1. Kufuze siliqale njani ilungelo lokuthandaza kuJehova?

 SINIKELWE ilungelo elihle khulu, lokukhuluma noMdali wezulu nephasi ngomthandazo. Akhucabange nje: Singathululela iinhliziyo zethu kuJehova nanyana kunini ngananyana ngiliphi ilimi, ngaphandle kokubawa imvumo. Singathandaza sikhulume naye lokha sisesibhedlela namkha sivalelwe ejele, siqiniseka ngokuthi uBabethu onethando uzosilalela. Asilithatheli phasi ilungelweli.

2. IKosi uDavida yatjengisa njani ukuthi iliqala njengeliqakathekileko ilungelo lokuthandaza?

² IKosi uDavida beyiliqala njengeliqakathekileko ilungelo lokuthandaza. Yabhinela uJehova yathi: “Umthandazwami awube njengetjhwalo kuwe.” (Rhu. 141:1, 2) Ngesikhathi sakaDavida, itjhwalo elicwengileko belisetjenziswa baphristi ekulotjheni kwamambala begodu belilungiselelwa ngokutlhogomela okukhulu. (Eks. 30:34, 35) Ukuqalisela kwakaDavida etjhwaleni kuveza ukuthi bekafuna ukucabangisisa ngalokho ebekazokutjho kuBabakhe wezulwini. Leso sifiso sethu. Sifuna imithandazwethu ithabise uJehova.

3. Kufuze bube njani ubujamo bomkhumbulwethu lokha nasithandazako begodu kubayini?

³ Nasithandaza kuJehova, kufuze sibalekele ukuzigedla khulu. Kufuze sithandaze ngehlonipho ekulu. Cabanga ngemibono ekarisako eyabonwa ngu-Isaya, uHezekiyeli, uDanyela noJwanisi. Imibono le ayifani omunye komunye kodwana inokuthileko efana ngakho. Yoke beyiveza uJehova njengeKosi ekulu. U-Isaya wabona ‘uSomandla ahlezi esihlalweni sobukhosi esiphezulu nesiphakamileko.’  (Isa. 6:1-3) UHezekiyeli wabona uJehova esihlalweni sobukhosi abhodwe ‘mlilo onemisebe njengezungu leKosi.’ (Hez. 1:26-28) UDanyela wabona “oMdala weminyaka” ambethe izambatho ezimhlophe kwehla amalangabi avela phambi kwakhe. (Dan. 7:9, 10) UJwanisi wabona uJehova ahlezi esihlalweni sobukhosi esibhodwe lizungu lekosi elibonakala njenge-emeraldi. (IsAm. 4:2-4) Njengombana sibona iphazimulo kaJehova engeze yamadaniswa nalitho, sikhumbula ukuthi kulilungelo elikhulu kangangani ukuthi uJehova usivumele bona sitjhidele kuye ngomthandazo. Kufuze sithandaze njani?

4. Khuyini esiyifunda emezwini avulako womthandazo osibonelo ofumaneka kuMatewu 6:9, 10?

⁴ Funda uMatewu 6:9, 10. ETjumayelweni yeNtabeni, uJesu wafundisa abalandeli bakhe indlela yokuthandaza ethabisa uZimu. Ngemva kokuthi, “kufuze nithandaze nganasi indlela,” uJesu waveza izinto eziqakathekileko ezikhambisana nomnqopho kaJehova: Ukucwengiswa kwebizo lakhe, ukuza komBuswakhe ozokutjhabalalisa boke abaphikisana noZimu nezinto ezihle azoziletha ephasini nebantwini. Ngokufaka izintwezi nasithandazako, sitjengisa ukuthi intando kaZimu iqakathekile kithi.

5. Inga-kghani kumbi ukuthandazela izinto esizitlhogako?

⁵ Engcenyeni elandelako yomthandazo, uJesu waveza ukuthi kuhle ukuthandazela izinto esizitlhogako. Singabawa uJehova asinikele ukudla kwelanga, asilibalele imitjhaphwethu, asivikele eenlingweni begodu asitjhaphulule komumbi. (Mat. 6:11-13) Nasibawa uJehova ukuthi asenzele izintwezi, sitjengisa ukuthi sithembele kuye begodu sifuna ukumthabisa.

6. Kghani kufuze silandele amezwi asemthandazweni osibonelo njengombana anjalo lokha nasithandazako? Hlathulula.

⁶ UJesu bekangakalindeli ukuthi abalandeli bakhe balandele amezwi asemthandazweni osibonelo njengombana anjalo. Eminye imithandazo uJesu ayenzako, wakhuluma nangezinye izinto ebeziqakathekile kuye ngesikhatheso.  (Mat. 26:39, 42; Jwa. 17:1-26) Ngendlela efanako, nathi singathandazela nanyana yini esitshwenyako. Nakunesiqunto ekutlhogeka bona sisenze, singathandazela ukuhlakanipha nokuzwisisa. (Rhu. 119:33, 34) Nasizokuthoma isabelo esibudisi, singathandazela ukuhlakanipha bona sifumane indlela ephumelelako yokusenza. (IzA. 2:6) Ababelethi bangathandazela abantwana babo, abantwana bangathandazela ababelethi babo begodu soke kufuze sithandazele abantu esifunda nabo iBhayibheli nalabo esibatjhumayezako. Liqiniso, akukafuzi sithandaze kuJehova kwaphela lokha nasitlhoga isizo.

7. Kubayini kufuze sidumise uJehova emithandazwenethu?

⁷ Kufuze sikhumbule ukudumisa uJehova emithandazwenethu. Akekho ofanelwe ukudunyiswa ukudlula uZimethu. ‘Ulungile begodu uyacolela’ godu ‘unguZimu onomusa nesirhawu, ubuthaka ekusilingekeni, uzele ukwethembeka neqiniso.’ (Rhu. 86:5, 15) Sinebanga elihle khulu lokudumisa uJehova ngebanga lalokho angikho nalokho akwenzako.

8. Ngiziphi ezinye izinto esingathokoza uJehova ngazo? (IRhubo. 104:12-15, 24)

⁸ Ngaphezu kokudumisa uJehova emithandazwenethu, sidoseleka bona simthokoze ngebanga lezinto asipha zona. Ngokwesibonelo, singamthokoza ngemibala emihle esiyibona emathuthumbweni, ukudla okumnandi okuhlukahlukeneko nokuba nabangani abahle abasikhuthazako. UBabethu onethando usinikela lokhu nokhunye okunengi bona asithabise. (Funda IRhubo 104:12-15, 24.) Okuqakatheke khulu, sithokoza uJehova ngelwazi elinengi elisitjhideza kuye nethemba esinalo ngengomuso.

9. Khuyini engasisiza sikhumbule ukuthokoza uJehova? (1  Thesalonika 5:17, 18)

⁹ Kungaba lula ukulibala ukuthokoza uJehova ngezinto asenzela zona. Khuyini engakusiza ukhumbule? Ungenza irhelo lezinto ezithileko ozibawileko begodu ulihlole ukubona bona uJehova ukuphendule njani. Ngemva kwalokho thandaza umthokoze ngesizo lakhe. (Funda yoku 1 kaThesalonika 5:17, 18.) Cabanga nganaku: Kuyasithabisa bekusenze sizizwe siqakathekile  lokha abanye nabasithokoza. Ngendlela efanako, nasikhumbula ukuthokoza uJehova ngokuphendula imithandazwethu, uyathaba. (Kol. 3:15) Ngiliphi elinye ibanga eliqakathekileko elisenza sithokoze uZimethu?

10. Ngokweyoku-1 kaPitrosi 2:21, kubayini sinebanga lokuthokoza uJehova ngokuthumela uJesu ephasini?

¹⁰ Funda yoku-1 kaPitrosi 2:21. Kufuze sithokoze uJehova ngokuthumela iNdodanakhe izosifundisa. Sifunda okunengi khulu ngoJehova nangokuthi singamthabisa njani ngokufunda ngokuphila kwakaJesu. Nasikholelwa emhlatjelweni kaKrestu, singaba nobuhlobo obufuthumeleko noJehova uZimu besithabele ukuthula.—Rom. 5:1.

11. Ngiyiphi indima uJesu ayidlalako emithandazweni esiyenza kuJehova?

¹¹ Siyamthokoza uJehova ngebanga lokuthi sikghona ukuthandaza ngebizo lendodanakhe. UJesu uyindlela uJehova ayisebenzisako ukulalela imithandazwethu bekaphendule imithandazo eyenziwe ebizweni lakaJesu. UJesu wahlathulula: “Nanyana yini eniyibawa ngebizo lami, ngizoyenza, ukuze uBaba aphazinyuliswe ngeNdodana.”—Jwa. 14:13, 14.

12. Ngiliphi elinye ibanga esinalo lokuthokoza uJehova ngeNdodanakhe?

¹² UJehova ulibalela izono zethu ngebanga lomhlatjelo kaJesu. ImiTlolo ihlathulula uJesu ngokuthi “mphristi ophakemeko [ohlezi] ngesidleni sesihlalo sobukhosi sakaZimu oMkhulu ezulwini.” (Heb. 8:1) UJesu “msizethu kuBaba.” (1 Jwa. 2:1) Sithokoza khulu ngebanga lokuthi uJehova usinikele umPhristi oPhakemeko onezwela nozwisisa ukubogaboga kwethu begodu “osincengelako”! (Rom. 8:34; Heb. 4:15) Sibabantu abanesono, yeke ngaphandle komhlatjelo kaJesu bengekhe sikghone ukutjhidela kuJehova ngomthandazo. Akunakuzaza ukuthi nawe uyavuma bona angeze sakghona ukutjengisa uJehova ngokupheleleko ukuthi simthokoza kangangani ngesipho asiphe sona—okusisipho sendodanakhe ethandekako!

13. Ngobusuku bangaphambi kokuhlongakala kwakhe, uJesu watjengise njani ukuthi uyabathanda abafundi bakhe?

¹³ Ngobusuku bangaphambi kokuhlongakala kwakhe, uJesu wathandaza isikhathi eside, abawela abafundi bakhe kuBabakhe ukuthi ‘abavikele ngebanga lomumbi.’ (Jwa. 17:15) Lesi bekusisenzo sethando! UJesu bekazokuqalana nesitjhijilo esibudisi nanyana kunjalo bekatshwenyeke ngehlalakuhle yabapostoli bakhe.

14. Singatjengisa njani ukuthi siyabathanda abafowethu nabodadwethu?

¹⁴ Nasilingisa uJesu, angekhe sidzimelele kilokho okutlhogwa ngithi kwaphela. Kunalokho, sizokuthandazela nabafowethu nabodadwethu. Nasenza njalo, silalela umyalo kaJesu wokuthi sithandane begodu sitjengisa uJehova ukuthi sibathanda kangangani abafowethu nabodadwethu. (Jwa. 13:34) Ukuthandazela abafowethu nabodadwethu akusikumorosa isikhathi. iliZwi lakaZimu lisitjela ukuthi, “ukurabhela komuntu olungileko kunomphumela onamandla.”—Jak. 5:16.

15. Kubayini abafowethu nabodadwethu batlhoga imithandazwethu?

¹⁵ Abafowethu nabodadwethu bayayitlhoga imithandazwethu ngombana  baqalana neenlingo ezinengi. Singabawa uJehova abasize bakghodlhelelele ukugula, iinhlekelele zemvelo, izipi, ukuhlunguphazwa namkha ezinye iintjhijilo. Singathandazela abafowethu nabodadwethu abasebenza budisi ukutlhogomela abanye. Kungenzeka kunomuntu omaziko oqalene neentjhijilwezi. Kubayini ungambizi ngegama emthandazwenakho? Sitjengisa ukuthi sinethando lamambala ngokubawa uJehova abasize bakghodlhelele.

16. Kubayini kufuze sithandazele labo abadosa phambili?

¹⁶ Labo abadosa phambili ebandleni bayithabela khulu imithandazo yabanye begodu bayazuza kiyo. Iqiniso lalokho silibona emezwini kampostoli uPowula owatlola wathi: “Ningithandazele nami bona nginikelwe amezwi nangivula umlomami, ukuze ngikghone ukukhuluma ngesibindi ekwembuleni ifihlo ecwengileko yeendaba ezimnandi.” (Efe. 6:19) Nathi namhlanjesi, sinabafowethu abanengi abasebenza budisi ekudoseni phambili. Sitjengisa ukuthi siyabathanda ngokubawa uJehova abusise umsebenzabo.

17-18. Ngibuphi ubujamo esingafumana kibo ilungelo lokuthandazela abanye begodu ngikuphi ekufuze sikukhumbule?

¹⁷ Ngezinye iinkhathi, sinikelwa ithuba lokuthandazela abanye. Ngokwesibonelo, udadwethu oraga isifundo seBhayibheli angabawa udade akhamba naye bona athandaze. Udadwethu ovakatjhileko kungenzeka angamazi kuhle umfundi, yeke angabawa ukuthandaza nakuphela isifundo. Ebujamwenobo, kuzokuba lula ngaye ukuthi akhulume ngeentlhogo zomfundi emthandazwenakhe.

¹⁸ Umfowethu anganikelwa ilungelo lokuthandaza emhlanganweni wekonzo namkha webandla. Abafowethu abanikelwe ilungelwelo kufuze bakhumbule umnqopho womhlangano loyo. Umthandazo akukafuzi usetjenziselwe ukweluleka amalunga webandla namkha ukwenza izaziso. Emihlanganweni yebandla eminengi, imizuzu emihlanu ibekelwe ukubhina nokuthandaza, yeke umfowethu othandazako akukafuzi asebenzise “amezwi amanengi,” khulukhulu nakenza  umthandazo wangaphambi kokuthoma komhlangano.—Mat. 6:7.

19. Khuyini ezosisiza silungele ilanga lakaJehova lokwahlulela?

¹⁹ Kufuze senze ukuthandaza kube yinto eqakathekileko ekuphileni kwethu njengombana ilanga lakaJehova lokwahlulela litjhidela. Endabeni le, uJesu wathi: “Hlalani niphapheme ngasosoke isikhatheso nibawe bona niphumelele ekubalekeleni zoke izintwezi okufuze zenzeke.” (Luk. 21:36) Ukuhlala sithandaza kuzosisiza sibe netjhebiswano elihle noZimu begodu ilanga lakhe lingasifikeli singakalindeli.

20. Imithandazwethu ingaba njani njengetjhwalo elinuka kamnandi?

²⁰ Sicoce ngani bekube nje? Silithokoza khulu ilungelo esinalo lokuthandaza. Imithandazwethu kufuze idzimelele khulu kilokho okukhambisana nomnqopho kaJehova. Kufuze sitjengise ukuthokoza ngeNdodana kaZimu nangomBuswakhe besithandazele abafowethu nabodadwethu. Liqiniso uJehova ufuna sithandazele izinto esizitlhogako besithandazele nokuthi sihlale sinokukholwa okuqinileko. Nasicabangisisa ngalokho esizokutjho emthandazwenethu sitjengisa ukuthi siliqala njengeliqakathekileko ilungelo lethu lomthandazo. Esizokutjho kuzokuba njengetjhwalo elinuka kamnandi kuJehova—“okumthokozisako.”—IzA. 15:8.