1. Khuyini uJehova ayenzileko msinyana ngemva kokuthi u-Adamu no-Eva benze isono? (Genesisi 3:15)

 MSINYANA ngemva kokuthi u-Adamu no-Eva benze isono, uJehova wanikela abantwana babo ithemba asebenzisa isiphorofido esiqakathekileko. Lokho akutjho kutlolwe kuGenesisi 3:15.—Ufunde.

2. Kubayini isiphorofidwesi siqakathekile?

² Isiphorofidwesi sitlolwe encwadini yokuthoma yeBhayibheli. Kunendlela ezinye iincwadi zeBhayibheli ezihlobana ngayo nencwadi le. Amezwi atlolwe kuGenesisi 3:15 amgogodlha weBhayibheli, zoke ezinye iincwadi zinomlayezo munye, othi kuzokuthunyelwa uMtjhaphululi ozokutjhabalalisa uDeveli nabo boke abalandeli bakhe abakhohlakeleko. b Lokho kuzokuba sibusiso kilabo abathanda uJehova.

3. Sizokucoca ngani esihlokwenesi?

³ Esihlokwenesi, sizokuphendula imibuzo elandelako malungana nesiphorofido esikuGenesisi 3:15: Bobani ekukhulunywa ngabo evesineli? Sizaliseka njani isiphorofidwesi? Begodu sizuza njani kiso?

4. Ingubani ‘inyoka’ begodu sazi njani?

⁴ Abantu ekukhulunywa ngabo encwadini kaGenesisi 3:14, 15 bafaka hlangana ‘inyoka,’ ‘isizukulwana’ senyoka, ‘umfazi’ ‘nesizukulwana’ somfazi. IBhayibheli lisisiza sikghone ukubazi. c Akhesithome ngenyoka. Inyoka yamambala beyingekhe ikuzwisise lokho okwatjhiwo  nguJehova esimini ye-Edeni. Yeke umuntu ophikisana nesahlulelo sakaJehova bekufuze abe sidalwa esihlakaniphileko. Ngubani? IsAmbulo 12:9 sihlathulula kuhle ukuthi ingubani inyoka. Umtlolo lo uthi, “inyoka yokuthoma” inguSathana uDeveli. Alo-ke bobani abasizukulwana senyoka?

5. Bobani abasizukulwana senyoka?

⁵ IBhayibheli nalikhuluma ngesizukulwana ngendlela engokomfanekiso, likhuluma ngalabo abacabanga bebenze izinto njengobababo ongokomfanekiso. Yeke isizukulwana senyoka ziindalwa zommoya nabantu abalingisa uSathana ngokungamlaleli uZimu nokuphikisa abantu bakhe. Laba bafaka hlangana neengilozi ezatjhiya isabelo sazo sezulwini ngesikhathi sakaNowa, kunye nabantu abakhohlakeleko abaziphatha njengobababo uDeveli.—Gen. 6:1, 2; Jwa. 8:44; 1 Jwa. 5:19; Jud. 6.

6. Kubayini sithi “umfazi” angeze kwaba ngu-Eva?

⁶ Nje-ke, khesibone ukuthi ungubani “umfazi.” Bekungekhe kube ngu-Eva. Kubayini sitjho njalo? Cabanga nganali ibanga elilandelako. Isiphorofido sithi isizukulwana somfazi ‘besizokutshidlha’ ihloko yenyoka. Njengombana sesibonile, inyoka ijamele isidalwa esimumoya, uSathana begodu isizukulwana saka-Eva njengombana bekamumuntu onesono, besingeze sakghona ukumtshidlha. Yeke uSathana bekazokutjhatjalaliswa njani?

7. Njengombana kuvezwe encwadini yesAmbulo 12: 1, 2, 5, 10, ngubani umfazi ekukhulunywa ngaye kuGenesisi 3:15?

⁷ Incwadi yamaswaphela yeBhayibheli iyaveza ukuthi umfazi ekukhulunywa ngaye kuGenesisi 3:15 ngubani. (Funda IsAmbulo 12:1, 2, 5, 10.) Umfazi  lo akakho ephasini! Inyanga ingaphasi kweenyawo zakhe begodu ehlokwakhe kunesihlohlo seenkwekwezi ezili-12. Ubeletha umntwana ongakajayeleki—UmBuso kaZimu. UmBuso lo usezulwini yeke nomfazi kufuze bona usezulwini. Ujamele ingcenye esezulwini yehlangano kaJehova eyakhiwa ziingilozi zakhe ezithembekileko.—Gal. 4:26.

8. Ngubani oyingcenye eqakathekileko yesizukulwana somfazi begodu uthome nini? (Genesisi 22:15-18)

⁸ IliZwi lakaZimu lisisiza nokuthi sikghone ukubona ukuthi ngubani oyingcenye eqakathekileko yesizukulwana somfazi. Bekazokuvela ebantwaneni baka-Abrahama. (Funda uGenesisi 22:15-18.) Njengombana kuphorofidiwe, uJesu wavela ebantwaneni bendoda ethembekileko le. (Luk. 3:23, 34) Isizukulwanesi bekufuze sibe namandla khulu kunabantu ngombana bekufuze sitshidlhe uSathana uDeveli angasaba khona. Yeke uJesu nakaneminyaka ema-30, wazeswa ngommoya ocwengileko. Nakazeswako, waba yingcenye eqakathekileko yesizukulwana somfazi. (Gal. 3:16) Ngemva kokufa nokuvuswa kwakaJesu, uZimu “wamthwesa isihlohlo sephazimulo nedumo” begodu wamnikela “loke ilawulo ezulwini nephasini,” kuhlanganise nelawulo ‘lokutjhabalalisa imisebenzi kaDeveli.’—Heb. 2:7; Mat. 28:18; 1 Jwa. 3:8.

9-10. (a) Bobani abanye abayingcenye yesizukulwana somfazi begodu bathoma nini ukuba yingcenye yaso? (b) Khuyini esizokucoca ngayo nje?

⁹ Bekuzokuba nengcenye yesibili yesizukulwanesi. Umpostoli uPowula bekakhuluma ngengcenye yesizukulwanesi nakatjela amaKrestu azesiweko amaJuda nalawo angasimaJuda ukuthi: “Nangabe ningebakaKrestu, kwamambala nibantwana baka-Abrahama, iindlalifa ngebanga lesithembiso.” (Gal. 3:28, 29) UJehova nakazesa umKrestu ngommoya ocwengileko, umuntu loyo uba yingcenye yesizukulwana somfazi. Ngalokho isizukulwanesi sihlanganisa uJesu Krestu nabazii-144 000 azokubusa nabo. (IsAm. 14:1) Boke balinga ukucabanga begodu benze izinto njengoBababo, uJehova uZimu.

¹⁰ Njengombana sesazi ukuthi bobani ekukhulunywa ngabo encwadini kaGenesisi 3:15, sizokufunda ngokuthi khuyini uJehova ayenzileko bona azalisekise isiphorofidwesi nokuthi lokho kusisiza njani namhlanjesi.

11. Besitjho ukuthini isiphorofido nasithi isizukulwana somfazi besizokulimala ‘esithendeni?’

¹¹ Ngokwesiphorofido esikuGenesisi 3:15, inyoka beyizokuluma isizukulwana somfazi ‘esithendeni.’ Lokho kwazaliseka lokha uSathana nakabangela ukuthi amaJuda namaRoma abulale iNdodana kaZimu. (Luk. 23:13, 20-24) Umuntu nakalimele esithendeni, akakghoni ukukhamba kuhle isikhatjhana. Ngendlela efanako, uJesu akhenge akghone ukwenza litho okwesikhatjhana njengombana bekahlongakele.—Mat. 16:21.

12. Ihloko yenyoka izokutshidlhwa nini begodu njani?

¹² Bona kuzaliseke isiphorofido esikuGenesisi 3:15, bekufuze uJesu avuke. Kubayini sitjho njalo? Kungebanga lokuthi isiphorofidwesi sithi isizukulwana somfazi besizokutshidlha ihloko yenyoka. Lokho bekutjho ukuthi uJesu bekuzofuze aphole esithendeni. Ngilokho  okwenzeka! Ngelanga lesithathu ngemva kokuhlongakala kwakhe, uJesu wavuselwa ezulwini anomzimba ongafiko. Ngesikhathi esifaneleko sakaZimu, uJesu uzokutshidlha uSathana begodu angekhe asaba khona. (Heb. 2:14) Labo abazokubusa noKrestu bazokuba nengcenye ekutjhabalaliseni woke amanaba kaZimu ephasini, okusizukulwana senyoka.—IsAm. 17:14; 20:4, 10. d

13. Sizuza njani ekuzalisekeni kwesiphorofidwesi?

¹³ Nange uyinceku kaZimu ethembekileko, uyazuza ekuzalisekeni kwesiphorofidwesi. UJesu weza ephasini amumuntu. Ubulingise ngokupheleleko ubuntu bakaBabakhe. (Jwa. 14:9) Yeke ukufunda ngoJesu kusenze samazi besamthanda uJehova uZimu. Siyazuza naseemfundisweni nesinqophisweni sakaJesu njengombana anqophisa ibandla lobuKrestu namhlanjesi. Usifundise ukuthi khuyini ekufuze siyenze nasifuna ukwamukelwa nguJehova. Soke siyazuza ekufeni kwakaJesu, okufanekiselwa kulimala esithendeni. Njani? UJesu nakavuswako, wanikela ngeengazi zakhe ezinganasono ‘ezisihlanza kizo zoke izono.’—1 Jwa. 1:7.

14. Sazi njani ukuthi isiphorofido uJehova asikhulume e-Edeni akhenge sizaliseke ngesikhatheso? Hlathulula.

¹⁴ Lokho uJehova akutjho esiphorofidweni akhuluma ngaso e-Edeni bekuveza ukuthi bekuzokuthatha isikhathi ngaphambi kokuzaliseka kwesiphorofidwesi. Bekuzokuthatha isikhathi ngomfazi ukuthi aveze isizukulwana esithenjisiweko, ngoDeveli bona abuthelele abalandeli bakhe nokuthi kube nehloyo eenqhemeni ezimbilezi. Kuyasizuzisa ukuzwisisa isiphorofidwesi ngombana sifumana isiyeleliso sokuthi iphasi elilawulwa nguSathaneli lizokuhloya abantu abalotjha uJehova. UJesu wanikela abafundi bakhe isiyeleliso esifanako. (Mar. 13:13; Jwa. 17:14) Sikubonile ukuzaliseka kwengcenye yesiphorofidwesi, khulukhulu eminyakeni eli-100 yamva nje. Sikubone njani?

15. Kubayini iphasi lisihloye khulu isizukulwana somfazi kunekuthomeni, kodwana kubayini singanalo ibanga lokusaba uSathana?

¹⁵ Msinyana ngemva kokuthi uJesu abekwe njengeKosi enguMesiya ngo-1914, uSathana waqothwa ezulwini. Nje, sele avaleleke ephasini begodu ulinde ukutjhatjalaliswa kwakhe. (IsAm. 12:9, 12) Akakazigedli njengombana alindile. USathana unelaka elikhulu begodu uhlasela abantu bakaZimu. (IsAm. 12:13, 17) Kungebangelo iphasi lisihloye khulu kunekuthomeni. Nanyana kunjalo, akukafuzi sisabe uSathana nabalandeli bakhe. Kunalokho, nathi singaba nethemba elifana nelakampostoli uPowula, owatlola wathi: “Nangabe uZimu ungakithi, ngubani ozokuphikisana nathi?” (Rom. 8:31) Simthemba khulu uJehova ngombana ingcenye ekulu yesiphorofido esikuGenesisi 3:15 sele izalisekile.

16-18. UCurtis, u-Ursula noJessica bazuze njani ngokuzwisisa uGenesisi 3:15?

¹⁶ Isithembiso sakaJehova esikuGenesisi 3:15 singasisiza siqalane neentjhijilo ngendlela ephumelelako. UCurtis, osithunywa sevangeli eGuam, uthi: “Ngezinye iinkhathi khengiqalane neentjhijilo nokudana okulinga ukuzinikela kwami  kuJehova. Ukucabangisisa ngesiphorofido esikuGenesisi 3:15 kungisize ngahlala ngithembele kuBabami wezulwini.” UCurtis uliqale ngabomvu ilanga uJehova azokuqeda ngalo zoke iintjhijilo zethu.

¹⁷ Udadwethu weBavaria ibizo lakhe elingu-Ursula uthi ukuzwisisa uGenesisi 3:15 kumsize waqiniseka ngokuthi iBhayibheli liphefumulelwe nguZimu. Wabona indlela ezinye iimphorofido ezihlobana ngayo nesiphorofidwesi begodu lokho kwamkara kwamambala. Uthi: “Ngathinteka khulu nangifunda ukuthi uJehova wathatha igadango msinyana ukwenzela ukuthi abantu babe nethemba.”

¹⁸ UJessica weMicronesia, uthi: “Ngisayikhumbula indlela ebengizizwa ngayo nangilemuka ukuthi ngifumene iqiniso! Isiphorofido esisencwadini kaGenesisi 3:15 besizaliseka. Singisize ngakhumbula ukuthi izinto ezibuhlungu esiqalana nazo namhlanjesi azibangelwa nguJehova. Isiphorofidwesi siqinise nokukholelwa kwami ukuthi ukulotjha uJehova kusenza siphile ipilo emnandi nje begodu kusilethele ukuphila okuhle esikhathini esizako.”

19. Kubayini siqiniseka ngokuthi ingcenye yamaswaphela yesiphorofido izokuzaliseka?

¹⁹ Njengombana sifundile, uGenesisi 3:15 uyazaliseka. Sesiyazi ukuthi bobani isizukulwana somfazi nesizukulwana senyoka. UJesu, oyingcenye eqakathekileko yesizukulwana somfazi sele apholile esithendeni begodu nje, uyiKosi enamandla nengeze yafa. Ukukhethwa kwalabo abayingcenye yesibili yesizukulwana sekuzokuphela. Ngebanga lokuthi ingcenye yokuthoma yesiphorofidwesi sele izalisekile, sinebanga lokuthemba ukuthi ingcenye yamaswaphela, okukutshidlhwa kwehloko yenyoka nayo izokuzaliseka. Kuzoba lithabo elikhulu ebantwini abathembekileko lokha uSathana nakatjhatjalaliswako! Bekube sikhatheso, ungapheli amandla. UZimethu uthembekile. Asebenzisa isizukulwana somfazi, uzokuletha iimbusiso ezinengi kizo “zoke iinkoro zephasi.”—Gen. 22:18.