1-2. Kwenzekani ngabafundi bakaJesu ababili njengombana bebatjhinga e-Emawusi?

 NGONISANI 16, 33 C.E abafundi bakaJesu badanile begodu bathukiwe. Ababili basuka eJerusalema baya e-Emawusi, edorobheni elimakhilomitha ali-11 nawusuka eJerusalema. Amadoda la ezwa ubuhlungu njengombana uJesu, indoda ebekayilandela ibulalwa. Bekanethemba lokuthi uMesiya uzokwenzela amaJuda izinto ezihle kodwana nje uhlongakele. Kuthi kusesenjalo, kwenzeka into engakalindeleki.

² Kwavela indoda abangayaziko yakhamba nawo. Abafundi bakaJesu batjho indlela abadane ngayo ngalokho okwenzeke kuJesu. Kuthi kusesenjalo, indoda le ithome ukukhuluma nabo ngezinto amadoda la angekhe azilibale. “Ithoma ngoMosi nangabo boke abaphorofidi” yahlathulula ukuthi kubayini bekufuze uMesiya atlhage begodu ahlongakale. Kuthi amadoda amathathu la nakafika e-Emmuas, indoda engaziwako le, yaziveza ukuthi nguJesu ovusiweko. Ungayicabanga indlela abafundi bakaJesu abathaba ngayo nababona ukuthi uMesiya uyaphila.—Luk. 24:​13-35.

3-4. Kwenzekani ngabafundi bakaJesu begodu khuyini esizoyifunda esihlokwenesi? (IzEnzo 1:3)

³ UJesu waziveza ebafundini bakhe iinkhathi ezinengi emalangenakhe wamaswaphela ama-40. (Funda izEnzo 1:3.) Ngesikhatheso, abafundi bakaJesu ebebathukiwe, banevalo, batjhugulula  indlela abazizwa ngayo, bathaba baba nesibindi njengamasotja anamandla, ukutjhumayela nokufundisa ngombuso. a

⁴ Singazuza ngokufunda ngesikhathi esithabisako sokuphila kwakaJesu. Esihlokwenesi, sizokufunda ngokuthi uJesu wasisebenzisa njani isikhathi sakhe (1) ukukhuthaza abalandeli bakhe, (2) ukudephisa indlela abazwisisa ngayo imitlolo (3) nokubabandula ukwenza imisebenzi engeziweko. Engcenyeni ngayinye sizokufunda ngokuthi singamlingisa njani uJesu.

KHUTHAZA ABANYE

5. Kubayini abalandeli bakaJesu bebatlhoga ukukhuthazwa?

⁵ Abafundi bakaJesu bebatlhoga isikhuthazo. Kubayini? Kungombana abanye batjhiya amakhaya, imindeni namabhizinisi bona balandele uJesu. (Mat. 19:27) Abanye bebangaphathwa kuhle emphakathini ngebanga lokukhetha ukuba bafundi bakaJesu. (Jwa. 9:22) Bazidela ngendlela le ngombana bebakholwa ukuthi uJesu nguMesiya othenjisiweko. (Mat. 16:16) UJesu nakabulawako, ithemba lawo latjhabalala begodu bebangazi ukuthi khuyini ekufuze bayenze.

6. Khuyini uJesu ayenzako ngemva kokuvuswa?

⁶ UJesu bekazwisisa ukuthi kungokwemvelo ukuthi abafundi bakhe badane ngebanga lokuthi uhlongakele begodu bekazi ukuthi ibanga elibenza badane akusikukuthi abanakho ukukholwa. Yeke, ngelanga avuswe ngalo, wathoma ukukhuthaza abangani bakhe. Ngokwesibonelo, waziveza kuMariya Marhdalina njengombana bekalila ethuneni lakhe. (Jwa. 20:​11, 16) Wabuye wabonakala ebafundini esikhulume ngabo ekuthomeni kwesihlokwesi. Waziveza nakumpostoli uPitrosi. (Luk. 24:34) Khuyini esiyifunda esibonelweni sakaJesu? Tjheja okwenzeka nakazibonakalisa kokuthoma.

7. Njengombana kutlolwe kuJwanisi 20:​11-16, khuyini uJesu abona uMariya ayenza ekuseni ngoNisani 16 begodu nakabona lokho wenzani? (Qala nesithombe.)

⁷ Funda uJwanisi 20:​11-16. Ekuseni ngoNisani 16 abanye abomma abathembekileko baya ethuneni lakaJesu. (Luk. 24:​1, 10) Akhesidzimelele kilokho okwenzeka kuMariya  Marhdalina. UMariya nakafika ethuneni wafumana kunganamuntu. Wagijima wayokutjela uPitrosi noJwanisi begodu wabalandela njengombana bagijimela ethuneni. Ngemva kokubona ukuthi ngambala akunamuntu ethuneni, amadoda la abuyela ekhaya, ingasi uMariya. Wahlala lapho, alila. Nanyana yena bekangaboni kodwana uJesu bekalapho. Wazibona iinyembezi zakamma othembekileko lo begodu lokho kwamthinta. Yeke wabonakala kuMariya ngemva kwalokho, wakhuluma naye, wamnikela umsebenzi oqakathekileko, ukuthi atjele abafowabo bona uvusiwe, lokho kwamkhuthaza khulu uMariya.—Jwa. 20:​17, 18.

8. Singamlingisa njani uJesu?

⁸ Singamlingisa njani uJesu? Singenza okunengi okukhuthaza abafowethu nabodadwethu bona baragele phambili balotjha uJehova nange nathi njengoJesu sitjheja okubagandelelako begodu sikhulume nabo ngomusa. Tjheja okwenzeka kudadwethu u-Jocelyn, udadwabo wahlongakala kabuhlungu engozini. Uthi, “Kwaphela iinyanga ezinengi ngigandelelekile.” Nanyana kunjalo, umfowethu nomkakhe bamumema emzinabo bamlalela ngomusa, bamqinisekisa ngendlela uJehova amthanda ngayo. U-Jocelyn uthi, “Ngazizwa ngasuthi uJehova bekabasebenzisa bona bangidose esiwuruwurwini esinzima elwandle, bangifake ngemkhunjini. Bavuselela isifiso sami sokuragela phambili ngilotjha uJehova ngokuthembeka.” Nathi singabakhuthaza abanye, ngokuthi sibalalelisise nabasithululela iinhliziyo zabo, sikhulume nabo ngomusa, ngehloso yokubakhuthaza bona baragele phambili balotjha uZimu.—Rom. 12:15.

BASIZE BAZWISISE ILIZWI LAKAZIMU

9. Ngiziphi iintjhijilo abafundi bakaJesu abaqalana nazo begodu uJesu wabasiza njani?

⁹ Abafundi bakaJesu balamukela iliZwi lakaZimu begodu bebalinga ngamandla ukulisebenzisa ekuphileni kwabo. (Jwa. 17:6) Nanyana kunjalo, ukubona uJesu ahlongakala njengesilelesi esigodweni sokuhlunguphazwa, akhenge kube bulula kibo. UJesu watjheja ukuthi ukuzaza kwabo bekungabangelwa kukuthi baneenhliziyo ezimbi, kodwana kwabangelwa kungazwisisi. (Luk. 9:​44, 45; Jwa. 20:9) Yeke wabafundisa ukuzwisisa imitlolo. Cabanga ukuthi wakwenza njani lokho ngesikhathi aziveza ebafundini bakhe ababili endleleni etjhinga e-Emawusi.

10. UJesu wabaqinisekisa njani abalandeli bakhe ukuthi unguMesiya? (Lukasi 24:​18-27)

¹⁰ Funda uLukasi 24:​18-27. Tjheja ukuthi uJesu akhenge atjele amadoda la khonokho ukuthi ungubani. Kunalokho wawabuza imibuzo. Kubayini? Kungenzeka kungebanga lokuthi bekafuna aveze akucabangako nokungeenhliziyweni zawo. Begodu kwaba njalo. Amtjela ukuthi bekalindele bona uJesu ahlenge u-Israyeli ekugandelelweni maRoma. Ngemva kokuthi aveze okuwatshwenyako, uJesu wasebenzisa imiTlolo ukusiza amadoda la azwisise ebekuzokwenzeka. b Ngobusukobo uJesu wasebenzisa isikhathi sakhe aqinisekisa abanye abafundi ngawo amaqiniso la. (Luk. 24:​33-48) Khuyini esingayifunda endabeni le?

11-12. (a) Ngiziphi iimfundo esizifunda endleleni uJesu ebekafundisa ngayo amaqiniso weBhayibheli? (Qala neenthombe.) (b) Umuntu obekafunda iBhayibheli no-Nortey wamsiza njani?

¹¹ Singamlingisa njani uJesu? Kokuthoma, nasifunda nabantu iBhayibheli, singabuza imibuzo ngehlonipho, imibuzo ezokwenza batjho abakucabangako nokungeenhliziyweni zabo. (IzA. 20:5) Nawuzwisisa indlela abazizwa ngayo, batjengise imitlolo enqophileko, abangayisebenzisa ebujamweni babo. Balekela ukubatjela ekufuze bakwenze, kunalokho basize  babone okutjhiwo mitlolo, babone nalokho bona ekufuze bakwenze nokuthi kufuze bazisebenzise njani iinkambisolawulo zeBhayibheli ekuphileni kwabo. Cabanga ngesibonelo sakamfowethu we-Ghana, u-Nortey.

¹² U-Nortey nakaneminyaka eli-16 wathoma ukufunda iBhayibheli. Kungasikade umndenakhe wathoma ukumtjhutjhisa. Khuyini eyamsiza waragela phambili afunda iBhayibheli? Umuntu ebekafunda naye iBhayibheli wasebenzisa uMatewu isahluko 10 ukuhlathulula ukuthi amaKrestu wamambala azokuhlunguphazwa. U-Nortey uthi, “Yeke nakuthoma ukuhlunguphazwa bengiqiniseka ukuthi ngifumene iqiniso.” Umuntu obekafunda naye iBhayibheli wabuye wamsiza ukucabanga ngoMatewu 10:16 otjengisa ukuthi kufuze sitjheje kodwana sihloniphe nasikhuluma ngeendaba eziphathelene nokukholwa kwethu. Ngemva kokuthi abhajadiswe, u-Nortey bekafuna ukuphayona kodwana uyise bekalindele bona aye eyunivesithi. Kunokobana amtjele ukuthi khuyini ekufuze ayenze, umuntu afunda naye iBhayibheli wambuza imibuzo ngemva kwalokho wamsiza bona acabange ngeenkambisolawulo zeBhayibheli. Waba yini umphumela? U-Nortey wakhetha ukungenela ikonzo yesikhathi esizeleko. Uyise wamqotha ekhaya. Alo u-Nortey wazizwa njani ngezinto ebezenzeka? Uthi, “Ngiyaqiniseka ukuthi ngenze isiqunto esihlakaniphileko.” Nathi nasisebenzisa isikhathi sethu ukusiza abantu bacabangisise ngemitlolo, sizobasiza babe maKrestu anzinzileko.—Efe. 3:​16-19.

SIZA AMADODA ABE ‘ZIZIPHO EZIBABANTU’

13. Khuyini uJesu ayenzako ukuqinisekisa bona umsebenzi kaYise uragela phambili wenziwa? (Efesu 4:8)

¹³ UJesu nakasephasini bekanendaba nokutlhogomela umsebenzi uYise amnikele wona. (Jwa. 17:4) UJesu bekangacabangi ukuthi ‘Nawufuna into yenzeke kuhle, zenzele wena yona.’ Hlangana nekonzwakhe yeminyaka emithathu nesiquntu, wabandula abanye ukwenza umsebenzi. Ngaphambi kobana abuyele ezulwini, uJesu wathemba abafundi bakhe ngomsebenzi wokutlhogomela izimvu eziligugu zakaJehova nokudosa phambili emsebenzini wokutjhumayela, kungenzeka abanye babo bebaneminyaka ematjhumi amabili . (Funda yebe-Efesu 4:8.) UJesu wawasebenzisa njani amalanga ama-40 wamaswaphela ukusiza amadoda azinikeleko athembekileko nasebenza  budisi la bona akghone ukuba ‘zizipho ezibabantu.’—study note kwebe-Efesu 4:8.

14. UJesu wabasiza njani abalandeli bakhe bathanda uZimu khulu emalangeni ama-40 wamaswaphela wokuphila kwakhe? (Qala nesithombe.)

¹⁴ UJesu wanikela abalandeli bakhe isiyalo ebebatlhoga ukusizwa nesizobasiza begodu lokho wakwenza ngendlela enomusa. Ngokwesibonelo, watjheja ukuthi abanye babo bebanomukghwa wokuzaza begodu wabakhalima ngomusa. (Luk. 24:​25-27; Jwa. 20:27) Ngokwesibonelo, watjheja ukuthi abanye abafundi bakhe bebangakholwa ukuthi uhlongakele wabe wavuswa. Yeke wabasiza bazi iqiniso ngokubanikela isiyalo. Wabuye wabatjela nokuthi badzimelele khulu ekutlhogomeleni abantu bakaJehova kunokuzenzela imali. (Jwa. 21:15) Wabakhumbuza nokuthi bangazimadanisi nabanye kilokhu abakwenzela uJehova. (Jwa. 21:​20-22) Wabuye walungisa nokucabanga okungakalungi malungana nomBuso begodu wabasiza badzimelela ekutjhumayeleni iindaba ezimnandi. (IzE. 1:​6-8) Khuyini abadala abangayifunda kuJesu?

15-16. (a) Ngiziphi iindlela abadala abangalingisa ngazo isibonelo sakaJesu? Hlathulula. (b) U-Patrick wazuza njani esiyalweni?

¹⁵ Abadala bangamlingisa njani uJesu? Kufuze babandule abafowethu kuhlanganise nalabo ababonakala babancani, balungele ukwenza imisebenzi engeziweko. c Abadala akukafuzi balindele amadoda la bona angenzi imitjhapho. Kufuze banikele isiyalo esinethando ukwenzela bona abafowethu abasese batjhaba bakwazi ukwenza imisebenzi babone ukuqakatheka kokuthobeka, ukuthembeka nokuzimisela ukusiza abanye.—1 Thim. 3:1; 2 Thim. 2:2; 1 Pit. 5:5.

¹⁶ Tjheja indlela umfowethu u-Patrick azuza ngayo esiyalweni. Nangisese mumuntu omutjha benginomukghwa wokukhuluma kabuhlungu nabantu, nginganamusa kabanye kuhlanganise nakibodade. Umdala othileko wabona ukuthi u-Patrick utlhoga ukwenza amatjhuguluko begodu wamnikela isiyalo esinqophileko  kodwana ngendlela enomusa. U-Patrick uthi, “Ngiyathokoza ngokuthi ngafumana isiyalwesi. Bengidana nangibona abafowethu bafumana izabelo ebengizifuna. Isiyalo umfowethu anginikela sona sangisiza ngabona itlhogeko yokuthobeka nangisiza abafowethu nabodadwethu kunokufuna isikhundla nezabelo ebandleni.” Waba yini umphumela? U-Patrick wabekwa njengomdala nakaneminyaka ema-23.—IzA. 27:9.

17. UJesu watjengisa njani ukuthi uyabathemba abalandeli bakhe?

¹⁷ UJesu wanikela abalandeli bakhe umsebenzi ingasi wokutjhumayela kwaphela kodwana nokufundisa. (Mat. 28:20.) Abalandeli bakaJesu kungenzeka bazizwa bangafaneleki ukwenza umsebenzi lo. Nanyana kunjalo, uJesu wabaqinisekisa ukuthi bebazokukghona ukuwenza begodu wabatjela lokho. UJesu wabatjengisa ukuthi uyabathemba ngokuthi atjho amezwi la: “Njengombana uBaba angithumile nami ngiyanithuma.”—Jwa. 20:21.

18. Abadala bangasilingisa njani isibonelo sakaJesu?

¹⁸ Abadala bangamlingisa njani uJesu? Abadala abanekghono bangabandula abanye bona batlhogomele eminye imisebenzi. (Flp. 2:​19-22) Ngokwesibonelo, abadala bangabiza abasesebatjha nakuhlwengiswa iWolo lomBuso nalokha nalilungiswako. Ngemva kokubanikela umsebenzi loyo, bangatjengisa indlela ababathemba ngayo ukuthi bazowenza ngokubabandula nokubathemba ngokuthi bazowenza ngendlela efaneleko. Umdala osesemutjha u-Matthew uthi uthokoza ngabadala abanelemuko, abambandula kuhle bona akghone ukwenza imisebenzi ngemva kwalokho bamthemba ngokuthi uzoyenza ngendlela efaneleko. Uthi, “Ngazuza ngokuqala imitjhapho engiyenzako njengengcenye yokufunda nokuthi bangisize ngithuthuke.” d

19. Khuyini ekufuze sizimisele ukuyenza?

¹⁹ UJesu wasebenzisa amalanga ama-40 wamaswaphela asephasini ukukhuthaza, ukufundisa nokubandula abanye. Kwanga singazimisela ukulandela isibonelo sakhe eduze. (1 Pit. 2:21) Uzosisiza senze njalo. Wasithembisa ukuthi, “Nginani imihla yoke bekube sekupheleni kwephasi.”—Mat. 28:20.