1. Khuyini esiza abantu bakaJehova baragele phambili bamlotjha nanyana baqalana nemiraro?

 IBHAYIBHELI lihlathulula iinkhathi esiphila kizo ngokuthi ‘ziinkhathi ezibudisi ukuqalana nazo.’ (2 Thim. 3:1) Ngaphezu kweentjhijilo woke umuntu aqalana nazo ephasini esiphila kilweli, abantu bakaJehova baqalana nokuphikiswa nokuhlunguphazwa. Khuyini esisiza siragele phambili silotjha uJehova naphezu kwemiraro le? Ibanga eliyihloko kukwazi bona uJehova “unguZimu ophilako.”—Jor. 10:10; 2 Thim. 1:12.

2. UJehova unguZimu ophilako ngayiphi indlela?

² UJehova ubona zoke iintjhijilo esiqalana nazo begodu ufuna ukusisiza. (2 Kron. 16:9; Rhu. 23:4) Nasimqala njengoZimu ophilako, kuzosisiza siqalane nanyana ngiziphi iintjhijilo ngokuphumelelako. Tjheja bona lokho kwaba liqiniso njani eKosini uDavida.

3. UDavida bekatjho ukuthini nakathi ‘uJehova uyaphila’?

³ UDavida bekamazi uJehova bewathembela kuye. Lokha iKosi uSawula nabanye balinga ukumbulala, wathandaza wabawa isizo kuJehova. (Rhu. 18:6) Ngemva kokuthi uZimu aphendule umthandazwakhe bewamsindisa uDavida wathi, “UJehova uyaphila!” (Rhu. 18:46) Ngamezwi la bakangatjho ukuthi uZimu ukhona kwaphela. Incwadi ethileko iveza ukuthi bekagandelela bona uZimu wamambala uzokuhlala asiza abantu bakhe. UDavida bekazi ukuthi uZimu uyakubona okwenzeka kuye nokuthi uhlala akulungele ukumsiza, okwamkhuthaza  waragela phambili adumisa uJehova.—Rhu. 18:​28, 29, 49.

4. Sizuza njani ngokuqala uJehova njengoZimu ophilako?

⁴ Ukuqiniseka ukuthi uJehova nguZimu ophilako kuzosisiza simlotjhe ngokukhuthala. Sizokuba namandla wokukghodlhelelela iintjhijilo, sikhuthazeke, siragele phambili simsebenzela ngamandlethu woke. Sizozimisela nokuhlala sitjhidelene naye.

UZIMU OPHILAKO UZOKUQINISA

5. Khuyini engasipha isibindi nasiqalene neentjhijilo? (Filipi 4:13)

⁵ Sizokukghona ukukghodlhelelela iintjhijilo ezikulu namkha ezincani, nasikhumbulako ukuthi uJehova uyaphila nokuthi uhlala akulungele ukusisiza. Angasisiza kunanyana ngiziphi iintjhijilo ngombana ayikho imiraro ebudisi kuye. UnguMninimandla woke begodu angasipha amandla wokukghodlhelela. (Funda kwebeFilipi 4:13.) Lokhu kusipha isibindi sokuthi singaqalana nananyana ngiziphi iintjhijilo. Nasibona uJehova asisiza eentjhijilweni ezincani, kusenza siqiniseke nokuthi uzosisiza nakezikulu.

6. Khuyini eyenzeka kuDavida nakamumuntu omutjha eyaqinisa ukuthembela kwakhe kuJehova?

⁶ Akhesihlole izenzakalo ezimbili ezitjengisa indlela uDavida ebekathemba ngayo uJehova. Ngesikhathi asesemncani angumelusi, ibhera nebhubezi zathatha enye yezimvu zakayise. Ezenzakalwenezi, uDavida waba nesibindi, wagijimisa iimbandanezi bewasindisa imvu. Akhenge acabange ukuthi wenze lokhu ngamandlakhe. Bekazi ukuthi nguJehova obekamsiza. (1 Sam. 17:​34-37) UDavida akhenge akukhohlwe okwenzekileko. Ngokucabangisisa ngakho, waqiniseka ukuthi uZimu uyaphila nokuthi uzomsiza esikhathini esizako.

7. Khuyini uDavida adzimelela kiyo begodu lokho kwamsiza njani wakghona ukulwa noGoliyadi?

⁷ Ngokukhamba kwesikhathi, uDavida nakamumuntu omutjha wavakatjhela ikampa yama-Israyeli. Wafumana amasotja athukiwe ngebanga letsitsirimba emFilista uGoliyadi oweza ‘azokudelela ama-Israyeli.’ (1 Sam. 17:​10, 11) Amasotja bekathukiwe ngebanga lokudzimelela endleleni uGoliyadi ebekaqaleka ngayo nalokho ebekakutjho. (1 Sam. 17:​24, 25) Nanyana kunjalo, uDavida waqala ubujamobu ngendlela ehlukileko. Akhenge aqale ebekwenzeka njengesitjhijilo sebutho lakwa-Israyeli, kunalokho wasiqala njengesitjhijilo ‘sebutho lakaZimu ophilako.’ (1 Sam. 17:26) UDavida bekacabanga ngoJehova begodu bekathemba ukuthi uZimu owamsiza ngesikhathi angumelusi, uzomsiza godu. Njengombana bekaqiniseka ukuthi uZimu uzomsiza, walwa noGoliyadi bewamhlula.—1 Sam. 17:​45-51.

8. Khuyini esiqinisekisa ukuthi uJehova uzosisiza nasiqalene neentjhijilo? (Qala nesithombe.)

⁸ Nathi ngendlela efanako, singakghona ukuqalana neentjhijilo ngokuphumelelako nasikhumbula ukuthi uZimu ophilako uhlala akulungele ukusisiza. (Rhu. 118:6) Singaqinisa ukuthemba kwethu uJehova ngokucabanga ngendlela asisize ngayo esikhathini esidlulileko. Funda iindaba eziseBhayibhelini ezikukhumbuza iindlela uJehova asindise ngayo abantu abamlotjhako. (Isa. 37:​17, 33-37) Okhunye ongakwenza kucabanga ngemibiko eku-jw.org eveza indlela uJehova asekele ngayo abafowethu nabodadwethu namhlanjesi. Ukungezelela kilokho, khumbula lokho uJehova akusize ngakho. Ungatshwenyeki nangabe akhenge kwenzeke isenzakalo esikhulu ekuphileni kwakho, esinjengokuthi ulwe nebhere namkha ibhubezi.  Kubayini? Iqiniso kukuthi uJehova ukwenzele izinto ezinengi. Ukudosele kuye ukuthi ube mnganakhe. (Jwa. 6:44) Bekube nje, ulotjha uJehova ngebanga lokuthi uyakusiza. Kubayini ungambawi akusize ukhumbule iinkhathi lapha aphendule khona imithandazwakho namkha akusiza khona ngesikhathi ebewumtlhoga ngaso khulu? Ebujamweni obugandelelako, uzokuqiniseka ukuthi uJehova uzokuragela phambili akusiza.

9. Khuyini ekufuze siyikhumbule nasiqalene neentjhijilo? (IzAga 27:11)

⁹ Ukulemuka ukuthi uJehova uhlala akulungele ukusisiza kuzosenza siqale iintjhijilo ngendlela efaneleko. Njani? Ngokuthoma ukubona iintjhijilo esiqalana nazo njengengcenye ekulu ephakathi kwakaJehova noSathana. UDeveli uthi nasiqalene neentjhijilo sizokutjhiya uJehova. (Job. 1:​10, 11; funda izAga 27:11.) Kodwana nasiqalana ngendlela ephumelelako neentjhijilo sisuke sitjengisa uJehova ukuthi simthanda kangangani begodu siveza ukuthi uSathana ungumleyimala. Kghani uqalene nokuphikiswa ngurhulumende, imiraro yezeemali, abantu abasabeli kuhle nawutjhumayelako namkha eminye imiraro? Nakunjalo, khumbula ukuthi ubujamo oqalene nabo bukunikela ithuba lokwenza ihliziyo kaJehova ithabe. Khumbula nokuthi angekhe avume ulingwe ngaphezu kwamandlakho. (1 Kor. 10:13) Uzokunikela amandla wokukghodlhelela.

UZIMU OPHILAKO UZOKUBUSISA

10. UZimu ophilako uzobenzelani abamlotjhako?

¹⁰ UJehova ubusisa abantu abamlotjhako. (Heb. 11:6) Usinikela ukuthula nokwaneliseka nje, bekasinikele nokuphila okungapheliko esikhathini esizako. Singathembela kuJehova besiqiniseke bona unesifiso namandla wokusibusisa. Ithembelo lizosenza sihlale simajadu ekumlotjheni, njengabantu ebebamlotjha ngokuthembeka esikhathini esidlulileko. Kwenzeka okufanako kuThimothi ngekhulu lokuthoma.—Heb. 6:​10-12.

11. Khuyini eyakhuthaza uThimothi ukuthi asebenze budisi ebandleni? (1 Thimothi 4:10)

 ¹¹ Funda yoku-1 kaThimothi 4:10. UThimothi wathembela kuZimu ophilako. Yeke bekanamabanga amanengi wokusebenza budisi nokuzinikela. Ngayiphi indlela? Umpostoli uPowula wamkhuthaza ukuthi athuthuke njengomuntu ofundisako nesikhulumi. UThimothi godu bekufuze abekele abantu akholwa nabo isibonelo esihle, kokubili abatjha nabadala. Wanikelwa nemisebenzi ebudisi, ehlanganisa ukunikela isiyalo esinethando kodwana esiqinileko nakutlhogekako. (1 Thim. 4:​11-16; 2 Thim. 4:​1-5) Yeke uThimothi bekaqiniseka ukuthi, ngitjho nanyana umsebenzi awenzako ngezinye iinkhathi abanye bangawuboni begodu bangawuthokozi, uJehova bekazombusisa.—Rom. 2:​6, 7. 

12. Khuyini engasiza abadala bahlale bamajadu emsebenzinabo? (Qala nesithombe.)

¹² Nanamhlanjesi, abadala bangaqiniseka ukuthi uJehova uyawubona bewuyathaba ngomsebenzi omuhle abawenzako. Ngaphezu kokwelusa, ukufundisa nokutjhumayela, abadala abanengi basekela umsebenzi wokwakha nomsebenzi wokuhlangula. Abanye basiza ku-Patient Visitation Groups namkha eKomidini Yokubonisana Neembhedlela. Bayazi ukuthi ibandla ngelakaJehova ingasi labantu. Yeke benza umsebenzabo ngokusuka ehliziyweni begodu bayaqiniseka ukuthi uJehova uzobabusisa ngalokho abakwenzako.—Kol. 3:​23, 24.

13. UJehova uzizwa njani ngalokho esimenzela khona?

¹³ Akusibo boke abantu abangaba badala. Nanyana kunjalo, soke kunokuthileko esingakwenzela uJehova. UZimu uyathaba nasenza koke okusemandlenethu ukuthi simlotjhe. Uyawubona umnikelwethu esiwunikelako ephasini loke kunganandaba ukuthi mncani kangangani. Uyathaba nakasibona sisebenza budisi sihlula amahloni, siphakamise isandla ukunikela ngependulo  esifundweni begodu uthaba khulu nasiqala ngale kwemitjhapho yabafowethu nabodadwethu, sibalibalele. Ngitjho nanyana ungabona ngasuthi kuncani okghona ukukwenza, qiniseka ukuthi uJehova uyathaba ngalokho okwenzako. Uyakuthanda begodu uzokubusisa.—Luk. 21:​1-4.

HLALA UTJHIDELENE NOZIMU OPHILAKO

14. Ukuhlala sitjhidelene noJehova kusisiza njani sihlale sithembekile? (Qala nesithombe.)

¹⁴ Nasinobungani obutjhideleneko noJehova, kuzokuba bulula ukuthi sithembeke kuye. Ngilokho okwenzeka kuJosefa. Wala ngokuqinileko ukuziphatha kumbi ngokwamabhayi ngombana bekanobuhlobo obutjhideleneko noJehova begodu bekangafuni ukwenza litho elizomphatha kabuhlungu. (Gen. 39:9) Nasifuna ukutjhidelana noJehova, kufuze senze isikhathi sokuthandaza besifunde neliZwi lakhe. Ubungani bethu naye buzokuqina nasenza njalo. Nasinobungani noJehova njengoJosefa, angekhe sifune ukwenza into engekhe imthabise.—Jak. 4:8.

15. Khuyini esingayifunda kilokho okwenzeka kuma-Israyeli nakasemmangweni? (Hebheru 3:12)

¹⁵ Abantu abalibalako ukuthi uJehova unguZimu ophilako, kungaba bulula ngabo ukuthi bamtjhiye. Khumbula okwenzeka kuma-Israyeli lokha nakasemmangweni. Bekazi ukuthi uJehova ukhona kodwana athoma ukungasaqiniseki ukuthi uzowatlhogomela. Abuza ukuthi, “Inga-kghani uJehova uphakathi kwethu?” (Eks. 17:​2, 7) Ngemva kwalokho ahlubuka kuZimu. Siyaqiniseka ukuthi asifuni ukulandela isibonelo sawo esimbi.—Funda amaHebheru 3:12.

16. Khuyini engalinga ukukholwa kwethu?

¹⁶ Iphasi esiphila kilweli lenza kube budisi ukuhlala siseduze noJehova. Abanengi abayikholelwa yokuthi uZimu ukhona. Kanengi, labo abangenzi ngendlela uZimu afuna ngayo babonakala ngasuthi bayaphumelela ekuphileni. Nasibona lokho kwenzeka, ukukholwa kwethu kungalingeka. Nanyana singali  ukuthi uZimu ukhona, singathoma ukuzaza ukuthi uzosisiza. Umtloli weRhubo 73 wazibuza umbuzo ofanako. Wabona labo abanganandaba nomthetho kaZimu baphumelela ekuphileni. Lokho kwamenza wagcina sele azibuza bona kuyazuzisa na ukulotjha uZimu.—Rhu. 73:​11-13.

17. Khuyini ezosisiza sihlale sitjhidelene noJehova?

¹⁷ Khuyini eyasiza umrhubi walungisa indlela acabanga ngayo? Wacabangisisa ngalokho okuzokwenzeka ngalabo abalibala uJehova. (Rhu. 73:​18, 19, 27) Wacabanga nangeembusiso eziba khona nawulotjha uZimu. (Rhu. 73:24) Nathi singacabangisisa ngeembusiso uJehova asiphe zona bese sizimadanisa nendlela ukuphila kwethu ebekuzokuba ngayo ngathana besingalotjhi uJehova. Ukwenza njalo kusisiza sihlale sithembekile begodu sizozizwa njengomrhubi owathi: “Kodwana mina, ukutjhidela kuZimu kuhle kimi.”—Rhu. 73:28.

18. Kubayini kungakafuzi sisabe lokho okuzokwenzeka ngengomuso?

¹⁸ Singaqalana nananyana ngiziphi iintjhijilo ngamalanga wamaswaphela la ngombana ‘siziingqila zakaZimu ophilako noweqiniso.’ (1 Thes. 1:9) UZimethu unendaba nathi begodu uhlala akulungele ukusisiza. Wasiza abantu bakhe esikhathini esidlulileko, nathi uyasisiza namhlanjesi. Ingasikade sizokuqalana nesizi elikhulu elingakhenge khelibe khona ephasini. Kodwana angekhe siqalane nalo sisodwa. (Isa. 41:10) Kwanga soke singaba “nesibindi khulu sithi: ‘UJehova umsizami; angekhe ngisabe.’”—Heb. 13:​5, 6.