1. Njengombana kutlolwe encwadini kaMtjhumayeli 7:20, ngiliphi iqiniso elavezwa yiKosi uSolomoni?

 IKOSI uSolomoni yatlola yathi: “Akunamuntu olungileko ephasini owenza okuhle kwaphela, angoni nakanye.” (UMtj. 7:20) Amezwi la aliqiniso. Soke sizizoni. (1 Jwa. 1:8) Yeke sitlhoga ukulitjalelwa nguZimu nabanye abantu.

2. Uzizwa njani nawulitjalelwa mnganakho omkhulu?

² Akunakuzaza ukuthi uyasikhumbula isikhathi owaphatha ngaso umnganakho omkhulu kabuhlungu. Bewufuna nibe bangani godu, yeke wabawa ukulitjalelwa ngokusuka ehliziyweni. Wazizwa njani nakakulibalela ngokutjhaphulukileko? Kghani wazizwa ungcono? Iye, begodu bewuthabile!

3. Sizokucoca ngani esihlokwenesi?

³ Sifuna ukuthi uJehova abe mnganethu omkhulu kodwana ngezinye iinkhathi, sizokutjho besenze izinto ezimdanisako. Kubayini siqiniseka ukuthi uJehova ukulungele ukulibalela? Ukulibalela kwakaJehova kuhluke njani nakumadaniswa nendlelethu yokulibalela? Begodu bobani abalitjalelwa nguZimu?

4. Kubayini siqiniseka ngokuthi uJehova ukulungele ukulibalela?

⁴ IliZwi lakaZimu lisiqinisekisa ngokuthi uJehova ukulungele ukulibalela. Lokha uJehova nakazihlathulula kuMosi eNtabeni iSinayi, wathumela ingilozi eyathi: “USomnini, uSomnini unguZimu onomusa nesirhawu, ubuthaka ekusilingekeni, uzele ukwethembeka neqiniso! Uhlala athembekile eenkulungwaneni ngeenkulungwana zeenzukulwana, ulibalela imilandu, imitjhapho nezono.” (Eks. 34:6, 7) UJehova unguZimu onomusa nesirhawu ohlala  akulungele ukulibalela izoni ezitjhugulukako.—Nerh. 9:17; Rhu. 86:15.

5. NgokweRhubo 103:13, 14, ilwazi elidephileko uJehova analo ngabantu limhlohlozela ukuthi enzeni?

⁵ Njengombana aMdalethu, uJehova wazi koke ngathi. Akhucabange, wazi yoke imininingwana ngawo woke umuntu osephasini. (Rhu. 139:15-17) Ubona yoke imitjhapho esayifumana ebabelethini bethu bokuthoma. Ukungezelela kilokho, ukwazi koke okwenzeke ekuphileni kwethu okusenze saba babantu esingibo namhlanjesi. Ilwazi elidephileko uJehova analo ngabantu limhlohlozela ukuthi enzeni? Limhlohlozela ukuthi abe nesirhawu kithi.—Rhu. 78:39; Funda iRhubo 103:13, 14.

6. UJehova utjengise njani ukuthi ukulungele ukusilibalela?

⁶ UJehova utjengisile ukuthi ukulungele ukusilibalela. Uyazwisisa ukuthi ngebanga lezenzo zomuntu wokuthoma, u-Adamu, soke safumana isono nokufa. (Rom. 5:12) Bekungeze kwakghonakala ukuthi sizitjhaphulule esonweni namkha sitjhatjhululwe ngomunye umuntu. (Rhu. 49:7-9) Nanyana kunjalo, uZimethu onethando ube nesirhawu kithi bewenza nelungiselelo lokuthi sitjhaphuluke. Khuyini ayenzako? Njengombana uJwanisi 3:16 aveza, uJehova wathumela iNdodanakhe ebelethwe yodwa bona ihlongakale ngebanga lethu. (Mat. 20:28; Rom. 5:19) UJesu wathatha indawethu, waqalana nesigwebo sokufa ukwenzela ukuthi atjhaphulule nanyana ngubani okholelwa kuye. (Heb. 2:9) Cabanga ukuthi bekubuhlungu kangangani ngoJehova ukubona iNdodanakhe ethandekako ihlongakala kabuhlungu nangendlela ehlazisako. Kwamambala, uJehova bengeze avumele iNdodanakhe ihlongakale ngathana bekangafuni ukusilibalela.

7. IBhayibheli linaziphi iimbonelo zabantu abalitjalelwa nguJehova?

⁷ IBhayibheli lizele ngeembonelo zabantu uJehova abalibalela ngokutjhaphulukileko. (Efe. 4:32) Ngubani ofika emkhumbulwenakho? Kungenzeka ucabanga ngeKosi uManase. Indoda ekhohlakeleko leyo yenza izinto ezimbi phambi kwakaJehova. Yadosa phambili ekulotjheni  kwamala. Yabulala abantwana bayo beyanikela ngabo njengomhlatjelo kibozimu bamala. Wabe wabeka nesithombe esibaziweko sakazimu wamala ethempelini lakaJehova elicwengileko. Nalikhuluma ngaye, iBhayibheli lithi: “Wakhambelela ekwenzeni ubumbi phambi kwakaSomnini, wamthukuthelisa.” (2 Kron. 33:2-7) Nanyana kunjalo, uManase nakatjhuguluka ngokusuka ehliziyweni uJehova wamlibalela ngokutjhaphulukileko. UZimu wabe wamvumela bona abe yikosi godu. (2 Kron. 33:12, 13) Kungenzeka ucabanga nangeKosi uDavida, eyenza izono ezikulu phambi kwakaJehova ezihlanganisa ukuya emabhayini nomfazi wenye indoda nokubulala. Nanyana kunjalo, uDavida nakatjhuguluka ngokusuka ehliziyweni begodu avuma imitjhaphwakhe, uJehova wamlibalela. (2 Sam. 12:9, 10, 13, 14) Siyaqiniseka ngokuthi uJehova ukulungele ukulibalela. Njengombana sizokubona, ikghono lakhe lokulibalela lihlukile nalimadaniswa nelabantu.

8. Isikhundla sakaJehova esihlukileko njengomaHluleli silithinta njani ikghono lakhe lokwahlulela?

⁸ UJehova “umGwebi wephasi loke.” (Gen. 18:25) Umahluleli omuhle kufuze awuzwisise kuhle umthetho. Lokho kuliqiniso naziza kuJehova ngombana naphezu kokuthi abe ngumaHlulelethu, unguMnikelimthetho wethu. (Isa. 33:22) Akakho umuntu owazi kuhle ukuthi ngikuphi okulungileko nokungakalungi ngaphandle kwakaJehova. Khuyini okhunye umahluleli omuhle okufuze abe nakho? Kufuze azi yoke imininingwana yecala ngaphambi kokukhipha isahlulelo. UJehova ungumaHluleli ophuma phambili ngombana wazi yoke imininingwana.

9. Ngiliphi ilwazi uJehova analo nakazakuqunta ukuthi uzokulibalela namkha awa?

⁹ Ngokungafaniko nabahluleli abababantu, uJehova uhlala anemininingwana epheleleko ngendaba. (Gen. 18:20, 21; Rhu. 90:8) Akahluleli ngokwalokho abantu abakubonako namkha abakuzwako. Uzwisisa ngokuzeleko ukuthi izenzo zomuntu zithintwa yifuzo, indlela akhuliswe ngayo, indawo ahlala kiyo nobujamo bakhe bomkhumbulo. UJehova ukghona nokufunda ihliziyo. Uyabona ukuthi kubayini umuntu enza okuthileko, ubona iinhloso neemfiso zakhe. Akunalitho elingafihlwa phambi kwakaJehova. (Heb. 4:13) Ngalokho, ukulibalela kwakaJehova kusekelwe elwazini elipheleleko ngendaba.

10. Kubayini sithi izahlulelo zakaJehova zihlala zilungile? (Duteronomi 32:4)

¹⁰ Izahlulelo zakaJehova zihlala zilungile. Akathathi ihlangothi. Ukulibalela kwakhe akuyi ngokuthi umuntu uqaleka njani, unemali, udumile namkha ngamakghonwakhe. (1 Sam. 16:7; Jak. 2:1-4) Akakho ongagandelela uJehova bona enze okuthileko namkha amfumbathise. (2 Kron. 19:7) Iinqunto zakhe azithintwa mazizo. (Eks. 34:7) Akunakuzaza ukuthi ukuzwisisa kwakaJehova nelwazi lakhe elidephileko kumenza abe ngumaHluleli ophuma phambili.—Funda uDuteronomi 32:4.

11. Khuyini ehlukileko ngokulibalela kwakaJehova?

¹¹ Abatloli bemiTlolo yesiHebheru balemuka ukuthi indlela kaJehova yokulibalela ihlukile. Kobunye ubujamo, basebenzise ibizo lesiHebheru elinehlathululo “esetjenziselwa ukuveza indlela uZimu  alibalela ngayo izoni. Ibizweli angekhe lahlathulula indlela elinganiselweko umuntu alibalela ngayo omunye umuntu.” NguJehova kwaphela okghona ukulibalela isoni esitjhugukileko ngokupheleleko. Ngimiphi imiphumela ebakhona lokha uJehova nakasilibalelako?

12-13. (a) Khuyini umuntu ayithabelako nakalitjalelwa nguJehova? (b) Zihlala isikhathi esingangani iinzuzo zokulitjalelwa nguJehova?

¹² Nasamukela ukuthi uJehova usilibalele, sizokuthabela “iinkhathi zokuvuseleleka,” ezifaka hlangana ukuthula komkhumbulo nonembeza ohlwengileko. Indlela le yokulibalela angeze yavela ebantwini kodwana ivela “kuJehova ngokwakhe.” (IzE. 3:19) UJehova nakasilibalelako, usivumela ukuthi sibe bangani bakhe godu, kube ngasuthi akhenge senze isono.

¹³ Ngemva kokuthi uJehova asilibalele, angekhe asibeke umlandu namkha asijezisele isono esifanako. (Isa. 43:25; Jor. 31:34) KuJehova, izono zethu zikude “njengepumalanga idedelene netjingalanga.” * (Rhu. 103:12) Kuyasirara bekusithabise ukucabanga ngendlela ephuma phambili kaJehova yokulibalela. (Rhu. 130:4) Bobani abalitjalelwa nguJehova?

14. Khuyini esiyifundileko bekube nje malungana nokulibalela kwakaJehova?

¹⁴ Njengombana sifundile, isiqunto sakaJehova sokwahlulela asiyi ngokuthi isono besisikhulu namkha sisincani kangangani. Sifunde nokuthi uJehova usebenzisa ilwazi analo njengoMdalethu, uMnikelimthetho nomaHlulelethu nakaqunta ukuthi uzosilibalela namkha awa. Khuyini uJehova ayiqalako?

15. Ngokomtlolo kaLukasi 12:47, 48, ngiyiphi enye yezinto uJehova ayiqalako?

¹⁵ Enye yezinto uJehova aziqalako kukuthi isoni besazi na ukuthi esikwenzako akukalungi. UJesu wakukhanyisa lokhu njengombana kutlolwe encwadini kaLukasi 12:47, 48. (Ufunde.) Umuntu owona ngabomu ngokwenza into azi kuhle ukuthi yimbi begodu ayamukeleki kuJehova, wenza isono esikhulu. Umuntu loyo uzibeka engozini yokungalitjalelwa. (Mar. 3:29; Jwa. 9:41)  Kufuze sivume ukuthi ngezinye iinkhathi siyazi ukuthi esikwenzileko kumbi. Kghani likhona ithemba endabeni ebujamwenobo? Iye! Kunokhunye godu uJehova akuqalako nakazaqunta ukuthi uzosilibalela namkha awa.

16. Kutjho ukuthini ukutjhuguluka begodu kubayini kutlhogeka sitjhuguluke nasizakulitjalelwa nguJehova?

¹⁶ Okhunye uJehova akuqalako kukuthi umuntu owonileko utjhuguluke kwamambala na. Kutjho ukuthini ukutjhuguluka? Kutjho “ukutjhugulula indlela esicabanga ngayo, indlela esenza ngayo izinto nomnqophwethu.” Kuhlanganisa nokuthi umuntu azisole begodu adane ngokumbi akwenzileko namkha ngokungenzi izinto ezilungileko ebekufuze azenze. Umuntu otjhugulukileko akadaniswa bubumbi abenzileko kwaphela kodwana udaniswa nakungabi netjhebiswano elihle noJehova, okubangele bona enze izinto ezimbezo. Khumbula ukuthi iKosi uManase neKosi uDavida benza izono ezikulu, nanyana kunjalo uJehova wabalibalela ngombana batjhuguluka kwamambala. (1 Kho. 14:8) Liqiniso, uJehova kufuze abone ubufakazi bokutjhuguluka kwethu nakazasilibalela. Akukaneli ukudaniswa bubumbi esibenzileko kwaphela. Kufuze sizimisele ukuthatha igadango. * Akhesibone okhunye uJehova akuqalako.

17. Kutjho ukuthini ukuphenduka begodu kubayini kuqakathekile ukuthi sibalekele izono esazenzako? (Isaya 55:7)

¹⁷ Enye into eqakathekileko uJehova ayiqalako kuphenduka. Ukuphenduka kutjho ‘ukuphendukela kuSomnini.’ Ngamanye amezwi, umuntu kufuze alise ukwenza izinto ezimbi athome ukuphila ngendlela uJehova afuna abantu baphile ngayo. (Funda u-Isaya 55:7) Umuntu loyo kufuze atjhugulule ingqondwakhe ukwenzela bona inqotjhiswe kucabanga kwakaJehova. (Rom. 12:2; Efe. 4:23) Kufuze azimisele ukutjhiya imicabango  nezenzo zakhe ezimbi. (Kol. 3:7-10) Liqiniso, ukukholelwa kwethu emhlatjelweni kaKrestu ngikho okwenza uJehova asilibalele abe asihlanze nesonweni. Uzosilibalela nakabona ukuthi senza koke okusemandlenethu ukutjhugulula indlela esiziphatha ngayo.—1 Jwa. 1:7.

18. Khuyini esiyifundileko ngokulibalela kwakaJehova?

¹⁸ Akhe sibuyekeze amaphuzu ambalwa esele sicoce ngawo. UJehova mumuntu olibalela ukubadlula boke ezulwini nephasini. Kubayini sitjho njalo? Kokuthoma, uhlala akulungele ukulibalela. Kwesibili, wazi yoke imininingwana ngathi. Wazi kuhle ukuthi sidalwe njani begodu usebujamweni obuhle bokubona ukuthi sitjhuguluke kwamambala namkha awa. Kwesithathu, uJehova nakasilibalelako kuba ngasuthi uyayisula imitjhaphwethu. Lokhu kusenza sibe nonembenza ohlwengileko besithatjiswe kukwamukelwa nguye.

19. Khuyini engasenza sihlale sithabile nanyana sibabantu abanesono begodu siraga nokwenza imitjhapho?

¹⁹ Iqiniso kukuthi njengombana sinesono, sizokuraga nokwenza imitjhapho. Nanyana kunjalo, ayasiduduza amezwi afumaneka ku-Insight on the Scriptures, Umqulu 2, ikhasi 771, athi: “UJehova unesirhawu begodu uyazi ukuthi abantu bakhe bayabogaboga. Akukafuzi bahlale badanile ngebanga lesono abasifumene njengelifa. (Rhu. 103:8-14; 130:3) Nabenza koke okusemandlenabo ukuthi baphile ngendlela uZimu ayamukelako, bangathaba. (Flp. 4:4-6; 1 Jwa. 3:19-22).” La mamezwi akhuthazako tle!

20. Sizokucoca ngani esihlokweni esilandelako?

²⁰ Kuyasithabisa ukwazi ukuthi uJehova uhlala akulungele ukusilibalela nasizisola ngokusuka ehliziyweni ngezono esizenzileko. Singakulingisa njani ukulibalela kwakaJehova? Ukulibalela kwethu kufana ngaziphi iindlela nokulibalela kwakaJehova begodu kuhluke ngaziphi iindlela? Kubayini kuqakathekile ukuzwisisa umahluko lo? Imibuzo le izokuphendulwa esihlokweni esilandelako.