AMA-ISRAYELI bekawuthabela khulu umbhino. Esikhathini esinengi iBhayibheli likhuluma ngabantu abadlala iinlilisi bebavume iingoma. Ingcenye ekulu yeBhayibheli ineengoma. Ngokwesibonelo, incwadi yeRhubo, Yengoma Yeengoma nencwadi yesiLilo. Incwadi ethi, Music in Biblical Life ithi iBhayibheli “iveza ngokukhanyako ukuthi ama-Israyeli bekasebenzisa umbhino ezintweni ezihlukahlukeneko ekuphileni kwawo.”

Umbhino ekuphileni kwaqobe langa. Ama-Israyeli bekadlala umbhino ukuveza indlela azizwa ngayo. (Isa. 30:29) Abafazi bebadlala abosotjherere, bavume iingoma bebagide nakubekwa ikosi, ngemigidi nalokha kuthunjiwe epini. (Hlul. 11:34; 1 Sam. 18:​6, 7; 1 Kho. 1:​39, 40) Ama-Israyeli bekavuma iingoma ukuveza iindlela ezwa ubuhlungu ngayo lokha nakuhlongakele umuntu. (2 Kron. 35:25) Kuyakhanya ukuthi ama-Israyeli bekawuthanda khulu umbhino.

Amakhosi wakwa-Israyeli bekawuthabela umbhino. IKosi uSawula yabiza uDavida esigodlweni ukuthi azomdlalela umbhino. (1 Sam. 16:​18, 23) Ekukhambeni kwesikhathi, uDavida nakaba yiKosi watlola iingoma ezimnandi, wabe wahlela nesiqhema salabo ebebazokubhina ethempelini lakaJehova. (2 Kron. 7:6; Amo. 6:5) IKosi uSolomoni beyinabavumi esirhodlweni sayo.—UMtj. 2:8.

Ama-Israyeli bekabhina ukudumisa uJehova. Ama-Israyeli bekabhina nakalotjha uJehova. Kunamadoda azii-4 000 ebekadlala iinliliso ethempelini, eJerusalema. (1 Kron. 23:5) Bekadlala amasimbali, iinliliso zesinara, amaharibha namabhorompita. (2 Kron. 5:12) Abantu ababhinakwaba, abanekghono bekungasibo kwaphela ebebalotjha uJehova ngombhino. Ama-Israyeli amanengi bekabhina Ingoma Yalabo Abakhuphukako lokha nakaya eJeruralema ukuyokugidinga iminyanya yaqobe mnyaka. (Rhu. 120–134) Ngokwemitlolo yamaJuda, ama-Israyeli bekabhina ezinye iingoma zeRhubo a ngesikhathi sePhasika.

Umbhino usaqakathekile ebantwini bakaZimu. (Jak. 5:13) Sivuma iingoma njengengcenye yokulotjha uJehova. (Efe. 5:19) Umbhino usenza sizizwe sitjhidelene khulu nabafowethu nabodadwethu nasivuma iingoma ndawonye. (Kol. 3:16) Ziyasiqinisa lokha nasiqalene nobujamo obubudisi. (IzE. 16:25) Umbhino uyindlela ehle esitjengisa ngayo ukukholwa kwethu kuJehova nokuthi siyamthanda.