ISIHLOKO SAMA- 43
INGOMA 90 Asikhuthazaneni
Singakuhlula Njani Ukuzaza?
“Qinisekani ngazo zoke izinto.”—1 THES. 5:21.
OKUSESIHLOKWENESI
Sizokucoca ngokuthi khuyini ongayenza nawunokuzaza okungathinta indlela olotjha ngayo uJehova.
1-2. Ngikuphi ukuzaza abantu bakaJehova ababa nakho? (b) Sizokucoca ngani esihlokwenesi?
BOKE abantu ngasikhathi bayaba nakho ukuzaza. a Ngokwesibonelo, cabanga ngoFakazi kaJehova osese mutjha ozibuzako ukuthi uJehova uyamthanda na. Kungenzeka akaqiniseki ukuthi ufuna kwamambala ukubhajadiswa. Cabanga ngomfowethu owakhetha ukulotjha uJehova asese mutjha kunokobana akhethe ibizelo elizomenzela imali enengi ephasineli. Nakaqalana nomraro wezeemali ukuthi atlhogomele umndenakhe angazibuza imibuzo eminengi. Cabanga ngodade olupheleko ongasanamandla wokwenza afisa ukukwenza. Uzizwa adanile ngebanga lokuthi akasakghoni ukwenza lokhu ebekakghona ukukwenza ngaphambilini. Kwakhe kwaba nesikhathi lapha uzibuza imibuzo enjengokuthi, ‘Kghani uJehova unendaba nami? Kghani engikudelileko ngebanga lakaJehova kuyamthabisa? Kusese khona engingakwenzela uJehova?’
2 Nange silisa imibuzo enjenga le ingakaphendulwa, kungenzeka ithinte indlela esilotjha ngayo uJehova. Esihlokwenesi, sizokudzimelela eenkambiswenilawulo zeBhayibheli ezizosisiza nasizaza ukuthi (1) uJehova uyasithanda, (2) ukuthi iinqunto esizenze esikhathini esidlulileko bezihlakaniphile (3) namkha sisasebenziseka kuJehova.
SINGAKUHLULA NJANI UKUZAZA?
3. Ngiyiphi enye indlela esingahlula ngayo ukuzaza?
3 Enye yendlela esingahlula ngayo ukuzaza kufunda iliZwi lakaZimu ukufumana iimpendulo zemibuzo esinayo. Nasenza njalo, sizokuqinisa ukukholwa kwethu kuJehova nobungani bethu naye, sizokuqina besibe namathuba amahle wokuthi ‘sihlale siphapheme, sidzimelele ekukholweni.’—1 Kor. 16:13.
4. Khuyini engasenza ‘singaqiniseki ngazo zoke izinto’? (1 Thesalonika 5:21)
4 Funda yoku-1 kwebeThesalonika 5:21. Tjheja bona iBhayibheli lithi, “qinisekani ngazo zoke izinto.” Singakwenza njani lokho? Ngokuqinisekisa ukuthi esikukholelwako ngilokho iBhayibheli elikutjhoko. Ngokwesibonelo, cabanga ngomuntu omutjha ongaqiniseki ukuthi uJehova unendaba naye. Inga-kghani kufuze ase akholwe ukuthi lokho kuliqiniso? Awa, kufuze ‘aqiniseke ngazo zoke izinto’ ngokuthi afumane bona uJehova ucabanga ini ngendaba leyo.
5. UJehova uyiphendula njani imibuzwethu?
5 Njengombana sifunda iliZwi lakaZimu ‘sizwa’ uJehova akhuluma nathi. Kufuze senze okungaphezu kokufunda iBhayibheli nasifuna ukufumana iimpendulo zakaJehova zemibuzo esinayo. Kufuze sidzimelele eenhlokweni ezisithintako besenze irhubhululo eencwadini esizifumana ehlanganweni kaJehova. (IzA. 2:3-6) Kufuze sithandazele ukuthi uJehova asisize ngerhubhululo esilenzako ukufumana akucabangako ngemibuzo esinayo. Ngemva kwalokho singaqala iinkambisolawulo zeBhayibheli nelwazi elingasisiza ebujamweni esikibo. Singazuza nangokucabanga ngeendaba eziseBhayibhelini zabantu ekhebaqalana nobujamo esiqalene nabo.
6. Nasiya esifundweni, singasizeka njani sihlule ukuzaza?
6 UJehova ubuye akhulume nathi nasisesifundweni. Nasihlala siya esifundweni, singezwa okuthileko ekulumweni namkha ependulweni yomuntu kuphenduleke umbuzo esinawo. (IzA. 27:17) Njenganje akhesicoce ngokuthi singakuhlula njani ukuzaza.
NAWUZAZA UKUTHI UJEHOVA UYAKUTHANDA
7. Ngimiphi imibuzo esingazibuza yona?
7 Wakhe wazibuza, ‘Inga-kghani uJehova unendaba nami?’ Nange uzizwa ungakaqakatheki ungakubona kungekhe kwakghonakala ukuba mngani noMbumbi wezulu nephasi. IKosi uDavida nayo kungenzeka beyizizwa njalo. Beyicabanga ukuthi kuyamangalisa ukuthi uJehova ukghona ukubona abantu begodu abe nendaba nabo, wabe wabuza wathi: “Maye! Jehova, uyini umuntu bona ungamtjheja, indodana yomuntu ofako bona ungayitjheja?” (Rhu. 144:3) Singayifumanaphi ipendulo yombuzo lo?
8. Ngokweyoku-1 kaSamyela 16:6, 7, 10-12, khuyini uJehova ayibonako ebantwini?
8 EBhayibhelini sifunda ukuthi uJehova ubona nabantu abangabonakala bangakaqakatheki kabanye abantu. Ngokwesibonelo, uJehova wathumela uSamyela endlini kaJese ayokuzesa omunye wamadodanakhe bona abe yikosi yakwa-Israyeli. UJese wabiza amadodanakhe alikhomba, akhenge abize indodanakhe encani uDavida. b Kodwana uJehova bekakhethe uDavida. (Funda yoku-1 kaSamyela 16:6, 7, 10-12.) UJehova wabona uDavida njengombana anjalo bekazi ukuthi ulisokana elimthandako.
9. Kubayini singaqiniseka ukuthi uJehova uyasithanda? (Qala nesithombe.)
9 Cabanga ngeendlela ezitjengisa ukuthi uJehova uyakubona. Ukunikela iinyeleliso zobujamo oqalene nabo. (Rhu. 32:8) Ukwenza njani lokho nange angakwazi? (Rhu. 139:1) Nawulalela isiyeleliso sakaJehova begodu usibone sikusiza uzokuqiniseka ukuthi uJehova uyakuthanda. (1 Kron. 28:9; IzE. 17:26, 27) UJehova ubona koke okwenzako ukuthi umlalele begodu umlotjhe. Ubona ubuntu obuhle onabo begodu ufuna ukuba mnganakho. (Jor. 17:10) Kuzomthabisa khulu nange nawe ufuna ukuba mnganakhe.—1 Jwa. 4:19.
“Nawumfunako [uJehova], uzozenza afumaneke kuwe.”—1 Kron. 28:9 (Funda isigaba 9) c
KHUYINI ONGAYENZA NANGE UNGAQINISEKI UKUTHI WENZA IINQUNTO EZIHLE
10. Nasicabanga ngeenqunto esizenzileko esikhathi esidlulileko, ngimiphi imibuzo esingaba nayo?
10 Ngokukhamba kwesikhathi, abanye bangaqala emva bazibuze ukuthi benza iinqunto ezihlakaniphileko na. Kungenzeka baqunta ukulisa ibizelo elithembisako namkha ibhizinisi eraga kuhle bona basebenzele uJehova isikhathi esizeleko. Nje sele kudlule iminyaka eminengi kungenzeka babona abantu ababaziko abaragele phambili ngebizelo elithileko bathabela izinto eziphathekako. Ngebanga lalokho bangazibuza: ‘Inga-kghani iinqunto engizenzileko esikhathini esidlulileko bezizihle? Namkha inga-kghani bekufuze ngisebenze ngamandla ngibe nemali enengi?’
11. Khuyini ebeyitshwenya umtloli weRhubo 73?
11 Nawutshwenywa mibuzo enjalo cabanga ngendlela umtloli weRhubo 73 ebekazizwa ngayo. Wabona abantu abangalotjhi uJehova baphila kamnandi, baregile begodu babonakala banganamraro. (Rhu. 73:3-5, 12) Njengombana abaqalile abona ngasuthi koke kukhamba kuhle ngokuphila kwabo, wazizwa ngasuthi koke akwenzileko ukuthi alotjhe uJehova ukuphila kwakhe bekunganamsebenzi. ‘Bekatshwenyeke ilanga loke’ ngebanga lemicabango engakhiko le. (Rhu. 73:13, 14) Khuyini eyamsiza wahlula imicabango engakhiko le?
12. NgokweRhubo 73:16-18, umtloli wawurarulula njani umrarwakhe?
12 Funda iRhubo 73:16-18. Umrhubi watjhinga endaweni enokuthula yokulotjha uJehova. Kulapho akghona ukucabanga kuhle khona. Wazwisisa ukuthi ngitjho nanyana abanye bangabonakala ngasuthi baphila ukuphila okwanelisako kodwana bebanganalo ithemba lengomuso. Ngokwenza njalo wathola ukuthula njengombana azi ukuthi ukusebenzela uJehova bekusiqunto esihlakaniphe khulu. Umphumela walokho waba kukuthi wazimisela ukuragela phambili alotjha uJehova.—Rhu. 73:23-28.
13. Singakufumana njani ukuthula nange singaqiniseki ukuthi sithethe isiqunto esihle esikhathini esidlulileko? (Qala nesithombe.)
13 Nawe njengomrhubi ungakghona ukulwisana nemicabango engakhiko. Ungakwenza njani lokho? Cabanga ngalokho onakho kuhlanganise neminono yezulwini begodu kumadanise nemiphumela yalabo abafumana imiphumela yephaseli. Kungenzeka bathembele ngokupheleleko ekuphumeleleni kwabo epilweni le ngombana banganangomuso abaqale phambili kilo. Kodwana wena uJehova ukuthembisa okungaphezu kwalokho ongakghona ukukucabanga. (Rhu. 145:16) Cabanga ngalokhu: Kungenzeka kwamambala na ukuthi sazi bona ukuphila kwethu bekungaba njani nange sithethe isiqunto esithileko? Esiqiniseka ngakho ngilokhu: Abenza iinqunto ngebanga lethando abanalo ngoZimu nabomakhelwana babo akunalitho elihle elibalahlekelako.
Qala phambili eembusisweni uJehova azithembisileko (Funda isigaba 13) d
NAWUZAZA UKUTHI UJEHOVA ANGAKUSEBENZISA
14. Kubayini abanye bangaqiniseki begodu ngimiphi imibuzo engabatshwenya?
14 Abanye abantu bakaJehova balwisana nemiphumela yokuluphala, yepilo ebogabogako namkha barholophele. Lokho kungabenza bangaqiniseki ukuthi uJehova angabasebenzisa. Bangazibuza, ‘Kghani uJehova angangisebenzisa?’
15. Khuyini umtloli weRhubo 71 ebekaqiniseka ngayo?
15 Umtloli weRhubo 71 watshwenyeka ngento efanako. Watlola wathi: “Ungangilahli nasele ngiphelelwe mamandla.” (Rhu. 71:9, 18) Nanyana kunjalo, umrhubi waqiniseka ukuthi nakahlala alotjha uJehova uZimu ngokuthembeka uzokuhlala amnqophisa begodu amsekela. Njengombana umrhubi afunda, uJehova uthokoziswa ngilabo abalinga koke okusemandlenabo naphezu kokulinganiselwa.—Rhu. 37:23-25.
16. Abantu abalupheleko bangasebenziseka njani kuJehova? (IRhubo 92:12-15)
16 Bantu abalupheleko, qalani ubujamo benu ngendlela uJehova abuqala ngayo. UJehova anganisiza niragele phambili nimlotjha ngokuthembeka nanyana amandlenu anganivumeli ukuthi nenze ezinye izinto. (Funda iRhubo 92:12-15.) Kunokudzimelela kilokho eningasakghoni ukukwenza dzimelelani kilokho enikghona ukukwenza. Ngokwesibonelo, ningaqinisa abanye ngesibonelo senu sokuthembeka nangokubatjheja. Ningakhuluma ngendlela uJehova abenani iminyaka yoke le begodu nicoce ngethemba lenu lokuzaliseka kweenthembiso zakhe. Ningayithatheli phasi indlela imithandazwenu esuka ehliziyweni engabasiza ngayo abanye. (1 Pit. 3:12) Kunganandaba ukuthi ubujamo bethu bunjani, soke kukhona esingakunikela uJehova nabanye.
17. Kubayini kufuze sikubalekele ukuzimadanisa nabanye?
17 Nawuzizwa ugandelelekile ngebanga lokuthi awusakghoni ukwenza okungeziweko emsebenzini kaJehova qiniseka ukuthi uthabela nanyana yini okghona ukumenzela yona. Kungenzeka ufune ukumadanisa okghona ukukwenza nalokho abanye abakghona ukukwenza. Kubalekele lokho. Kubayini? UJehova akasimadanisi nabanye. (Gal. 6:4) Ngokwesibonelo, uMariya wanikela uJesu amafutha anuka kamnandi nabiza khulu. (Jwa. 12:3-5) Ngokuhlukileko, umhlolokazi otlhagileko wanikela ethempelini ngeempaparwana ezimbili zenani elincani. (Luk. 21:1-4) UJesu waqala iminikelo le njengetjengisa ukukholwa. UBabakhe, uJehova uthokozela nanyana yini esiyenzako ngebanga lokuthi siyamthanda, kunganandaba ukuthi yincani kangangani kuwe.
18. Khuyini engasisiza sihlule ukuzaza esinakho? (Funda ibhoksi elithi, “ IliZwi LakaJehova Lingakusiza Uhlule Ukuzaza.”)
18 Soke ngasikhathi siba nokuzaza njengombana sibonile, kodwana iliZwi lakaZimu elithembekileko iBhayibheli lingasisiza silwisane nakho. Yenza koke okusemandlenakho ukufumana iimpendulo zezinto ezikwenza uzaze nawenza njalo, uzokuba nesibindi kunokuthi ugandeleleke. UJehova unendaba nawe. Uyakuthabela lokho okudelako ngebanga lakhe begodu uzokuvuza ngakho. Qiniseka ukuthi uJehova uyabathanda bewunendaba nabo boke abamlotjha ngokuthembeka.
INGOMA 111 Amabanga Asenza Sithabe
a IHLATHULULO YAMAGAMA: Esihlokwenesi, sicoca ngokuzaza okungabangela ukungaqiniseki ukuthi uJehova uyasithanda namkha ngeenqunto ebesizenze kade ukuthi bezihlakaniphile. Lokhu akusikho ukuzaza iBhayibheli ethi kubangelwa kungabi nokukholwa kuJehova neenthembisweni zakhe.
b Ngitjho nanyana iBhayibheli lingasitjeli ngokunqophileko ukuthi uDavida bekanangakhi nakamkhethako, kungenzeka bekamumuntu osese mutjha.—Funda IsiThala sakaSeptemba 1, 2011, k. 29, isig. 2.
