1-2. Ukuphila kuba ngcono njani ngemva kokubhajadiswa?

 KULITHABO khulu ukubhajadiswa nokuba yingcenye yomndeni kaJehova. Kulilungelo elihle khulu ukutjhidelana noJehova begodu sizizwa njengomrhubi uDavida, owathi, “Uyathaba umuntu omkhethako [Jehova] bese umtjhideze bona azokuhlala eenrhodlweni zakho.”—Rhu. 65:4.

² Akusiwo woke umuntu uJehova amletha esirhodlweni sakhe. Njengombana sifundile esihlokweni esidlulileko, ukhetha labo abatjengisa ukuthi bafuna ukutjhidelana naye. (Jak. 4:8) Nawuzinikela kuJehova bewubhajadiswe, utjhidelana naye ngendlela ekhethekileko. Ngemva kwalokho, ungaqiniseka ukuthi uJehova ‘uzokukghuthulela iimbusiso bekube kulapho ungasatlhogi litho.’—Mal. 3:10; Jor. 17:​7, 8.

3. AmaKrestu azinikeleko nabhajadisiweko anamuphi umthwalo? (UMtjhumayeli 5:​4, 5)

³ Ukubhajadiswa sithomo sokulotjha uJehova. Ngemva kokubhajadiswa, uzokufuna ukwenza koke okusemandlenakho bona uphile ngokuvumelana nokuzinikela kwakho, ngitjho nanyana uqalene neentjhijilo ezilinga ukukholwa kwakho. (Funda uMtjhumayeli 5:​4, 5.) Njengombana umfundi kaJesu, uzokulandela isibonelo sakhe nemiyalwakhe eduze ngendlela ongakghona ngayo. (Mat. 28:​19, 20; 1 Pit. 2:21) Isihlokwesi sizokusiza wenze njalo.

 RAGELA PHAMBILI ULANDELA UJESU NAPHEZU KWEENTJHIJILO NEENLINGO

4. Abalandeli bakaJesu basithwala ngayiphi indlela “isigodo sokuhlunguphazwa”? (Lukasi 9:23)

⁴ Ungacabangi ukuthi ngemva kokubhajadiswa ukuphila kwakho angekhe kube nemiraro. Kuhlekuhle, uJesu wathi abalandeli bakhe bazokuthwala ‘isigodo sabo sokuhlunguphazwa.’ UJesu wathi lokhu kuzokwenzeka “qobe.” (Funda uLukasi 9:23.) Kghani uJesu bekatjho ukuthi abalandeli bakhe bazokuhlala batlhaga? Awa, akusinjalo. Bekatjho ukuthi ngaphezu kweembusiso abazozifumana, bazokuqalana neentjhijilo. Ezinye iintjhijilwezi zingaba buhlungu khulu.—2 Thim. 3:12.

5. Ngiziphi iimbusiso uJesu azithembisa labo abazidelako?

⁵ Kungenzeka umndenakho uyakuhlunguphaza namkha wena udele ukuba nemali enengi bona ubeke umBuso kaZimu qangi ekuphileni kwakho. (Mat. 6:33) Nakunjalo, qiniseka ukuthi uJehova uyayibona imisebenzakho yokuthembeka. (Heb. 6:10) Kungenzeka ubone ukuba liqiniso kwamezwi kaJesu athi: “Ngiqinisile ngithi kini, akakho otjhiye indlu namkha abafowabo namkha abodadwabo namkha unina namkha uyise namkha abantwana namkha amasimu ngebanga lami nangebanga leendaba ezimnandi ongekhe afumane ngokubuyelelwe nge-100 esikhathini sanje, izindlu, abafowabo, abodadwabo, abomma, abantwana, amasimu, nokutlhagiswa begodu ephasini elizako, ukuphila okungapheliko.” (Mar. 10:​29, 30) Iimbusiso ozifumeneko zidlula nanyana yini oyidelileko.—Rhu. 37:4.

6. Kubayini kufuze uragele phambili ulwisana ‘nesifiso senyama’ ngemva kokubhajadiswa?

⁶ Kusazokufuze ulwisane ‘nekanuko yenyama’ ngemva kokubhajadiswa. (1 Jwa. 2:16) Lokho kubangelwa kukuthi unesono. Ngezinye iinkhathi, ungazizwa njengompostoli uPowula, owatlola wathi: “Ngithaba kwamambala emthethweni kaZimu ngokomuntu enginguye ngaphakathi kodwana ngibona emzimbenami omunye umthetho olwisana nomthetho womkhumbulwami begodu ungidosela ekubeni sithunjwa somthetho wesono esisemzimbenami.” (Rom. 7:​22, 23) Kungakuqeda amandla ukulwisana neemfiso ezimbi. Nanyana kunjalo, nawucabanga ngesithembiso osenze kuJehova nawuzinikela kuye, uzokuba namandla wokulwisana neenlingo. Iqiniso kukuthi isithembiso osenzileko nawuzinikelako sizokwenza ulwisane neentjhilo. Njani?

7. Ukuzinikela kuJehova kungakusiza njani uhlale uthembekile kuye?

⁷ Nawuzinikela kuJehova, awusaziphileli wena. Lokhu kutjho ukungasenzi izinto ezifunwa nguye naziphikisana nentando kaJehova. (Mat. 16:24) Nawuqalene nesilingo, angekhe usolo uzibuza ukuthi khuyini ekufuze uyenze. Into ozokufuna ukuyenza kuthembeka kuJehova. Uzozimisela ukuthabisa uJehova. Uzokufana noJobho. Nanyana bekaqalene neentjhijilo ezibuhlungu, ngokuqiniseka wathi: “Angekhe ngavumela litho bona lingilahlekisele ukuthembeka kwami!”—Job. 27:5.

8. Ukucabanga ngomthandazo owenzileko nawuzinikelako, kungakusiza njani nawuqalene nesilingo?

⁸ Ngokucabangisisa ngomthandazo owawenzako nawuzinikela kuJehova, uzokuba namandla wokuhlula nanyana ngisiphi isilingo. Ngokwesibonelo, kghani uzokufuna ukuganukeja umuntu otjhadileko? Awa, angekhe! Uthembise uJehova ukuthi angekhe wayenza into enjalo. Nawungavumeli imizwa emimbi yakheke, angekhe kutlhogeke  bona ulwisane nayo ngokukhamba kwesikhathi. Angekhe ‘ukhambe endleleni yabantu abambi.’—IzA. 4:​14, 15.

9. Ukucabanga ngomthandazo owenzileko nawuzinikelako, kungakwenza njani ukulotjha uJehova kuze qangi kuwe?

⁹ Kuthiwani nangabe ufumene umsebenzi ozokwenza kube budisi ukuba sesifundweni ngaso soke isikhathi? Uzokwazi ukuthi khuyini ekufuze uyenze. Ngaphambi kokufumana umsebenzi onjalo, sele uqunte kusese ngaphambili ukuthi angekhe wawuthatha. Angekhe walingeka ukwamukela umsebenzi lo, bese uthi ufuna ukubona ukuthi ungambeka njani qangi uJehova ekuphileni kwakho. Nawukhumbula indlela uJesu ebekazimisele ngayo ukuthabisa uYise, uzokurhaba bewuqine ekwaleni nanyana yini oyaziko ukuthi angekhe imthabise uZimu ozinikele kuye.—Mat. 4:10; Jwa. 8:29.

10. UJehova uzokusiza njani ngemva kokubhajadiswa uragele phambili ulandela uJesu?

¹⁰ Iqiniso kukuthi iintjhijilo neenlingo zikunikela ithuba lokutjengisa bona uzimisele kangangani ukuragela phambili ulandela uJesu. Njengombana wenza njalo, qiniseka bona uJehova uzokusiza. IBhayibheli lithi: “UZimu uthembekile begodu angekhe avume bona nilingwe ngokungaphezu kwalokho eningakuthwala kodwana nakufika isilingweso, uzokwenza nendlela yokuphuma kiso ukuze nikghone ukusikghodlhelela.”—1 Kor. 10:13.

UNGARAGELA NJANI PHAMBILI ULANDELA UJESU?

11. Ngiyiphi indlela ephuma phambili yokuragela phambili ulandela uJesu? (Qala nesithombe.)

¹¹ UJesu bekakhuthele, wahlala atjhidelene noJehova begodu bekahlala athandaza. (Luk. 6:12) Enye yeendlela eziphuma phambili  zokuhlala ulandela uJesu ngemva kokubhajadiswa, kukwenza izinto ezizokutjhideza kuJehova. IBhayibheli lithi: “Ngezinga esesithuthuke ngalo, asirageleni phambili nokukhamba ngokuhlelekileko endleleni efanako le.” (Fil. 3:16) Iinkhathi ezinengana uzokuzwa ngabafowethu nabodadwethu abakhethe ukwenzela uJehova okungeziweko. Kungenzeka baye esiKolweni sabaTjhumayeli beVangeli lomBuso namkha bafudukele lapha kunetlhogeko yabatjhumayeli khona. Nawukghona ukwenza njalo, sikukhuthaza bona ukwenze lokho. Abantu bakaJehova bazimisele ukumenzela okungeziweko. (IzE. 16:9) Kuthiwani nakungakghonakali ukuthi ukwenze lokho njenganje? Ungacabangi ukuthi awusililitho nawuzimadanisa nalaba abakghonako. Okuqakathekileko kukuthi uragele phambili ukghodlhelela. (Mat. 10:22) Ungakhohlwa ukuthi umthabisa kangangani uJehova nawenza koke ongakghona ukukwenza ebujamweni okibo. Le yindlela eqakathekileko ongaragela ngayo phambili ulandela uJesu ngemva kokubhajadiswa.—Rhu. 26:1.

12-13. Khuyini ongayenza nange itjisekwakho yehla? (1 Korinte 9:​16, 17) (Funda ibhoksi elithi, “ Hlala Emgijimweni.”)

¹² Kuthiwani nawungasathandazi namkha ungasakuthabeli ukuya esimini njengekuthomeni? Kuthiwani nange ungasakuthabeli ukufunda iBhayibheli njengekuthomeni? Nawuzizwa njalo ngemva kokubhajadiswa, ungaphethi ngokuthi ulahlekelwe mumoya kaJehova. Unesono begodu indlela ozizwa ngayo izokunande itjhuguluka. Nange indlela okhuthele ngayo sele yehla, khumbula isibonelo sompostoli uPowula. Nanyana bekalinga ukulingisa uJesu, bekazi ukuthi ngezinye iinkhathi angeze akghone  ukwenza ngendlela afisa ngayo. (Funda yoku-1 kwebeKorinte 9:​16, 17.) Wathi: “Nanyana ngingakwenza ngingathandi, uZimu usangiphathise wona umsebenzi lo.” Bekazimisele ukuragela phambili enza umsebenzakhe kunganandaba ukuthi bekazizwa njani ngesikhatheso.

¹³ Ngendlela efanako, ungavumeli ukuba nesono kukwenzele iinqunto. Qunta ukuthi uzokwenza okulungileko kunganandaba ukuthi uzizwa njani. Nawuragela phambili wenza okulungileko, indlela ozizwa ngayo izokutjhuguluka. Ukuba nesifundo somuntu mathupha nokuthandaza qobe kuzokusiza uhlale ulandela uJesu ngemva kokubhajadiswa. Ukuragela phambili kwakho ulotjha uJehova kuzokukhuthaza abafowenu nabodadwenu.—1 Thes. 5:11.

‘RAGELANI PHAMBILI NIHLOLA’

14. Khuyini ekufuze uhlale uyihlola begodu kubayini? (2 Korinte 13:5)

¹⁴ Ngemva kokubhajadiswa, kuqakathekile ukuzihlola qobe. (Funda yesi-2 kwebeKorinte 13:5.) Hlala uqalisisa kuhle ukuphila kwakho nezinto ojayele ukuzenza ubone ukuthi uyathandaza na qobe lilanga, uyalifunda iBhayibheli bewucabangisise ngalo, uyaya esifundweni nesimini. Fumana iindlela zokuthabela ukwenza izintwezi bewuzuze kizo. Ngokwesibonelo, zibuze imibuzo enjengale: ‘Ngingakghona ukuhlathululela umuntu amaqiniso asisekelo? Zikhona na iindlela engingazisebenzisa bona ngithabele ukutjhumayela? Idephe kangangani imithandazwami begodu iyatjengisa na ukuthi ngithembele kuJehova ngokupheleleko? Kghani ngiya qobe esifundweni? Ngingayithuthukisa njani indlela engilalela nengihlanganyela ngayo esifundweni?’

15-16. Khuyini oyifundako kilokho okwenzeka komunye umfowethu ngokwala isilingo?

¹⁵ Kuqakathekile nokwazi ubuthakathaka bakho. Umfowethu u-Robert uhlathulula okwenzeka ekuphileni kwakhe uthi: “Nangineminyaka ema-20, bengisebenza. Ngelinye ilanga ngemva komsebenzi, umuntu ebengisebenza naye wangibizela lapha ahlala khona. Wathi sizobe sisodwa begodu ‘sizokuba nesikhathi esimnandi.’ Ekuthomeni, ngamnikela amabanga angazwakaliko kodwana ngokukhamba kwesikhathi akhenge ngivume, ngamhlathululela ukuthi kubayini.” U-Robert wakghona ukuhlula isilingo begodu yinto ehle khulu leyo. Ngokukhamba kwesikhathi, nakaqala emva wabona ukuthi bekangenza ngcono. Uthi: “Akhenge ngale  ngokuqinileko namkha msinya njengoJosefa nakala umfazi kaPothifara. (Gen. 39:​7-9) Eqinisweni ngarareka khulu ukuthi kube budisi kangangani ukwala. Kwangisiza ngakghona ukubona ukuthi kukuphi lapha ekufuze ngiqinise khona ebuhlotjeni bami noJehova.”

¹⁶ Ungazuza ngokuzihlolisisa njengombana kwenza u-Robert. Nanyana ungaphumelela ekwaleni isilingo esithileko, zibuze ukuthi, ‘Kungithethe isikhathi esingangani ukusala?’ Nakunala ekufuze uthuthukise khona, ungaphatheki kabuhlungu. Kufuze kukuthabise ukwazi ubuthakathaka ekufuze usebenzele kibo. Thandaza ngabo, uzimisele ukuthatha amagadango wokuphila ngemithethokambiso kaJehova.—Rhu. 139:​23, 24.

17. Lokho okwenzeke ku-Robert kulithinte njani igama lakaJehova?

¹⁷ Kunokhunye esikufundako ku-Robert. Uraga uthi: “Ngemva kokwala isilingo somuntu ebengisebenza naye, wathi ‘Ungihlulile!’ Ngambuza ukuthi utjho ukuthini ngalokho. Wathi umnganakhe obekanguFakazi, wamtjela bona abantu abatjha ababoFakazi, benza izinto ezimbi emsitheleni nabafumana ithuba. Yeke watjela umnganakhe ukuthi uzongilinga afune ukubona. Kwangithabisa ukubona ukuthi ngivikele isithunzi sakaJehova.”

18. Khuyini ozimisele ukuyenza ngemva kokubhajadiswa? (Funda ibhoksi elithi, “ Imilandelande Ozoyithabela.”)

¹⁸ Nawuzinikela kuJehova bewubhajadiswe, utjengisa ukuthi ufuna ukucwengisa igama lakaJehova nanyana kungenzekani. Ungaqiniseka ukuthi uJehova uyazazi iintjhijilo oqalana nazo neenlingo ozihlulako. Uzoyibusisa imizamwakho yokuhlala uthembekile. Ungaqiniseka ukuthi ngomoyakhe ocwengileko uzokusiza akunikele amandla wokwenza njalo. (Luk. 11:​11-13) Ngesizo lakaJehova uzokukghona ukuragela phambili ulandela uJesu ngemva kokubhajadiswa.