1. Ngiziphi ezinye izinto uJesu asenzele zona?

 AKUKHO namunye okhe wenza izinto ezinengi ukusiza abantu ukudlula uJesu. Nakasephasini, esikhathini esinengi bekasiza abantu ngokwenza imikarisomraro. (Luk. 9:​12-17) Wanikela ngesipho esikhulu khulu ngokuthi anikele ngokuphila kwakhe ngebanga lethu. (Jwa. 15:13) Kusukela ngesikhathi avuswa ngaso, uJesu waragela phambili asisiza. Njengombana athembisa, wabawa uJehova bona athululele umoya ocwengileko ukusifundisa nokusiduduza. (Jwa. 14:​16, 17, ftn.; 16:13) Ngemihlanganwethu yebandla, uJesu usinikela lokho esikutlhogako ukuthi sifundise abantu ephasini loke ngeBhayibheli besenze abafundi.—Mat. 28:​18-20.

2. Ngiziphi ‘izipho ezibabantu’ ekukhulunywa ngazo kwebe-Efesu. 4:​7, 8?

² Kunesinye isipho uJesu asiphe sona. Umpostoli uPowula watlola ukuthi, ngemva kokuthi uJesu aye ezulwini “waphana ngezipho ezibabantu.” (Funda kwebe-Efesu 4:​7, 8.) UPowula wahlathulula ukuthi uJehova wanikela ngeziphwezi bona akghone ukusekela ibandla ngeendlela ezihlukahlukeneko. (Efe. 1:​22, 23; 4:​11-13) Namhlanjesi ‘izipho ezibabantu’ ziinceku ezisizako, abadala bebandla nababonisi besigodi. a Amadoda la, anesono begodu ayayenza imitjhapho. (Jak. 3:2) Nanyana kunjalo, iKosethu uJesu Krestu iyawasebenzisa ukuthi asisize. Azizipho ezivela kuye.

3. Fanekisa ukuthi singasekela njani umsebenzi ‘wezipho ezibabantu.’

³ UJesu unikele ‘izipho ezibabantu’ umsebenzi oqakatheke  khulu, wokuqinisa ibandla. (Efe. 4:12) Nanyana kunjalo, soke singakghona ukusiza njengombana benza umsebenzi oqakathekileko lo. Singamadanisa lokho nokwakha iWolo lomBuso. Abanye basekela ngokwakha, abanye bapheke ukudla, besebenze ngeenthuthi nangeminye imisebenzi. Ngendlela efanako, nathi singasekela iinceku ezisizako, abadala bebandla nababonisi besigodi ngalokho esikutjhoko nesikwenzako. Akhesicoce ngokuthi sizuza njani emsebenzini obudisi abawenzako begodu sitjengisa njani ukuthi siyabathokoza, sithokoza noJesu ngokusinikela ‘izipho ezibabantu.’

IINCEKU EZISIZAKO ZINIKELA “IMISEBENZI YAMANDLA”

4. Ngimiphi eminye “imisebenzi yamandla” ebeyenziwa ziinceku ezisizako ngekhulu lokuthoma?

⁴ Ekhulwini lokuthoma abanye abafowethu babekwa njengeenceku ezisizako. (1 Thim. 3:8) Kubonakala ngasuthi ngilabo ebebenza “imisebenzi yamandla” uPowula atlola ngayo. (1 Kor. 12:28) Iinceku ezisizako kubonakala ngasuthi bezenza umsebenzi omnengi oqakathekileko nomsebenzi wezandla, ukwenzela bona abadala badzimelele ekufundiseni nekuluseni ibandla. Ngokwesibonelo, iinceku ezisizako kungenzeka zasiza ekwenzeni amakhophi wemiTlolo namkha zithenge izinto ezitlhogekako zokukopulula.

5. Ngimiphi eminye imisebenzi eqakathekileko elisizo eyenziwa ziinceku ezisizako namhlanjesi?

⁵ Cabanga ngeminye yemisebenzi eqakathekileko eyenziwa ziinceku ezisizako ebandleni lakho. (1 Pit. 4:10) Kungenzeka zinikelwe umsebenzi wokutlhogomela zeemali ebandleni namkha zesimini, zifake nama-oda weencwadi zebandla. Zisebenze ngezemidumo, amavidiyo, zitlhogomele abaqeda ukufika eWolweni, zibale abantu bezisize ekutlhogomeleni iWolo lomBuso. Koke lokho msebenzi oqakatheke khulu, kwenza kukghoneke bona ibandla lithabele imihlangano begodu nomsebenzi wokutjhumayela wenzeke ngendlela ehlelekileko. (1 Kor. 14:40) Ukungezelela kilokho, izinye iinceku ezisizako ziba nengcenye emhlanganweni Wepilo Nomsebenzi bezinikele neenkulumo. Inceku esizako ingabelwa bona isize nomtlhogomeli wesiqhema. Ngezinye iinkhathi iinceku ezisizako ezifanelekako, ziba khona abadala nabenza ukukhambela kokwelusa.

6. Ngimaphi amanye amabanga asenza sithokoze khulu ngokusebenza budisi kweenceku ezisizako?

⁶ Umsebenzi owenziwa ziinceku ezisizako ulizuzisa njani ibandla? U-Beberly b udadwethu we-Bolivia uthi, “Sizithokoza khulu iinceku ezisizako ngombana ngikghona ukuthabela imihlangano ngokuzeleko.” “Ngebanga lemisebenzazo ngikghona ukucula, nginikele ngeempendulo, ngilalele iinkulumo bengifunde emavidiyweni neenthombeni. Zenza isiqinisekiso sokuthi siphephile” begodu zitjheja nalabo abathungelele nge-Zoom. Ngemva kwesifundo zidosa phambili ekuhlwengiseni, zisize ngezeemali, zenze isiqinisekiso sokuthi sifumana iincwadi esizitlhogako. Ngizithokoza khulu.” U-Leslie ohlala e-Colombia indodakwakhe engumdala uthi, “Indodami ithembele eencekwini ezisizako bona zitlhogomele izabelo ezinengana. Ngaphandle kwazo, beyizokuba majadu khulu ukudlula indlela esimajadu ngayo nje. Ngithokoza khulu ngokukhuthala kwazo nokuzimisela kwazo ukusiza.” Akunakuzaza ukuthi lokhu kuveza nendlela nawe ozizwa ngayo.—1 Thim. 3:13.

7. Singatjengisa njani ukuthi siyazithokoza iinceku ezisizako? (Qala nesithombe.)

⁷ Nanyana singazizwa sithokoza ngeenceku ezisizako, iBhayibheli lisikhuthaza ukuthi ‘sihlale sithokoza.’ (Kol. 3:15) U-Krzysztof  umdala we-Finland utjengisa ukuthokoza kwakhe ngendlela le, uthi, “Ngithumela ikarada namkha umlayezo, ngidzubhule umtlolo, ngiveze nendlela enqophileko inceku esizako engikhuthaze ngayo namkha ukuthi kubayini ngithokoza khulu ngomsebenzayo.” U-Pascal no-Jael abahlala e-New Caledonia, bathandazela ngokunqophileko iinceku ezisizako. U-Pascal uhlathulula uthi, “Mvanje sithandazela iinceku ezisizako khulu, sithokoza uJehova ngazo besimbawa ukuthi abe nazo, azisize.” UJehova uyayizwa imithandazo enjengale begodu ibandla liloke liyazuza.—2 Kor. 1:11.

ABADALA BEBANDLA ‘BASEBENZA BUDISI’

8. Kubayini uPowula athi abadala bekhulu lokuthoma ‘basebenza budisi’? (1 Thesalonika 5:​12, 13)

⁸ Abadala bangekhulu lokuthoma bebasebenza budisi ebandleni. (Funda yoku-1 kwebeThesalonika 5:​12, 13; 1 Thim. 5:17) Bebadosa phambili ebandleni ngokuraga imihlangano benze iinqunto ezimalungana nebandla bebabuye godu banikele abafowabo nabodadwabo isiyalo esinethando ukuthi bahlale baqinile ekukholweni kwabo. (1 Thes. 2:​11, 12; 2 Thim. 4:2) Iye amadoda la, asebenza budisi khulu ngokutlhogomela imindenawo begodu aqinise nobuhlobo bawo noZimu.—1 Thim. 3:​2, 4; Tit. 1:​6-9.

9. Ngimiphi eminye imisebenzi abadala abayenzako namhlanjesi?

⁹ Namhlanjesi abadala amajadu khulu. Babavangeli. (2 Thim. 4:5) Bakhuthele esimini, bahlela umsebenzi wokutjhumayela eendaweni ekufuze kutjhunyayelwe kizo begodu bayasibandula ukuthi sitjhumayele besifundise ngendlela ethinta ihliziyo. Baba bahluleli abangakhethiko nabanomusa. Lokha umKrestu nakenza isono esikhulu, abadala balwela ukumsiza ukuthi alungise ubuhlobo bakhe noJehova, ngesikhathi esifanako bayatjheja ukuthi benza ibandla lihlale lihlwengile. (1 Kor. 5:​12, 13; Gal. 6:1) Abadala abanengi babelusi. (1 Pit. 5:​1-3) Banikela ngeenkulumo ezisekelwe emiTlolweni, ezilungiselelwe kuhle, balinga budisi ukwazi woke umuntu ebandleni bebenze nokukhambela kokwelusa. Abanye abadala basiza ekwakhiweni kwamaWolo womBuso nekuwatlhogomeleni, ekulungiseleleni imihlangano nekusebenzeni eKomidini yokuThintana neembhedlela ne-Patient Visitation Groups ukungezelela kilokho, baba nezinye izabelo ekufuze bazenze. Kwamambala abadala basebenza budisi khulu ukuthi basisize!

10. Ngimaphi amanye amabanga asenza sithokoze khulu ngokusebenza budisi kwabadala esinabo ebandleni?

¹⁰ UJehova wabikezela ukuthi abelusaba bazositlhogomela kuhle begodu ‘angekhe sasaba namkha sirhidlwe livalo.’ (Jor. 23:4) U-Johanna udadwethu we-Finland wabona ukuba liqiniso kwamezwi la, lokha unina nakaqalene nokugula okumasikizi. Uthi, “Nanyana bengikufumana kubudisi ukukhuluma nabanye ngendlela engizizwa ngayo, umdala ebengingamazi kuhle wangibekezelela, wathandaza nami, wangiqinisekisa ukuthi uJehova uyangithanda. Angikukhumbuli kuhle lokho akutjhoko kodwana ngiyakhumbula ukuthi ngazizwa ngivikelekile. Ngiyaqinisela ukuthi uJehova wamthumela kimi ukuthi angisize ngesikhathi esifaneleko.” Abadala bebandleni lakho, bakusiza njani?

11. Singatjengisa njani ukuthi siyabathokoza abadala? (Qala nesithombe.)

¹¹ UJehova ufuna sitjengise ukuthi sithokoza ngokusuka ehliziyweni ngabadala “ngebanga lomsebenzabo.” (1 Thes. 5:​12, 13) U-Henrietta ohlala e-Finland uthi, “Abadala basiza abanye ngokuzimisela kodwana lokho akutjho ukuthi banesikhathi namandla adlula wabanye namkha abanazo ezinye iintjhijilo ekuphileni kwabo. Ngezinye iinkhathi ngithi kibo, ‘yazi ukuthini, ungumdala olungileko  ngithemba ukuthi uyakwazi lokho.’” Udade ose-Türkiye c u-Sera uthi, “Abadala bayasitlhoga isikhuthazo bona baragele phambili benza umsebenzabo. Yeke, singabatlolela ikarada sibameme ukuthi bazokudla nathi namkha sibe nabo ekonzweni yesimini.” Inga-kghani kukhona umdala ngokunqophileko othokoza khulu ngomsebenzakhe obudisi awenzako ebandleni? Funa iindlela ongamtjengisa ngazo ukuthi uyamthokoza ngalokho akwenzako.—1 Kor. 16:18.

UKUKHUTHAZA ABABONISI BESIGODI

12. Ngisiphi esinye isiqhema uJehova asipha sona ukuqinisa ibandla? (1 Thesalonika 2:​7, 8)

¹² UKrestu uJesu wanikela ibandla ‘izipho ezibabantu’ ezisiza ibandla ngenye indlela. Wanqophisa abadala beJerusalema ukuthi bathumele uPowula, uBharinabhasi nabanye emsebenzini wokuvakatjhela amabandla. (IzE. 11:22) Kubayini? Ngebanga lokuthi benza umsebenzi ofana neweenceku ezisizako nabadala, baqinisa amabandla. (IzE. 15:​40, 41) Amadoda la, adele okunengi khulu ukuthi enze umsebenzi lo, ngezinye iinkhathi abeka ukuphila kwawo engozini, ukufundisa nokukhuthaza abanye.—Funda yoku-1 kwebeThesalonika 2:​7, 8.

13. Ngimiphi eminye imisebenzi umbonisi wesigodi anayo?

¹³ Ababonisi besigodi bakhamba amabanga amade begodu abahlali endaweni yinye. Abanye bakhamba amakhilomitha namkha ama-awara amanengi khulu ukuvakatjhela amanye amabandla. Qobe veke umbonisi wesigodi unikela ngeenkulumo ezimbalwa, aye ekukhambeleni kokwelusa bekarage nomhlangano wamaphayona, umhlangano wabadala nemihlangano yesimini. Ulungiselela iinkulumo, ahlele imihlangano yesigodi nemihlangano yesifunda, ufundisa esikolweni  samaphayona, alungiselele nomhlangano okhethekileko wamaphayona asesifundeni esithileko bekatlhogomele nokhunye okurhabekileko akufumana e-ofisini legatja.

14. Ngimaphi amanye amabanga asenza sithokoze khulu ngomsebenzi obudisi owenziwa babonisi besigodi?

¹⁴ Sizuza njani emsebenzini oligugu owenziwa babonisi besigodi? Nakakhuluma ngokuvakatjhelwa mbonisi wesigodi umfowethu we-Türkiye uthi, “Qobe nakavatjhile kungikhuthaza ukuthi ngibe nesikhathi esinengana sokusiza abafowethu nabodadwethu. Ngihlangene nababonisi besigodi abanengi kodwana akuna namunye wabo okhe wangenza ngazizwa ngasuthi umajadu khulu namkha akanamusa.” U-Johanna okukhulunywe ngaye ngaphambilini, bekasebenza nombonisi wesigodi esimini kodwana akhenge bafumane muntu endlini leyo. Uthi, “Ngizokuhlala ngilikhumbula ilangelo. Abodadwethu ababili bebaqeda ukufuduka, yeke bengibahlulukela khulu. Umbonisi wesigodi wangikhuthaza, wangisiza ngabona ukuthi emsebenzini kaJehova, ukuba kude komuntu yinto yesikhatjhana kodwana ephasini elitjha sizokuba namathuba amanengi wokuthi sibe ndawonye.” Abanengi bethu, sibe neenkhathi ezimnandi nababonisi besigodi.—IzE. 20:37–21:1.

15. (a) Ngokuvumelana neyesi-3 kaJwanisi 5-8 singatjengisa njani ukuthi siyabathokoza ababonisi besigodi? (Qala nesithombe.) (b) Kubayini kufuze sicabangele abafazi babafowethu abasebenza budisi ebandleni begodu singakwenza njani lokho? (Funda ibhoksi elithi, “ Khumbula Abafazi Babo.”)

¹⁵ Umpostoli uJwanisi wakhuthaza uGayusi ukuthi atjengise umoya wokwamukela iinkhambi kubafowethu abavakatjhileko begodu ‘abasize ngendlela ethabisa uZimu.’ (Funda yesi-3 kaJwanisi 5-8.) Enye indlela esingakwenza ngayo, kumema umbonisi wesigodi azokudla nathi. Okhunye esingakwenza kusekela esimini nakavakatjhileko.  U-Leslie, ekukhulunywe ngaye ngaphambilini utjengisa indlela athokoza ngayo ngezinye iindlela uthi, “Ngithandazela ukuthi uJehova abatlhogomele. Mina nendodami sibatlolela iincwadi, sibatjele ukuthi ukuvakatjha kwabo kusisize kangangani.” Khumbula ukuthi ababonisi besigodi nabo baneentjhijilo abaqalana nazo begodu bayadinwa njengathi. Ngezinye iinkhathi kungenzeka bayagula, batshwenyekile namkha kunezinto ezibadanisako. Kungenzeka amezwakho anomusa namkha ukubapha isipho kungaba yipendulo yomthandazwabo.—IzA. 12:25.

SITLHOGA ‘IZIPHO EZIBABANTU’

16. Ngokuvumelana nezAga 3:27 ngimiphi imibuzo abafowethu abangazibuza yona?

¹⁶ Ephasini loke, sitlhoga abafowethu abangeziweko abazokuba ‘zizipho ezibabantu.’ Nange ungumfowethu obhajadisiweko, kghani ‘ungakghona ukwenza njalo?’ (Funda izAga 3:27.) Kghani uzimisele ukusebenzela emnqophweni wokuthi ube yinceku esizako? Nange sele uyinceku esizako, kghani uzimisele ukusebenzela emnqophweni wokuthi ube mdala? d Kghani uzimisele ukulungisa ubujamo bakho bona ufake isibawo sokuya esiKolweni sabaTjhumayeli beVangeli? Isikolwesi sizokusiza besikubandule ukuthi usetjenziswe nguJesu ngokuzeleko. Nange uzizwa ngasuthi angekhe wakghona ukwenza izintwezi, thandaza kuJehova, umbawe akusize ngomoyakhe ocwengileko bona ukghone ukwenza nanyana ngisiphi isabelo onikelwa sona.—Luk. 11:13; IzE. 20:28.

17. ‘Izipho ezibabantu’ zitjengisani ngeKosethu uKrestu uJesu?

¹⁷ Abafowethu ababekwe nguJesu ‘njengezipho ezibabantu’ babufakazi bokuthi usolo asinqophisa hlangana namalanga wokuphela la. (Mat. 28:20) Kghani asithokozi ngokuthi sineKosi enethando, ephanako, eyaziko ukuthi khuyini esikutlhogako begodu isinikele abafowethu ukuthi basisize. Yeke funa iindlela zokutjengisa ukuthi uthokoza kangangani ngomsebenzi obudisi owenziwa madoda la. Ungalibali ukuthokoza uJehova ngombana umthombo ophuma phambili ‘wananyana ngisiphi isipho esihle nesipheleleko.’—Jak. 1:17.