ISIHLOKO SE-14
“Boke Bazokwazi Ngalokhu Ukuthi Nibafundi Bami”
“Boke bazokwazi ngalokhu ukuthi nibafundi bami nanithandanako.”—JWA. 13:35.
INGOMA 106 Asifundeni Ukuba Nethando
OKUZOKUCOCWA NGAKHO a
Khuyini abantu abanengi abangasiboFakazi abayicabangako nababona abantu bakaJehova bathandana? (Funda isigaba 1)
1. Khuyini abantu abayitjhejako nabeze esifundweni kokuthoma? (Qala nesithombe.)
AKHUCABANGE ngabatjhadikazi abeze kokuthoma esifundweni eWolweni lomBuso laboFakazi bakaJehova. Abatjhadikazaba kubarara khulu ukubona indlela abafowethu nabodadwethu abanobuntu ngayo nendlela abathandana ngayo. Nababuya esifundweni basendleleni eya ekhaya, umfazi uthi endodenakhe, ‘Abantwaba bahlukile kwabanye abantu ekhesahlangana nabo begodu ngiyakuthabela ukuba nabo.’
2. Kubayini abanye balise ukulotjha uJehova?
2 Ithando elihlangana kwabantu bakaJehova likhethekile. Kuliqiniso ukuthi aboFakazi bakaJehova banemitjhapho. (1 Jwa. 1:8) Njengombana sithoma ukwazi labo abasebandleni, kulapho sizokubona khulu imitjhaphwabo. (Rom. 3:23) Okudanisako kukuthi abanye bavumele lokho kubalisise ukulotjha uJehova.
3. Abalandeli bakaJesu beqiniso bazokubonakala ngani? (Jwanisi 13:34, 35)
3 Akhuqale godu isihloko esifunda ngaswesi. (Funda uJwanisi 13:34, 35.) Ngiliphi itshwayo lokubona abalandeli bakaKrestu beqiniso? Lithando ingasi ukungabi nesono. Tjheja bona uJesu akhenge athi: ‘Ngalokhu uzokwazi ukuthi umfundami.’ Wathi: “Boke bazokwazi ngalokhu ukuthi nibafundi bami.” Ngalokhu uJesu watjengisa ukuthi akusibafundi bakhe kwaphela abazokubona abalandeli bakhe beqiniso ngethando abanalo komunye nomunye kodwana nalabo abangaphandle kwebandla lobuKrestu.
4. Khuyini abanye abangafuna ukuyazi ngamaKrestu weqiniso?
4 Abantu abangasiboFakazi bakaJehova bangabuza: ‘Ithando libaveza njani abalandeli bakaJesu beqiniso? UJesu watjengisa njani ukuthi uyabathanda abapostoli bakhe? Singasilingisa njani isibonelo sakaJesu namhlanjesi?’ AboFakazi benza kuhle ngokucabangisisa ngeempendulo zemibuzo enjalo. Ukwenza njalo kuzosisiza sitjengise ithando ngokuzeleko, khulukhulu nasisebenzelana nabantu abanesono.—Efe. 5:2.
KUBAYINI ITHANDO KUNGIYO KWAPHELA INDLELA YOKUBONA ABALANDELI BAKAJESU BEQINISO?
5. Hlathulula amezwi kaJesu afumaneka kuJwanisi 15:12, 13.
5 UJesu wahlathulula ukuthi abalandeli bakhe bazokuthandana ngendlela ekhethekileko. (Funda uJwanisi 15:12, 13.) Tjheja bona uJesu wabayala wathi: “Nithandane njengombana nami nginithandile.” Kutjho ukuthini lokho? UJesu waragela phambili wahlathulula ukuthi ithando elinjengaleli, litjho ukuthanda abanye ukudlula ukuzithanda wena namkha lithando elingenza umKrestu afe ngebanga lamanye amaKrestu. b
6. IliZwi lakaZimu likugandelela njani ukuqakatheka kwethando?
6 IliZwi lakaZimu lisifundisa ukuthi ithando liqakatheke khulu. Ngokwesibonelo, inengi labantu liwathanda khulu amavesi naka: “UZimu ulithando.” (1 Jwa. 4:8) “Kufuze uthande umakhelwanakho njengombana uzithanda wena.” (Mat. 22:39) “Ithando ligubuzesa izono ezinengi.” (1 Pit. 4:8) “Ithando angeze laphela.” (1 Kor. 13:8) Amavesi la namanye kufuze akwenze kukhanye kinanyana ngubani ukuthi kuqakatheke kangangani ukutjengisa ubuntu obuhlobu.
7. Kubayini uSathana angakghoni ukufundisa abantu bona bathandane begodu babumbane?
7 Abantu abanengi bayazibuza: ‘Ungayibona njani ikolo yeqiniso? Zoke iinkolo zithi zifundisa iqiniso, kodwana ngayinye ifundisa okuhlukileko ngoZimu.’ USathana wenze iinkolo ezinengi zamala begodu lokho kwenza kube budisi ngabantu bona bazi ukuthi ngiyiphi yeqiniso. Kodwana angeze akghona ukwenza abantu abavela ephasini mazombe bona babe babantu abathandanako. NguJehova kwaphela ongenza njalo. Lokho sikwazi ngombana ithando lamambala livela kuJehova. Ngilabo kwaphela abanommoya kaJehova nesibusiso sakhe abathandana kwamambala. (1 Jwa. 4:7) Kungebangelo uJesu athi, balandeli bakhe kwaphela abazokuthandana kwamambala.
8-9. Abanye abantu bathinteke njani ngokubona ithando aboFakazi bakaJehova abanalo?
8 Njengombana uJesu abikezela, inengi labantu likghonile ukubona abalandeli bakhe beqiniso ngethando abanalo phakathi kwabo. Ngokwesibonelo, umfowethu u-Ian, ukhumbula umhlangano wokuthoma aya kiwo, owabanjelwa etatawini lezemidlalo eduze nalapha ahlala khona. U-Ian khewaya etatawineli eenyangeni ezimbalwa ezidlulileko ayokubukela zemidlalo. Uthi: “Abantu ebebeze emhlanganweni bebahluke khulu kunabantu ebebazokubukela zemidlalo. AboFakazi bebanehlonipho, bambethe kuhle nabantwana babo baziphethe kuhle.” Ungezelela uthi: “Ngaphezu kwakho koke, abantwaba bebabonakala banelisekile begodu banokuthula, okuyinto ebengiyifuna. Angisazikhumbuli iinkulumo ezanikelwa emhlanganweni loyo kodwana ukuziphatha kwaboFakazi ngikho engisakukhumbulako.” c Ukuziphatha okunjalo kumphumela wethando lamambala esinalo ngomunye nomunye. Ngebanga lokuthanda abafowethu nabodadwethu, sibaphatha ngomusa nangehlonipho.
9 Umfowethu u-John, wazizwa ngendlela efanako nakathoma ukuya esifundweni, uthi: “Yangikara indlelabo yokuba nobungani . . . kiwo woke umuntu, bebabonakala bamsulwa. Ithando ebebanalo langiqinisekisa ukuthi ngifumene ikolo yeqiniso.” d Indaba le nezinye ezinengi zitjengisa ukuthi abantu bakaJehova bamaKrestu weqiniso.
10. Kunini la sinethuba lokutjengisa ithando lobuKrestu? (Qala nomtlolo waphasi.)
10 Njengombana kuvezwe ekuthomeni, abafowethu nabodadwethu banesono. Ngezinye iinkhathi bazokutjho namkha benze izinto ezisikwatisako. e (Jak. 3:2) Ebujamweni obunjalo sinethuba lokutjengisa ithando lobuKrestu ngendlela esisabela ngayo. Yeke khuyini esingayifunda esibonelweni sakaJesu?—Jwa. 13:15.
UJESU WABATJENGISA NJANI ABAPOSTOLI BAKHE BONA UYABATHANDA?
UJesu watjengisa ukuthi uyabathanda abapostoli ngitjho nanyana bebenza imitjhapho eminengi (Funda iingaba 11-13)
11. Ngimiphi imikghwa emimbi uJakopo noJwanisi abayitjengisako? (Qala nesithombe.)
11 UJesu akhenge alindele bona abalandeli bakhe bangayenzi imitjhapho. Kunalokho, ngethando wabasiza bona balungise imikghwabo emimbi, ukwenzela bona bamukelwe nguJehova. Kobunye ubujamo, uJakopo noJwanisi babawa unina bona ababawele kuJesu isikhundla esiphakemeko emBusweni. (Mat. 20:20, 21) Lokho uJakopo noJwanisi abakwenzako kwatjengisa ukuthi bayazikhakhazisa begodu bazibona baqakatheke khulu ukudlula abanye.—IzA. 16:18.
12. Inga-kghani nguJakopo noJwanisi kwaphela abatjengisa umukghwa omumbi? Hlathulula.
12 UJakopo noJwanisi akusingibo bodwa abatjengisa imikghwa emimbi ebujamwenobo. Tjheja indlela abanye abapostoli abasabela ngayo: “Kwathi abanye abalitjhumi nabezwa ngendaba leyo, basilingeka ngebanga labantwana bomuntu ababilaba.” (Mat. 20:24) Ungawacabanga amezwi ahlabako akhutjhwa nguJakopo, uJwanisi nabanye abapostoli. Kungenzeka abanye batjho amezwi afana nala: ‘Nicabanga ukuthi nibobani bona ningabawa isikhundla esiphakemeko emBusweni? Akusingini nodwa enisebenze budisi noJesu. Nathi siyafaneleka njengani ukufumana amalungelo akhethekileko.’ Kinanyana ngikuphi, abapostolaba bavumela ubujamobu buthikazise ithando abanalo ngomunye nomunye kwesikhatjhana.
13. UJesu wasabela njani emitjhaphweni yabapostoli bakhe? (Matewu 20:25-28)
13 Khuyini uJesu ayenzako ebujamwenobo? Akhenge asilingeke. Akhenge athi uyokufuna abapostoli abangcono, amadoda athobekileko azokuphatha abanye ngethando qobe. Kunalokho, ngomusa uJesu wabonisana kuhle namadoda la ngebanga lokuthi bekazi bona afuna ukwenza okulungileko. (Funda uMatewu 20:25-28.) Waragela phambili asebenzelana nabo ngendlela enethando ngitjho nanyana isenzwesi besingasi ngesokuthoma begodu besingasi ngesamaswaphela ukobana bafune ukuthola ukuthi ngubani omkhulu kibo.—Mar. 9:34; Luk. 22:24.
14. Bakhulela endaweni enjani abapostoli bakaJesu?
14 Akunakuzaza ukuthi uJesu bekakhumbula ukuthi amasiko abapostoli abakhula ngawo adlala indima ekulu kibo. Bakhulela endaweni la abadosiphambili bekolo bebaqala iinkhundla nokuphumelela njengento eqakatheke khulu. (Mat. 23:6) Abadosiphambili bekolo bamaJuda bebazibona bangcono kunabanye. f (Luk. 18:9-12) UJesu bekazwisisa ukuthi ummoya lo bewungathinta indlela abapostoli bakhe abaziqala ngayo nabaqala abanye ngayo. (IzA. 19:11) UJesu bekangakalindeli bona abafundi bakhe bangayenzi imitjhapho begodu bekababekezelela lokha nabayenzako. Bekazi ukuthi baneenhliziyo ezihle, yeke wababekezelela, wabasiza bahlula ukuzikhakhazisa nokuzibona bangcono kunabanye, wabafundisa ukuba nethando.
SINGASILINGISA NJANI ISIBONELO SAKAJESU?
15. Khuyini esingayifunda kilokho okwenzeka kuJakopo, uJwanisi nabanye abafundi?
15 Singafunda okunengi endabeni kaJakopo noJwanisi. Bekungakafaneli babawe isikhundla esiphakemeko emBusweni kuJesu. Kodwana nabanye abapostoli bekungakafaneli bavumele ubujamobu buphazamise ubunye phakathi kwabo. Nanyana kunjalo, uJesu bekanomusa begodu abathanda boke abapostoli bakhe abali-12. Sifundani kilokhu? Okuqakathekileko akusingilokho abanye abantu abakwenzako kodwana yindlela esisabela ngayo emitjhaphwenabo. Khuyini engasisiza? Nasisilingwa ngomunye umKrestu kufuze sizibuze: ‘Khuyini ayenzako engangiphathi kuhle? Kghani kuveza umukghwa omumbi okufuze ngiwulungise? Inga-kghani umuntu ongiphethe kumbi uqalene nobujamo obubudisi? Ngitjho nanyana ngizizwa ngasuthi nginelungelo lokusilingeka, inga-kghani ngingatjengisa ithando ngokuthi ngidlulise ukuphathwa kumbokho?’ Lokha nasisebenzelana nabanye ngendlela enethando, sizokutjengisa ukuthi sibalandeli bakaJesu beqiniso.
16. Khuyini enye esingayifunda esibonelweni sakaJesu?
16 Isibonelo sakaJesu godu sisifundisa bona silinge ukuzwisisa amaKrestu esikunye nawo. (IzA. 20:5) UJesu bekakghona ukufunda iinhliziyo. Thina asikghoni. Kodwana singababekezelela abafowethu nabodadwethu nabasisilingako. (Efe. 4:1, 2; 1 Pit. 3:8) Kuzokuba bulula ukukwenza lokho, khulukhulu nasazi indlela abakhule ngayo. Akhesicoce ngesibonelo.
17. Umbonisi wesigodi kwamsiza njani ukuzwisisa omunye umfowethu?
17 Umbonisi wesigodi ukhumbula omunye umfowethu ebandleni akhe alikhambela ePumalanga ye-Afrika. Ekuthomeni umbonisi lo bekacabanga ukuthi umfowethu lo akanamusa. Umbonisi wesigodi lo wasabela njani? Uthi: “Kunokobana ngimgegede, ngaqunta ukumazi ngcono.” Ngokwenza njalo, wafunda indlela umfowethu lo akhule ngayo nokuthi lokho kwayithinta njani indlela aphatha ngayo abanye. Umbonisi wesigodi uthi: “Nangifumana ukuthi kube budisi kangangani ngaye ukwenza amatjhuguluko bona azwane nabanye nokuthi angangani amatjhuguluko esele awenzile, lokho kwangenza ngamhlonipha. Saba bangani abakhulu.” Lokha nasilinga ukuzwisisa abafowethu nabodadwethu kwenza kube bulula bona sibathande.
18. Ngimiphi imibuzo esingazibuza yona nange umKrestu esilotjha naye asikhubile? (IzAga 26:20)
18 Ngezinye iinkhathi singakubona kutlhogeka bona sikhulume nomKrestu osikhubileko. Kokuthoma, sizabe senza kuhle nasizibuza ukuthi, ‘Inga-kghani nginawo woke amaqiniso?’ (IzA. 18:13) ‘Kghani kungenzeka ukuthi ongikhubileko bekangakahlosi?’ (UMtj. 7:20) ‘Inga-kghani khengenza umtjhapho ofanako?’ (UMtj. 7:21, 22) ‘Ngokuya emntwini lo inga-kghani ngizoyenza ibe yimbi khulu indaba kunokobana ngiyilungise?’ (Funda izAga 26:20.) Nasizipha isikhathi sokucabanga ngemibuzo le singaphetha ngokuthi ithando lethu ngabafowethu nangabodadwethu lingasenza singadzimeleli emitjhaphwenabo.
19. Khuyini ozimisele ukuyenza?
19 AboFakazi bakaJehova batjengisa ukuthi babafundi bakaJesu beqiniso ngokuthandana. Ngamunye wethu utjengisa ukuthi umlandeli kaJesu weqiniso nakathanda abafowabo nabobodadwabo naphezu kwemitjhapho. Ngokwenza lokhu singasiza nabanye babone ikolo yeqiniso begodu bahlanganyele nathi ekulotjheni uJehova uZimu olithando. Asizimiseleni ukuragela phambili sitjengisa ithando elisiveza simaKrestu weqiniso.
INGOMA 17 “Ngiyathanda”
a Abantu abanengi bafuna ukufunda okungeziweko ngoJehova nangeliZwi lakhe ngombana babone ithando esinalo. Nanyana kunjalo, ngebanga lokuthi sinesono singakufumana kubudisi ukuthi sithandane. Akhesihlole bona kubayini ithando liqakathekile nokuthi singasilingisa njani isibonelo sakaJesu lokha abanye nabenza imitjhapho.
b Qala incwadi ethi, “Woza Ube Ngumlandeli Wami,” isahl. 17, iing. 10-11.
c Qala isihloko esithi, “Ekugcineni Ukuphila Kwami Sekunenjongo,” esifumaneka ku-Nqabayokulinda kaNovemba 1, 2012, kk. 13-14.
d Qala isihloko esithi, “Ukuphila kwami kwakubonakala kujabulisa,” esikuNqabayokulinda, kaMeyi 1, 2012, kk. 18-19.
e Isihlokwesi asikhulumi ngezono ezikulu okufuze zidenjwe badala, njengalezo ezibalwe kweyo-1 kwebeKorinte 6:9, 10.
f Kubikwe ukuthi ngemva kwesikhathi uRabi wathi: “Ephasini okunganani kunamadoda angaphasi kwesibalo esima-30, alunge njengo-Abrahama. Nange kunamadoda ama-30 mina nendodanami singabanye bawo; nange kunamadoda alitjhumi mina nendodanami singabanye bawo; nange kunamadoda amahlanu mina nendodanami singabanye bawo; nange kunamadoda amabili mina nendodanami singabanye bawo; nange kunendoda yinye ngimi loyo.”
