1. Ngokomtlolo weyoku-1 kaPitrosi 5:2, ngimuphi umsebenzi oqakathekileko abadala okufuze bawenze?

 ABADALA abamaKrestu banikelwe umthwalo wokutlhogomela izimvu zakaJehova eziligugu. Amadoda azinikeleko la ayathokoza ukuthi uJehova uyawathemba bona azokukghona ukutlhogomela abafowabo nabodadwabo begodu asebenza budisi bona abe ‘belusi abazobelusa.’ (Jor. 23:4; funda yoku-1 kaPitrosi 5:2.) Sithokoza khulu ukuba namadoda anjengalawo emabandlenethu!

2. Ngiziphi iinlingo abanye abadala abangaqalana nazo?

² Zinengi iintjhijilo abadala abaqalana nazo nabenza umsebenzabo. Abadala kufuze basebenze budisi nabazakutlhogomela ibandla. U-Tony umdala we-United States, kwafuze afunde ukuthobeka naziza endabeni yokuthi uzokwamukela umsebenzi ongangani. Uhlathulula uthi: “Nakuthoma isindabelaphi i-COVID-19, ngamukela umsebenzi omnengi wokuhlela imihlangano nesimu. Nanyana bengenza okunengi kangangani bekuhlala kunomsebenzi omnengi. Ekugcineni, ngazithola ngiba majadu khulu kangangobana akhenge ngisaba nesikhathi sokufunda iBhayibheli, sokuba nesifundo sami mathupha nesokuthandaza.” U-Ilir umdala we-Kosovo, yena waqalana nesitjhijilo esihlukileko. Nakazifumana endaweni lapho kunepi khona, wakufumana kubudisi ukulalela isinqophiso esivela ehlanganweni. Uthi: “Ukuba kwami nesibindi kwalingwa lokha i-ofisi legatja linginikela isabelo sokusiza abafowethu nabodadwethu abasendaweni eyingozi. Bengithukiwe nesinqophiswesi besibonakala singanahloko.” U-Tim, isithunywa sevangeli se-Asia, wakufumana kubudisi ukwenza zoke izinto ebekufuze azenze qobe  langa. Uthi: “Ngezinye iinkhathi bengizizwa ngidinwe khulu bona ngingatlhogomela abodadwethu nabafowethu.” Khuyini engasiza abadala abaqalene neentjhijilo ezifanako?

3. Singazuza njani soke ngokufunda ngesibonelo soMahluleli uGidiyoni?

³ Abadala bangafunda okuthileko esibonelweni soMahluleli uGidiyoni. (Heb. 6:12; 11:32) Bekamvikeli nomelusi wabantu bakaZimu. (Hlul. 2:16; 1 Kron. 17:6) NjengoGidiyoni, abadala bakhethwe bona batlhogomele abantu bakaZimu ngeenkhathi ezibudisi. (IzE. 20:28; 2 Thim. 3:1) Singafunda ekuthobekeni nekulaleleni kwakaGidiyoni. Ukukghodlhelela kwakhe kwalingwa nakenza izabelo zakhe. Nanyana singasibadala singafunda ukubathokoza abadala ngomsebenzi abawenzako. Singawasekela amadoda asebenza budisi la bona asitlhogomele.—Heb. 13:17.

4. UGidiyoni wakutjengisa njani ukuthobeka?

⁴ UGidiyoni bekayindoda ethobekileko. b Lokha ingilozi kaJehova imtjela ukuthi ukhethwe bona ayokusindisa ama-Israyeli kumaMidiyani anamandla, indoda ethobekileko le yaphendula yathi: “Ikorwami ngencani kwaManase begodu mina ngingongakaqakatheki kunabo boke endlini kababa.” (Hlul. 6:15) Wazizwa angakufanelekeli ukwenza umsebenzi lo kodwana uJehova bekazi ukuthi angakghona ukuwenza. Ngesizo lakaJehova, uGidiyoni wakghona ukwenza umsebenzakhe ngendlela ephumelelako.

5. Kungalingwa njani ukuthobeka komdala?

⁵ Abadala balinga ngamandla ukuthobeka kizo zoke izinto. (Mik. 6:8; IzE. 20:18, 19) Abazikhakhazisi ngalokho abakghone ukukwenza namkha abakwenzileko begodu abacabangi ukuthi abasililitho ngebanga lemitjhapho abayenzileko. Nanyana kunjalo, umdala angaqalana neenlingo. Ngokwesibonelo, angamukela izabelo ezinengi bese kube budisi ukuzenza zoke. Kungenzeka abukwe ngendlela enze ngayo esinye sezabelo zakhe namkha anyefulwe ngendlela enze ngayo esinye. Abadala bangafundani kuGidiyoni ezobasiza ebujamweni obunjalo?

6. Khuyini abadala abangayifunda ngokuthobeka kuGidiyoni? (Qala nesithombe.)

⁶ Bawa isizo. Umuntu othobekileko uyazi ukuthi kunezinto angeze akghona ukuzenza.  UGidiyoni watjengisa ukuthobeka ngokuthi abawe isizo kwabanye. (Hlul. 6:27, 35; 7:24) Abadala abahlakaniphileko benza okufanako. U-Tony okukhulunywe ngaye phambilini, uhlathulula uthi: “Ngebanga lendlela engakhuliswa ngayo, bengizimisele ukwamukela umsebenzi omnengi kunalowo engingakghona ukuwenza. Yeke ekulotjheni komndeni ngaqunta ukufaka isihloko esikhuluma ngokuthobeka, ngabawa umkami bona atjho lokho akucabangako. Ngabukela nevidiyo eku-jw.org enesihloko esithi, Qeqesha, Uthembe Futhi Uqinise Abanye Njengoba Kwenza UJesu.” U-Tony wathoma ukubawa abanye bona bamsize ngomsebenzakhe. Umphumela waba yini? Uthi: “Umsebenzi uyaraga ebandleni begodu nginesikhathi esaneleko sokuqinisa itjhebiswano lami noZimu.”

7. Abadala bangamlingisa njani uGidiyoni nabanyefulwako? (Jakopo 3:13)

⁷ Yiba nomoya ophasi nabakunyefulako. Esinye isilingo abadala abaqalana naso ngesokunyefulwa. Isibonelo sakaGidiyoni singasiza nebujamwenobu. Bekazi ukuthi unesono, yeke waphendula ngomoya ophasi lokha amadoda wakwaMidiyani nakamnyefulako. (Hlul. 8:1-3) Akhenge aphendule ngokusilingeka. Watjengisa ukuthobeka ngokuthi alalele lokho anghonghoyila ngakho nangokukhuluma nawo ngomusa begodu lokhu kwawenza ehlisa umoya. Abadala abahlakaniphileko balingisa uGidiyoni ngokulalelisisa kuhle, baphendule nangomoya ophasi lokha nabanyefulwako. (Funda uJakopo 3:13.) Ngokwenza njalo, benza kube nokuthula ebandleni.

8. Abadala kufuze basabele njani nabadunyiswako? Nikela isibonelo.

⁸ Idumo loke aliye kuJehova. Lokha inengi labantu nalidumisa uGidiyoni ngokuhlula bakwaMidiyani, wasa loke idumo kuJehova. (Hlul. 8:22, 23) Amadoda abekiweko angamlingisa njani uGidiyoni? Angadumisa uJehova ngalokho akghone ukukwenza. (1 Kor. 4:6, 7) Ngokwesibonelo, nange umdala abukwa ngekghono lakhe lokufundisa, angasa idumelo emthonjeni wesinqophisweso, eliZwini lakaZimu namkha ebandulweni alifumene ehlanganweni kaJehova. Abadala bangacabangisisa ukuthi indlela abafundisa ngayo idumisa uJehova namkha bafuna ukukara abantu. Cabanga ngalokho okwenzeka kumdala okuthiwa ngu-Timothy. Nakabekwa bona abe mdala, bekakuthanda ukubeka iinkulumo. Uthi: “Bengithanda ukwenza iingeniso nemifanekiso emide nehlangahlangeneko. Kanengi lokho bekwenza abantu bangibuke. Okudanisako kukuthi idumo beliza kimi kunokuthi liye eBhayibhelini namkha kuJehova.” Ngokukhamba kwesikhathi, u-Timothy wabona kutlhogeka bona alungise indlela afundisa ngayo ukwenzela bona alise ukuzidosela amehlo. (IzA. 27:21) Kwaba namuphi umphumela? Uhlathulula uthi: “Abantu abahlukahlukeneko, bangitjela indlela ikulumami ebasize ngayo bakghona ukuqalana nemiraro ebaphetheko, bakghodlhelelela iinlingo namkha batjhidela kuJehova. Kungithabisa khulu ukubezwa batjho emezwi lawo kunalokha nabangidumisako.”

9. Kwalingwa njani ukulalela nokuba nesibindi kwakaGidiyoni? (Qala isithombe esingaphandle.)

⁹ Ngemva kobana uGidiyoni abekwe bona abe ngumahluleli, ukulalela nokuba kwakhe nesibindi kwalingwa. Wanikelwa isabelo esiyingozi sokutjhabalalisa i-aldara uyise ebekalotjhela kilo uBhali. (Hlul. 6:25, 26) Ngemva kokubuthelela ibutho lakhe, uJehova watjela uGidiyoni kabili ukuthi aphungule isibalo sebutho lakhe. (Hlul. 7:2-7) Emaswapheleni, watjelwa bona asahlele ikampa yamanaba phakathi kobusuku.—Hlul. 7:9-11.

10. Ukulalela kwabadala kungalingwa njani?

 ¹⁰ Abadala kufuze ‘bakulungele ukulalela.’ (Jak. 3:17) Umdala olalelako uhlala akulungele ukulalela lokho okutjhiwo miTlolo nokwenza ngokuvumelana nesinqophiso esivela ehlanganweni kaZimu. Ngokwenza lokho ubekela abanye isibonelo esihle. Nanyana kunjalo, ukulalela kwakhe kungalingwa. Ngokwesibonelo, angakufumana kubudisi ukusebenzisa isinqophiso asifumanako. Kobunye ubujamo, angazibuza kuthi isinqophiswesi sihlakaniphile namkha silisizo. Namkha bangambawa bona amukele isabelo esingambangela bona abotjhwe. Abadala bangakulingisa njani ukulalela kwakaGidiyoni ebujamweni obunjalo?

11. Khuyini engasiza abadala balalele?

¹¹ Lalelisisa kuhle isinqophiso begodu usisebenzise. UZimu watjela uGidiyoni bona alitjhabalalise njani i-aldara lakayise begodu amakhele kuphi uJehova i-aldara elitjha nokuthi ngiziphi iinlwana okufuze enze ngazo umhlatjelo. UGidiyoni akhenge asisole isinqophiso asifumanako, wasilandela njengombana sinjalo. Namhlanjesi abadala bafumana iinqophiso ehlanganweni kaJehova ngeencwadi, izaziso nezinye iinqophiso ezisisiza sihlale sivikelekile begodu siseduze noJehova. Siyabathanda abadala ngombana basilandela ngokuthembeka isinqophiso esivela kuZimu. Ibandla loke liyazuza.—Rhu. 119:112.

12. Abadala bangawasebenzisa njani amaHebheru 13:17 nangabe ihlangano kaJehova ibatjela bona benze izinto ngendlela ehlukileko?

¹² Zimisele ukulungisa indlela ocabanga ngayo. Khumbula ukuthi uJehova watjela uGidiyoni bona aphungule pheze loke ibutho lakhe. (Hlul. 7:8) Kungenzeka wazibuza: ‘Kghani lokhu kuyatlhogeka? Kghani kuzokusebenza?’ Nanyana kunjalo uGidiyoni walalela. Abadala namhlanjesi balingisa uGidiyoni ngokulalela ihlangano nayibatjela bona benze okuthileko ngendlela ehlukileko. (Funda amaHebheru 13:17.) Ngokwesibonelo, ngo-2014 isiHlopha esiBusako satjhugulula indlela amaphrojekthi wokwakha amaWolo womBuso namaWolo womHlangano asekelwa ngayo ngokweemali. (2 Kor. 8:12-14) Amabandla angekhe kusatlhogeka bona abhadele imali ayibolekileko. Kunalokho, ihlangano izokusebenzisa iminikelo evela emabandleni ephasini loke bona yakhe amaWolo womBuso namaWolo womHlangano nanyana kukuphi la bekatlhogeka khona, ngitjho nanyana ibandla linikela kancani. U-José nakezwa ngetjhugulukweli, wazaza ukuthi lizokusebenza, wathi: ‘Alikho nalinye iWolo lomBuso elisazokwakhiwa. Izinto azisebenzi njalo ngapha ngakithi.’ Khuyini eyasiza u-José ukuthi asekele isinqophiswesi? Uthi: “Amezwi akuzAga 3:5, 6 angikhumbuza bona ngithembe uJehova. Umphumela ube muhle khulu! Asakhi amaWolo womBuso amanengi kwaphela kodwana sifunde nokunikela ngeendlela ezinengi ukwenzela ukuthi kube nokulingana.”

13. (a) Khuyini uGidiyoni ebekaqiniseka ngayo? (b) Abadala bangamlingisa njani uGidiyoni? (Qala nesithombe.)

 ¹³ Yenza intando kaJehova ngesibindi. UGidiyoni walalela uJehova ngitjho nanyana bekasaba nesabelo sakhe siyingozi. (Hlul. 9:17) Ngemva kokufumana isiqinisekiso kuJehova, uGidiyoni bekangazazi ukuthi uJehova uzomsekela njengombana avikela abantu bakhe. Abadala abahlala la umsebenzi wokutjhumayela uvinjelwe khona, balingisa uGidiyoni. Badosa phambili ngesibindi esifundweni nesimini ngitjho nanyana bathuselwa ngokubotjhwa, ukuhlonywa ngemibuzo, ukulahlekelwa msebenzi namkha ngenturhu. c Hlangana nesizi elikhulu, abadala kuzokufuze babe nesibindi sokulandela iinqophiso abazifumanako ngitjho nanyana kuyingozi ukwenza njalo. Ngokwesibonelo, singafumana iinqophiso zokuthi kufuze siwutjhumayele njani umlayezo wesahlulelo nokuthi kufuze senzeni nasizakusinda ekuhlaselweni nguGogi wakwaMagogi.—Hez. 38:18; IsAm. 16:21.

14. Ukukghodlhelela kwakaGidiyoni kwalingwa njani?

¹⁴ UGidiyoni bekufuze asebenze budisi njengomahluleli. Lokha bakwaMidiyani nababalekako epini ebusuku, uGidiyoni wabagijimisa kusukela emRhobeni weJizriyeli ukuyokufika eMlanjeni iJordani okungenzeka bewubhodwe mimithi eminengi. (Hlul. 7:22) Kghani uGidiyoni wajama nakafika eJordani? Awa! Nanyana bekadiniwe, yena namadoda ama-300 ebekakhamba nawo bawuyama umlambo loyo baragela phambili bawagijimisa. Ekugcineni, babamba bakwaMidiyani balwa nabo babahlula.—Hlul. 8:4-12.

15. Kunini la ukukghodlhelela komdala kungalingwa khona?

¹⁵ Ngezinye iinkhathi, umdala angazizwa adiniwe bona angatlhogomela ibandla nomndenakhe. Ebujamweni obunjalo, abadala bangamlingisa njani uGidiyoni?

16-17. Yini eyasiza uGidiyoni bona akghodlhelele begodu abadala bangaqiniseka ngani? (Isaya 40:28-31) (Qala nesithombe.)

¹⁶ Thembela kuJehova bona uzokuqinisa.  UGidiyoni bekathembele kuJehova ukuthi uzomqinisa begodu kwaba njalo. (Hlul. 6:14, 34) UGidiyoni namadoda ebekakhamba nawo bakhe bagijimisa amakhosi amabili wakwaMidiyani ngeenyawo wona akhamba ngamakamela. (Hlul. 8:12, 21) Kodwana uZimu wasiza ama-Israyeli bona awabambe bekathumbe. Abadala nabo bangathembela kuJehova ‘ongadinwa namkha aphelelwe mamandla.’ Uzobapha amandla nabawatlhogako.—Funda u-Isaya 40:28-31.

¹⁷ Cabanga ngalokhu okwenzeka ku-Matthew, ilunga leKomidi yokuBonisana neemBhedlela. Yini eyamsiza wakghodlhelela? U-Matthew uthi: “Ngawezwa amandla avela kuJehova ekukhulunywa ngawo kwebeFilipi 4:13. Iinkhathi ezinengi nangidiweko begodu ngingaboni ukuthi ngizokukghona ukuragela phambili, ngathandaza kuJehova ngimbawa bona angiphe amandla ngikghone ukusekela abafowethu. Eenkhathini ezinjalo, ngawuzwa umoya kaJehova ungipha amandla ungisiza ngikghodlhelele.” NjengoGidiyoni, abadala basebenza budisi bona batlhogomele abantu bakaJehova, ngitjho nanyana ngezinye iinkhathi kungasilula. Kuliqiniso ukuthi kufuze bathobeke bebalemuke ukuthi angeze bahlala benza yoke into abangathanda ukuyenza. Bangathembela kuJehova ukuthi uzozizwa iimbawo zabo nokuthi uzobaqinisa abasize bakghodlhelele.—Rhu. 116:1; Flp. 2:13.

18. Nasesibuyekeza, abadala bangamlingisa njani uGidiyoni?

¹⁸ Abadala bangafunda okunengi esibonelweni sakaGidiyoni. Abadala kufuze batjengise ukuthobeka nakuziwa endabeni yokuthi ungangani umsebenzi abazowamukela nendleleni abasabela ngayo lokha nababukwako nalokha nabanyefulwako. Kufuze balalele, babe nesibindi khulukhulu njengombana ukuphela kwephaseli kutjhidela. Kufuze bathembe nokuthi nanyana ngiziphi iinqabo abaqalana nazo uZimu angabaqinisa. Siwuthokoza khulu umsebenzi obudisi wabelusaba begodu ‘siwaphatha ngethando amadoda anjalo.’—Flp. 2:29.