1. Khuyini ababelethi abayifisela abantwababo?

 BABELETHI, siyazi ukuthi nifuna ukusiza abantwabenu bazi uJehova bebamthande. Kodwana uJehova akabonakali. Ungabasiza njani abantwabakho bambone amuMuntu wamambala bebatjhidele kuye?—Jak. 4:8.

2. Ababelethi bangabafundisa njani abantwababo ngobuntu bakaJehova?

² Indlela ehle yokusiza abantwana batjhidelane noJehova kufunda nabo iBhayibheli. (2 Thim. 3:14-17) Nanyana kunjalo, iBhayibheli liveza enye indlela abantwana abangafunda ngayo ngoJehova. Encwadini yezAga, ubaba ukhumbuza indodanakhe ukuthi ingakhohlwa ubuntu bakaJehova obuvela endalweni. (IzA. 3:19-21) Sizokucoca ngezinye iindlela ababelethi abangasebenzisa ngazo indalo ukusiza abantwababo bafunde ngobuntu bakaJehova.

3. Ngiliphi isizo ababelethi abangalinikela abantwababo?

³ IBhayibheli lithi ‘ubuntu bakaZimu obungabonakaliko bubonakala kusukela ekudalweni kwephasi kuye phambili, bubonakala ngezinto ezenziweko.’ (Rom. 1:20) Babelethi, kungenzeka niyakuthanda ukuba ngaphandle nabantwabenu. Sebenzisa isikhatheso ukusiza abantwabakho babone ukuhlobana okukhona phakathi ‘kwezinto ezenziweko’ nobuntu bakaJehova obukarisako. Endabeni le, khesibone ukuthi khuyini ababelethi abangayifunda esibonelweni sakaJesu.

4. UJesu wayisebenzisa njani indalo ukufundisa abafundi bakhe? (Lukasi 12:24, 27-30)

 ⁴ Tjheja indlela uJesu asebenzisa ngayo indalo ukufundisa. Ngesinye isikhathi, wabawa abafundi bakhe ukuthi baqale amagubulu namathuthumbo. (Funda uLukasi 12:24, 27-30.) UJesu bekangakhuluma ngananyana ngisiphi isilwana namkha isitjalo kodwana wakhetha inyoni nethuthumbo, okuzizinto abafundi bakhe abazazi kuhle. Kungenzeka abafundi bakhe babona amagubulu aphapha phezulu namathuthumbo ahluma emasimini. Ungacabanga uJesu akhomba izintwezo njengombana akhuluma ngazo? Khuyini uJesu ayenzako ngemva kokukhuluma ngeembonelwezi? Wafundisa abafundi bakhe isifundo esiqakatheke khulu malungana nokupha nomusa kaBababo osezulwini: UJehova uzozipha ukudla bekazimbathise iinceku zakhe ezithembekileko njengombana enza emagubulweni nemathuthumbeni asesimini.

5. Ngiziphi iimbonelo ezifumaneka endalweni ababelethi abangazisebenzisa ukufundisa abantwababo ngoJehova?

⁵ Babelethi, kghani nizoyilingisa indlela kaJesu yokufundisa? Ungatjela umntwanakho ngendalo ethileko oyithandako, kungaba silwana namkha isitjalo. Nawutjela umntwanakho ngezintwezi, kufuze uhlathulule ukuthi zisifundisani ngoJehova. Ungabuza umntwanakho ukuthi ngisiphi isilwana namkha isitjalo asithandako. Nawukhuluma ngento ayithandako, umntwanakho uzokulalelisisa khulu lokha nawulinga ukumfundisa ngoJehova.

6. Khuyini esingayifunda esibonelweni esabekwa ngumaka-Christopher?

⁶ Kghani ababelethi kufuze basebenzise isikhathi esinengi barhubhulula ngesilwana namkha ngesitjalo esithileko ngaphambi kokucoca ngokuthi indalo leyo ivezani ngoJehova? Awa akusinjalo. UJesu akhenge anikele ihlathululo ede yokuthi amagubulu adla njani nokuthi amathuthumbo akhula njani. Ngitjho nanyana umntwanakho athanda ukufunda ngokungeneleleko ngezinto uJehova azibumbileko, ngezinye iinkhathi ukutjho amezwi alula namkha ukubuza umbuzo kwanele ukusiza umntwanakho azwisise iphuzu lakho. Tjheja lokho okukhunjulwa ngu-Christopher nakasesemncani: “Umma bekasebenzisa amezwi alula wokusisiza sithokoze ngendalo esibhodileko. Ngokwesibonelo, nasiseduze neentaba bekathi: ‘Qala bona zikulu bezihle kangangani iintabezi! Kghani uJehova akakarisi?’ Namkha nasiseduze nelwandle, bekathi: ‘Qala bona amagagasi la anamandla kangangani! Kghani uZimu akanamandla?’” U-Christopher uthi: “Amezwi alula lawo asithinta khulu.”

7. Ungababandula njani abantwabakho bona bacabangisise ngendalo?

⁷ Njengombana abantwabakho bakhula, ungababandula bona bacabangisise ngendalo bebafunde ngobuntu bakaJehova. Ungakhuluma nabantwabakho ngento yinye uJehova ayibumbileko bese ubabuze ukuthi, “Lokhu kukufundisani ngoJehova?” Kungakurara bekukuthabise nawuzwa indlela abantwabakho abacabanga ngayo.—Mat. 21:16.

8. Ngiliphi ithuba ababelethi abama-Israyeli ebebanalo nabakhamba “endleleni”?

⁸ Ababelethi abama-Israyeli batjelwa bona bafundise abantwababo amezwi womyalo kaJehova lokha nabakhamba “endleleni.” (Dut. 11:19) Iindlela zakhona bezidlula emaphandleni wakwa-Israyeli. Bebabona iinlwana ezihlukahlukeneko, iinyoni namathuthumbo. Njengombana imindeni yama-Israyeli beyikhamba endleleni, ababelethi  bebangakhuluma nabantwababo ngezinto uJehova azibumbileko. Nani babelethi ninethuba elifanako lokusebenzisa indalo ukuthi nifundise abantwabenu. Cabanga ngendlela abanye ababelethi abakwenze ngayo lokho.

9. Ungafundani ku-Punitha no-Katya?

⁹ Umma obizwa ngokuthi ngu-Punitha, ohlala edorobheni elikhulu le-Indiya, uthi: “Nasivakatjhele umndenekhaya ohlala emaphandleni, sikuqala njengethuba lokusiza abantwabethu bafunde ngendalo kaJehova ekarisako. Ngibona ngathi abantwabami bazwisisa ngcono indalo lokha nabangasi seendaweni eziphithizelako ezisemadorobheni.” Babelethi abantwabenu angekhe bakhohlwe isikhathi enibe naso nabo endaweni ehle. U-Katya, udadwethu we-Moldova, uthi: “Isikhathi engisikhumbula kuhle kulokha ngisesemncani nginababelethi bami eendaweni ezisemaphandleni. Ngiyabathokoza ngokungifundisa ngisesemncani bona ngiziphe isikhathi sokuthi ngijame ngiqalisise lokho uJehova akwenzileko.”

10. Khuyini ababelethi abangayenza nange bakufumana kubudisi ukuya eendaweni ezisemaphandleni? (Qala ibhoksi elithi, “ Okungasiza Ababelethi.”)

¹⁰ Kuthiwani-ke nange ungakghoni ukuvakatjhela iindawo ezisemaphandleni? U-Amol, ohlala e-Indiya uthi: “La ngihlala khona ababelethi kufuze basebenze ama-awara amanengi begodu ukuya endaweni esemaphandleni kubiza khulu. Nanyana kunjalo, ungakghona ukubona indalo kaJehova begodu ukhulume ngobuntu bakhe lokha nawusephageni encani namkha emathurini wesakhiwo okiso.” Nawuqalisisa kuhle, ungakghona ukubona ubuhle bendalo eduze nalapha uhlala khona ongakghona ukucoca ngabo nabantwabakho. (Rhu. 104:24) Kungenzeka ufumane iinyoni, iinunwana, iintjalo nokhunye. U-Karina we-Germany uthi: “Umma uyawathanda amathuthumbo, nangisesemntazanyana bekakhomba  amathuthumbo amahle lokha nasikhamba ndawonye.” Babelethi ningasebenzisa iincwadi namavidiyo amanengi akhuluma ngendalo agadangiswe yihlanganwethu ukufundisa abantwabenu. Nanyana ubujamo bakho bunjani, ungakghona ukusiza abantwabakho baqalisise lokho uZimu akwenzileko. Nje khesicoce ngobunye ubuntu bakaJehova ongabutjengisa abantwabakho.

11. Ababelethi bangabasiza njani abantwababo babone ithando lakaJehova?

¹¹ Bona usize abantwabakho babone ithando lakaJehova, ungabatjengisa indlela iinlwana ezinengi ezitlhogomela ngayo abantwabazo. (Mat. 23:37) Ungabatjela nangobuhle obuhlukahlukeneko esibuthabelako endalweni. U-Karina, ekukhulunywe ngaye ekuthomeni, uthi: “Lokha nasizikhambela nomma, bekajayele ukungikhuthaza bona ngiziphe isikhathi sokuqalisisa ithuthumbo ngalinye ukuthi lihluke kangangani begodu ubuhle balo butjengisa njani ithando lakaJehova. Ngemva kweminyaka eminengi, ngisawaqalisisa kuhle amathuthumbo, indlela adalwe ngayo nemibalawo. Asangikhumbuza ngethando lakaJehova.”

12. Ababelethi bangabasiza njani abantwababo babone ukuhlakanipha kwakaZimu? (IRhubo 139:14) (Qala nesithombe.)

¹² Siza abantwabakho babone ukuhlakanipha kwakaZimu. UJehova uhlakaniphe khulu kunathi. (Rom. 11:33) Ngokwesibonelo, ungatjela umntwanakho ukuthi amanzi akhuphuka njani aye phezulu enze amafu begodu amafu lawo atjhuguluka njani abe mamanzi asuke kwenye indawo aye kwenye. (Job. 38:36, 37) Ungamtjela nangendlela umzimba womuntu odalwe ngayo ngokukarisako. (Funda iRhubo 139:14.) Tjheja bona ubaba u-Vladimir wakwenza njani lokho. Uthi: “Ngelinye ilanga, indodanethu yawa ebhasigirinayo yazilimaza. Ngemva kwamalanga ambalwa, inceba layo laphola. Mina nomkami samhlathululela ukuthi uJehova ubumbe iimzimbethu bona ikghone ukuzipholela. Samtjengisa ukuthi lokhu akwenzeki ezintweni ezenziwe babantu. Ngokwesibonelo, ikoloyi ayikghoni ukuzilungisa ngemva kwengozi. Lokhu kwasiza indodanethu bona izwisise ukuhlakanipha kwakaJehova.”

13. Ababelethi bangabasiza njani abantwababo babone amandla kaZimu? (Isaya 40:26)

 ¹³ UJehova usimema bona siphakamisele amehlwethu emkayini sibone indlela amandlakhe akghona ukulawula ngayo izulu nephasi. (Funda u-Isaya 40:26.) Ungabakhuthaza abantwabakho bona baqale phezulu emkayini bacabangisise ngalokho abakubonako. Tjheja lokho udadwethu we-Taiwan u-Tingting akukhumbulako ngokukhula kwakhe: “Mina nomma sakhamba sayokukampa emmangweni ebusuku saqala phezulu emkayini ngaphandle kokuphazamiswa malerhe wedorobheni. Ngesikhatheso bengitshwenyeke khulu ngebanga lokugandelelwa ziintanga zami begodu ngizibuza ukuthi ngizokukghona na ukulotjha uJehova ngokuthembeka. Umma wangikhuthaza bona ngicabange ngamandla uJehova awasebenzisileko ukudala zoke iinkwekwezi nokuthi ngikhumbule ukuthi angakghona ukusebenzisa amandla lawo ukungisiza ngiqalane nanyana ngiziphi iinlingo. Ngemva kokuqalisisa indalo ekhambweni lethwelo, ngazimisela khulu ukwazi uJehova nokumlotjha.”

14. Ababelethi bangayisebenzisa njani indalo ukwenza abantwababo babone ukuthi uJehova nguZimu othabileko?

¹⁴ Izinto uJehova azenzileko ziyatjengisa ukuthi uJehova uthabile begodu ufuna nathi sithabe. Abososayensi bafumene ukuthi iinlwana ezinengi ziyakghona ukudlala, kuhlanganise iinyoni neemfesi. (Job. 40:20) Kghani abantwabakho bayahleka nababona iinlwana zidlala? Kungenzeka babone ukatswana agijimisa ibholo yewulu namkha izinjana zidlala ndawonye. Lokha abantwabakho bahleka njengombana babona indlela iinlwana ezenza ngayo izinto, kubayini ungabakhumbuzi ukuthi silotjha uZimu othabileko?—1 Thim. 1:11.

15. Khuyini engasiza ababelethi bakghone ukufumana ukuthi yini ecatjangwa bantwababo? (IzAga 20:5) (Qala nesithombe.)

¹⁵ Ngezinye iinkhathi ababelethi bangakufumana kubudisi ukuthi abantwababo bakhulume nabo ngobujamo obubatshwenyako. Nangabe uqalene nobujamo obufanako, ungasebenzisa  iindlela ezihlukahlukeneko ukuthi abantwabakho bakhulume ngalokho abaqalana nakho. (Funda izAga 20:5.) Abanye ababelethi bakufumana kulula ukwenza njalo lokha nabathabela indalo nabantwababo. Kubayini? Elinye ibanga kukuthi zincani khulu izinto ezingathikazisa ababelethi nabantwana. Ubaba we-Taiwan u-Masahiko uveza elinye ibanga uthi: “Lokha nasiba nesikhathi nabantwabethu ngaphandle—sikhwela iintaba namkha sikhamba hlanu kwelwandle—bazizwa batjhaphulukile. Ngebanga lalokho, kuba lula ukuthi baveze abakucabangako nalokho okubatshwenyako.” U-Katya ekukhulunywe ngaye ngaphambilini uthi: “Nakuphuma isikolo, umma bekangithatha angise ephageni ehle. Endaweni enjalo, bekulula ukuthi ngimtjele lokho okwenzeke esikolweni nalokho okungitshwenyako.”

16. Imindeni ingaphumula beyizithabise njani lokha nayiqale indalo kaJehova?

¹⁶ Lokha imindeni nayithabela izinto ezenziwe nguJehova, ingakghona ukuphumula ibe nesikhathi esimnandi, lokhu kuzoyisiza bona ithandane khulu. IBhayibheli lithi “kunesikhathi sokuhleka” “nesikhathi sokugida.” (UMtj. 3:1, 4) Ngomsebenzakhe wezandla, uJehova usinikela iindawo ezihle la esingathabela khona ukwenza izinto esizithandako. Imindeni eminengi ithanda ukuba ndawonye eendaweni la kuzele khona iinlwana, emaphandleni, eentabeni namkha elwandle. Abanye abantwana bathanda ukugijima, badlale emaphageni, babukele iinlwana namkha badude emlanjeni namkha elwandle. Sinamathuba amahle wokuzithabisa lokha nasisendaweni engaphandle ebhodwe zizinto uJehova azidalileko!

17. Kubayini ababelethi kufuze basize abantwababo bathabele indalo kaZimu?

¹⁷ Ephasini elitjha lakaZimu ababelethi bazokuthabela indalo kaJehova ukudlula phambilini. Ngokungafani nanamhlanjesi, angekhe sibe nebanga lokusaba iinlwana begodu nazo angekhe zisisabe. (Isa. 11:6-9) Sizokuba nesikhathi esaneleko sokuthabela lokho uJehova akudalileko. (Rhu. 22:26) Kodwana babelethi ningalindi bekufike isikhatheso bona abantwabenu bathome ukuthabela indalo. Njengombana usebenzisa indalo ukufundisa abantwabakho ngoJehova, bazokuvumelana namezwi weKosi uDavida nayithi: “Maye! Jehova, ayikho imisebenzi enjengeyakho.”—Rhu. 86:8.