1-2. Ngisiphi isimemo uJehova asinikela abantu abamlotjha ngokuthembeka?

 UJEHOVA udlala yiphi indima ekuphileni kwakho? Ungaphendula uthi, ‘UJehova nguBabami, nguZimami begodu Mnganami.’ Kungenzeka kunezinye iindlela ongahlathulula ngazo uJehova. Nanyana kunjalo, kghani umqala njengoMuntu okumemileko?

² IKosi uDavida yamadanisa ubungani uJehova anabo nabantu abamlotjha ngokuthembeka netjhebiswano umuntu omemako aba nalo neemvakatjhi zakhe. Wathi: “Maye! Jehova, ngubani ongaba sivakatjhi etendeni lakho? Ngubani ongahlala entabenakho ecwengileko?” (Rhu. 15:1) Evesineli, sifunda ukuthi singaba ziimvakatjhi etendeni lakaJehova, okutjho ukuba bangani bakhe. Qala bona simemo esithabisa kangangani lesi!

UJEHOVA UFUNA SIBE ZIIMVAKATJHI ZAKHE

3. Ngubani uJehova amumema kokuthoma begodu uJehova naloyo amumemileko bazizwa njani?

³ Ngaphambi kobana adale izinto, uJehova bekayedwa. Kodwana kwaba nesikhathi lapha amukela khona iNdodanakhe elizibulo etendeni lakhe elingokomfanekiso. UJehova wayithabela khulu indimakhe yokumema abantu bona beze etendeni lakhe. IBhayibheli lithi uJehova ‘bekayithanda khulu’ begodu nayo beyihlala ‘ithabile [phambi kwakaJehova] ngaso soke isikhathi.’—IzA. 8:30.

4. Bobani uJehova abamemele etendeni lakhe ngokukhamba kwesikhathi?

 ⁴ UJehova wabumba neengilozi, nazo wazimema bona zibe ziimvakatjhi zakhe. Iingilozi zibizwa ngokuthi ‘madodana kaZimu’ begodu ziyakuthabela ukuba noJehova. (Job 38:7; Dan. 7:10) Kwadlula isikhathi eside iimvakatjhi zakaZimu kungilezo ezihlala ezulwini kwaphela. Ngokukhamba kwesikhathi, wakhulisa itende lakhe bona lihlanganise nabantu abasephasini. Ngokukhamba kwesikhathi, iimvakatjhi zakhe zahlanganisa u-Inogo, uNowa, u-Abrahama noJobho. Abantwaba balotjhe uZimu ngokuthembeka begodu bahlathululwa ngokuthi bangani bakaZimu namkha labo ‘abakhamba noZimu weqiniso.’—Gen. 5:24; 6:9; Job 29:4; Isa. 41:8.

5. Khuyini esiyifunda esiphorofidweni esifumaneka kuHezekiyeli 37:​26, 27?

⁵ Kuphele iminyaka eminengi uJehova asolo amema abantu bona babe ziimvakatjhi zakhe. (Funda uHezekiyeli 37:​26, 27.) Ngokwesibonelo, esiphorofidweni sakaHezekiyeli, uZimu ufuna abantu abamlotjha ngokuthembeka batjhidelane naye. Uthembisa ukwenza “isivumelwano sokuthula nabo.” Isiphorofidwesi siqalisele esikhathini lapho abantu abanethemba lokuphila ezulwini nalabo abanethemba lokuphila ephasini bazokuhlanganiswa khona ngaphasi kwetende elingokomfanekiso babe “mhlambi munye.” (Jwa. 10:16) Isikhatheso kunamhlanjesi!

UZIMU UNENDABA NATHI KUNGANANDABA UKUTHI SIHLALAPHI

6. Ngubani ongaba sivakatjhi etendeni lakaJehova begodu lifumaneka kuphi?

⁶ Ngeenkhathi zeBhayibheli, itende bekuyindawo lapha umuntu bekangaphumula khona bekavikeleke ebujamweni bezulu. Iimvakatjhi etendenelo bezingalindela ukutlhogonyelwa. Nasizinikela ebuhlotjeni bethu noJehova, siba ziimvakatjhi etendeni lakhe elingokomfanekiso. (Rhu. 61:4) Lapho sithabela ilwazi elinengi elisenza sitjhidelane noZimu, ubungani nabanye abaziimvakatjhi etendeni lakhe. Abantu ephasini loke bangakghona ukuba ziimvakatjhi etendeni lakaJehova. Kungenzeka ukhe waya kwenye inarha emhlanganweni okhethekileko begodu wahlangana nabanye ababusiswe ngokuba setendeni lakaJehova. Lifumaneka nanyana kukuphi lapho kunabantu abamlotjha ngokuthembeka khona.—IsAm. 21:3.

7. Kubayini singathi labo abahlongakele bathembekile basese ziimvakatjhi etendeni lakaJehova? (Qala nesithombe.)

⁷ Kuthiwani ngalabo abahlongakele bathembekile? Singatjho na ukuthi basese  ziimvakatjhi etendeni lakaJehova? Iye, singatjho! Kodwana kubayini sitjho njalo? Kungebanga lokuthi basaphila emkhumbulweni kaJehova. UJesu wahlathulula ukuthi: “Abafileko bayavuswa, ngitjho noMosi wakwambula endabeni yomuthi wameva, nakabiza uJehova ngokuthi, ‘nguZimu ka-Abrahama noZimu ka-Isaka noZimu kaJakopo.’ AkasinguZimu wabafileko kodwana ungewabaphilako ngombana boke bayaphila kuye.”—Luk. 20:​37, 38.

IINZUZO NEEMFUNEKO ZOKUBA ZIIMVAKATJHI ZAKAJEHOVA

8. Iimvakatjhi zakaJehova zizuza njani ngokuba setendeni lakhe?

⁸ Njengombana itende lamambala lingaba yindawo yokuphumula neyokuvikeleka ezintweni ezinengi, netende lakaJehova livikela iimvakatjhi zakhe kunanyana yini engalimaza ubuhlobo bazo naye begodu libanikela ithemba lamambala ngengomuso. Nasihlala sitjhidelene noJehova, uSathana angeze enza litho bona asilimaze unomphela. (Rhu. 31:23; 1 Jwa. 3:8) Ephasini elitjha, uJehova uzokuragela phambili avikela abangani bakhe abathembekileko bona ubuhlobo babo naye bungalimali bekabavikele nekufeni.—IsAm. 21:4.

9. UJehova ulindele bona iimvakatjhi zakhe ziziphathe njani?

⁹ Kuyathabisa tle ukuba ziimvakatjhi etendeni lakaJehova begodu sizokuthabela ukuba nobungani obutjhideleneko naye ngokungapheliko. Nasifuna ukuhlala siziimvakatjhi zakhe, kufuze siziphathe njani? Nasiziimvakatjhi emzini, sizokufuna ukwazi ukuthi khuyini elindeleke kithi. Ngokwesibonelo, kungenzeka umuntu osimemileko afune sihlubule amanyathelo ngaphambi kokungena ngendlini, sizokwenza sithabile lokho. Ngendlela efanako, sifuna ukwenza nanyana yini uJehova ayifunako bona sihlale siziimvakatjhi etendeni lakhe. Ithando lethu ngoJehova lisenza senze koke okusemandlenethu ‘bona simthabise ngokupheleleko.’ (Kol. 1:10) Nanyana siqala uJehova njengoMnganethu, siyazi ukuthi ubuye abe nguZimethu noBabethu ekufanele simhloniphe. (Rhu. 25:14) Kufuze sihlale sikukhumbula lokho begodu sihlale simhlonipha khulu uJehova. Ukumhlonipha ngendlela leyo kuzosenza sibalekele ukwenza nanyana yini engamphatha kabuhlungu. Kwamambala, sifuna ‘ukukhamba noZimethu ngokuthembeka.’—Mik. 6:8.

UJEHOVA AKHENGE AKHETHULULE AMA-ISRAYELI

10-11. Indlela uJehova asebenzelene ngayo nama-Israyeli emmangweni weSinayi itjengisa njani ukuthi akakhethi?

¹⁰ UJehova uphatha abangani bakhe ngokulingana. (Rom. 2:11) Singayibona indlela uJehova angakhethululi ngayo ngendlela asebenzelana ngayo nama-Israyeli nakasemmangweni weSinayi.

¹¹ Ngemva kobana atjhaphulule abantu bakhe eGibhide, uJehova wakhetha abaphristi bona basebenze ethaberinakeli. AmaLevi bekenza umsebenzi etendeni elicwengileko. Kghani labo ebebasebenza ethaberinakeli namkha ebebakampe hlanu kwalo, bebatjhidelene khulu noJehova ukudlula abanye? Awa! UJehova akakhethululi.

12. UJehova utjengise njani bona akakhethi njengombana akhethe isitjhaba sakhe esitjha? (Eksodusi 40:38) (Qala nesithombe.)

¹² Boke ebebasekampeni bebanamathuba alinganako wokuthabela ubungani obutjhideleko noJehova, kunganandaba ukuthi kunomsebenzi oqakathekileko ababelwe wona namkha lapha abahlala khona kuseduze namkha  kude kangangani nethaberinakeli. Ngokwesibonelo, uJehova waqinisekisa ukuthi isitjhaba soke siyakghona ukubona isika yelifu elikarisako nesika yomlilo ephezu kwethaberinakeli. (Funda u-Eksodusi 40:38.) Ilifu nalithoma ukukhamba, ngitjho nalabo ebebakampe kude nethaberinakeli bebakghona ukulibona, babuthelele izinto zabo, batlhatlhamule amatende wemindenabo begodu bakhambisane nesitjhaba soke. (Num. 9:​15-23) Boke bebakghona ukulizwa itjhada elihlukileko lamabhorompita wesiliva litjela woke umuntu bona kufuze athome ukufuduka. (Num. 10:2) Kuyakhanya ukuthi ukuhlala eduze nethaberinakeli bekungasi bufakazi bokuthi unobuhlobo obutjhidelene khulu noJehova. Kunalokho, woke umuntu obekakha isitjhaba esitjha sakaJehova bekangaba sivakatjhi sakhe begodu afumane isinqophiso nesivikelo sakhe. Kuyafana nanamhlanjesi, uJehova angasitjheja bekasivikele ngendlela enethando.

NANAMHLANJESI, UJEHOVA AKAKHETHI

13. Ngiyiphi enye indlela uJehova atjengisa ngayo ukuthi akakhethi namhlanjesi?

¹³ Abanye hlangana nabantu bakaZimu, bahlala eduze nemzimkhulu namkha negatja laboFakazi bakaJehova. Abanye bakghona nokusebenza ezakhiwenezi. Lokho kubanikela ithuba lokuthi benze imisebenzi eminengi begodu babe hlangana nalabo abadosaphambili. Abanye basebenza njengababonisi abakhambako namkha bakeminye imikhakha yokusebenzela uJehova isikhathi esizeleko ngendlela ekhethekileko. Nanyana kungasi njalo ngawe, ungaqiniseka ukuthi uJehova uyakuthanda begodu usivakatjhi etendeni lakhe. UJehova ukwazi kuhle begodu ukunikela koke okutlhogako. (1 Pit. 5:7) Boke abantu bakaZimu bafumana ilwazi elaneleko elibasiza bona batjhidelane noZimu, bayanqotjhiswa begodu bafumana nevikeleko abalitlhogako.

14. Ngiyiphi enye indlela uJehova atjengisa ngayo ukuthi uziphatha ngokulingana iimvakatjhi zakhe?

 ¹⁴ Esinye isibonelo esitjengisa ukuthi uJehova akakhethi ngesokuthi iBhayibheli lifunyanwa ngibo boke ephasini namhlanjesi. ImiTlolo eCwengileko beyifumaneka ngamalimi amathathu kwaphela: IsiHebheru, isi-Aramu nesiGirigi. Kghani labo abakghona ukufunda iBhayibheli ngamalimi atlolwa ngalo kwekuthomeni batjhidelene khulu noJehova ukudlula abanye? Awa, akusinjalo.—Mat. 11:25.

15. Ngibuphi ukufakazi bokuthi uJehova akakhethi? (Qala nesithombe.)

¹⁵ Ukwamukelwa kwethu nguJehova akukasami efundweni namkha emakghonweni esinawo ngamalimi. Kunokuthi anikele abantu abanefundo ephakemeko kwaphela ukuhlakanipha kwakhe, uJehova ukwenza kufumaneke ebantwini boke ephasini, kunganandaba bona bafundile namkha awa. IliZwi lakhe eliphefumulelweko iBhayibheli litjhugululelwe eenkulungwaneni zamalimi, okwenza abantu ephasini loke bakghone ukuzuza eemfundisweni zalo bebafunde nokuthi bangaba njani bangani bakaZimu.—2 Thim. 3:​16, 17.

HLALA ‘WAMUKELWA’ NGUJEHOVA

16. Ngokuya ngezEnzo 10:​34, 35, singahlala njani samukeleka kuJehova?

¹⁶ Kulilungelo elihle khulu ukwamukelwa nguJehova njengeemvakatjhi zakhe etendeni lakhe elingokomfanekiso. Unomusa, unethando bewamukela iimvakatjhi ngendlela ehle khulu. Ukungezelela kilokho, akakhethi, wamukela boke abantu, kunganandaba ukuthi bahlalaphi, bavelaphi, bafundile, bamhlobo bani, bavela kisiphi isitjhaba, baneminyaka emingakhi nokuthi bangebobulili obunjani. Kodwana ngilabo kwaphela abaphila ngeenkambisolawulo zakaZimu abamukelekako njengeemvakatjhi zakhe.—Funda izEnzo 10:​34, 35.

17. Singayifumana kuphi eminye imininingwana ngokuba sivakatjhi etendeni lakaJehova?

¹⁷ Njengombana kutloliwe kuRhubo 15:​1, uDavida wabuza umbuzo othi: “Maye! Jehova, ngubani ongaba sivakatjhi etendeni lakho? Ngubani ongahlala entabenakho ecwengileko?” Umrhubi waphefumulelwa bona aphendule imibuzo leyo. Esihlokweni esilandelako, sizokucoca ngezinye iimfuneko ezinqophileko ekufuze siphile ngazo bona uJehova asamukele.