1. Ngimaphi amaqiniso owawafundako nawuthoma ukufunda iBhayibheli?

 UYAKHUMBULA mhlana uthoma ukufunda iBhayibheli? Kungenzeka kwakurara ukufumana ukuthi uZimu unegama. Kungenzeka wazizwa utjhaphulukile ukufumana ukuthi uZimu akahlunguphazi abantu esirhogweni. Kungenzeka yakuthabisa indaba yokuthi uzobabona godu abahlongakeleko obathandako nokuthi uzokuhlala nabo ephasini eliyipharadesi.

2. Ngaphezu kokufunda iqiniso leBhayibheli, ngiyiphi ituthuko owayenzako? (Efesu 5:1, 2)

² Nawulokhu ufunda iliZwi lakaZimu kulapho ithando lakho ngoJehova lakhula khona. Ithandwelo lakwenza wasebenzisa okufundileko. Wenza iinqunto ezihle ezisekelwe eenkambiswenilawulo zeBhayibheli. Wafunda ukucabanga nokwenza izinto ezilungileko ngombana bewufuna ukuthabisa uZimu. Njengalokha umntwana alingisa umbelethakhe onethando, nawe bewulingisa uBabakho onethando.—Funda kwebe-Efesu 5:1, 2.

3. Ngimiphi imibuzo esingazibuza yona?

³ Kungenzeka siyazibuza: ‘Kghani ithando lami ngoJehova liqinile nje kunalokha nangithoma ukuba mKrestu? Ngemva kobana ngibhajadisiwe, inga-kghani ngibe nobuntu obufana nebakaJehova—khulukhulu ngokuthi ngithande abafowethu nabodadwethu?’ Nange “ithando ebewunalo ekuthomeni” selipholile, ungapheli amandla. Kwenzeka into efanako nemaKrestwini wekhulu lokuthoma. UJesu akhenge awalahlele izandla, nathi akasilahleli izandla. (IsAm. 2:4, 7) Uyazi  ukuthi singalivuselela ithando ebesinalo nasithoma ukufunda iqiniso.

4. Khuyini esizokucoca ngayo esihlokwenesi?

⁴ Isihlokwesi sizokukhuluma ngokuthi singaragela njani phambili sikhulisa ithando esinalo ngoJehova nangabanye. Ngemva kwalokho sizokufunda ngezinye izinto ezihle ezizokwenzeka nasithanda abafowethu nabodadwethu khulu.

5-6. Ngiziphi iintjhijilo umpostoli uPowula aqalana nazo nakenza umsebenzakhe begodu khuyini eyamsiza waragela phambili alotjha uJehova?

⁵ Umpostoli uPowula bekakuthabela ukulotjha uJehova kodwana bekungasilula ngaso soke isikhathi. UPowula bekakhamba amabanga amade begodu bekungasilula ukukhamba ngeenkhathezo. Ngezinye iinkhathi ekhambweni lakhe bekaqalana ‘neengozi zemilanjeni, neengozi zabadlelezeli.’ Kwakhe kwaba neenkhathi lapho amanabakhe ambetha khona. (2 Kor. 11:23-27) Esikhathini esinengi abafowabo abamaKrestu bebatjengisa ukungathokozi ngemizamo ayenzako bona abasize.—2 Kor. 10:10; Flp. 4:15.

⁶ Khuyini eyasiza uPowula bona aragele phambili alotjha uJehova? UPowula wafunda okunengi ngobuntu bakaJehova emiTlolweni nakilokho okwamenzakalelako. Waqiniseka ukuthi uJehova uZimu uyamthanda. (Rom. 8:38, 39; Efe. 2:4, 5) Lokho kwamenza wathanda uJehova khulu. UPowula watjengisa ukuthi uyamthanda uJehova ‘ngokusiza abacwengileko nokuragela phambili abasiza.’—Heb. 6:10.

7. Ngiyiphi indlela esingakhulisa ngayo ithando lethu ngoJehova?

⁷ Singakhulisa indlela esithanda ngayo uZimu ngokuthi sifunde iliZwi lakhe. Njengombana ufunda iBhayibheli, linga ukubona ukuthi ingcenye ngayinye ivezani ngoJehova. Zibuze: ‘Indaba le itjengisa njani ukuthi uJehova uyangithanda? Inginikela maphi amabanga wokuthanda uJehova?’

8. Umthandazo ungasisiza njani sikhulise indlela esithanda ngayo uZimu?

⁸ Enye indlela esingakhulisa ngayo ithando lethu ngoJehova, kukuthi sithandaze kuye qobe besimtjele indlela esizizwa ngayo. (Rhu. 25:4, 5) UJehova uzoyiphendula imithandazwethu. (1 Jwa. 3:21, 22) U-Khanh, udadwethu we-Asia, uthi: “Ekuthomeni, ithando lami ngoJehova belisekelwe elwazini kodwana ithandwelo lakhula khulu nangibona indlela aphendule ngayo imithandazwami. Lokhu kwangenza ngafuna ukwenza izinto ezimthabisako.” b

9. UThimothi watjengisa njani ukuthi bekathuthuka ekutjengiseni ithando?

⁹ Ngemva kokuba mKrestu uPowula wahlangana nesokana eliseselitjha uThimothi. UThimothi bekathanda uJehova, athanda nabantu. UPowula wathi kumaKrestu weFilipi: “Anginaye omunye onomkhumbulo ofana newakhe ozonitlhogomela kwamambala kilokho okunitshwenyako.” (Flp. 2:20) La uPowula bekangakhulumeli ikghono lakaThimothi lokuhlela izinto namkha lokuba sikhulumi, kodwana bekabona ukuthi uThimothi uthanda abafowabo nabodadwabo khulu. Akunakuzaza ukuthi amabandla uThimothi ebekawakhambela bewahlala aqale phambili ukumbona.—1 Kor. 4:17.

10. U-Anna nendodakhe batjengise njani ukuthi bayabathanda abafowabo nabodadwabo?

¹⁰ Nathi sifuna iindlela esingasiza ngazo  abafowethu nabodadwethu. (Heb. 13:16) Cabanga ngalokho okwenzeka ku-Anna okukhulunywe ngaye esihlokweni esidlulileko. Ngemva kwesiwuruwuru esinamandla, yena nendodakhe bavakatjhela umndeni waboFakazi bafumana ukuthi isiwuruwuru sitjhabalalise iphahla lendlwabo. Ngebanga lalokho umndeni lo bewunganazo izambatho ezihlwengileko. U-Anna uthi: “Sathatha izambatho zabo sazivasa sazibuyisela kibo zi-ayiniwe begodu zibhinciwe. Kithi, lokhu bekungasiyinto ekulu kodwana kwabangela bona sibe bangani bekube kunamhlanjesi.” Ithando u-Anna nendodakhe abanalo ngabafowabo nangabodadwabo labenza bafuna ukubasiza.—1 Jwa. 3:17, 18.

11. (a) Abanye bazizwa njani ukuthi siyabathanda? (b) NgokwezAga 19:17 uJehova usabela njani nasitjengisa ithando?

¹¹ Nasinomusa begodu sitjengisa ukuthi siyabathanda abanye, bazokubona ukuthi silinga ukulingisa uJehova. Kungenzeka bathokoze umusa esiba nawo kibo ukudlula indlela thina esicabanga ngayo. U-Khanh ekhe kwakhulunywa ngaye ngaphambilini, uyabakhumbula labo abamsizako. Uthi: “Ngibathokoza boke abadadwethu abakhamba nami esimini. Bebeza bazongithatha, bangimeme ngiyokudla nabo bebaqiniseke ukuthi ngifika ngiphephile ekhaya. Ngilemuka nje bona bekumsebenzi omnengi kibo. Bakwenza ngethando. Kuliqiniso ukuthi akusiwo woke umuntu ozosithokoza ngalokho esimenzela khona. U-Khanh akhuluma ngalabo abamsizako, uthi: “Ngifisa ngathana ngingababhadela ngebanga lazo zoke izinto abangenzele zona kodwana angazi ukuthi bahlalaphi. Nanyana kunjalo, uJehova uyabazi begodu uzongibhadelela bona.” U-Khanh uqinisile. UJehova ubona nesenzo esincani somusa  esisenzela abanye nanyana singaba sincani kangangani. Uqala lokho njengomhlatjelo oligugu nesikolodo azosibhadela.—Funda izAga 19:17.

12. Abafowethu bangatjengisa njani ukuthi bayalithanda ibandla? (Qala neenthombe.)

¹² Nange umfowethu, ungabatjengisa njani abanye ukuthi uyabathanda bewubasize? Umfowethu osesemutjha u-Jordan wabuza umdala ukuthi khuyini angayenza bona asize ebandleni. Umdala lo wambuka ngetuthuko esele ayenzile wamnikela neseluleko sokuthi angakwenza njani okungeziweko. Ngokwesibonelo, wamkhuthaza bona afike kusesenesikhathi eWolweni lomBuso alotjhise abanye, aphendule esifundweni, atjhumayele nesiqhema sakhe sesimu, afune neendlela angasiza ngazo abanye. U-Jordan nakasebenzisa iselulekwesi bekangafundi amakghono amatjha kwaphela kodwana ithando lakhe ngabafowethu nabodadwethu lakhula. U-Jordan wafunda ukuthi umfowethu nakaba yinceku esizako, akathomi lapho ukusiza abanye kunalokho uragela phambili abasiza.—1 Thim. 3:8-10, 13.

13. Ithando lamsiza njani umfowethu u-Christian bona afanelekele ukuba mdala godu?

¹³ Kuthiwani nangabe khewaba yinceku esizako namkha umdala? UJehova uyawukhumbula umsebenzi owawenzako nethando elakukhuthaza bona uwenze. (1 Kor. 15:58) Uyalibona nethando oragela phambili ulitjengisa. Umfowethu u-Christian wadana khulu lokha nakehliswa ekubeni ngumdala. Nanyana kunjalo, uthi: “Ngaqunta ukwenza koke okusemandlenami bona ngilotjhe uJehova kungayi ngokuthi ngimdala namkha awa.” Ngokukhamba kwesikhathi wabekwa bona abe mdala godu. U-Christian uyavuma uthi: “Bengithukiwe ukuthi ngibe mdala godu.  Kodwana ngaqunta ukuthi nangabe uJehova ngomusakhe uyangivumela ukuthi ngibe mdala godu, ngizokwenza ngebanga lokuthi ngiyamthanda begodu ngithanda nabafowethu.”

14. Ufundani kilokho okwatjhiwo ngudadwethu we-Georgia?

¹⁴ Iinceku zakaJehova ziyabathanda nabomakhelwana. (Mat. 22:37-39) Ngokwesibonelo u-Elena, udadwethu we-Georgia, uthi: “Ekuthomeni into ebeyingikhuthaza bona ngitjhumayele kuthanda kwami uJehova. Kodwana njengombana ithando ebenginalo ngoBaba osezulwini likhula, nendlela ebengithanda ngayo abantu yakhula. Ngalinga ukucabangisisa ngemiraro abaqalana nayo nokuthi ngiziphi iinhloko ezingabathinta ihliziyo. Ukucabanga ngabo ngendlela le bekungenza ngifune khulu ukubasiza.”—Rom. 10:13-15.

15-16. Njengombana kutjengiswe esithombeni, ngiziphi iimbusiso ezilethwa kuthanda abanye?

¹⁵ Nasithanda abafowethu akusibo kwaphela abazuzako. Ngemva kokuthoma kwesindabelaphi i-COVID-19, umfowethu u-Paolo nomkakhe basiza abodadwethu abanengi abalupheleko ukusebenzisa iinsetjenziswa zabo ze-elekthroniki bona batjhumayele. Omunye udadwethu obekakufumana kubudisi ukusebenzisa isisetjenziswa sakhe se-elekthroniki wagcina akghona. Wakghona ukusisebenzisa amemela iinhlobo zakhe esiKhumbuzweni. Abama-60 babo babakhona  ngethungelelwano levidiyo! Udadwethu lo neenhlobo zakhe boke bazuza emizamweni ka-Paolo nomkakhe. Ekukhambeni kwesikhathi udade lo watlolela u-Paolo wathi: “Sithokoza khulu ukusisiza njengombana siluphele. Angekhe ngiyikhohlwe indlela uJehova asitlhogomele ngayo nokuthi usebenze budisi kangangani bona usisize.”

¹⁶ Izenzakalo ezinjengalezi zafundisa u-Paolo isifundo esiqakathekileko. Wafunda ukuthi ithando liqakatheke khulu ukudlula ilwazi namkha ikghono. Uthi: “Khengaba mbonisi wesigodi. Namhlanjesi ngiyalemuka ukuthi abarhuweleli kungenzeka bazikhohliwe iinkulumo zami kodwana basayikhumbula indlela engabasiza ngayo.

17. Ngubani omunye ozuzako nasitjengisa ithando?

¹⁷ Nathi nasithanda abanye, siyazuza ngeendlela ezingakalindeleki. U-Jonathan ohlala e-New Zealand, uyakufakazela lokho. Ngomunye uMgqibelo ngemva kwamadina kutjhisa, wabona iphayona litjhumayela eqadi kwendlela. Waqunta ukusebenza nephayoneli ngaboMgqibelo abalandelako ngemva kwamadina. Ngesikhatheso akhenge alemuke bona uzokuzuza kangangani esenzweni somusesi. U-Jonathan uthi, “Ngesikhatheso bengingakuthabeli ukuya esimini. Kodwana njengombana ngilalele indlela iphayoneli elifundisa ngayo nokubona indlela eliphumelela ngayo emsebenzini lo, ngathoma ukukuthanda ukutjhumayela. Ngafumana umngani owangisiza ngathuthukisa indlela engithanda ngayo uJehova, ngathabela isimu begodu ngatjhidela kuJehova.”

18. UJehova ufuna senzeni?

¹⁸ UJehova ufuna bona soke sikhulise indlela esimthanda ngayo nesithanda ngayo abanye. Njengombana sifundile singakhulisa ithando lethu ngoJehova ngokuthi sifunde iliZwi lakhe, sicabangisise ngalo begodu sikhulume naye ngomthandazo. Singakhulisa indlela esithanda ngayo abafowethu nabodadwethu ngokuthi sibasize. Njengombana ithando lethu likhula, sizokutjhidelana khulu noJehova nabafowethu nabodadwethu. Sizokuthabela ubunganobo ngokungapheliko!