1. Khuyini ekufuze siyenze nasizakusinda elangeni lakaJehova?

 WIBHAYIBHELI nalikhuluma ‘ngelanga lakaJehova,’ liqalisela esikhathini lapho uJehova azokwahlulela amanabakhe asindise abantu bakhe. Ekadeni, uJehova wazahlulela ezinye iintjhaba. (Isa. 13:1, 6; Hez. 13:5; Zef. 1:8) Esikhathini sethu, “ilanga lakaJehova” lithoma ngokusahlela iBhabhiloni eliKhulu begodu lifike esitlhorini epini i-Arimagedoni. Nasizakusinda ‘elangenelo’ kufuze sizilungiselele nje. UJesu wafundisa ukuthi akukafuzi silungele ‘isizi elikhulu’ kwaphela kodwana kufuze ‘sihlale sililindile.’—Mat. 24:21; Luk. 12:40.

2. Singazuza njani encwadini yoku-1 kwebeThesalonika?

² Encwadinakhe yokuthoma eya kwebeThesalonika, umpostoli uPowula wasebenzisa imifanekiso eminengana ukusiza amaKrestu ukuhlala alindele ilanga lakaJehova elikhulu lokwahlulela. UPowula bekazi ukuthi ilanga lakaJehova angekhe lifike ngesikhatheso. (2 Thes. 2:1-3) Nanyana kunjalo, wakhuthaza abafowabo bona balungiselele ilangelo kwangathi liza kusasa, nathi singasisebenzisa iselulekweso. Akhesihlole ihlathululwakhe malungana nezinto ezilandelako: (1) lizokufika njani ilanga lakaJehova, (2) ngubani ongeze asinde ngelangelo, (3) singazilungiselela njani.

3. Ilanga lakaJehova lizokufika njani njengesela ebusuku? (Qala isithombe.)

³ “Njengokuza kwesela ebusuku.” (1 Thes. 5:2) Lo, mfanekiso  wokuthoma kwemithathu ohlathulula ukufika kwelanga lakaJehova. Amasela kanengi enza msinya begodu afika phakathi nobusuku abantu bangakawalindeli. Ilanga lakaJehova nalo lizokufika msinya abantu abanengi bangakalilindeli. Ngitjho namaKrestu weqiniso angarareka ngendlela izinto ezenzeka msinya ngayo. Kodwana ngokungafani nabantu abakhohlakeleko angekhe sitjhatjalaliswe.

4. Ilanga lakaJehova lifana njani nemirhelo yokubeletha?

⁴ “Njengemirhelo efikela umfazi osidisi.” (1 Thes. 5:3) Umfazi osidisi angeze asazi isikhathi esinqophileko azokubeletha ngaso. Nanyana kunjalo, uyazi ukuthi kuzokwenzeka. Nakwenzekako ukubeletha kuzokuba msinya, kube buhlungu begodu kungavimbeki. Ngokufanako, asilazi ilanga ne-iri ilanga lakaJehova elizokuthoma ngalo. Nanyana kunjalo, siyaqiniseka ukuthi liyeza nokuthi ukwahlulela kwakaZimu abantu abakhohlakeleko kuzokwenzeka msinyana begodu angeze kubalekeleke.

5. Isizi elikhulu lifana njani nokuthoma kwelanga?

⁵ Njengokuthoma kwelanga. Umfanekiso wesithathu kaPowula ukhuluma ngokweba kwamasela ebusuku. Kodwana nje uPowula ubonakala afanisa ilanga lakaJehova nokuthoma kwelanga. (1 Thes. 5:4) Amasela angabamajadu khulu alibale nokuqala isikhathi. Ukukhanya kwelanga elitjha kungawafikela angakatjheji kuwaveze epepeneneni. Ngokufanako, isizi elikhulu lizobaveza epepeneneni labo abanjengamasela abahlala ebumnyameni abaragela phambili benza izinto ezingamthabisi uZimu. Ngokungafani nabo, singahlala silindile ngokwala imikghwa engamthabisi uJehova nangokwenza “yoke imihlobo yobuhle, yokulunga neyeqiniso.” (Efe. 5:8-12) Ngokulandelako uPowula usebenzisa imifanekiso emibili ukuhlathulula labo engekhe basinde.

6. Abantu balele ngayiphi indlela? (1 Thesalonika 5:6, 7)

⁶ ‘Ngilabo abalalako.’ (Funda yoku-1 kwebeThesalonika 5:6, 7.) UPowula wafanisa labo abangekhe basinde ngelanga lakaJehova nabantu abaleleko. Abakuboni lokho okwenzekako namkha ukukhamba kwesikhathi. Abazi nakunento eqakathekileko eyenzekileko begodu abakghoni ukusabela kiyo. Abantu abanengi namhlanjesi bafana nabantu abaleleko. (Rom. 11:8) Abakukholelwa ukuthi siphila “emihleni yokuphela” nokuthi isizi elikhulu lizokufika msinyana. Nakunamatjhuguluko amakhulu ephasini abantu abanengi babanekareko kilokho esikutjhumayelako. Nanyana kunjalo, abanengi babuyela ekulaleni kunokuthi bahlale balindile. Ngitjho nalabo abakholelwa elangeni lokwahlulela bacabanga bona lisesekude khulu. (2 Pit. 3:3, 4) Nanyana kunjalo, siyalemuka ukuthi iseluleko esiphefumulelekwesi sokuhlala silindile siba ngesirhabeke khulu ilanga nelanga.

7. Abantu abazokutjhatjaliswa nguZimu bafana njani nabantu abadakiweko?

⁷ ‘Ngilabo abadakwako.’ Umpostoli uPowula wafanisa labo abazokutjhatjalaliswa nguZimu njengeendakwa. Abantu abadakiweko babuthaka ukusabela kilokho okwenzeka hlanu kwabo godu benza iinqunto ezingasizihle. Ngokufanako, abakhohlakeleko abasabeli lokha uZimu nakabayelelisako. Bakhetha indlela yokuphila ebanqophisa ekutjhatjalalisweni kodwana amaKrestu atjelwa bona ahlale aqaqulukile. (1 Thes. 5:6) Isazi seBhayibheli sahlathulula ukuqaquluka ngokuthi “kukuba nomoya ophasi, yindlela yokucabanga eyenza umuntu akghone ukubona izinto kuhle begodu akghone ukwenza isiqunto esihle.” Kubayini kufuze sibe nomoya ophasi begodu sicabangisise kuhle? Ukwenzela bona singazibandakanyi kwezepolotiki zanamhlanjesi namkha kezomphakathi. Igandelelo lokobana sithathe ihlangothi kilokhu lizokuba likhulu njengombana ilanga lakaJehova litjhidela. Nanyana kunjalo, akukafuzi sitshwenyeke ngokuthi sizokusabela njani. Umoya kaZimu ungasisiza sibe nomoya ophasi, sicabangisise kuhle begodu senze iinqunto ezihlakaniphileko.—Luk. 12:11, 12.

8. Yoku-1 kwebeThesalonika 5:8 ibufanisa njani ubuntu obuzosisiza sihlale siphapheme begodu siqaqulukile? (Qala nesithombe.)

⁸ ‘Mbatha isivikelo sesifuba . . . nesikoporo.’ UPowula usifanisa namasotja aphaphamileko ambethe izembatho zepi. (Funda yoku-1 kwebeThesalonika 5:8.) Abantu balindele ukuthi isotja lihlale likulungele ukulwa lokha nakunepi. Kunjalo nangathi. Sihlala silindele ilanga lakaJehova ngokumbatha isivikelo sesifuba sokukholwa nethando nesikoporo sethemba. Ubuntobu bungasisiza khulu.

9. Ukukholwa kusivikela njani?

⁹ Isivikelo sesifuba besivikela ihliziyo yesotja. Ukukholwa nethando kuvikela ihliziywethu engokomfanekiso. Ubuntobu buzosisiza siragele phambili silotjha uZimu silandele noJesu. Ukukholwa kuyasiqinisekisa ukuthi uJehova uzosibusisa nasimfuna ngeenhliziyo zethu zoke. (Heb. 11:6) Kuzosenza sihlale sithembekile kuJesu umdosiphambilethu ngitjho nanyana kufuze sikghodlhelelele ubudisi. Singaqinisa ukukholwa kwethu okuzosenza siqalane neentjhijilo zokuphila ngokuthi sifunde ngeembonelo zanamhlanjesi zabantu abahlala bathembekile naphezu kokuhlunguphazwa namkha ubujamo bezomnotho obubudisi. Singayibalekela ingozi yokuthanda imali nezinto khulu ngokulingisa labo  abenza ukuphila kwabo kwaba lula ngokubeka qangi umBuso. b

10. Ithando ngoZimu nangabantu lisisiza njani sikghodlhelele?

¹⁰ Ithando nalo liqakathekile ukuthi sihlale siphapheme besiqaqulukile. (Mat. 22:37-39) Ithando ngoZimu lisisiza sikghodlhelele nasitjhumayelako ngitjho nanyana ukwenza njalo kungasilethela imiraro. (2 Thim. 1:7, 8) Ngebanga lokuthi siyabathanda nalabo abangalotjhi uJehova, siragela phambili sitjhumayela esiminethu, sifakaza ngomtato, sitlola neencwadi. Asililahli ithemba lokuthi ngelinye ilanga abomakhelwana bethu bazokutjhuguluka bathome ukwenza okulungileko.—Hez. 18:27, 28.

11. Ithando esinalo ngabafowethu nabodadwethu lisisiza njani? (1 Thesalonika 5:11)

¹¹ Ithando ngabomakhelwana lihlanganisa ukuthanda abafowethu nabodadwethu. Sitjengisa ithando elinjalo ‘ngokuhlala sikhuthazana begodu sakhana.’ (Funda yoku-1 kwebeThesalonika 5:11.) Njengamasotja asebenzisanako epini, siyakhuthazana. Kuliqiniso ukuthi isotja lingalimaza elinye isotja elisebenza nalo epini kodwana angeze lakwenza ngamabomu lokho. Ngokufanako, angeze salimaza abafowethu nabodadwethu ngamabomu namkha sibuyisele okumbi ngokumbi. (1 Thes. 5:13, 15) Godu sitjengisa ithando ngokuthi sibe nehlonipho kubafowethu abadosa phambili ebandleni. (1 Thes. 5:12) UPowula nakatlola incwadi le, ibandla leThesalonika belingakaqedi nomnyaka lithonyiwe. Amadoda wakhona abekiweko kungenzeka bekanganalemuko begodu enza nemitjhapho. Nanyana kunjalo, bekufuze ahlonitjhwe. Njengombana isizi elikhulu litjhidela, kungatlhogeka sithembele kubadala esinabo bona basinikele isinqophiso ukudlula phambilini. Kungenzeka singakghoni ukufumana isinqophiso kubafowethu bemzimkhulu wephasi loke namkha e-ofisini legatja, yeke kuqakathekile ukuhlonipha nokuthanda abadala esinabo nje. Nanyana kungenzekani, asihlaleni siqaqulukile singadzimeleli ekubeni  nesono kwabo kodwana sidzimelele eqinisweni lokuthi ngoJesu uJehova unqophisa amadoda athembekileko la.

12. Ithemba lethu liyivikela njani indlela esicabanga ngayo?

¹² Njengombana isikoporo sivikela ihloko, ithemba lethu lesindiso livikela indlela esicabanga ngayo. Nasinethemba eliqinileko, siyalemuka bona lokho iphasi elisinikela khona kulilize lakolize. (Flp. 3:8) Ithemba lethu lisisiza sihlale sinomoya ophasi begodu sicabanga kuhle. Ngilokho okwenzeka ku-Wallace no-Laurinda abalotjha uJehova e-Afrika. Hlangana neemveke ezintathu ngamunye wabo wahlongakalelwa mbelethi. Ngebanga lesindabelaphi i-COVID-19 akhenge bakghone ukubuyela ekhaya bayokuba nemindenabo. U-Wallace watlola wathi: “Ithemba lokuvuswa kwabahlongakeleko lingisiza ngicabange ngabo, ingasi ngendlela ebebangayo nabazokuhlongakala kodwana ngendlela abazokuba ngayo emalangeni wokuthoma wephasi elitjha. Ithembeli lingenza ngehlise umoya nangilwisana namazizo wokudana namkha wokuhlongakalelwa.”

13. Singenzani nasizakufumana umoya ocwengileko?

¹³ “Ningawucimi umlilo wommoya.” (1 Thes. 5:19) UPowula wafanisa umoya ocwengileko nomlilo ongaphakathi kithi. Nasinomoya kaZimu sifuna khulu ukwenza okulungileko begodu silwela ukusebenzela uJehova. (Rom. 12:11) Singenzani nasizakufumana umoya ocwengileko? Singathandaza, sifunde iliZwi lakaZimu eliphefumulelweko sizihlanganise nehlangano enqotjhiswa mumoyakhe. Ukwenza njalo kuzosisiza silwele ukuba ‘neenthelo zommoya.’—Gal. 5:22, 23.

14. Khuyini ekufuze siyibalekele nasizakuragela phambili sifumana umoya kaZimu? (Qala nesithombe.)

¹⁴ Ngemva kokobana uZimu asinikele umoya ocwengileko, kufuze sitjheje bona ‘singawucimi umlilo wommoya.’ UZimu umoyakhe uwunikela kwaphela labo abahlala bacabanga okuhlwengileko begodu baziphatha kuhle. Angekhe aragele phambili asinikela umoyakhe nange silokhu sicabanga izinto ezingakahlwengeki  besizenze. (1 Thes. 4:7, 8) Bona sifumane umoya ocwengileko kufuze ‘singazideleli iimphorofido.’ (1 Thes. 5:20) Evesineli ibizo elithi, “iimphorofido” litjho imilayezo uJehova asinikela yona ngomoyakhe, kuhlanganisa imilayezo yelanga lakaJehova nokurhaba kwesikhathi esiphila kiso. Asicabangi bona ilanga lakaJehova namkha i-Arimagedoni angekhe ifike esikhathini sethu. Kunalokho, sitjengisa ukuthi sililindele ukuthi lizokufika msinyana namkha sihlala silikhumbula ngokuhlala simajadu ‘ezenzweni zokuzinikela kuZimu’ qobe langa.—2 Pit. 3:11, 12.

15. Singakubalekela njani ukukhohliswa mininingwana engasiliqiniso namkha amala arhatjhwa madimoni? (1 Thesalonika 5:21)

¹⁵ Esikhathini esizako esiseduze, labo abaphikisa uZimu bazokuthi: “Ukuthula nokuvikeleka!” (1 Thes. 5:3) Imilayezo emamala erhatjhwa madimoni izokuzala iphasi loke ikhohlise abanengi. (IsAm. 16:13, 14) Kuthiwani ngathi? Angeze sikhohliseke nange ‘siqiniseka [namkha sihlolisisa] zoke izinto.’ (Funda yoku-1 kwebeThesalonika 5:21.) Ibizo lesiGirigi elitjhugululwe ngokuthi “qinisekani” lasetjenziswa ukuhlolisisa izinto ezinjengeensimbi eziligugu. Nje-ke kufuze sihlolisise lokho esikuzwako namkha esikufundako ukubona ukuthi kuliqiniso na. Lokho bekuqakatheke khulu ebantwini beThesalonika begodu kuzokuqakatheka khulu kithi njengombana isizi elikhulu litjhidela. Kunokobana sikholelwe yoke into abantu abayitjhoko, kufuze sisebenzise amandlethu wokucabanga, simadanise esikufundako namkha esikuzwako nalokho iBhayibheli nehlangano kaJehova ezikutjhoko. Nasenza njalo, angeze sikhohliswe mamala arhatjhwa madimoni.—IzA. 14:15; 1 Thim. 4:1.

16. Ngiliphi ithemba esinalo begodu sizimisele ukwenzani?

¹⁶ Siyazi ukuthi abantu bakaJehova bazokusinda ngesizi elikhulu. Kodwana asazi ukuthi ngamunye wethu ikusasa limphatheleni. (Jak. 4:14) Nanyana kunjalo, akunandaba ukuthi siphila bekufike isizi elikhulu namkha sihlongakala ngaphambi kwalo sizokubusiswa ngokuphila okungapheliko nasihlala sithembekile. Abazesiweko bazokuba noKrestu ezulwini. Ezinye izimvu zizokuba sephasini epharadesi. Kwanga soke singadzimelela ethembeni lethu elikarisako sihlale sililindile ilanga lakaJehova!