1-2. Ngimuphi umraro esiqalana nawo namhlanjesi onjengewakaLoti?

 NASIQALA indlela abantu abaziphatha ngayo namhlanjesi, sizizwa ngendlela uLoti azizwa ngayo. ‘Bekagandeleleke khulu ngebanga labantu abanganamthetho ebebenza amanyala bangabi neenhloni,’ ngombana bekazi ukuthi uBabethu wezulwini uyakuhloya ukuziphatha okumbi okunjalo. (2 Pit. 2:7, 8) Ngebanga lokuthi uLoti bekamhlonipha begodu amthanda khulu uZimu, wakuhloya ukuziphatha okumbi kwabantu ebekaphila nabo. Nathi siphila nabantu abangayihloniphiko imithethokambiso kaJehova yokuziphatha. Ngaphezu kwalokho singaragela phambili siziphatha ngendlela ehlwengileko nange sihlala simthanda uZimethu besifunde ukumsaba ngendlela efaneleko.—IzA. 14:2.

² UJehova usisiza bona sikwenze lokho ngesikhuthazo esisifumana encwadini yezAga. Woke amaKrestu, amadoda, abafazi, abantu abatjha nabantu abadala bangazuza ngokuhlolisisa iseluleko esihlakaniphileko esifumaneka lapho.

3. NgokwezAga 17:3, ngiliphi ibanga elisenza sivikele iinhliziyo zethu? (Qala nesithombe.)

³ Ibanga eliqakathekileko elisenza sivikele ihliziywethu kukobana uJehova uhlola iinhliziyo zethu. Lokho kutjho ukuthi ubona ngale kwalokho abantu abakubonako begodu uyazi ukuthi sibabantu abanjani ngaphakathi. (Funda izAga 17:3.) Uzosithanda nangesiragela phambili sicabanga ngeseluleko sakhe esizosisiza siphile ngokungapheliko. (Jwa. 4:14) Nje-ke angeze salinyazwa kuziphatha okumbi, amala kaSathana nabantu abakhohlakeleko  abasephasini lakheli. (1 Jwa. 5:18, 19) Nasitjhidela eduze noJehova, ithando lethu nehlonipho esinayo ngaye kuzokukhula. Ngebanga lokuthi asifuni ukuzwisa uBabethu ubuhlungu, sizowuhloya ngitjho nomcabango omncani wokuthi sone. Nange silingeka ukuthi senze okungakalungi singazibuza, ‘Ngingamlimaza njani ngamabomu umuntu ongithanda kangaka?’—1 Jwa. 4:9, 10.

4. Ukusaba uJehova kwamvikela njani omunye udade ekwenzeni okumbi?

⁴ U-Marta we-Croatia owalingeka bona aziphathe kumbi ngokomseme, watlola wathi: “Ngikufumana kubudisi ukucabanga kuhle nokulwisana nesifiso sokwenza isono. Kodwana ukusaba uJehova kwangivikela.” b Ukusaba uZimu kumvikele njani? U-Marta uthi wacabangisisa ngemiphumela emimbi ezokuba khona nange aziphatha kumbi ngokomseme. Nathi singenza okufanako. Okumbi khulu kukuthi sizokudanisa uJehova begodu angekhe sibe serhelweni lokumlotjha ngokungapheliko.—Gen. 6:5, 6.

5. Khuyini ongayifunda kilokho okwenzeka ku-Leo?

⁵ Nasisaba uJehova sitjhejisisa khulu bona singabi bangani nalabo abenza izinto ezimbi. U-Leo ohlala e-Congo, wasifunda isifundweso. Ngemva kweminyaka emine abhajadisiwe, wazihlanganisa nabangani abangakalungi. Bekabona kunganamraro ukuzihlanganisa nabantu abanjalo, ikani yena nakangazenziko izinto abazenzako. Msinyana abangani bakhe bamenza wabusebenzisa kumbi utjwala begodu waziphatha kumbi ngokwamabhayi. Wathoma ukucabangisisa ngalokho ababelethi bakhe abamaKrestu abamfundisa khona nangethabo ebekanalo nakalotjha uJehova. Umphumela waba kukuthi wathoma ukwenza izinto ezilungileko godu. Asizwa badala wabuyela  kuJehova. Namhlanjesi uthabela ukuba mdala nokuba liphayona elikhethekileko.

6. Ngiziphi iimbonelo ‘zabafazi’ ababili esizokukhuluma ngazo nje?

⁶ Akhesihlole izAga isahluko 9 ezikhuluma ngabafazi ababili omunye ujamele ukuhlakanipha omunye ujamele ubudlhadlha. (Madanisa kwebeRoma 5:14; noGalatiya 4:24.) Njengombana senza njalo, khumbula ukuthi iphasi lakaSathana likuthabela khulu ukuziphatha kumbi ngokomseme nokubukela iinthombe zomseme. (Efe. 4:19) Nje-ke kuqakathekile bona siragele phambili sifunda ukusaba uZimu sisuke kokumbi. (IzA. 16:6) Ngebanga lalokho, soke kungaba madoda namkha abafazi singazuza kilokho okutjhiwo sisahlukwesi. Abafazi ababilaba bavezwa bamema onganalemuko—labo ‘abanganangqondo.’ Kufana nokuthi ngamunye uthi, ‘Yewize ngendlinami sizokudla.’ (IzA. 9:1, 5, 6, 13, 16, 17) Umphumela ngamunye womuntu owamukela isimemeso awufani.

7. NgokwezAga 9:13-18, kwenzekani kilabo abamukela isimemo somfazi osidlhayela? (Qala nesithombe.)

⁷ Funda ngesimemo ‘somfazi’ osidlhayela. (Funda izAga 9:13-18.) Angananhloni, ubiza abanganalemuko bona beze ngendlinakhe bazokudla naye. Umphumela uba kukuthi “labo abanganamandla ekufeni balapho.” Kungenzeka uyalikhumbula ilimi elifanako elingokomfanekiso elisetjenziswe ezahlukweni ezidlulileko zezAga. Sayeleliswa ngomfazi “ophambukako” ‘nangomfazi oziphatha kumbi.’ Satjelwa ukuthi: “Indlwakhe itjhingela phasi ekufeni.” (IzA. 2:11-19) IzAga 5:3-10 zinesiyeleliso ‘ngomfazi ophambukako,’ “iinyawo zakhe zehlela ekufeni.”

8. Ngisiphi isiqunto ekufuze sisithathe?

⁸ Labo abezwa ‘umfazi osidlhayela’ kufuze baqunte ukuthi: Bazosamukela namkha bazosala isimemo sakhe na? Nathi kungatlhogeka bona senze isiqunto esifanako. Khuyini esingayenza nange othileko asilinga bona siziphathe kumbi ngokomseme namkha kungakalindeleki sizithola sesibona iinthombe zomseme ku-inthanethi?

9-10. Ngimaphi amanye amabanga wokubalekela ukuziphatha kumbi ngokomseme?

⁹ Kunamabanga amahle wokobana kubayini kufuze sibalekele ukuziphatha kumbi ngokomseme. ‘Umfazi osidlhayela’ uhlathululwa njengothi, “Amanzi etjiweko amnandi.” Ayini “amanzi etjiweko”? IBhayibheli lifanisa ukuya emsemeni kwabantu abatjhadileko nokuthabela amanzi amnandi aqabulako. (IzA. 5:15-18) Indoda nomfazi abatjhadileko bavumelekile bona bangaya emsemeni. Lokhu kuhlukile ‘kunamanzi  etjiweko.’ Amanzi etjiweko angaqalisela ekuziphatheni kumbi kwamabhayi okungakavunyelwa nekuziphatheni kumbi ngokomseme. Abantu abanengi abaziphatha kumbi ngokomseme, kanengi balinga ukukufihla abakwenzileko njengesela nalilinga ukweba okuthileko. “Amanzi etjiweko” angabonakala amnandi kilabo ababandakanyekileko nabacabanga bona akakho ozokufumana ukuthi benzeni. Bayazikhohlisa! Ngombana uJehova ubona koke. Ayikho into ebaba ukudlula ukulahlekelwa kuthandwa nguJehova, nje-ke akunalitho “elimnandi” ngesenzwesi. (1 Kor. 6:9, 10) Kodwana kunokuthileko godu.

¹⁰ Ukuziphatha kumbi ngokomseme kungabangela ihlazo, ukuzizwa ungasililitho, ukuba sidisi ungakahleli nokuhlukana kwemindeni. Kukuhlakanipha ukwala isimemo somfazi osidlhayela. Ngaphezu kokulahlekelwa litjhebiswano labo noZimu, abantu abanengi abaziphatha kumbi ngokomseme baba nokugula okubenza bahlongakale kungakabi sikhathi. (IzA. 7:23, 26) Ivesi 18 lesahluko  9 liphetha ngokuthi: “Iimvakatjhi zakhe zisekuzikeni kweThuna.” Alo kubayini abanye bamukela isimemo sakhe esidosela ekutjhabalaleni?—IzA. 9:13-18.

11. Kubayini kuyingozi khulu ukubukela iinthombe zomseme?

¹¹ Okhunye okufuze sikubalekele kubukela iinthombe zomseme. Abanye bacabanga bona ukubukela iinthombe zomseme akulimazi ngalitho. Ngokuphambene nalokho, ukubukela iinthombe zomseme kuyalimaza, kwehlisa isithunzi begodu mumukghwa okubudisi ukuwulisa. Iinthombe zomseme ziyahlala engqondweni begodu kubudisi ukuzisula. Ngaphezu kwalokho, iinthombe zomseme azibulali iimfiso ezingakalungi kunalokho zizenza zibe namandla khulu. (Kol. 3:5; Jak. 1:14, 15) Abantu ababukela iinthombe zomseme bagcina sebaziphethe kumbi ngokomseme.

12. Sitjengisa njani ukuthi siyakubalekela ukubukela iinthombe ezenza sibe nemicabango esilapheleko?

¹² Khuyini okufuze siyenze njengamaKrestu lokha nakuvela iinthombe zomseme singakalindeli kusisetjenziswa sethu se-elekthroniki? Kufuze singaziqali. Kuzokuba lula ukwenza lokho nasikhumbula ukuthi into eqakathekileko kubulunga ubuhlobo bethu noJehova. Ngitjho neenthombe ezingabonakala zingasingezomseme kwabanye, zingavusa iimfiso zomseme. Kubayini kufuze sizibalekele? Ngombana asifuni ukucabanga ukwenza nanyana yini esilapheleko. (Mat. 5:28, 29) U-David umdala we-Thailand uthi: “Ngiyazibuza: ‘Ngitjho nanyana iinthombezi zingasingezomseme, uJehova uzokuthaba na nakangibona ngizibukela?’ Ukucabanga okunje kuyangisiza ngikghone ukwenza iinqunto ezihlakaniphileko.”

13. Khuyini esisiza sithathe iinqunto ezihlakaniphileko?

¹³ Ukusaba ukwenza nanyana yini ezokwenza uJehova angathabi, kuzosisiza sithathe iinqunto ezihlakaniphileko. Ukusaba uZimu “kukuthoma kokuhlakanipha.” (IzA. 9:10) Lokhu sikubona ekuthomeni kwezAga isahluko 9, lapho “ukuhlakanipha kweqiniso” kufaniswa nomunye umfazi.

14. Ngisiphi isimemo esihlukileko esifunda ngaso kuzAga 9:1-6?

¹⁴ Funda izAga 9:1-6. La sifunda ngesimemo esivela kuJehova uMdalethu noMthombo wakho koke ukuhlakanipha kweqiniso. (IzA. 2:6; Rom. 16:27) Endabeni le, sifunda ngendlu ekulu eneensika ezilikhomba. Lokhu kufanekisela ukuthi uJehova unesandla esivulekileko begodu wamukela boke abafuna ukusebenzisa ukuhlakanipha kwakhe ekuphileni kwabo.

15. Khuyini uJehova asimema bona siyenze?

¹⁵ UJehova ungumuphi noMtlhogomeli  omkhulu. Esibonelweni somfazi ojamele “ukuhlakanipha kweqiniso” sifunda ukuthi uJehova uyaphana begodu usinikela zoke izinto ezinengi ezihle. Amavesi la athi umfazi lo umema iimvakatjhi ngendlinakhe bona zizokudla naye ukudla okumnandi, inyama newayini alilungiseleleko. (IzA. 9:2) Ngaphezu kwalokho, ngokuya ngokwevesi lesi-4 nelesi-5: “Uthi kiloyo onganangqondo: ‘Yewize, udle uburotho bami.’” Kubayini kufuze samukele isimemo esivela emfazini lo? UJehova ufuna abantwana bakhe bahlakaniphe bebaphephe. Akafuni senze imitjhapho ezosilimaza. Kungebangelo ‘abekela abalungileko ukuhlakanipha.’ (IzA. 2:7) Nasisaba uJehova ngendlela efaneleko, sizokufuna ukumthabisa. Silalela iseluleko sakhe esihlakaniphileko begodu siyakuthabela ukusisebenzisa.—Jak. 1:25.

16. Ukusaba uZimu kwamsiza njani u-Alain bona enze isiqunto esihlakaniphileko begodu kwaba namuphi umphumela?

¹⁶ Cabanga ngendlela ukusaba uZimu okwasiza ngayo u-Alain bona enze isiqunto esihlakaniphileko. U-Alain mdala webandla begodu ungutitjhere, uthi: “Abantu abanengi engisebenza nabo bathi amafilimu atjengisa iinthombe zomseme ayindlela yokufundisa ngezomseme.” Kodwana u-Alain bekazi ukuthi lokho akusiliqiniso. Uthi, “Ngebanga lokuthi ngithanda begodu ngihlonipha uJehova, ngabetha ngenyawo phasi ngathi angekhe ngiwabukele amafilimu anjalo. Ngabahlathululela nebanga lokuthi kubayini ngingawabukeli.” Bekasebenzisa iseluleko esivela ‘ekuhlakanipheni kweqiniso’ ‘sokutjhinga phambili endleleni yokuzwisisa.’ (IzA. 9:6) Abanye abotitjhere kwabakara khulu lokhu kangangobana nje sebafunda iBhayibheli begodu baba khona esifundweni.

17-18. Ngiziphi iimbusiso ezithatjelwa ngilabo abamukela isimemo esivela ‘ekuhlakanipheni kweqiniso’ begodu khuyini abaqale ephambili kiyo? (Qala nesithombe.)

¹⁷ UJehova usebenzisa iimbonelo ezimbili zabafazaba ukutjengisa ukuthi singaba njani nengomuso elithabisako. Labo abamukela isimemo esivela ‘emfazini osidlhayela’ balinga ukufumana ithabo ekuziphatheni kumbi ngokomseme. Kodwana abalemuki ukuthi abakwenzako kuzokuthinta lokho okuzokwenzeka kibo esikhathi esizako. Umphumelabo uzokuba ‘sekuzikeni kweThuna.’—IzA. 9:13, 17, 18.

¹⁸ Labo abamukela isimemo esivela emfazini ojamele “ukuhlakanipha kweqiniso” bazokuba nengomuso elihlukileko! Iimvakatjhi zakhe zithabile ngombana zinakho koke ezikutlhogako bona zihlale ziseduze noJehova. (Isa. 65:13) Ngomphorofidi u-Isaya uJehova wathi: “Ngilalelisisani bese nidle ukudla okumnandi, nizokufumana ithabo elikhulu ekudleni okunothileko.”  (Isa. 55:1, 2) Sifunda ukuthanda lokho uJehova akuthandako nokuhloya lokho akuhloyako. (Rhu. 97:10) Kuyasithabisa ukuthi singakghona nokumema nabanye bona bazokufunda ‘ekuhlakanipheni kweqiniso.’ Sifana neensebenzi ‘ezirhuwelela zisendaweni eziphakemeko zedorobho, zithi: “Nanyana ngubani onganalemuko akangene ngapha.’” Iinzuzo esizozifumana nezizokufunyanwa ngilabo abasabelako esimemweni akusingezanje kwaphela. Zihlala umtjhawutjhile begodu zisivulela nethuba ‘lokuphila’ ngokungapheliko njengombana ‘sitjhinga phambili endleleni yokuzwisisa.’—IzA. 9:3, 4, 6.

19. Ngokuvumelana noMtjhumayeli 12:13, 14, khuyini okufuze sizimisele ukuyenza? (Qala nebhoksi elithi, “ Ukusaba UZimu Kuyasizuzisa.”

¹⁹ Funda uMtjhumayeli 12:13, 14. Ukusaba uZimu kuzosivikela sihlale siziphethe ngendlela ehlwengileko begodu siseduze noJehova hlangana namalanga wamaswaphela akhohlakeleko la. Ukusaba uZimu okunjalo kuzosenza siragele phambili simema abantu abanengi ngendlela esingakghona ngayo bona bafune ‘ukuhlakanipha kweqiniso’ begodu bazuze kikho.