukuthi uJehova ucabanga njani ngendaba ethileko? Fanekisa.

⁷ Ngemva kokuthi uthandazele isinqophiso sakaJehova tjhejisisa indlela akuphendula ngayo. Akhe sithi ulahlekile endaweni ethileko, ungabawa umuntu ohlala lapho bona akusize. Kghani ungakhamba ngaphambi kobana akuphe iinqophiso zokuthi kufuze utjhinge kuphi? Awa angekhe, uzomlalelisisa. Ngendlela efanako, ngemva kokubawa ukuhlakanipha kuJehova, linga ukufumana indlela aphendula ngayo, ngokuthi uqalisise imithetho yeBhayibheli neenkambisolawulo ezizokusebenza ebujamweni oqalene nabo. Ngokwesibonelo,  nawuqunta ukuthi kghani uzokuya na emnyanyeni esikhulume ngawo, ungacabangisisa ngalokho iBhayibheli ekutjhoko ngeminyanya engalawulekiko, ukuzihlanganisa nabantu abambi nokuqakatheka kokubeka umBuso qangi ukudlula izinto esizithandako.—Mat. 6:33; Rom. 13:13; 1 Kor. 15:33.

8. Khuyini ongayenza nange ufuna isizo lokufumana imininingwana ezokusiza? (Qala nesithombe.)

⁸ Ngezinye iinkhathi ungatlhoga isizo lokufumana imininingwana oyitlhogako. Ungafumana isizo kumfowethu namkha udadwethu onelemuko. Nanyana kunjalo, ungazuza khulu nangokuzenzela irhubhululo. Kunemininingwana eminengi esinayo emathulusinethu wokurhubhulula, njengeThulusi Lokurhubhulula LaboFakazi bakaJehova NemiTlolo Yokuphila KwamaKrestu. Khumbula ukuthi umnqopho kukwenza isiqunto esizokuthabisa uJehova.

9. Singaqiniseka njani bona isiqunto esisenzako sizokuthabisa uJehova? (Efesu 5:17)

⁹ Singaqiniseka njani bona isiqunto esisenzako sizokuthabisa uJehova? Kokuthoma kufuze simazi kuhle. IBhayibheli lithi, “ilwazi loCwengeke Khulu likuzwisisa.” (IzA. 9:10) Ukwazi ubuntu bakaJehova, umnqophwakhe, akuthandako nakuhloyileko kukuzwisisa kwamambala. Zibuze, ‘Kilokho engikwaziko ngoJehova, kghani isiqunto engizosithatha sizomthabisa?’—Funda kwebe-Efesu 5:17.

10. Kubayini iinkambisolawulo eziseBhayibhelini ziqakatheke khulu ukudlula isiko lomndeni namkha lokho okwenziwa endaweni ohlala kiyo?

¹⁰ Ngezinye iinkhathi nasizakuthabisa uJehova, kufuze senze into ezokudanisa abantu esitjhidelene nabo. Ngokwesibonelo, ababelethi abafisela umntwanabo okuhle mhlamunye indodakazabo, bangafuna bona itjhade nomuntu ojame kuhle ngokweemali, ozokukghona ukubhadala amalobolo ngitjho nanyana umuntu loyo anganabuhlobo obuhle noJehova. Kuliqiniso, bafuna indodakazabo itlhogomeleke kuhle kodwana ngubani ozoyisiza iragele phambili iba nobuhlobo obuhle noJehova? UJehova uyiqala njani indaba enjalo? Sifumana ipendulo kuMatewu 6:33. Lapho uJesu, ubawa amaKrestu bona ‘aragele phambili afuna umBuso kaZimu qangi.’ Nanyana sihlonipha ababelethi bethu begodu sihlonipha nalabo abahlala emphakathini esikiwo, into eqakatheke khulu kithi, kuthabisa uJehova.

CABANGISISA NGESIQUNTO OFUNA UKUSENZA

11. Ngibuphi ubuntu ekukhulunywa ngabo kwebeFilipi 1:​9, 10 obungakusiza ucabangisise ngesiqunto ofuna ukusenza?

¹¹ Nasele ubone iinkambisolawulo zeBhayibheli ezimalungana nesiqunto ofuna ukusenza, kufuze uhlolisise imiphumela engaba khona. (Funda kwebeFilipi 1:​9, 10.) Ikghono lokuzwisisa lizokusiza ucabangisise ngomphumela ongaba khona esiquntweni osenzako. Ezinye iinqunto zingaba lula kodwana akusizo zoke ezinqophileko. Ukuzwisisa kuzokusiza wenze isiqunto esihlakaniphileko, ngitjho nebujamweni obungazwisiseki kuhle.

12-13. Ukuzwisisa kuzokusiza njani wenze iinqunto ezimalungana nomsebenzi?

¹² Cabanga nganakhu, ufuna umsebenzi bona ukghone ukutlhogomela umndenakho. Kunemisebenzi emibili ongakhetha kiyo. Uzokuhlolisisa yoke imininingwana, enjengokuthi msebenzi onjani, kuzokulindeleka bona usebenze amalanga ayingaki nesikhathi ozosikhamba ukuya emsebenzini nokhunye. Yomibili imisebenzi le ayiphikisani nalokho okusemiTlolweni. Kungenzeka ucabangisise ngomsebenzi ozokunikela umrholo omnengana. Kunokhunye godu ekufuze ucabange ngakho ngaphambi kobana wenze isiqunto.

¹³ Ngokwesibonelo, kghani eminye yemisebenzi le itjhayisana namalanga wokuya  kwakho esifundweni? Kghani ungathatha umsebenzi ozokuthathela isikhathi esinengi ukuthi usize umndenakho uzizwe uvikelekile, uthabile begodu utjhidelene noJehova? Ukuzibuza imibuzo le kuzokusiza ubeke ‘izinto eziqakathekileko’ okukulotjha uJehova nokutlhogomela umndenakho ngalokho okutlhogako, kunokuthi uthathe umsebenzi ozokubhadela imali enengi. Lokhu kuzokusiza wenze isiqunto uJehova azosibusisa.

14. Ukuzwisisa nokuba nethando kuzosisiza njani sibalekele ukukhuba abanye?

¹⁴ Ukuzwisisa kuzosenza sibone indlela iinqunto zethu ezingabathinta ngayo abanye abantu bona sibalekele ‘ukungawisi abanye.’ (Flp. 1:10) Lokhu kuqakathekile nasenza iinqunto ezithinta thina ngokwethu njengokumbatha nokuzilungisa. Ngokwesibonelo, singathanda indlela ethileko yokumbatha nokuzilungisa. Kodwana kuthiwani nange phakathi  ebandleni namkha ngaphandle kwebandla abanye kubakhube lokho? Ukuzwisisa kuzosisiza sihloniphe indlela abanye abazizwa ngayo. Ithando lizosenza sifune ukuzuzisa ‘omunye umuntu’ begodu simbathe ngokuhlonipheka. (1 Kor. 10:​23, 24, 32; 1 Thim. 2:​9, 10) Sizokwenza isiqunto esiveza ithando nehlonipho esinayo ngabanye abantu.

15. Khuyini ekufuze ucabange ngayo ngaphambi kobana wenze isiqunto?

¹⁵ Nange uzokwenza isiqunto esikhulu, cabanga ngokuthi khuyini ozoyitlhoga bona wenze isiquntweso. UJesu wathi ‘sibale iindleko.’ (Luk. 14:28) Yeke cabanga ngesikhathi, ngezinto ozozitlhoga, nangemizamo ekufuze uyenze ukuthi isiqunto osithathako siphumelele. Kesinye isikhathi, kungatlhogeka ukhulume namalunga womndenakho, uwatjele ukuthi ufuna akusekele njani isiqunto osenzileko nasizakuphumelela. Kubayini ukuhlela okunjalo kuqakathekile? Ngombana kungakusiza ulemuke ukuthi isiqunto ofuna ukusenza singatlhoga ulungise okuthileko namkha kungafuze ukhethe okhunye okuzokuba ngcono. Nawukhuluma namalunga womndenakho begodu ulalele nemibonwawo kuzokusiza bona asebenzisane nawe wenze isiqunto esizokuphemelela.—IzA. 15:22.

YENZA ISIQUNTO ESIZOKUPHUMELELA

16. Ngimaphi amagadango azokusiza wenze isiqunto esizokuphumelela? (Funda ibhoksi elithi “ Iindlela Ongenza Ngazo Iinqunto Ezihlakaniphileko.”)

¹⁶ Nange wenze zoke izinto okukhulunywe ngazo, ukulungele ukwenza isiqunto esihlakaniphileko. Ufumene imininingwana, wahlolisisa neenkambisolawulo ezizokusiza ukuthi wenze isiqunto esizokuthabisa uJehova. Nje ungabawa uJehova ukuthi akusize ngesiqunto osenzileko.

17. Khuyini ezokusiza wenze iinqunto ezihle?

¹⁷ Nanyana wenze iinqunto ezinengi ezaphumelelako, khumbula ukuthi into ezokusiza wenze iinqunto ezihle kungathembeli ekuhlakanipheni kwakho namkha kezinye iinqunto okhewazenza ezaphumelelako kodwana kuthembela ekuhlakanipheni kwakaJehova. Nguye kwaphela ozokunikela ilwazi lamambala, ukuzwisisa, nokuhlakanipha okuzizinto eziqakathekileko. (IzA. 2:​1-5) UJehova angakusiza wenze iinqunto ezizomthabisa.—Rhu. 23:​2, 3.