1. Uzizwa njani ngeqiniso?

 ABANTU bakaJehova bayalithanda iqiniso elifumaneka eliZwini lakhe. Sakhele ukukholwa kwethu kilo. (Rom. 10:17) Sikholwa ukuthi uJehova wakhe ibandla lobuKrestu ‘njengesika nesisekelo seqiniso.’ (1 Thim. 3:15) Sikhetha ‘ukulalela labo abadosa phambili’ abahlangana nathi, njengombana bahlathulula iqiniso eliseBhayibhelini begodu basinikela isinqophiso esikhambisana nentando kaZimu.—Heb. 13:17.

2. Ngokuya ngomtlolo kaJakopo 5:19 ngiyiphi ingozi esiqalana nayo ngemva kokufunda iqiniso?

² Nanyana kunjalo, ngemva kokwamukela iqiniso nendima edlalwa yihlangano kaZimu ekusinikeleni iinqophiso esingazithemba, singaphambukiswa endleleni. (Funda uJakopo 5:19.) USathana angathaba khulu nakangasilisisa ukuthemba iBhayibheli namkha isinqophiso esisifumana ehlanganweni kaZimu.—Efe. 4:14.

3. Kubayini sitlhoga ukubambelela eqinisweni? (Efesu 6:​13, 14)

³ Funda kwebe-Efesu 6:​13, 14. Kungasikade, uDeveli uzokusebenzisa amala ukukhohlisa iintjhaba zoke bona ziphikisane noJehova. (IsAm. 16:​13, 14) Siyazi nokuthi uSathana uzokwenza koke okusemandlenakhe ukuphambukisa abantu bakaZimu. (IsAm. 12:9) Kuqakathekile ukuzibandula bona sikghone ukuhlukanisa uqiniso namala ukuthi sikhambe eqinisweni. (Rom. 6:17; 1 Pit. 1:22) Kuqakathekile lokhu  nasizakusinda hlangana nesizi elikhulu.

4. Sizokucoca ngani esihlokwenesi?

⁴ Esihlokwenesi, sizokubona ubuntu obubili obutlhogekako obuzosisiza sikghone ukuhlukanisa iqiniso elivela eBhayibhelini nokwamukela isinqophiso esivela ehlanganweni kaZimu. Ngemva kwalokho, sizokucoca ngezinto ezintathu ekufuze sizenze nasizakuragela phambili sibambelele eqinisweni.

UBUNTU ESIBUTLHOGAKO NASIZAKUBONA IQINISO

5. Ukusaba uJehova kuzosisiza njani sibone iqiniso?

⁵ Saba uJehova. Nasele sisaba uJehova ngendlela efaneleko, sizomthanda khulu kangangokuthi singafuni ukumzwisa ubuhlungu. Sizokufuna ukuhlukanisa hlangana kokulungileko nokungakalungi, phakathi kweqiniso namala bona sithandwe nguJehova. (IzA. 2:​3-6; Heb. 5:14) Akukafuzi sivumele ukusaba abantu kudlule ithando esinalo ngoJehova ngombana kanengi okuthabisa abantu, akumthabisi uJehova.

6. Ukusaba kwawenza njani amakhosana alitjhumi wakwa-Israyeli atjhugulula iqiniso?

⁶ Nange sisaba abantu ukudlula indlela esisaba ngayo uZimu, singathoma ukukholwa izinto ezingasi liqiniso ngoJehova. Cabanga ngesibonelo samakhosana ali-12, akhamba ayokuhlola inarha uJehova athembisa ukuyinikela ama-Israyeli. Iinhloli ezilitjhumi zavumela ukusaba kwazo amaKanana kwaba namandla ukudlula ukuthanda uJehova. Zatjela ama-Israyeli ukuthi: “Angekhe sikghone ukukhuphuka siyokulwa nabantwaba, ngombana banamandla kunathi.” (Num. 13:​27-31) Ngokwalokho okubonwa mumuntu, amaKanana bekanamandla ukudlula ama-Israyeli. Nanyana ngubani owathi ama-Israyeli bekangekhe akghone  ukuhlula amanabawo, bekangacabangi ngoJehova. Iinhloli ezilitjhumeza bakufuze zidzimelele kilokhu uJehova afuna ama-Israyeli akwenze. Bekufuze godu zicabangisise ngalokho uJehova azenzele khona ingasi kade. Ngokwenza njalo, bezizokulemuka ukuthi amandla wamaKanana bekangasililitho nakamadaniswa namandla kaJehova. Ngokungafani neenhloli ezinganakukholwa, uJotjhuwa noKalebi bebafuna ukuthabisa uJehova. Batjela abantu ukuthi: “Nasithabisa uJehova uzosisa enarheni le begodu uzosinikela yona.”—Num. 14:​6-9.

7. Singayiqinisa njani indlela esisaba ngayo uJehova? (Qala nesithombe.)

⁷ Nasifuna ukuthuthukisa indlela esisaba ngayo uJehova, kufuze sidzimelele ekumthabiseni kizo zoke iinqunto esisenzako. (Rhu. 16:8) Njengombana ufunda iBhayibheli, zibuze, ‘Ngathana bengisebujamenobu bengizokwenza njani?’ Ngokwesibonelo, zicabange ulalele njengombana amakhosana wakwa-Israyeli alitjhumi anikela umbiko ongakhuthaziko. Bewuzowukholwa umbiko lowo na bewuvumele ukusaba abantu kukuhlule namkha bewuzokuvumela ithando lakho ngoJehova nokufisa kwakho ukumthabisa kukuqinise? Isizukulwana sama-Israyeli soke sabhalelwa kubona iqiniso elakhulunywa nguJotjhuwa noKalebi. Ngebanga lalokho, salahlekelwa lithuba lokungena eNarheni yesiThembiso.—Num. 14:​10, 22, 23.

8. Ngibuphi ubuntu ekufuze silwele ukuba nabo begodu kubayini?

⁸ Ukuthobeka. UJehova wembula iqiniso ebantwini abathobekileko. (Mat. 11:25) Ngokuthobeka, samukela isizo lokufunda iqiniso. (IzE. 8:​30, 31) Nanyana kunjalo, kufuze sitjheje bona singazikhakhazisi. Ukuzikhakhazisa kungasenza sibone ngasuthi imibonwethu iqakatheke ngendlela efanako neenkambisolawulo zemiTlolo nesinqophiso esivela ehlanganweni kaJehova.

9. Singahlala njani sithobekile?

⁹ Bona siragele phambili sithobekile, kufuze sikhumbule indlela esibancani ngayo nasimadaniswa nobukhulu bakaJehova. (Rhu. 8:​3, 4) Singabawa noJehova asisize sithobeke bona sikghone ukufundiseka. UJehova uzosisiza sibone ukuqakatheka kwendlela acabanga ngayo ngeliZwi lakhe nangehlanganwakhe ukudlula indlela esicabanga ngayo. Nawufunda iBhayibheli, qala indlela uJehova azizwa ngayo ngokuthobeka nendlela ahloye ngayo ukuzikhakhazisa, ukuba nekani nokuzibona ungcono kunabanye. Tjheja khulu bona uhlala uthobekile nakwenzeka ufumana ilungelo lokulotjha uZimu elikwenza ube nelawulo elithileko namkha elenza ube semehlweni wabantu.

SINGARAGELA NJANI PHAMBILI SIBAMBELELE EQINISWENI?

10. Ngubani uJehova amsebenzisa ukunikela abantu bakhe iinqophiso?

¹⁰ Ragela phambili uthemba iinqophiso ezivela ehlanganweni kaJehova. Ngesikhathi saka-Israyeli wakade, uJehova bekasebenzisa uMosi noJotjhuwa bona banikela abantu iinqophiso zakhe. (Jotj. 1:​16, 17) Bekuwakhambela kuhle ama-Israyeli nakaqala amadoda la njengabajameli bakaJehova uZimu. Ngokukhamba kwesikhathi, nakuthonywa ibandla lobuKrestu, abapostoli abali-12 banikela isinqophiso. (IzE. 8:​14, 15) Ngemva kwalokho, isiqhemeso sakhuliswa sahlanganiswa nabanye abadala beJerusalema. Ngokulandela isinqophiso asifumana emadodeni athembekileko la, “amabandla aragela phambili aqiniswa ekukholweni begodu  anda ngesibalo qobe langa.” (IzE. 16:​4, 5) Namhlanjesi, uJehova usasibusisa nasilandela isinqophiso esivela ehlanganwenakhe. UJehova angazizwa njani nasingafuni ukulalela labo abakhethileko? Singaphendula umbuzo lo ngokuthi sicabange ngalokho okwenzeka ngesikhathi ama-Israyeli anqotjhiswa eNarheni yesiThembiso.

11. Kwenzekani kuma-Israyeli wakade aphikisana nokuthi uZimu ukhethe uMosi bona adose phambili? (Qala nesithombe.)

¹¹ Hlangana nekhambo lawo eliya eNarheni yesiThembiso, amadoda ebekanelawulo elithileko aphikisana noMosi nendima uJehova ebekamabele bona ayenze. Athi: “Ihlangano yoke icwengile [ingasi uMosi kwaphela] begodu uJehova uhlangana nayo.” (Num. 16:​1-3) Nanyana bekuliqiniso ukuthi kuZimu “ihlangano yoke” beyicwengile kodwana uJehova bekakhethe uMosi bona anqophise abantu bakhe. (Num. 16:28) Ngokusola uMosi, iinhlubukezi bezisola uJehova. Akhenge zidzimelele kilokho uJehova akufunako, zadzimelela kilokho zona ezikufunako, amandla nedumo. UZimu wabulala abadosiphambili beenhlubukeza kuhlanganise neenkulungwana ebezivumelana nazo. (Num. 16:​30-35, 41, 49) Namhlanjesi singaqiniseka ukuthi uJehova akavumelani nabantu abangahloniphi amalungiselelo wehlangano.

12. Kubayini singakghona ukuragela phambili sithemba ihlangano kaJehova?

¹² Singahlala siyithemba ihlangano kaJehova. Nakukhanyako bona kutlhogeka amatjhuguluko athileko endleleni esizwisisa ngayo iqiniso eliseBhayibheli namkha indlela umsebenzi womBuso owenziwa ngayo, abadosa phambili bayawenza amatjhuguluko atlhogekako. (IzA. 4:18) Ibanga eliyihloko elibenza benze njalo kukuthi bafuna ukuthabisa uJehova. Benza koke abangakwenza ukusekela iinqunto zabo eliZwini lakaZimu,  ekungilezo woke umuntu ekufuze anamathele kizo.

13. Siyini ‘isisekelo samezwi azuzisako’ begodu kufuze senzeni ngaso?

¹³ “Ragela phambili ubambelele esisekelweni samezwi azuzisako.” (2 Thim. 1:13) ‘Isisekelo samezwi azuzisako’ siqalisele eemfundisweni zobuKrestu ezifumaneka eBhayibhelini. (Jwa. 17:17) Iimfundiswezi zisisekelo sakho koke esikukholelwako. Ihlangano kaJehova isifundise bona sinamathele eenkambiswenezo. Nasenza njalo, sizokubusiswa.

14. Amanye amaKrestu alisa njani ukubambelela ‘esisekelweni samezwi azuzisako’?

¹⁴ Kuzokwenzekani nange silisa ukunamathela ‘esisekelweni samezwi azuzisako’? Cabanga nganasi isibonelo. Ekhulwini lokuthoma, amanye amaKrestu arhatjha indaba emamala yokuthi isiphelo sele sifikile. Kungenzeka bekunencwadi abantu ebebacabanga bona itlolwe ngumpostoli uPowula eyabenza bacabanga njalo. Amanye amaKrestu weThesalonika akhenge azitshwenye ngokwenza irhubhululo, awakholwa amala lawo begodu awarhatjha. Bewangekhe akhohliseke ngathana akhumbula izinto uPowula awafundisa zona nakasese nawo. (2 Thes. 2:​1-5) UPowula wayelelisa abafowabo bona bangakhi bakholwa nanyana yini abayizwako. Bona awasize esikhathini esizako, waphetha incwadakhe yesibili etjhinga kwebeThesalonika ngamezwi la: “Nakhu ukulotjhisa kwami, mina Powula, ngesami isandla okulitshwayo kizo zoke iincwadi, le yindlela engitlola ngayo.”—2 Thes. 3:17.

15. Singazivikela njani emaleni abonakala aliqiniso? Nikela isibonelo. (Qala neenthombe.)

¹⁵ Khuyini esiyifundako emezwini kaPowula atjhinga kwebeThesalonika? Nange sizwa okuthileko okungakhambisani nalokho esikufunda eBhayibhelini namkha nasizwa indaba ethusako, kufuze sisebenzise ukuhlakanipha. Ngesikhathi se-Soviet Union, amanabethu anikela abafowethu incwadi okuthiwa ivela emzimkhulu wephasi  loke. Incwadi leyo beyikhuthaza abanye abafowethu bona babe nehlangano ehlukileko nezijameleko. Incwadi leyo beyibonakala ithembekile. Kodwana abafowethu abathembekileko akhenge bakhohliswe. Bakghona ukubona ukuthi umlayezo osencwadini awukhambisani nalokho abakufundisiweko. Namhlanjesi amanabethu asebenzisa itheknoloji ukusihlangahlanganisa nokusiphadlhula phakathi. Kunokobana ‘sisikinyeke msinyana emkhumbulwenethu,’ singazivikela ngokuthi sicabange ukuthi esikuzwako namkha esikufundako kuyakhambisana na namaqiniso esele siwazi.—2 Thes. 2:2; 1 Jwa. 4:1.

16. Ngokomtlolo webeRoma 16:17, 18, khuyini ekufuze siyenze abanye nabalisa iqiniso?

¹⁶ Hlalani nibumbene nabantu abathembekileko kuJehova. UZimu ufuna sibumbane njengombana simlotjha. Sizokuhlala sibumbene nasinamathele eqinisweni. Nanyana ngubani ophambuka eqinisweni ubanga ukuhlukana ebandleni. Yeke uZimu uyasiyelelisa ukuthi, ‘sibalekele.’ Nakungasi njalo, thina ngokwethu singadeda eqinisweni.—Funda kwebeRoma 16:​17, 18.

17. Khuyini esizoyizuza ngokubona nokubambelela ngokuqinileko eqinisweni?

¹⁷ Nasilibonako iqiniso besinamathele kilo, sizokuhlala sitjhidelene noJehova begodu ukukholwa kwethu kuzokuqina. (Efe. 4:​15, 16) Sizokuvikeleka eemfundisweni zakaSathana ezimamala, sizokuhlala sitlhogonyelwa nguJehova hlangana nesikhathi sesizi elikhulu. Bambelelani ngokuqinileko eqinisweni, “uZimu wokuthula uzokuba nani.”—Flp. 4:​8, 9.