1. Khuyini abantu abathembekileko bakaJehova abangazibuza yona?

 KUNGASIPHA ithemba ukwazi ukuthi uJehova uyabathanda abantu bakhe njengesiqhema! IBhayibheli lithi: “UJehova uthatjiswa babantu bakhe.” (Rhu. 149:4) Ngezinye iinkhathi abanye bangadana bebazibuze ukuthi ‘Inga-kghani uJehova uyangithanda?’ Kunabantu eBhayibhelini ebebathembekile, balotjha uJehova, abazibuza umbuzo ofanako.—1 Sam. 1:​6-10; Job. 29:​2, 4; Rhu. 51:11.

2. Bobani abathandwa nguJehova?

² IBhayibheli litjengisa ngokukhanyako ukuthi abantu abanesono bangamukelwa nguJehova. Lokho kungenzeka ngokuthi babe nokukholwa kuJesu Krestu bebabhajadiswe. (Jwa. 3:16) Ngendlela leyo, sitjengisa abanye bona siphendukile ezonweni zethu begodu sithembisa uZimu ukwenza intandwakhe. (IzE. 2:38; 3:19) Kuyamthabisa uJehova nasithatha amagadango la bona sakhe ubuhlobo naye. Nasiragela phambili senza okusemandlenethu bona siphile ngokuvumelana nesifungo sokuzinikela kuye, uJehova uyasamukela begodu usithatha njengabangani abatjhidelene naye.—Rhu. 25:14.

3. Khuyini esizokucoca ngayo nje?

³ Alo kanti kubayini abanye ngezinye iinkhathi bazizwa ngasuthi uZimu akabamukeli? UJehova utjengisa njani ukuthi uyakuthanda? UmKrestu angaqiniseka njani ngokuthi uZimu uyamthanda?

 AMABANGA ENZA ABANYE BAZIZWE NGASUTHI UJEHOVA AKABAMUKELI

4-5. Nanyana singazizwa singasililitho, khuyini esingaqiniseka ngayo?

⁴ Abantu abanengi kusukela basese bancani bebasolo balwa nokuzizwa bangasi lilitho. (Rhu. 88:15) Umfowethu u-Adrián uthi: “Bengisolo ngizizwa ngingasililitho kusukela kade. Ngikhumbula ngisese msanyana ngithandaza ukuthi umndenami uphile ePharadesi, ngitjho nanyana mina bengiqiniseka ukuthi bengingafaneleki ukuba lapho.” U-Tony, okhuliswe babelethi abangasimaKrestu uthi: “Ababelethi bami akhenge bangitjele ukuthi bayangithanda namkha bayazikhakhazisa ngami. Lokho bekungenza ngizizwe ngasuthi nanyana yini ehle engiyenzako ayibathabisi.”

⁵ Nange ngezinye iinkhathi sizizwa singasililitho, kufuze sikhumbule ukuthi uJehova nguye osidosele kuye. (Jwa. 6:44) Ubona okuhle kithi, okungenzeka thina asikuboni begodu wazi iinhliziyo zethu. (1 Sam. 16:7; 2 Kron. 6:30) Yeke singamthemba nakathi siligugu.—1 Jwa. 3:​19, 20.

6. Umpostoli uPowula wazizwa njani ngezono azenza ngaphambilini?

⁶ Ngaphambi kobana sifunde iqiniso, abanye bethu kungenzeka besenza izinto ezisenza sizizwe simlandu. (1 Pit. 4:3) Abanye abalotjha uJehova ngokuthembeka, kungenzeka nabo balwisana nokubogaboga okufanako. Inga-kghani nawe ngezinye iinkhathi uzizwa kwanga uJehova angeze akulibalela? Nange kunjalo, kwanga ungaduduzeka ngokwazi ukuthi abantu bakaJehova abathembekileko nabo bebazizwa ngendlela efanako. Ngokwesibonelo, umpostoli uPowula wazizwa agandeleleke khulu nakacabanga ngokumbi akwenzileko. (Rom. 7:24) UPowula besele atjhugulukile bewabhajadiswa. Nanyana kunjalo, bekaziqala ‘njengomncani ebapostolini’ begodu aziqala njengesoni ‘esikhulu.’—1 Kor. 15:9; 1 Thim. 1:15.

7. Khuyini ekufuze siyikhumbule ngezono esazenza kade?

⁷ UBabethu wezulwini usithembisa bona uzosilibalela nasitjhugulukako. (Rhu. 86:5) Nangabe sizisola kwamambala ngezono esizenzileko, singathemba lokho uJehova akutjhoko nakathi uzosilibalela.—Kol. 2:13.

8-9. Singakuhlula njani ukuzizwa ngasuthi angekhe sikghone ukwenzela uJehova okwaneleko bona simthabise?

⁸ Soke sifuna ukwenza koke esingakghona ukukwenza ukulotjha uJehova. Nanyana kunjalo, abanye bangazizwa ngasuthi angeze bakghona ukwenza izinto ezizokwanelisa uJehova. Udadwethu u-Amanda uthi: “Kanengi ngicabanga ukuthi ukwenzela uJehova okusemandlenami kutjho ukwenza okungeziweko. Esikhathini esinengi, ngilinga ukwenza okungaphezu kwamandlami. Yeke ‘nangibhalelwako’ ngicabanga ukuthi ngidanise uJehova ngendlela engizidanise ngayo mina.”

⁹ Singakghona njani ukulwisana nokuzizwa ngasuthi angeze sakghona ukwanelisa uJehova? Khumbula ukuthi uJehova uyabonelela. Akafuni okungaphezu kwamandlethu. Uthatjiswa ngilokho esimenzela khona, ikani nasenza koke okusemandlenethu. Sineembonelo eziseBhayibhelini zalabo abalotjha uJehova ngehliziywabo yoke. Cabanga ngoPowula. Wasebenza budisi isikhathi eside, akhamba amabanga amade begodu athoma amabandla amanengi. Izinto nazitjhugulukako ekuphileni kwakhe begodu angasakghoni ukutjhumayela ngendlela ebekatjhumayela ngayo phambilini, inga-kghani uJehova akhenge asathaba ngaye? Awa. Waragela  phambili enza okusemandlenakhe begodu uJehova wambusisa. (IzE. 28:​30, 31) Ngokufanako, lokho esikunikela uJehova angeze kuhlale kufana. Okuqakathekileko kuye kukuthi kubayini simlotjha. Akhesicoce ngezinye iindlela uJehova asithanda ngazo.

UJEHOVA UTJENGISA NJANI UKUTHI UYATHOKOZA NGALOKHO ESIMENZELA KHONA?

10. Singabona njani ukuthi uJehova uyasithanda? (Jwanisi 16:27)

¹⁰ Usiphe iBhayibheli. UJehova ufuna iindlela angatjengisa ngazo abantu bakhe ukuthi uyabathanda nokuthi bayamthabisa. ImiTlolo itjengisa iinkhathi ezimbili lapho atjela khona uJesu ukuthi uyiNdodanakhe ayithandako nayamukelako. (Mat. 3:17; 17:5) Ungathanda ukuzwa uJehova akuqinisekisa ukuthi uyakuthanda? UJehova akakhulumi nathi asezulwini kodwana ukhuluma nathi ngeliZwi lakhe. “Nasizwa” amezwi uJesu awatjela abafundi bakhe, kuba ngasuthi sizwa uJehova akhuluma nathi. (Funda uJwanisi 16:27.) UJesu wabulingisa ngokupheleleko ubuntu bakaYise. Yeke, nasifunda ukuthi uJesu wabathokoza abalandeli bakhe abanesono, singacabanga ukuthi uJehova utjho lokho kithi.—Jwa. 15:​9, 15.

11. Kubayini kungakafuzi sicabange bona iintjhijilo zitjho ukuthi uJehova akasithandi? (Jakopo 1:12)

¹¹ Usipha esikutlhogako. UJehova uhlala akulungele ukusisiza njengokusinikela izinto esizitlhogako. Ngezinye iinkhathi, uJehova uvumela izinto ezimbi ukuthi zenzeke kithi, njengalokha kwenzeka kuJobho. (Job. 1:​8-11) Ukuqalana neentjhijilo akutjho ukuthi uJehova akasasithandi. Kunalokho, sinethuba lokutjengisa uJehova ukuthi siyamthanda nokuthi simthemba kangangani. (Funda uJakopo 1:12.) Nasiqalene neentjhijilo, sizokubona indlela uJehova asithanda ngayo nasisiza ngayo bona sikghodlhelele.

12. Khuyini esingayifunda kilokho okwenzakalela u-Dmitrii?

¹² Cabanga ngalokho okwenzeka kumfowethu we-Asia u-Dmitrii. Walahlekelwa msebenzi begodu kwaphela iinyanga angawufumani omunye. Yeke waqunta ukuthemba uJehova ngokuthi aye khudlwana esimini. Kwaphela iinyanga ezinengi asolo angawutholi umsebenzi. Kwathi kusese njalo, wagula khulu kangangokuthi bekangakghoni ukuvuka embhedeni. Wathoma ukuzizwa angasiyindoda  nobaba omuhle, wazibuza ukuthi uJehova usamthanda na. Ngobunye ubusuku, indodakazakhe yaphrinta amezwi aku-Isaya 30:15: “Amandlenu azokuba sekwehliseni ummoya nokungithemba.” Walibeka hlanu kombhedakhe wathi kuye, “Baba, nawuzizwa udanile, khumbula umtlolo lo.” U-Dmitrii walemuka ukuthi nguJehova obekabatlhogomela ngokudla okwaneleko, izembatho nendawo yokuhlala. Uthi, “Ebekufuze ngikwenze, kukwehlisa umoya nokuragela phambili ngithemba uZimu.” Nange unomraro ofanako ungaqiniseka ukuthi uJehova unendaba nawe begodu uzokusiza ukghodlhelele.

13. UJehova angasebenzisa abobani ukutjengisa ukuthi uyasithanda begodu njani?

¹³ Usiphe abafowethu nabodadwethu. UJehova usebenzisa abafowethu nabodadwethu ukutjengisa indlela asithanda ngayo. Ngokwesibonelo, angasebenzisa abanye ukuthi basikhuthaze nasitlhoga isikhuthazo khulu. Ngilokho okwenzeka kudade we-Asia. Waphelelwa msebenzi wabe wagula khulu. Indodakhe yenza isono esikhulu begodu akhenge isabamdala. Uthi, “Bengingazwisisi ukuthi kubayini kwenzeka izinto ezinjengalezi. Bengicabanga ukuthi kukhona into embi engiyenzileko begodu uJehova akasangithandi.” Udadwethu wancenga uJehova ukuthi amtjengise bona usamthanda. UJehova wakwenza njani lokho? Uthi, “Abadala bakhuluma nami bangiqinisekisa ukuthi uJehova usangithanda.” Ngemva kwesikhathi, wabawa isizo lakaJehova godu. Uthi, “Ngalo ilangelo ngafumana incwadi evela esiqhemeni sabafowethu nabodadwethu ebandleni. Njengombana ngifunda amezwabo aduduzako, ngabona ukuthi uJehova uyangithanda.” Kuliqiniso ukuthi uJehova utjengisa ukuthi uyasithanda ngamezwi wabafowethu nabodadwethu.—Rhu. 10:17.

14. Ngiyiphi enye indlela uJehova atjengisa ngayo ukuthi uyasithanda?

 ¹⁴ UJehova utjengisa ukuthi uyasithanda asebenzisa esikholwa nabo bona basinikele isiyalo nasisitlhogako. Ngokwesibonelo, ngekhulu lokuthoma, uJehova wasebenzisa umpostoli uPowula ukutlola iincwadi ezili-14 atlolele labo akholwa nabo. Eencwadinezo uPowula wanikela akholwa nabo isiyalo esiqinileko kodwana esinethando. Kubayini uJehova aphefumulela uPowula bona atlole isiyalweso? UJehova unguBaba olungileko begodu uyabakhalimela abantwana bakhe ‘abathandako.’ (IzA. 3:​11, 12) Yeke omunye nakasinikela isiyalo esivela eBhayibhelini, akutjho ukuthi uJehova usikwatele kodwana uyasithanda. (Heb. 12:6) Khuyini okhunye okutjengisa ukuthi uJehova uyasithanda?

IINDLELA EZINYE ESINGABONA NGAZO UKUTHI UJEHOVA UYASITHANDA

15. UJehova unikela abobani umoyakhe ocwengileko begodu kubayini lokho kungasiqinisekisa?

¹⁵ UJehova ubanikela umoya ocwengileko labo abathandako. (Mat. 12:18) Singazibuza, ‘Kghani siyakghona ukuveza ubuntu beenthelo zomoya ocwengileko kaZimu ekuphileni kwethu?’ Inga-kghani ulemuke ukuthi ubekezelela khudlwana kunangaphambi kokobana wazi uJehova? Kuhlekuhle, nawusolo uba neenthelo zobuntu bakaZimu, kulapho ozokubona khona ukuthi uJehova uyakuthanda!—Funda ibhoksi elithi, ‘ Iinthelo Zomoya Ngilezi . . . ’

16. UJehova usebenzisa abobani ukuthi batjhumayele iindaba ezimnandi begodu lokho kukwenza uzizwe njani? (1 Thesalonika 2:4)

¹⁶ UJehova uvumela abathandako ukuthi batjhumayele iindaba ezimnandi. (Funda yoku-1 kwebeThesalonika 2:4.) Tjheja indlela udade u-Jocelyn azuza ngayo ngokutjhumayela nabanye iindaba ezimnandi. Ngelinye ilanga, u-Jocelyn wavuka agandelelekile. Uthi, “Ngazizwa ngasuthi ayikho into engingayenza kodwana bengiphayona begodu kulilanga lami lokuya esimini. Yeke ngathandaza ngaphuma ngaya esimini.” Ekuseni ngelangelo u-Jocelyn wahlangana no-Mary, umma onomusa owamukela isifundo seBhayibheli. Ngemva kweenyanga ezimbalwa u-Mary wathi bekathandaza kuZimu, abawa isizo lokha nakuzokukokoda u-Jocelyn emnyango. Nakacabanga ngalokhu, u-Jocelyn uthi, “Ngezwa ngasuthi uJehova ungitjela  ukuthi, ‘Ngiyakuthanda.’” Kuliqiniso, akusiwo woke umuntu ozokulalela umlayezo esiwutjhumayelako. Nanyana kunjalo, singaqiniseka ukuthi uJehova uyathaba nasenza koke okusemandlenethu ukutjhumayela iindaba ezimnandi.

17. Khuyini oyifundako kilokho okwatjhiwo ngu-Vicky ngesihlengo? (IRhubo 5:12)

¹⁷ UJehova usebenzisa isihlengo kilabo abathandako. (1 Thim. 2:​5, 6) Kuthiwani nangabe ihliziywethu ifukamele umkhumbulo wokuthi uJehova akasithandi, nanyana sikholelwa esihlengweni begodu sibhajadisiwe? Khumbula ukuthi angeze sahlala sithemba indlela esizizwa ngayo kodwana singamthemba uJehova. Uqala labo abakholelwa esihlengweni njengabalungileko bewuzobabusisa. (Funda iRhubo 5:12; Rom. 3:26) Ukucabangisisa ngesihlengo kwasiza u-Vicky. Ngelinye ilanga, ngemva kokucabangisisa ngesihlengo, uthi: “UJehova bekasolo angibekezelela isikhathi eside. . . . Kodwana mina kuhlekuhle bengithi kuye: ‘Angeze wakghona ukuthanda umuntu onjengami. Umhlatjelo wendodanakho angekhe ukghone ukusula izono zami.’” Ngokucabangisisa ngesipho sesihlengo, wathoma ukubona ukuthi uJehova uyamthanda. Nathi sizokubona indlela uJehova asithanda ngayo nasicabanga ngesihlengo.

18. Khuyini esingaqiniseka ngayo nange siragela phambili sithanda uBabethu wezulwini?

¹⁸ Nanyana singalinga ngamandla ukwenza koke okusesihlokwenesi, ngezinye iinkhathi singadana sizibuze ukuthi uJehova usasithanda na. Nange lokho kwenzeka, khumbula ukuthi uJehova uyabathanda “labo abaragela phambili bamthanda.” (Jak. 1:12) Yeke, ragela phambili utjhidelana noJehova uqale nendlela atjengisa ngayo ukuthi uyakuthanda. Hlala ukhumbula ukuthi uJehova ‘akasikude komunye nomunye wethu.’—IzE. 17:27.