1. Bekunjani ukuphila kwakho ngaphambi kokufunda iBhayibheli?

 BEKUNJANI ukuphila kwakho ngaphambi kokufunda iBhayibheli naboFakazi bakaJehova? Inengi lethu alifuni nokukhumbula bona beliphila njani. Indlela esiqala ngayo izinto kunye nobuntu bethu, bekulawulwa yindlela iphasi eliqala ngayo izinto, khulukhulu nakuziwa endabeni yokulungileko nokungakalungi. Kuhlekuhle, ‘besinganathemba begodu besinganaZimu ephasini.’ (Efe. 2:12) Ukufunda iBhayibheli, kwakutjhugulula koke lokho!

2. Khuyini owayifunyanako njengombana bewufunda iBhayibheli?

² Ngemva kokuthoma ukufunda iBhayibheli, wabona ukuthi unoBaba osezulwini okuthanda khulu. Watjheja godu nokuthi nawufuna ukuthabisa uJehova begodu ube yingcenye yomndenakhe omlotjhako, kuzokufuze wenze amatjhuguluko abonakalako endleleni ophila ngayo, endleleni oqala ngayo izinto nendlelenakho yokucabanga. Kuzokufuze uphile ngemithethokambiswakhe ephakemeko.—Efe. 5:3-5.

3. NgokwebeKolose 3:9, 10, khuyini uJehova afuna siyenze begodu sizokucoca ngani esihlokwenesi?

³ UMdalethu noBabethu wezulwini, uJehova unelungelo lokusiquntela bona kufuze siphile njani ngombana simalunga womndenakhe. Ufuna bona sibhajadiswe, silinge ngamandlethu ‘ukuhlubula ubuntu obudala nemikghwabo.’ * (Funda yebeKolose 3:9, 10.) Isihlokwesi sizokusiza labo abafuna ukubhajadiswa bona baphendule imibuzo emithathu nasi: (1) Buyini “ubuntu obudala”? (2) Kubayini uJehova asikhuthaza bona sibuhlubule? (3) Singakwenza njani lokho? Kithi soke esibhajadisiweko, isihlokwesi sizosisiza sibalekele izinto ezingasibuyisela ebuntwini obudala.

4. Umuntu olawulwa ‘bubuntu obudala’ uziphatha njani?

⁴ Umuntu olawulwa ‘bubuntu obudala’ esikhathini esinengi ucabanga bekenze ngendlela yenyama. Umuntu onjalo kubulula bona abe marhamaru, angathokozi begodu umsinya ukubeni nenturhu bekazikhakhazise. Angakuthabela ukubukela iinthombe eziveza ukuziphatha okusilapheleko ngokomseme kunye nokubukela amafilimu aveza izenzo zenturhu. Asikuzazi ukuthi umuntu onjalo unabo ubuntu obuhle begodu ngezinye iinkhathi uyazisola ngezinto ezimbi azikhulumako nazenzako kodwana ukuzisola kwakhe akunamandla wokumenza atjhugulule indlelakhe yokucabanga nokuziphatha.—Gal. 5:19-21; 2 Thim. 3:2-5.

5. Ngimuphi umbono olinganiselako ekufuze sibe nawo nakuziwa ekuhlubuleni ubuntu obudala? (IzEnzo 3:19)

⁵ Sibabantu abanesono, yeke akekho kithi ongayisusa ngokupheleleko imicabango neemfiso ezimbi eenhliziyweni neemkhumbulwenethu. Ngezinye iinkhathi sizokwenza besikhulume into esizozisola ngayo. (Jor. 17:9; Jak. 3:2) Nasihlubula ubuntu obudala, iimfiso zenyama nemikghwa emimbi ngekhe kusasilawula. Sizokuba babantu abanobuntu obuhlukileko.—Isa. 55:7; Funda IzEnzo 3:19.

6. Kubayini uJehova asikhuthaza bona sisuse imicabango nemikghwa emimbi ekhambisana nobuntu obudala?

⁶ UJehova usikhuthaza bona siruthule imicabango nemikghwa emimbi ngombana uyasithanda begodu ufuna sithabele ukuphila. (Isa. 48:17, 18) Uyazi ukuthi nasingalwisani neemfiso zenyama, lokho kungasilimaza begodu kungalimaza nabanye. Kumzwisa ubuhlungu ukusibona sizilimaza begodu silimaza nabanye.

7. Ngokwencwadi yebeRoma 12:1, 2, ngikuphi ukukhetha ekufuze sikwenze?

⁷ Abanye abangani bethu namalunga wemindenethu bangathoma bahlekise ngathi nasilinga ukutjhugulula ubuntu bethu. (1 Pit. 4:3, 4) Bangathi sinelungelo lokwenza nanyana yini esiyifunako begodu akukafuzi sivumele abanye basitjele bona senzeni. Iqiniso kukuthi labo abangafuni ukuphila ngeenkambisolawulo zakaJehova abakazijameli. Ekhabolakhona,  bavumela iphasi lakaSathaneli bona libalawule. (Funda kwebeRoma 12:1, 2.) Soke kufuze sikhethe: Kghani sifuna ukuhlala nobuntu obudala obulawulwa sisono nephasi elimbi lakaSathana namkha sivumela uJehova asitjhugulule sibe babantu abangcono nje.—Isa. 64:8.

8. Ngiliphi isizo esingalifumana bona sibalekele imicabango nemikghwa emimbi?

⁸ UJehova uyazi ukuthi kuzokuthatha isikhathi nomzamo bona sibalekele ukucabanga okungakafaneli nemikghwa emimbi. (Rhu. 103:13, 14) Ngitjho nanyana kunjalo, ngeliZwi lakhe, ummoyakhe kunye nehlanganwakhe, uJehova usinikela ukuhlakanipha, amandla nesekelo esilitlhogako bona sitjhuguluke. Siyaqiniseka ukuthi uJehova sele akusizile. Akhesicoce ngamanye amagadango esingawathatha angasivumela bona senze amatjhuguluko aragela phambili ukwenzela bona sihlubule ubuntu obudala besifanelekele ukubhajadiswa.

9. IliZwi lakaZimu lingakusiza bona wenzeni?

⁹ Sebenzisa iBhayibheli bona uzihlolisise. IliZwi lakaJehova lifana nesiboniboni, lingakusiza uhlolisise indlela ocabanga ngayo, okhuluma ngayo kunye nendlela owenza ngayo izinto. (Jak. 1:22-25) Umuntu ofunda naye iBhayibheli namkha umKrestu onelemuko angakunikela iseluleko. Ngokwesibonelo, angasebenzisa imitlolo ukukusiza ubone ukuthi kukuphi la wenza kuhle khona nala kufuze uthuthukise khona. Angakufundisa nokuthi ungalifumanaphi ilwazi elingeziweko usebenzisa iincwadi ezisekelwe eBhayibhelini ezinemininingwana elisizo yokuhlula imikghwa emimbi. UJehova uhlala akulungele ukukusiza. Uyazi bona ngikuphi angakwenza bona akusize, uyazi nokuthi khuyini esehliziywenakho. (IzA. 14:10; 15:11)Yeke, thandaza begodu ufunde iliZwi lakhe qobe lilanga.

10. Ufundeni endabeni ka-Elie?

¹⁰ Qiniseka ngokuthi imithethokambiso kaJehova iphuma phambili. Singazuza kilokho uJehova asibawa bona sikwenze. Labo abaphila ngemithethokambiso kaJehova bayahlonipheka, banomnqopho ekuphileni begodu banethando lamambala. (Rhu. 19:7-11) Ngokuhlukileko kilokhu, labo abangayilaleli imithethokambiso kaJehova, baqalana nemiphumela ebuhlungu yokungalaleli. Tjheja okwatjhiwo ngelinye isokana ibizo lalo ngu-Elie malungana nokungayilaleli imithethokambiso kaZimu. Lakhuliswa babelethi abathanda uJehova. Kwathi lokha naliseminyakeni yobutjha, lathoma ukuzihlanganisa nabantu abaziphatha kumbi. Lathoma ukuphila ipilo esilapheleko ebeyihlanganisa ukusebenzisa kumbi iindakamizwa begodu lagcina sele lisigebengu. U-Elie uthi besele amumuntu osilingeka msinyana begodu anenturhu. Uthi: “Ngenza koke engafundiswa bona ngingakwenzi njengomKrestu.” Akhenge akulibale afundiswa khona ngesikhathi asesemutjha. Wathoma godu wafunda iBhayibheli. Wasebenza budisi bona alise imikghwakhe emimbi begodu wabhajadiswa ngo-2000. Ukuphila ngemithethokambiso kaJehova kumzuzise njani? Uthi: “Nje nginokuthula komkhumbulo begodu nginonembeza ohlwengekileko.” * Indabakhe isifundisa ukuthi labo abangafuni ukuphila ngemithethokambiso kaJehova, bazilimaza bona. UJehova uzimisele ukusiza nanyana ngubani bona atjhugulule ukuphila kwakhe.

11. Ngiziphi izinto uJehova azihloyileko?

¹¹ Hloya lokho uJehova akuhloyako.  (Rhu. 97:10) IBhayibheli liveza ukuthi uJehova uwahloyile “amehlo aziphakamisako, ilimu elileya amala, izandla eziphalaza iingazi ezimsulwa.” (IzA. 6:16, 17) Godu, ‘uyabazonda abenzi bobumbi nabazitjhayako.’ (Rhu. 5:6) UJehova uzihloyile izenzwezi zokuziphatha kangangokuthi warhayila boke abantu abambi ebebazalise iphasi ngenturhu ngesikhathi sakaNowa. (Gen. 6:13) Cabanga nganasi esinye isibonelo godu. Ngomphorofidakhe uMalaki, uJehova wathi umhloyile owenza ameswe wokungathembeki kumkakhe abe amtlhale. UJehova akakwamukeli ukumlotjha kwabo begodu uzobenza balandise ngokuziphatha kwabo.—Mal. 2:13-16; Heb. 13:4.

12. Kutjho ukuthini ‘ukuhloya okumbi’?

¹² UJehova ufuna ‘sihloye okumbi.’ (Rom. 12:9) Ibizo elithi “hloyani” liveza umuzwa oqinileko; okutjho ukuthi kufuze sihloye into ngokuqinileko besifikelele ezingeni lokuyinyenya. Cabanga bona bewungazizwa njani nabekungathiwa idla ukudla okubolileko. Ukucabanga nje ngalokho, kukwenza uzizwe ugula. Ukucabanga ukwenza into uJehova athi uyihloyile, kufuze kusenze sikunyenye.

13. Kubayini kufuze sitjheje izinto esicabangako?

¹³ Tjheja lokho okucabangako. Izinto esizicabangako zilawula indlela esenza ngayo. Kungebangelo uJesu wasifundisa bona sibalekele imicabango emimbi engasidosela ekwenzeni isono esikhulu. (Mat. 5:21, 22, 28, 29) Sifuna ukuthabisa uBabethu wezulwini, akusinjalo? Yeke kuqakatheke khulu bona singariyadi ukubalekela nanyana ngimiphi imicabango emimbi esifikelako!

14. Indlela okhuluma ngayo ivezani ngawe begodu ngimiphi imibuzo ekufuze siyiphendule?

¹⁴ Tjheja izinto ozikhulumako. UJesu wathi, “koke okuphuma ngemlonyeni kusuka ehliziyweni.” (Mat. 15:18) Esikukhulumako, kuveza ihlobo labantu esiyilo ngaphakathi. Yeke, zibuze imibuzo nasi: ‘Kghani ngiyakubalekela ukuleya amala, ngitjho nanyana ukukhuluma iqiniso kungangifaka emrarweni? Njengomuntu otjhadileko, kghani ngiyakubalekela ukuhlekisana khulu nabantu bobulili obuhlukileko? Kghani ngiyayibalekela ikulumo esilapheleko njengomuntu nakabalekela isifo esirhagalako? Kghani ngiphendula ngommoya ophasi lokha umuntu nakangiphathe kumbi?’ Kuzokusiza ukucabangisisa ngemibuzo le.  Nawulinga ngakho koke okusemandlenakho ukubalekela ukuhlunguphaza, ukuleya amala nekulumo esilapheleko, uzokufumana kubulula ukuhlubula ubuntu obudala.

15. Kutjho ukuthini ukubethela ubuntu bethu obudala esigodweni?

¹⁵ Zimisele ukuthatha amagadango aqinileko. Umpostoli uPowula, wasebenzisa umfanekiso onamandla ukusitjengisa bona kuqakatheke kangangani ukutjhugulula indlela esenza nesiziphatha ngayo. Watlola wathi kufuze ‘sibethele ubuntu bethu obudala esigodweni.’ (Rom. 6:6) Ngamanye amezwi, sifuna ukulandela isibonelo sakaKrestu. Kufuze sibulale imikghwa nokuziphatha uJehova akuhloyileko. Ngemva kokuthatha amagadango la sizokuba nonembeza ohlwengekileko begodu sibe nethemba lokuthabela ukuphila okungapheliko. (Jwa. 17:3; 1 Pit. 3:21) Khumbula ukuthi uJehova ngeze atjhugulula imithethokambiswakhe ngebanga lethu. Kunalokho, ngithi ekufuze sitjhugulule indlela esiziphatha ngayo ukwenzela bona ikhambisane nemithethokambiswakhe.—Isa. 1:16-18; 55:9.

16. Kubayini kufuze uzimisele ukuragela phambili ulwisane neemfiso zenyama?

¹⁶ Ragela phambili ulwisane neemfiso zenyama. Ngitjho nangemva kokubhajadiswa, kusafuze uragele phambili ulwisane neemfiso zenyama. Tjheja okwenzeka kwenye indoda ibizo layo lingu-Maurício. Lokha nakasesemutjha, wathoma ukuthanda abantu bobulili obufana nebakhe. Ngokukhamba kwesikhathi, wahlangana naboFakazi bakaJehova begodu wathoma ukufunda iBhayibheli. Ngemva kokwenza amatjhuguluko ekuphileni kwakhe, wabhajadiswa ngo-2002. Ngitjho nanyana sele alotjhe uJehova iminyaka eminengi, u-Maurício uthi: “Kufuze ngivume ukuthi kutlhogeke ngilwisane neemfiso ezingakalungi ngezinye iinkhathi.” Akakavumeli lokhu bona kumenze aphelelwe mamandla. Kunalokho uthi: “Kuyangikhuthaza ukwazi ukuthi ukungalaleli kwami iimfiso zenyama kuthabisa uJehova.” *

17. Ngikuphi okukhuthazako okufumene kilokho okwenzeka ku-Nabiha?

¹⁷ Thandazela isizo lakaJehova, uthembele emmoyenakhe ocwengileko, ingasi emandlenakho. (Gal. 5:22; Flp. 4:6) Kufuze sizimisele nasizakuhlubula ubuntu obudala begodu sihlale sibuhlubulile. Akhucabange ngalokho okwenzeka komunye umma ibizo  lakhe ngu-Nabiha. Ubabakhe wamlahla asesemncani aneminyaka esithandathu kwaphela. Uthi: “Lokho kwangenza ngaphatheka kabuhlungu emmoyenami.” Njengombana bekakhula, u-Nabiha waba mumuntu okwata khulu begodu anganamusa. Wathoma wathengisa iindakamizwa, wabotjhwa begodu wahlala iminyaka ejele. Wavakatjhelwa nguFakazi othileko nakasesejele begodu wathoma ukufunda iBhayibheli naye. Wathoma ukwenza amatjhuguluko ekuphileni kwakhe. Uthi: “Ezinye izinto ebengizenza, kwaba bulula bona ngizilise kodwana bekubudisi khulu ukulisa ukubhema.” U-Nabiha walwisana nomukghwa lo isikhathi esingangomnyaka kodwana ekugcineni wawuhlula. Wakwenza njani lokho? Uthi: “Ngaphezu kwazo zoke izinye izinto, bengithandaza qobe kuJehova begodu ukwenza njalo kwangisiza bona ngiwuhlule umukghwa lo.” Nje, utjela abanye uthi: “Ngiyaqiniseka ukuthi nangikghonileko ukwenza amatjhuguluko ukuthi ngithabise uJehova, nanyana kungubani angawenza!” *

18. Ngokweyoku-1 kwebeKorinte 6:9-11, khuyini inengi leenkhonzi zakaZimu elikghonileko ukuyenza?

¹⁸ Ekhulwini lokuthoma, amanye amadoda nabomma uJehova akhetha bona babuse kunye noKrestu nabo khebazenza izinto ezimbi. Ngokwesibonelo, abanye babo bebaziimfebe, abanye balala nabanobulili obufana nebabo begodu abanye bebaziingebengu. Ngokusizwa mummoya kaZimu ocwengileko, bakghona ukutjhuguluka, batjhugulula nobuntu babo. (Funda yoku-1 kwebeKorinte 6:9-11.) Ngendlela efanako, nanamhlanjesi iBhayibheli lisize iingidi zabantu bona zitjhugulule ukuphila kwazo. * Bahlule imikghwa edephileko ebebanayo. Isibonelo sabo siyatjengisa ukuthi nawe ungakghona ukwenza amatjhuguluko ebuntwini bakho, uhlule imikghwa emimbi bona ufanelekele ukubhajadiswa.

19. Khuyini esizokucoca ngayo esihlokweni esilandelako?

¹⁹ Ngaphezu kokuhlubula ubuntu obudala, labo abafuna ukubhajadiswa, kufuze benze umzamo wokumbatha ubuntu obutjha. Isihloko esilandelako sizokucoca ngokuthi singakwenza njani lokho nokuthi abanye bangasisiza njani.