1. Ngiziphi iimbusiso esizithabelako ngokuba yingcenye yehlangano kaJehova?

 KUSIBUSISO ukuba sehlanganweni kaJehova eenkhathi ezibudisezi zamaswaphela. Njengombana iinkhathezi ziba zimbi ukuya phambili, uJehova usinikele umndenakhe obumbeneko wabafowethu nabodadwethu. (Rhu. 133:1) Usisiza sibe nomndeni othabileko. (Efe. 5:33–6:1) Usipha ukuhlakanipha esikutlhogako bona sikghone ukuqalana nokutshwenyeka besithabe.

2. Khuyini ekufuze siyenze begodu kubayini?

² Kufuze siragele phambili sisebenza budisi bona silotjhe uJehova ngokuthembeka. Ngombana ngezinye iinkhathi singaphatheka kabuhlungu ngebanga lalokho abanye abakutjhoko nabakwenzako. Singatlhoga amandla nalokha nasenze imitjhapho. Kutlhogeka sikghodlhelele nasilotjha uJehova, (1) lokha umuntu esilotjha naye nakasiphatha kabuhlungu, (2) lokha umuntu esitjhade naye nakasidanisako (3) nalokha sidana ngebanga lemitjhapho esiyenzako. Esihlokwenesi, sizokufunda ngobujamo ngabunye. Sizokucoca nangokuthi khuyini esingayifunda esibonelweni seBhayibheli somuntu othembekileko.

HLALA UTHEMBEKILE KUJEHOVA LOKHA UMFOWENU NAMKHA UDADWENU AKUPHATHA KUMBI

3. Ngiziphi iintjhijilo abantu bakaZimu abaqalana nazo?

³ Isitjhijilo. Abantu esilotjha nabo bangaba nobuntu obusisilingako. Bangasiphatha kabuhlungu. Abadala bangenza imitjhapho.  Lokho kungenza abanye bathome ukuzibuza ukuthi kghani le yihlangano kaZimu. Kunokobana “balotjhe [uJehova] ngobunye” bangalisa ukuzihlanganisa nabafowethu nabodadwethu bebalise ukuya esifundweni. (Zef. 3:9) Kghani lokho kukuhlakanipha? Cabanga ngalokho esingakufunda ngesibonelo somuntu oseBhayibhelini owakhe waqalana nemiraro efanako.

4. Ngiziphi iintjhijilo umpostoli uPowula aqalana nazo?

⁴ Isibonelo esiseBhayibhelini. Umpostoli uPowula bekazi ukuthi abafowabo nabodadwabo abamaKrestu banesono. Ngokwesibonelo, abanye bebamsaba begodu bangakholwa ukuthi umKrestu lokha nabathoma ukuhlangana naye. (IzE 9:26) Abanye bebatjho izinto ezimbi ngaye ukwenzela bona abanye bangamthembi. (2 Kor. 10:10) UPowula wabona umdala enza isiqunto esimbi begodu lokho bekungaphatha abanye kumbi. (Gal. 2:​11, 12) Umngani kaPowula uMarkosi wamdanisa kabuhlungu. (IzE. 15:​37, 38) UPowula bekangavumela ubujamobu bumenze angasafuni ukuzihlanganisa nalabo abamphathe kabuhlungu. Nanyana kunjalo, uPowula wasolo abathanda abafowabo nabodadwabo bewaragela phambili alotjha uJehova ngokuthembeka. Khuyini eyasiza uPowula wakghodlhelela?

5. Khuyini eyasiza uPowula bona ahlale atjhidelene nabafowabo nabodadwabo? (Kolose 3:​13, 14) (Qala nesithombe.)

⁵ UPowula bekabathanda abafowabo nabodadwabo. Indlela ebekathanda ngayo abanye yamsiza wangadzimeleli emtjhaphwenabo kodwana ebuntwini babo obuhle. Ithando lamsiza wenza ngokuvumelana nalokho akutlola kwebeKolose 3:​13, 14. (Ifunde.) Tjheja indlela uPowula alibalela ngayo uMarkosi. Nanyana uMarkosi amtjhiya ekhambweni labo lokuthoma, akhenge ahlale akwatile. Ngokukhamba kwesikhathi, nakatlola incwadi ekhuthazako etjhinga ebandleni leKolose, wabuka uMarkosi njengomuntu asebenzisana kuhle naye, ‘njengomthombo wenduduzo ekulu.’ (Kol. 4:​10, 11) Ngesikhathi abotjhiwe eRoma, wabawa uMarkosi bona eze azomsiza. (2 Tim. 4:11) Kuyakhanya ukuthi akhenge alahlele abafowabo itewu. Khuyini esingayifunda kuPowula?

6-7. Khuyini engasisiza siragele phambili sithanda abafowethu nabodadwethu nanyana banesono? (1 Jwanisi 4:7)

⁶ Isifundo. UJehova ufuna siragele phambili sithanda abafowethu nabodadwethu. (Funda yoku-1 kaJwanisi 4:7.) Nakwenzeka abafowethu nabodadwethu basiphathe kabuhlungu, kufuze sithembe ukuthi abakenzi  ngamabomu nokuthi bayalinga ukwenza lokho uJehova athi kulungile. (IzA. 12:18) UZimu uyabathanda abantu bakhe abathembekileko nanyana benza imitjhapho. Akasilahleli itewu namkha ahlale asikwatele nasenza imitjhapho. (Rhu. 103:9) Kuqakathekile ukuthi silingise uBabethu olibalelako!—Efe. 4:32–5:1.

⁷ Khumbula ukuthi njengombana isiphelo sitjhidela, kufuze sitjhidelane nabafowethu nabodadwethu khulu. Singalindela ukuthi ukuhlunguphazwa kuzokwanda. Singazifumana sibotjhelwe ukukholwa kwethu. Nakungenzeka lokho, sizokutlhoga abafowethu nabodadwethu khulu. (IzA. 17:17) Cabanga ngalokho okwenzeka ku-Joseph a umdala we-Spain. Yena nabanye abafowethu babotjhelwa ukukholwa kwabo. Uthi: “Ejele besihlala ndawonye, yeke bekamanengi amathuba wokuthi omunye angasilinga omunye. Bekufuze sibekezelelane besilibalelane ngokutjhaphulukileko. Lokho kwasisiza bona sihlale sibumbene besivikelekile. Besibotjhwe nabantu abangalotjhi uJehova. Kwaba nesikhathi lapho ngilimele khona isandla, bengingakghoni ukuzenzela izinto. Kodwana omunye umfowethu bekahlanza izambatho zami begodu angitlhogomela. Ngafumana ithando nangilitlhoga khulu.” Ngimaphi amabanga amahle wokusombulula imiraro esiqalene nayo nje?

KGHODLHELELA LOKHA UMUNTU OTJHADE NAYE NAKAKUDANISAKO

8. Ngisiphi isitjhijilo abantu abatjhadileko abaqalana naso?

⁸ Isitjhijilo. Yoke imitjhado ineentjhijilo. IBhayibheli lithi abatjhadako bazokuqalana “nesizi enyameni.” (1 Kor. 7:28) Lokho kungebanga lokuthi umtjhado uhlanganisa abantu ababili abanesono, abanobuntu obungafaniko begodu abathanda nezinto ezingafaniko. Abatjhadikazi kungenzeka bavela emasikweni angafaniko begodu abakakhuliswa ngendlela efanako. Ngemva kwesikhathi, kungenzeka baveze ubuntu ebebangabuboni ngaphambi kobana batjhade. Lokho kungabangela imiraro. Kunokobana balemuke ukuthi ngamunye ube nengcenye emrarweni loyo, bangasola abatjhade naye. Bangakubona kungcono ukuthi bahlale ngokuhlukana namkha batlhalane. Kghani lokho kuzokurarulula imiraro abaqalene nayo? b Asifundeni emfazini owahlala athembekile kuJehova nanyana indodakhe beyenza ukuphila kwakhe kube budisi.

9. Ngisiphi isitjhijilo u-Abigeyili aqalana naso?

⁹ Isibonelo esiseBhayibhelini. U-Abigeyili bekatjhade noNabhali, iBhayibheli lithi bekayindoda ebukhali begodu aziphethe kumbi. (1 Sam. 25:3) Kungenzeka bekubudisi ku-Abigeyili bona ahlale nendoda enjalo. Beyikhona na indlela elula yokuthi u-Abigeyili awuqede umtjhado loyo? Ithuba elinjalo lavela ngesikhathi uDavida obekazokuba yikosi yakwa-Israyeli, afuna ukubulala uNabhali ngebanga lokuthi uthuke yena namadoda ebekakhamba nawo. (1 Sam. 25:​9-13) U-Abigeyili bekangabaleka avumele uDavida abulale uNabhali. Akhenge abaleke, kunalokho wabawa uDavida bona angabulali uNabhali. (1 Sam. 25:​23-27) Yini eyamenza wenza njalo?

10. Khuyini ekungenzeka yasiza u-Abigeyili wakghodlhelela ngitjho nanyana umtjhadwakhe bewubudisi?

¹⁰ U-Abigeyili bekathanda uJehova begodu  ahlonipha umtjhado njengoJehova. Kungenzeka bekazi ukuthi uJehova bekatheni nakanikela u-Adamu umfazi. (Gen. 2:24) U-Abigeyili bekazi ukuthi umtjhado ucwengile kuJehova. Bekafuna ukuthabisa uJehova, kungenzeka lokho kwamenza wenza koke okusemandlenakhe bona avikele umndenakhe nendodakhe. Msinyana wathatha isiqunto sokuvimba uDavida bona angabulali indodakhe. Bekazimisele nokubawa ukulitjalelwa ngitjho nanyana angakenzi litho elimbi. Kuyakhanya ukuthi uJehova bekamthanda umfazi onesibindi lo nongazicabangeli yena kwaphela. Khuyini abafazi namadoda abangayifunda ku-Abigeyili?

11. (a) Khuyini uJehova ayilindele ebantwini abatjhadileko? (Efesu 5:33) (b) Khuyini oyifundako ngalokho u-Carmen akwenzileko ukuvikela umtjhadwakhe? (Qala nesithombe.)

¹¹ Isifundo. UJehova ufuna abantu abatjhadileko bahlale ndawonye ngitjho nanyana kungaba budisi ukwenza njalo. Kuyamthabisa uJehova ukubona abantu abatjhadileko basebenza budisi ukusombulula imiraro abaqalene nayo, ukutjengisana ukuthi bayathandana bebayahloniphana. (Funda kwebe-Efesu 5:33.) Cabanga ngesibonelo saka-Carmen. Ngemva kweminyaka esithandathu atjhadile, u-Carmen wathoma ukufunda naboFakazi bakaJehova bewabhajadiswa. Uthi: “Lokho akhenge kuyithabise indodami, beyicabanga bona nginikela uJehova isikhathi sami esinengi. Beyingithuka begodu ithi izongitjhiya.” Nanyana kunjalo, u-Carmen wakghodlhelela emtjhadwenakhe. Iminyaka ema-50 yoke wasebenza budisi bona umtjhadwakhe usekelwe ethandweni nekuhloniphaneni. “Njengombana iminyaka ikhamba, ngafunda ukuzwisisa indlela indodami ezizwa ngayo nokuthi ngikhulume nayo ngomusa. Ukwazi ukuthi umtjhado ucwengile kuJehova, kwangenza ngenza koke okusemandlenami bona ngiwuvikele. Akhenge ngilinge ukutjhiya indodami ngombana ngithanda uJehova.” c Nawuneentjhijilo emtjhadwenakho, ungaqiniseka ngokuthi uJehova uzokusekela bekakusize ukghodlhelele.

UNGALISI UKULOTJHA UJEHOVA NGEBANGA LEMITJHAPHWAKHO

12. Ngisiphi isitjhijilo ongaqalana naso nawenze isono esimbi?

¹² Isitjhijilo. Singazizwa sidane khulu nange senze isono esimbi. IBhayibheli lithi imitjhapho esiyenzako ingasitjhiya ‘sinomoya ophukileko.’ (Rhu. 51:17) Umfowethu u-Robert wasebenza budisi bona afanelekele ukuba  yinceku esizako. Nanyana kunjalo, wenza isono esimbi esamenza wabona ukuthi udanise uJehova. Uthi: “Nangilemuka engikwenzileko, unembezami wangitshwenya khulu. Ngazizwa kabuhlungu. Ngalila ngathandaza kuJehova. Ngikhumbula ngicabanga ukuthi uJehova angekhe asazitshwenya ngokungilalela godu. Kubayini angenza njalo? Ngombana ngimdanisile.” Nakwenzekile senza isono, singafuna ukulahla itewu ngebanga lehliziyo ebuhlungu nokukholelwa ukuthi uJehova angeze asasithanda. (Rhu. 38:4) Nangabe ukhe wazizwa ngendlela le, cabanga ngesibonelo esiseBhayibhelini somuntu owakghodlhelela, waragela phambili alotjha uJehova ngitjho nanyana enze isono esimbi.

13. Ngisiphi isono esimbi uPitrosi asenzileko begodu ngiyiphi imitjhapho ayenza ngaphambi kwalokho?

¹³ Isibonelo esiseBhayibhelini. Ngobusuku obungaphambi kokuhlongakala kwakaJesu, umpostoli uPitrosi wenza imitjhapho eminengana eyamenza wenza isono esimbi. Kokuthoma, uPitrosi wazithemba khulu wazikhakhazisa ngokuthi uzokuhlala athembekile ngitjho nanyana kungenzeka abapostoli abanye bangatjhiya uJesu. (Mar. 14:​27-29) Ngokulandelako, nabasesimini yeGetsemani, uPitrosi wabhalelwa kuhlala aphapheme. (Mar. 14:​32, 37-41) Nakufika isiqubuthu sizokubopha uJesu, uPitrosi wabaleka. (Mar. 14:50) Emaswapheleni, waphika uJesu kathathu wabe wafunga. (Mar. 14:​66-71) Wenzani nakalemuka ukuthi isono asenzileko simbi khulu? Wezwa ubuhlungu khulu bewalila, kungenzeka wazizwa amlandu. (Mar. 14:72) Cabanga ngobuhlungu uPitrosi abuzwako ema-irini alandelako umnganakhe nakabulawa. Kungenzeka uPitrosi wazizwa angasililitho.

14. Khuyini eyasiza uPitrosi waragela phambili alotjha uJehova? (Qala isithombe .)

¹⁴ UPitrosi wakghona ukukghodlhelela ekulotjheni uJehova ngamabanga ambalwa. Akhenge azihlukanise nabantu begodu waya kwabanye abafundi bakaJesu bamduduza. (Luk. 24:33) Ukungezelela kilokho, uJesu nakavuswako waya kuPitrosi, kungenzeka bekafuna ukumkhuthaza. (Luk. 24:34; 1 Kor. 15:5) Ngokukhamba kwesikhathi, kunokobana uJesu akhalimele uPitrosi kabuhlungu, watjela umnganakhe ukuthi uzokutlhogomela izimvana zakhe. (Jwa. 21:​15-17) UPitrosi bekazi ukuthi wenze umtjhapho omumbi khulu kodwana akhenge alise ukulinga ukwenza izinto ezilungileko. Kubayini? Kungombana bekazi ukuthi uJesu bekasamthanda. Abanye abafundi bakaJesu baragela phambili bamsekela. Khuyini esingayifunda esibonelweni sakaPitrosi?

15. Khuyini uJehova afuna siqiniseke ngayo? (IRhubo 86:5; Roma 8:​38, 39) (Qala nesithombe.)

 ¹⁵ Isifundo. UJehova ufuna siqiniseke ngokuthi uyasithanda nokuthi uhlala akulungele ukusilibalela. (Funda iRhubo 86:5; Roma 8:​38, 39.) Nasonako sizizwa simlandu. Kujayelekile ukuzizwa njalo begodu kufanele. Nanyana kunjalo, akukafuzi sizizwe ngasuthi uJehova akasasithandi nokuthi angeze asilibalela. Kunalokho, kufuze sifune isizo msinyana. U-Robert, ekhesakhuluma ngaye ekuthomeni, uthi: “Ngenza isono ngombana bengizithembe khulu. Bengazi ukuthi kufuze ngikhulume nabadala. Nangikhuluma nabadala bangisiza ngabona indlela uJehova angithanda ngayo. Ngabona nokuthi abadala nabo bayangithanda. Bangenza ngakholwa ukuthi uJehova akakangilahli.” Nathi singaqiniseka ngokuthi uJehova usithanda khulu nokuthi uzosilibalela nasiphendukako ezonweni zethu, sifune isizo besilinge ngakho koke ukungabuyeleli imitjhapho efanako. (1 Jwa. 1:​8, 9) Nasiqinisekako ukuthi uJehova uyasithanda nokuthi ukulungele ukusilibalela, sizokuragela phambili simlotjha ngitjho nanyana singenza imitjhapho.

16. Kubayini uzimisele ukuragela phambili ulotjha uJehova?

¹⁶ UJehova uyakuthokoza esikwenzako bona sihlale simlotjha eenkhathini ezibudisezi. Ngesizo lakaJehova, singaragela phambili simlotjha ngokuthembeka nanyana sidaniswa mitjhaphwethu namkha yabanye. Singaragela phambili sithanda abafowethu nabodadwethu sibalibalele nanyana basiphatha kabuhlungu. Singatjengisa indlela esithanda ngayo uJehova nendlela esihlonipha ngayo umtjhado ngokuthi senze nanyana yini bona sirarulule imiraro engaba khona emtjhadwenethu. Nakwenzeka senze isono, singabawa isizo lakaJehova, samukele ithando nokusilibalela kwakhe besiragele phambili simlotjha. Singaqiniseka ukuthi sizokufumana iimbusiso ezinothileko nange “singalisi ukwenza okuhle.”—Gal. 6:9.