1. Khuyini elawula ubuntu bethu khulu?

 AKUNANDABA kobana sinamalangana sibhajadisiwe namkha sekumatjhumi weminyaka sibhajadisiwe, soke sifuna ukuba nobuntu uJehova abuthandako. Bona sibe babantu abanjalo kufuze silawule indlelethu yokucabanga. Kubayini? Ngombana ubuntu bethu bulawulwa zizinto esizicabangako. Nange sihlala sicabanga ngeemfiso zenyama sizokutjho namkha senze izinto ezimbi. (Efe. 4:17-19) Ngakelinye ihlangothi nasizalisa imikhumbulwethu ngemicabango emihle kuzokuba bulula bona sikhulume namkha senze ngendlela ezokuthabisa uBabethu, uJehova.—Gal. 5:16.

2. Ngimiphi imibuzo esizokucoca ngayo esihlokwenesi?

² Njengombana khekwavezwa esihlokweni esigadungileko, angeze sakghona ukukhandela yoke imicabango emimbi bona ingangeni emikhumbulwenethu. Singakhetha bona siziphatha njani nakufika imicabango enjalo. Ngaphambi kobana sibhajadiswe, kufuze silise ukukhuluma namkha ukwenza izinto uJehova azihloyileko. Lelo ligadango lokuthoma begodu eliqakatheke khulu nasizakuhlubula ubuntu bethu obudala. Bona sithabise uJehova ngokuzeleko kuqakatheke khulu ukulalela umyalo othi: “Nimbathe ubuntu obutjha.” (Kol. 3:10) Esihlokwenesi, sizokuphendula nasi imibuzo elandelako: Buyini ubuntu obutjha”? Singabumbatha njani ubuntu obutjha begodu singabuhlubuli?

3. Ngokuya ngokweyebeGalatiya 5:22, 23, buyini “ubuntu obutjha,” begodu umuntu angabumbatha njani?

³ “Ubuntu obutjha yindlela yokucabanga nokwenza ngendlela  etjengisa ubuntu bakaJehova. Umuntu umbatha ubuntu obutjha ngokutjengisa iinthelo zommoya kaZimu, avumele ummoya ocwengileko ulawule indlela acabanga ngayo, azizwa ngayo nenza ngayo. (Funda KwebeGalatiya 5:22, 23.) Ngokwesibonelo uthanda uJehova nabantu Bakhe. (Mat. 22:36-39) Umuntu onjalo uhlala athabile ngitjho nanyana aqalene neentjhijilo. (Jak. 1:2-4) Umumenzi wokuthula. (Mat. 5:9) Uyabekezela begodu unomusa lokha nakasebenzelana nabanye. (Kol. 3:13) Uyakuthanda okulungileko begodu uyakwenza. (Luk. 6:35) Utjengisa ngezenzo bona ukholelwa kuBabakhe wezulwini. (Jak. 2:18) Uba nommoya ophasi nalokha nabamlwisako begodu uyazibamba nakalingwako.—1 Kor. 9:25, 27; Tit. 3:2

4. Ekumbatheni ubuntu obutjha, kghani singakghona ukuthuthukisa ubuntu okukhulunywa ngabo kweyebeGalathiya 5:22, 23 ngokulandelana? Hlathulula.

⁴ Bona simbathe ubuntu obutjha, kutlhogeka sithuthukise boke ubuntu okukhulunywa ngabo kwebeGalathiya 5:22, 23 nakwezinye iingcenye zeBhayibheli. * Ubuntobu abufani nezambatho ezihlukahlukeneko esizimbathako. Kuhlekuhle ezinye iingcenye zobuntobu zitholakala kobunye ubuntu. Ngokwesibonelo, nangabe umthanda kwamambala umakhelwanakho, uzombekezelela begodu ube nomusa kuye. Bona ube mumuntu olungileko, kufuze ube nommoya ophasi begodu uzibambe.

5. Kutjho ukuthini ukuba ‘nomkhumbulo kaKrestu’, begodu kubayini kufuze sifunde ngokuphila kwakaJesu? (1 Korinte 2:16)

⁵ Funda yoku-1 kwebeKorinte 2:16. Nasizakumbatha ubuntu obutjha, kutlhogeka sibe ‘nomkhumbulo kaKrestu’. Ngamanye amezwi, kufuze sifunde indlela uJesu acabanga ngayo besimlingise. UJesu watjengisa iinthelo zommoya ocwengileko kaZimu ngokuzeleko. Njengesiboniboni, utjengisa ubuntu bakaJehova njengombana bunjalo. (Heb. 1:3) Nasisolo sicabanga njengoJesu, kulapho sizokwenza njengaye begodu siphumelele ekulingiseni ubuntu bakhe.—Flp. 2:5.

6. Khuyini okufuze siyikhumbule nasilinga ukumbatha ubuntu obutjha?

⁶ Kuyakghoneka bona silingise isibonelo sakaJesu? Singacabanga: ‘uJesu  akanasono. Angeze ngakghona ukuba njengaye!’ Nangabe uzizwa ngendlela leyo, khumbula nakhu okulandelako. Kokuthoma, wadalwa ngomfanekiso kaJehova noJesu. Nje-ke ungakhetha ukubalingisa begodu ungaphumelela, okungenani ngokwezinga elithileko. (Gen. 1:26) Kwesibili, ummoya kaZimu ocwengileko unamandla ukudlula nanyana yini ephasini nezulwini. Ngesizo lawo ungakghona ukwenza izinto ebengeze wakghona ukuzenza ngaphandle kwawo. Kwesithathu, uJehova akakalindeli bona utjengise iinthelo zommoya ocwengileko ngokupheleleko nje. Kuhlekuhle, uBabethu onethando ubekele eqadi iminyaka eyi-1,000 bona labo abanethemba lokuphila ephasini bafikelele ezingeni lokungasabi nesono. (IsAm. 20:1-3) UJehova asibawa khona nje kulinga ukwenza koke esingakwenza bona sithembele kuye ukuthi uzosisiza.

7. Khuyini esizokucoca ngakho?

⁷ Singamlingisa njani ngokunqophileko uJesu? Sizokuhlola kafitjhazana ubuntu obune obuvezwa sithelo sommoya ocwengileko kaZimu. Endabeni ngayinye sizokubona lokho esingakufunda endleleni uJesu atjengisa ngayo ifanelo leyo. Njengombana senza njalo, sizokuqala eminye imibuzo engasisiza sizihlolisise bona kungangani esikwenzileko ukumbatheni kwethu ubuntu obutjha.

8. UJesu walitjengisa njani ithando?

⁸ Ithando lakaJesu ngoJehova lamenza wazidela ngebanga lakaBabakhe nangathi. (Jwa. 14:31; 15:13) UJesu watjengisa bona ubathanda ngokudephileko abantu ngendlela ebakaphila ngayo nakasephasini. Qobe langa bekanethando begodu anezwela, ngitjho nanyana abanye bebamphikisa. Indlela ephuma phambili atjengisa ngayo ithando analo ngabantu bekukubafundisa ngomBuso kaZimu. (Luk. 4:43, 44) UJesu watjengisa ithando analo ngoZimu nangabantu ngokuzidela wafa ukufa okubuhlungu, wabulawa zizoni. Wasivulela soke ithuba lokufumana ukuphila okungapheliko.

9. Ngingamlingisa njani uJesu ngokutjengisa ithando?

⁹ Sizinikele kuJehova besabhajadiswa ngebanga lethando esinalo ngoBabethu wezulwini. Yeke njengoJesu, kufuze sitjengise ukuthi siyamthanda uJehova ngendlela esibaphatha ngayo abanye abantu. Umpostoli uJwanisi watlola wathi: “Ngombana loyo ongamthandi umfowabo, ambonileko, angekhe amthanda uZimu, angakhenge ambone.” (1 Jwa. 4:20) Singazibuza: ‘Kghani ngiyithuthukisile indlela engithanda ngayo abantu? Kghani nginezwelo nangisebenzelana nabanye, ngitjho nalokha banganamusa kimi? Kghani ithando lingenza ngisebenzise isikhathi sami nezinto enginazo bona ngisize abanye bafunde ngoJehova? Kghani ngizimisele ukukwenza lokhu ngitjho nanyana inengi lingayithabeli imizamwami namkha lingiphikisa? Ngingazifumana na iindlela zokuba nesikhathi esinengi sokutjhumayela.’—Efe. 5:15, 16.

10. UJesu wabanjani mumenzi wokuthula?

¹⁰ UJesu bekayindoda enokuthula. Ngesikhathi abantu bamphatha kumbi akhenge abuyisele okumbi ngokumbi. Wenza okungaphezu kwalokho. Wathatha igadango lokwenza ukuthula begodu wakhuthaza nabanye bona benze njalo. Ngokwesibonelo, wabatjela ukuthi kufuze benze ukuthula nabafowabo nangabe bafuna uJehova amukele ukulotjha kwabo. (Mat. 5:9, 23, 24) Wasiza abapostoli ngokubuyelelweko bona balungise ipikiswano ebebanayo malungana nokuthi ngubani obekamkhulu ukubadlula boke.—Luk. 9:46-48; 22:24-27.

11. Ngingaba njani mumenzi wokuthula?

 ¹¹ Bona sibe babenzi bokuthula, kutlhogeka senze okungaphezu kokubalekela ukubangela ukungazwani. Kufuze sithathe igadango lokwenza besikhuthaze abafowethu nabodadwethu bona benze ukuthula. (Flp. 4:2, 3; Jak. 3:17, 18) Singazibuza nasi imibuzo: ‘Khuyini engizimisele ukuyidela bona ngenze ukuthula nabanye. Nangabe umfowethu namkha udadwethu ungizwise ubuhlungu, kghani ngibamba ivunda? Kghani ngilinda omunye umuntu bona athathe igadango lokuzokwenza ukuthula, namkha ngimi engithathatha igadango lokuthoma ngitjho nanyana kungasingimi owonileko? Nakufanelekako kghani ngiyabakhuthaza abangazwaniko bona benze ukuthula?’

12. UJesu watjengisa njani ukuba nomusa?

¹² UJesu bekanomusa. (Mat. 11:28-30) Watjengisa ukuba nomusa ngokucabangela nangokuzwisisa ngitjho nangaphasi kobujamo obubudisi. Ngokwesibonelo, ngesikhathi umfazi womFunisiya ambawa bona alaphe umntwanakhe, wasala isibawo sakhe ekuthomeni kodwana nakatjengisa ukukholwa ngendlela ekulu, ngomusa wamlapha umntwanakhe. (Mat. 15:22-28) Ngitjho nanyana bekanomusa, uJesu akhenge akubalekele ukunikela iseluleko. Ngezinye iinkhathi bekatjengisa ukuba nomusa ngokubatjela amaqiniso labo abathandako. Ngokwesibonelo, ngesikhathi uPitrosi alinga ukumqeda amandla ekwenzeni intando kaJehova, uJesu wamlungisa phambi kwabanye abafundi. (Mar. 8:32, 33) Akhenge akwenze lokhu ngebanga lokumhlazisa kodwana ngebanga lokumbandula nokulemukisa abanye abafundi bona bangenzi izinto abangakayalelwa zona. Akunakuzaza ukuthi uPitrosi wazizwa ahlazisekile kodwana wazuza eselulekweneso.

13. Singaba njani nomusa kwabanye?

¹³ Bona sibe nomusa kilabo esibathandako, ngezinye iinkhathi kufuze sibanikele iseluleko. Lingisa uJesu ngokusekela iselukeko sakho eenkambisweni ezifumaneka eliZwini likaZimu. Yiba nomusa. Bacabangele okuhle, unethemba lokobana labo abathanda uJehova kunye nawe bazokusabela kuhle eselulekweni obanikela sona. Zibuze nasi imibuzo: ‘Kghani nginaso isibindi sokukhuluma nangibona omunye engimthandako enza okungakalungi? Nakutlhogeka ngikhuphe iseluleko, kghani ngikhuluma ngomusa nofana ngikhuluma amagama ahlabako? Uyini umqophwami nanginikela iseluleko? Kghani ngisikhupha ngombana ngisilingwe mumuntu loyo namkha kungombana ngifuna ukumsiza?’

14. UJesu wakutjengisa njani ukulunga?

¹⁴ UJesu bekangazi kwaphela okulungileko kodwana bekakwenza. UJesu uyamthanda uBabakhe, yeke wenza okulungileko ngomnqopho omuhle. Umuntu olungileko ubonakala ngezenzo ezihle azenzela abanye abantu, lobo bubuntu esingakghona ukuba nabo ngokwenza izenzo ezihle kwabanye. Akukaneli ukwazi kwaphela ukuthi singakwenza njani okulungileko, kufuze senze okulungileko ngomnqopho omuhle. Omunye angazibuza: ‘Kghani kuyakghoneka ukwenza okuhle ngomnqopho ongasimuhle?’ Iye kuyakghoneka. Ngokwesibonelo, uJesu wakhuluma ngalabo ebebanikela abatlhagako izipho kodwana baqiniseke ukuthi batjela abanye ngalokho abakwenzileko. Imisebenzi emihle ebebayenza yaba lilize kuJehova.—Mat. 6:1-4.

15. Singaba njani babantu abalungileko?

¹⁵ Singaba ngabalungileko nange senza into elungileko ngamabanga wokungabimarhamaru. Yeke, ungazibuza: ‘Inga-kghani ngiyayazi into elungileko begodu  ngiyayenza? Uyini umnqophwami nangenza into elungileko?’

16. Khuyini okufuze siyenze qobe langa, begodu kubayini?

¹⁶ Asingaphethi ngokuthi umsebenzi wokumbatha ubuntu obutjha uphela lokha nasibhajadiswako. Kufuze sitlhogomele ‘isambatho sethu esitjha’ bona sihlale sisebujamweni obuhle. Lokho singakwenza ngokufuna iindlela zokutjengisa iinthelo zommoya kaZimu qobe langa. Kubayini? Kungombana uJehova unguZimu wezenzo begodu nommoyakhe umamandla asebenzako. (Gen. 1:2) Nje-ke zoke iingcenye zeenthelo zommoya zingasenza sithathe amagadango. Ngokwesibonelo umfundi uJakopo watlola: “Nokukholwa ngaphandle kwemisebenzi kufile.” (Jak. 2:26) Kungatjhiwo okufanako ngazo zoke iingcenye zeenthelo zommoya kaZimu. Isikhathi ngasinye nasitjengisa iinthelo zommoya kaZimu, sinikela ubufakazi bokuthi uyasebenza kithi.

17. Kufuze sisabele njani nasibhalelwa kutjengisa iinthelo zommoya?

¹⁷ Ngitjho namaKrestu esele aneminyaka eminengi abhajadisiwe ngezinye iinkhathi ayabhalelwa kutjengisa iinthelo zommoya. Into eqakatheke khulu kungalahli itewu. Cabanga nganaku umfanekiso. Nakungenzeka udabule isambatho sakho osithandako kghani bewungasilahla msinyana? Awa. Nange kuyakghonakala bewungasithungisisa kuhle. Begodu bewuzokutjhejisisa khulu esikhathini esilandelako. Ngendlela efananako, nange ngezinye iinkhathi uyabhalelwa ukuba nomusa, ukubekezela namkha ukutjengisa ithando komunye, ungalahli itewu. Ukubawa ukulitjalelwa ngokusuka ehliziyweni kungawulungisa umonakalo, begodu kukubeke ebujamweni obuhle nomuntu loyo. Zimisele ukwenza ngcono esikhathini esizako.

18. Khuyini esingaqiniseka ngayo?

¹⁸ Siyakuthokoza ukuba nesibonelo sakaJesu! Nasilingisa indlela ebekacabanga ngayo nebekaziphatha ngayo, kuzokuba bulula bona senze njengaye. Nasenza njengoJesu kuzokuba bulula ukumbatha ubuntu obutjha. Esihlokwenesi sifunde ngobuntu obune obuvezwa ziinthelo zommoya kaZimu. Kubayini ungaziphi esinye isikhathi sokuhlolisisa ezinye iinthelo zommoya nokuthi ungazitjengisa njani ekuphileni kwakho. Uzokufumana iinhloko ezihlukahlukeneko ngendaba le encwadini ethi, Ithulusi Lokurhubhulula LaboFakazi BakaJehova ngaphasi kwesihloko esithi “Ukuphila KobuKrestu” nesithi “Iinthelo Zomoya.”Ungaqiniseka ngokuthi nange udlala indimakho, uJehova uzokusiza umbathe ubuntu obutjha begodu ungabuhlubuli.