1. UJehova uzizwa njani ngabantu abamlotjhako?

 KHUYINI uJehova akubonako nakaqala abantu abamlotjhako ephasini? UJehova ubona koke okwenzekako ebantwini bakhe. Uyabona nabadanile nalokha nabathabile. (Rhu. 37:18) Nakasibona senza koke okusemandlenethu bona simlotjhe nanyana sigandelelekile, kwenza azikhakhazise ngathi. Ngaphezu kwalokho, ufuna ukusisekela nokusiduduza.

2. Khuyini uJehova ayenzela abaphuke iinhliziyo begodu singazuza njani ekutlhogonyelweni nguye?

² IRhubo 147:3 lithi uJehova ‘ubopha amanceba’ wabaphuke iinhliziyo. Kilokhu uJehova uvezwa abatlhogomela ngomusa abantu abaphuke iinhliziyo. Khuyini ekufuze siyenze ukuzuza endleleni uJehova asitlhogomela ngayo? Tjheja umfanekiso naku. Udorhodera angenza okunengi ukusiza umuntu olimeleko bona aphole. Umuntu lo nakazakuphola kufuze alandele iinqophiso azifumene kudorhodera. Esihlokwenesi sizokubona ukuthi uJehova uthini ngeliZwi lakhe kilabo abaphuke iinhliziyo begodu sizokubona neendlela zokulandela isinqophiso sakhe sethando.

UJEHOVA UYASIQINISEKISA UKUTHI SIQAKATHEKILE KUYE

3. Kubayini abanye bazizwa bangakaqakatheki?

³ Kuyadanisa ukuthi abantu abanengi namhlanjesi ababathandi abanye abantu, lokho kubangela bona bangabaphathi kuhle, babenza bazizwe bangasililitho. Udadwethu u-Helen a uthi, “Ngikhulele emndenini onganathando. Ubaba bekanenturhu  begodu ahlala asitjela indlela esingakaqakatheki ngayo.” Kungenzeka nawe ufana no-Helen, bewuphathwa kabuhlungu begodu utjelwa amagama akwenza uzizwe ungathandwa. Nakunjalo, kungaba budisi ukukholwa ukuthi kunomuntu ongakuthanda begodu abe nendaba nawe.

4. NgokweRhubo 34:18 khuyini uJehova asiqinisekisa ngayo?

⁴ Ngitjho nanyana kungenzeka abanye abantu bakuphathe kabuhlungu esikhathini esidlulileko, qiniseka ukuthi uJehova uyakuthanda begodu uqakathekile kuye. “Useduze nalabo abanehliziyo ephukileko.” (Funda iRhubo 34:18.) Nawuzizwa “uphohlozekile emoyeni” khumbula ukuthi uJehova ubone okuhle ehliziywenakho begodu nguye okudosileko. (Jwa. 6:44) Uhlala akulungele ukukusiza ngombana uligugu kuye.

5. Khuyini esingayifunda endleleni uJesu ebekaphatha ngayo abantu ebebaqalelwa phasi?

⁵ Singafunda ngendlela uJehova azizwa ngayo, nasicabanga ngesibonelo sakaJesu. Nakasephasini, uJesu wabatjheja abantu ebebaqalelwa phasi nebebangaphathwa kuhle. (Mat. 9:​9-12) Ngesikhathi umma othileko ofuna ukulatjhwa ukugula okubuhlungu, athinta isambatho sakaJesu, uJesu wamduduza begodu wabuka ukukholwa kwakhe. (Mar. 5:​25-34) UJesu ulingisa uYise kikho koke akwenzako. (Jwa. 14:9) Yeke, ungaqiniseka ukuthi uJehova uyakuthanda nokuthi uyabubona ubuntu obuhle onabo, kuhlanganise ukukholwa kwakho nendlela omthanda ngayo.

6. Khuyini ongayenza nawuzizwa ungasililitho?

⁶ Khuyini ekufuze uyenze nange uzizwa ungasililitho? Funda amavesi weBhayibheli akuqinisekisa ngokuthi uJehova uyakuthanda begodu ucabangisise ngawo. b (Rhu. 94:19) Nakwenzeka ungakghoni ukufikelela  umnqopho ozibekele wona namkha udane ngokuthi awukghoni ukwenza okunengi njengabanye, ungavumeli lokho kukwenze uzizwe ngasuthi uJehova akasakuthandi. UJehova akalindeli okungaphezu kwalokho thina esikghona ukumenzela khona. (Rhu. 103:​13, 14) Nangabe ukhe wahlunguphazwa ngaphambilini, ungazibethi ngebanga lalokho. Bekungakafuzi uphathwe ngendlela leyo. Khumbula ukuthi uJehova uthi abenza okumbi bazoziphendulela, ingasi abantu abaphathwe kumbi. (1 Pit. 3:12) U-Sandra owahlunguphazwako asese mntwana uthi, “Bengihlala ngibawa uJehova ukuthi angisize ngibone ubuntu obuhle abubona kimi.”

7. Singazisebenzisa njani izinto ekhesahlangabezana nazo bona sisize abanye ekulotjheni uJehova?

⁷ Qiniseka ukuthi uJehova angakusebenzisa bona usize abanye. Ukuphe ilungelo lokusebenzisana naye emsebenzini wokutjhumayela. (1 Kor. 3:9) Ngebanga lezinto ezenzeka ekuphileni kwakho, kungenzeka kuba lula kuwe ukuzwisisa abantu abaphatheke kabuhlungu. Kunengi ongakwenza ukuthi ubasize. U-Helen esikhulume ngaye phambilini wafumana isizo begodu nje sele akghona ukusiza abanye ngendlela engcono, uthi, “UJehova wenze umuntu obekazizwa angasililitho, wazizwa athandwa begodu angakghona ukusiza abanye.” Sikhuluma nje u-Helen uthabile begodu uliphayona lesikhathi esizeleko.

UJEHOVA UFUNA WAMUKELE UKUTHI UKULIBALELE

8. U-Isaya 1:18 usiqinisekisa ngani?

⁸ Abanye abantu bakaJehova bezwa ubuhlungu khulu ngebanga lemitjhapho abayenza esikhathini esidlulileko, kungenzeka ngaphambi kobana babhajadiswe namkha ngemva kwalokho. Kufuze sikhumbule bona uJehova usinikele isihlengo ngombana usithanda khulu. Yeke, siyaqiniseka ukuthi ufuna sisamukele isipheso. UJehova usiqinisekisa ngokuthi ngemva kokuthi ‘silungise iindaba naye,’ c uzosilibalela ngokupheleleko. (Funda u-Isaya 1:18.) UJehova usithanda kwamambala ngokuthi akhethe ukungasakhumbuli imitjhaphethu edlulileko. Ngesikhathi esifanako, akakhohlwa izinto ezihle esizenzileko.—Rhu. 103:​9, 12; Heb. 6:10.

9. Kubayini kufuze senze koke okusemandleni ukudzimelela kilokho okwenzeka nje nalokho okuzokwenzeka esikhathini esizako kunokudzimelela kilokho okudlulileko?

⁹ Nakwenzeka uzwa ubuhlungu ngemitjhapho edlulileko, linga koke okusemandlenakho ukuthi udzimelele kilokho okwenzeka nje, nalokho okuzokwenzeka esikhathini esizako kunokudzimelela kilokho okudlulileko. Cabanga ngesibonelo sakampostoli uPowula. Bekazisola ngokuthi wakhe wahlunguphaza amaKrestu kabuhlungu kodwana bekazi ukuthi uJehova umlibalele. (1 Thim. 1:​12-15) Inga-kghani waragela phambili asolo azibetha ngesono sakhe esidlulileko? Siyaqiniseka ukuthi akhenge, njengombana angasolo adzimelela ezintweni azenzileko bona abe mFarisi ohlonitjhwako. (Flp. 3:​4-8, 13-15) Kunalokho, uPowula wakhuthala, wenza umsebenzakhe begodu waqala esikhathini esizako. NjengoPowula, angekhe wakghona ukutjhugulula okwenzeke esikhathini esidlulileko. Kodwana ungakghona ukuthabisa uJehova ngalokho okwenzekako epilwenakho nje begodu uqale phambili esikhathini esizako, eenthembisweni zakaJehova.

10. Khuyini esingayenza nange esikwenze esikhathi esidlulileko kulimaze abanye?

¹⁰ Ungaphatheka kabuhlungu nawucabanga ngezinto ozenzileko nendlela ezilimaze ngayo  abanye. Khuyini engakusiza? Yenza koke ongakghona ukukwenza ukulungisa izinto, kuhlanganise nokubawa ukulitjalelwa. (2 Kor. 7:11) Bawa uJehova asize abathintekileko ngebanga lezenzo zakho. Angasiza wena nabo ukuthi nikghone ukukghodlhelelela ubuhlungu begodu nibe nokuthula.

11. Khuyini esingayifunda esibonelweni somphorofidi uJona? (Qala nesithombe esingaphandle.)

¹¹ Funda emitjhaphenakho begodu uzimisele ukuvumela uJehova akusebenzise ngananyana ngiyiphi indlela. Ngokwesibonelo, cabanga ngomphorofidi uJona. Kunokobana aye eNiniva njengombana uZimu amthumile, uJona wabalekela endaweni ehlukileko. UJehova wamlungisa uJona begodu wafunda emtjhaphenakhe. (Jona 1:​1-4, 15-17; 2:​7-10) UJehova akhenge amphelele ihliziyo. Wamupha elinye ithuba lokuthi aye eNiniva begodu kilokhu walalela. Akhenge avumele ukuzisola ngemitjhapho edlulileko kumenze angamukeli isabelo esitjha uJehova amnikela sona.—Jona 3:​1-3.

UJEHOVA USIDUDUZA NGOMOYAKHE OCWENGILEKO

12. UJehova usinikela njani ukuthula nasiqalene neenkhathi ezibudisi nokuhlongakalelwa? (Filipi 4:​6, 7)

¹² UJehova usebenzisa umoyakhe ocwengileko bona asiduduze nasiqalene nobujamo obubudisi namkha sihlongakalelwe. Cabanga ngesibonelo saka-Ron no-Carol, indodanabo yazibulala. Bathi, “Sihlangabezene neenkhathi ezibudisi khulu ekuphileni kwethu kodwana lokhu bekubuhlungu ukudlula koke. Sathandaza kanengi, singalali ebusuku, sezwa ukuthula okuhlathululwa kwebeFilipi 4:​6, 7” (Ufunde.) Nawuqalene nomraro okwenza uphuke ihliziyo, thululela ihliziywakho kuJehova, uthandaze kuye kanengi ngendlela ofuna ngayo. (Rhu. 86:3; 88:1) Bawa uJehova kanengi ukuthi akuphe umoyakhe ocwengileko. Uzowulalela umthandazwakho.—Luk. 11:​9-13.

13. Umoya ocwengileko ungasisiza njani siragele phambili silotjha uJehova ngokuthembeka? (Efesu 3:16)

¹³ Inga-kghani ubudisi oqalene nabo bukutjhiye ungasanamandla wokwenza ekufuze ukwenze? Umoya ocwengileko ungakusiza uragele phambili ulotjha uJehova ngokuthembeka. (Funda yebe-Efesu 3:16.) Cabanga ngesibonelo sakadadwethu u-Flora. Yena nendodakhe balotjha uJehova bobabili baziinthunywa zevangeli begodu indodakhe akhenge ithembeke kuye, lokho kwabenza bahlukana. Uthi, “Ubuhlungu engabuzwako ngebanga lokungathembeki kwakhe kwangigandelela. Ngathandaza kuJehova ngibawa umoya ocwengileko bona ngikghone ukukghodlhelela. UJehova wanginikela ebengikutlhoga. Ukuphola nokuqalana nalokho ebengikubona kungekhe kwakghonakala.” Uthi, uzwa kwangathi uJehova wamsiza wakghona ukukghodlhelela begodu uzokuhlala amsiza aqalane neentjhijilo. Ungezelela ngokuthi, “Amezwi akumaRhubo 119:32 asebenza kimi, ‘Ngizokuphetha imiyalwakho ngehliziywami yoke ngombana uyenzele indawo ehliziywenami.’”

14. Singawuvumela njani umoya kaZimu usebenze kithi?

¹⁴ Ngemva kokuthi ubawe umoya ocwengileko kuJehova kufuze wenzeni? Yenza imisebenzi ezokwenza umoya ocwengileko usebenze kuwe. Lokho kuhlanganisa ukuba khona emihlanganweni nokutjhumayeza abanye. Funda iliZwi lakaZimu qobe lokhu kuzokusiza ucabangisise ngemicabangwakhe. (Flp. 4:​8, 9) Njengombana ufunda, tjheja abantu abaseBhayibhelini abahlangabezene nezinto ezifana nalezi ohlangabezene nazo. Cabangisisa ngendlela uJehova abasize ngayo  bakghodlhelela. U-Sandra esikhulume ngaye phambilini waqalana neetjhijilo ezinengi. Uthi, “Indaba kaJosefa yangithinta ihliziyo. Akhenge avumele ukungabi nobulungiswa kubogabogise itjhebiswano analo noJehova.”—Gen. 39:​21-23.

UJEHOVA USIDUDUZA NGABAFOWETHU NABODADWETHU

15. Singayifumana kibobani induduzo begodu bangasisiza njani? (Qala nesithombe.)

¹⁵ Nasiqalene neentjhijilo, abafowethu nabodadwethu bangaba “mthombo wenduduzo ekulu.” (Kol. 4:11) Abafowethu nabodadwethu basitjengisa indlela uJehova asithanda ngayo. Basiduduza ngokuthi basilalele ngomusa namkha basisekele ngokuthi babe nathi. Bangasiqinisekisa ngamavesi aseBhayibhelini namkha bathandaze nathi. d (Rom. 15:4) Ngezinye iinkhathi umfowethu namkha udadwethu angasikhumbuza ngendlela uJehova acabanga ngayo begodu asisize sikghone ukuqala izinto kuhle. Udadwethu namkha umfowethu angasisiza nangezinto esizitlhogako, mhlamunye asilethele ukudla nasigandelelekileko.

16. Khuyini ekungatlhogeka siyenze bona sifumane isekelo esilitlhogako kubafowethu nabodadwethu?

¹⁶ Ngezinye iinkhathi kungafuze sibawe isizo kubafowethu nabodadwethu. Bayasithanda begodu bafuna ukusisiza. (IzA. 17:17)  Kungenzeka bangazi ukuthi sizizwa njani namkha ukuthi sitlhogani. (IzA. 14:10) Nasinehliziyo ephukileko, singatjela umngani esimthembako indlela esizizwa ngayo. Singamtjela izinto esicabanga bona zingasisiza. Singakhetha ukukhuluma nomdala munye namkha ababili esizizwa sitjhaphulukile ukukhuluma nabo. Abanye abodadwethu bakufumana kududuza ukukhuluma nabodade abavuthiweko.

17. Ngiziphi ezinye iintjhijilo ezingenza kube budisi ukufumana iinkhuthazo begodu singazihlula njani?

¹⁷ Kubalekele ukufuna ukuba wedwa khulu. Ngebanga lehliziyo ebuhlungu, kungenzeka ungakhanukeli ukusolo ukhuluma nabantu. Ngezinye iinkhathi abafowethu nabodadwethu kungenzeka bangasizwisisi namkha bangakhethi kuhle amagama. (Jak. 3:2) Ungavumeli izintwezo zikwenze ungamukeli isikhuthazo ositlhogako. Umdala igama lakhe elingu-Gavin, otshwenywa kugandeleleka uthi, “Ukukhulumisana nabangani, kanengi yinto engingakhanukeli ukuyenza.” Nanyana kunjalo, u-Gavin akavumela ukwenza ngendlela azizwa ngayo. Uyazuza ngokuba nabanye. Udadwethu u-Amy uthi, “Ngebanga lalokho ekhengaqalana nakho ngaphambilini, ngikufumana kubudisi ukuthemba abantu. Nje, ngifunda ukuthanda nokuthemba abafowethu nabodadwethu njengombana uJehova enza. Ngiyazi bona lokho kwenza uJehova athabe begodu nami kungenza ngithabe.”

IINTHEMBISO ZAKAJEHOVA NGENGOMUSO ZIYASIDUDUZA

18. Khuyini esingaqala phambili kiyo esikhathini esizako begodu khuyini esingayenza nje?

¹⁸ Singaqala njani ngesibindi engomusweni, sazi ukuthi kungasi kade uJehova uzosilapha ngokupheleleko ebuhlungwini esiqalana nabo nekuphukeni ihliziyo? (IsAm. 21:​3, 4) Ngesikhatheso izinto ezibuhlungu ezenzekileko ‘angekhe zifike ehliziyweni.’ (Isa. 65:17) Njengombana sibonile, uJehova ubopha amancebethu, ngitjho nanje. UJehova usinikela izinto ezinengi bona asiduduze begodu asisize. Yamukela isizo lakhe. Qiniseka ukuthi uJehova ‘unendaba nawe.’—1 Pit. 5:7.