1-2. Kubayini ezinye iinkambiso zeBhayibheli ziba ngeziqakatheke khulu nakutjhuguluka ukuphila kwethu?

 NGELANGA labo lomtjhado, umkhwenyana nomakotakhe omuhle bayalalelisisa njengombana kubekwa ikulumo yomtjhado esekelwe eBhayibhelini. Iinkambiso ekukhulunywa ngazo bayazazi. Kusukela ngelangelo kuye phambili ilwazi abalifumene ekulumweni le lizokudlala indima eqakathekileko. Kubayini sitjho njalo? Kungombana nje bazolisebenzisa njengabantu abatjhadileko.

² Kuyafana nalokha abatjhadikazi abamaKrestu baba babelethi. Eminyakeni edlulileko, bebalalela iinkulumo ezikhuluma ngokukhulisa abantwana kodwana nje iinluleko ebebazifumana eenkulumwenezo seziqakatheke khulu kibo. Sele bazokuba nomntwanabo okufuze bamkhulise. Qala bona kulilungelo elikhulu kangangani leli! Kwamambala, ubujamo obutjha bungatjhugulula indlela esiqala ngayo iinkambiso zeBhayibheli esizaziko. Leli ngelinye lamabanga elenza abantu abalotjha uJehova bafunde imiTlolo njengombana namakhosi wakwa-Israyeli bewatjelwa bona azindle ngayo “imihla yoke” yokuphila kwabo.—Dut. 17:19.

3. Sizokucoca ngani esihlokwenesi?

³ Babelethi, ninomthwalo omkhulu amaKrestu angaba nawo, okukufundisa abantwana benu ngoJehova. Anifuni ukubafundisa ngoZimu kwaphela kodwana nifuna ukubasiza bamthande ngokusuka ehliziyweni. Khuyini eningayenza ukusiza abantwana benu bathande uJehova? Esihlokwenesi,  sizokucoca ngeenkambiso zeBhayibheli ezine ezinganisiza njengababelethi. (2 Thim. 3:16) Sizokubona nendlela abanye ababelethi abamaKrestu abazuze ngayo nabasebenzisa iseluleko esivela eBhayibhelini.

4. Ngiyiphi ikambiso engasiza ababelethi badzimelelise ithando ngoJehova eenhliziyweni zabantwana babo? (Jakopo 1:5)

⁴ Ikambiso 1: Funa isinqophiso sakaJehova. Bawa uJehova akunikele ukuhlakanipha okutlhogako bona usize abantwana bakho bamthande. (Funda uJakopo 1:5.) UmuMuntu ophuma phambili ongakunikela isinqophiso. Kunamabanga azwakalako asenza sitjho njalo, akhucabange nganaka amabili. Kokuthoma, uJehova unelemuko elikhulu ekubeni mbelethi. (Rhu. 36:9) Kwesibili, iseluleko sakhe esihlakaniphileko siyazuzisa.—Isa. 48:17.

5. (a) Ngiliphi isizo ihlangano kaJehova elinikela ababelethi? (b) Njengombana ubonile evidiyweni, khuyini oyifundako endleleni umFowethu noDade Amorim abakhulise ngayo abantwana babo?

⁵ Asebenzisa iliZwi lakhe nehlanganwakhe, uJehova unikela ababelethi ilwazi elinengi elivela eBhayibhelini elingabasiza bakhulise abantwana babo bona bamthande. (Mat. 24:45) Ngokwesibonelo, ungafumana iseluleko eenhlokweni ezimlandelande ezithi ‘Isizo Lomndeni,’ ebezigadangiswa kuPhaphama! begodu nje ziyafumaneka kuzinzolwazi yethu. Kunamavidiyo amanengi ku-jw.org anemikhulumiswano namadrama angasiza ababelethi basebenzise isiyeleliso sakaJehova njengombana bakhulisa abantwana babo. *—IzA. 2:4-6.

6. Omunye ubaba uzizwa njani ngesinqophiso yena nomkakhe abasifumana ehlanganweni kaJehova?

⁶ Ababelethi abanengi baveze indlela abalithokoza ngayo isizo uJehova abanikela lona asebenzisa ihlanganwakhe. Ubaba okuthiwa ngu-Joe uthi: “Ukukhulisela abantwana abathathu eqinisweni akusibulula. Sinomkami besihlala sithandaza sibawa uJehova asisize. Kanengi besibona ngasuthi isihloko namkha ividiyo ethileko  ifike ngesikhathi ukusisiza siqalane kuhle nobujamo esikibo. Ukufuna isinqophiso sakaJehova kuyinto eqakathekileko kithi.” U-Joe nomkakhe balemuke ukuthi iinhloko namavidiyo la, zisiza abantwana babo batjhidele kuJehova.

7. Kubayini kuqakathekile ngababelethi ukwenza koke okusemandlenabo bona babe sibonelo esihle? (Roma 2:21)

⁷ Ikambiso 2: Yiba sibonelo esihle. Abantwana kanengi baqala lokho ababelethi abakwenzako bese bayabalingisa. Kuliqiniso, akakho umbelethi ongayenzi imitjhapho. (Rom. 3:23) Nanyana kunjalo, ababelethi abahlakaniphileko benza koke okusemandlenabo ukuba sibonelo esihle ebantwaneni babo. (Funda kwebeRoma 2:21.) Omunye ubaba wathi ngabantwana: “Bafana nesipontji esimunya koke, bazositjela lokha esikwenzako kungafani nalokho esibafundisa khona.” Yeke nasifuna abantwana bethu bathande uJehova, ithando esinalo ngaye kufuze liqine belibonakale ngokukhanyako kibo.

8-9. Khuyini oyifundileko kilokho okutjhiwo ngu-Andrew no-Emma?

⁸ Kuneendlela ezinengi ababelethi abangafundisa ngazo abantwana babo ukuthanda uJehova. Tjheja lokho okwatjhiwo ngu-Andrew oneminyaka eli-17: “Ababelethi bami bebahlala bagandelela ukuqakatheka kokuthandaza. Qobe ebusuku uBaba bekathandaza nami ngitjho nanyana besele ngithandazile. Ababelethi bami bebahlala basikhumbuza bathi: ‘Ungakhuluma noJehova kanengi ngendlela ofuna ngayo.’ Lokho kwangithinta khulu, nje ngithandaza ngokutjhaphulukileko kuJehova begodu ngimqala njengoBaba onethando.” Babelethi, ningayithatheli phasi indlela enithanda ngayo uJehova, ingadlala indima ekulu ebantwaneni benu.

⁹ Cabanga nangesibonelo saka-Emma. Lokha ubabakhe nakazakukhamba, wabatjhiya neenkolodo ezinengi ebekufuze zibhadelwe ngummakhe. U-Emma uthi: “Kanengi umma bekanganamali eyaneleko kodwana bekahlala akhuluma ngendlela uJehova athanda bekatlhogomele ngayo abantu bakhe. Indlela ebekaphila ngayo beyiveza ukuthi bekakukholelwa kwamambala lokho. Umma bekakwenza ebekangifundisa khona.” Sifundani endabeni le? Ababelethi bangaba sibonelo nanyana baqalene nobujamo obubudisi.—Gal. 6:9.

10. Ngimaphi amathuba ababelethi abanengi abama-Israyeli ebebanawo wokucoca nabantwana babo? (Duteronomi 6:6, 7)

¹⁰ Ikambiso 3: Khuluma nabantwana bakho qobe. UJehova watjela ama-Israyeli bona afundise abantwana babo ngaye qobe langa. (Funda uDuteronomi 6:6, 7.) Ababelethaba bebanamathuba amanengi wokucoca nabantwana babo qobe, bebadzimelelise ithando ngoJehova eenhliziyweni zabo. Ngokwesibonelo, umsanyana wakwa-Israyeli bekangasiza ubabakhe ngokutjala namkha ngokuvuna. Umntazinyana yena bekangasiza ummakhe ngokuthunga namkha ukwenza eminye imisebenzi yangendlini. Njengombana ababelethi basebenza nabantwana babo, bebangasebenzisa isikhatheso ukucoca nabo ngezinto eziqakathekileko. Ngokwesibonelo, bebangacoca ngokuthi uJehova muhle kangangani nokuthi ubasiza njani njengomndeni.

11. Ngiliphi ithuba ababelethi abamaKrestu abangalisebenzisa ukucoca nabantwana babo?

¹¹ Nje ubujamo bokuphila butjhugulukile. Eenarheni ezinengi ababelethi nabantwana abakghoni ukuba nesikhathi esinengi ndawonye. Kungenzeka ababelethi basemsebenzini begodu abantwana basesikolweni.  Ngebanga lalokho, ababelethi kufuze balinge ukwenza isikhathi sokucoca nabantwana babo. (Efe. 5:15, 16; Flp. 1:10) Esinye isikhathi abangasisebenzisa ngesokulotjha komndeni. Umfowethu osesemutjha u-Alexander uthi: “UBaba bekanehlelo lokulotjha komndeni begodu bekangavumeli litho lithathe isikhatheso. Ngemva kokulotjha komndeni, besizicocela.”

12. Khuyini ihloko yomndeni ekufuze ikucabangele lokha nayiraga ukulotjha komndeni?

¹² Nange uyihloko yomndeni, khuyini ongayenza ukwenza ukulotjha komndeni kuthabise abantwana bakho? Ningafunda incwadethu etja ethi Thabela Ukuphila Ngokungapheliko! Incwadi le izoninikela amathuba amahle wokucocisana. Ufuna abantwana bakho bakhulume ngokutjhaphulukileko ngendlela abazizwa ngayo, yeke ungasebenzisi isikhathi sokulotjha komndeni ukukhuluma ngemitjhapho abayenzileko. Linga ukungasilingeki lokha nabaveza imibonwabo engavumelani neenkambiso ezisemiTlolweni. Kunalokho, kuthabele ukuthi baveza indlela abazizwa ngayo ngokuthembeka bewubakhuthaze ukuthi bahlale benza njalo. Ungabasiza kuhle abantwana bakho kwaphela nawazi indlela abazizwa ngayo.

13. Ngimaphi amanye amathuba ababelethi abanawo wokusiza abantwana babo batjhidele kuJehova?

¹³ Babelethi, funani amathuba wokusiza abantwana benu batjhidele kuJehova qobe langa. Akutlhogeki nilinde isikhathi sokufunda iBhayibheli bona nibafundise ngoZimethu onethando. Tjheja okwatjhiwo ngumma okuthiwa ngu-Lisa: “Sasiza abantwana bethu ukuthi babone ubuntu bakaJehova nabaqala indalo. Ngokwesibonelo, lokha injethu nayenza izinto ezihlekisako besibatjela ukuthi lokhu kuveza bona uJehova unguZimu othabileko begodu uthanda ukuphila njengathi.”

14. Kubayini kuqakathekile ukuthi ababelethi basize abantwana babo bakhethe abangani abahle? (IzAga 13:20)

¹⁴ Ikambiso 4: Siza abantwana bakho bakhethe abangani abahle. IliZwi lakaZimu likwenza kukhanye ukuthi abangani bethu banomthelela kithi, kungaba ngomuhle namkha omumbi. (Funda IzAga 13:20.)  Babelethi, kghani niyabazi abangani babantwana benu? Khenahlangana nabo, naba nesikhathi ninoke? Khuyini eningayenza ukusiza abantwana benu bakhethe abangani abathanda uJehova? (1 Kor. 15:33) Ningabasiza bakhethe kuhle ngokuthi nimeme abantu abanetjhebiswano elihle noJehova bona bahlanganyele nomndenenu ezintweni enizenzako.—Rhu. 119:63.

15. Khuyini ababelethi abangayenza ukusiza abantwana babo bakhethe abangani abahle?

¹⁵ Cabanga ngalokho okwenzeka kubaba okuthiwa ngu-Tony. Uhlathulula lokho yena nomkakhe abakwezileko ukusiza abantwana babo bakhethe abangani abahle, uthi: “Eminyakeni edlulileko, mina nomkami besimema abafowethu nabodadwethu abaneminyaka ehlukahlukeneko nabavela eenzindeni ezingafaniko. Bebadla nathi, bebabe nathi ngesikhathi sokulotjha komndeni. Le yindlela ephuma phambili yokwazi labo abathanda bebalotjhe uJehova ngethabo. Sibe nelungelo elihle khulu lokuvakatjhelwa babonisi besigodi, iinthunywa zevangeli nabanye emzinethu. Ilemuko labo, itjiseko nokuzinikela kwabo kube nomthelela omkhulu ebantwaneni bethu bekwabasiza batjhidela kuJehova.” Babelethi, zimiseleni ukusiza abantwana benu babe nabangani abahle.

16. Ithiwani-ke nange umntwana athi akafuni ukulotjha uJehova?

¹⁶ Kuthiwani-ke nasele wenze koke okusemandlenakho kodwana omunye wabantwana bakho athi akafuni ukulotjha uJehova? Akukafuzi uphethe ngokuthi ubhalelwe njengombelethi. UJehova usinikele soke ilungelo lokukhetha bona sizomlotjha namkha awa, kuhlanganise nabantwana bakho. Lokha umntwanakho nakaqunta ukutjhiya uJehova, ungalilahli ithemba lokuthi ngelinye ilanga uzokubuya. Khumbula umfanekiso wendodana eyalahlekako. (Luk. 15:11-19, 22-24) Indodana le yaphuma endleleni kodwana ekugcineni yabuya. Abanye bangathi “Loyo bekumfanekiso, kghani kungenzeka ekuphileni kwamambala?” Iye kungenzeka! Ekhabolakhona, lokhu kwenzeka kumfowethu osesemutjha u-Elie.

17. Lokho okwenzeka ku-Elie kukukhuthaza njani?

 ¹⁷ Nakakhuluma ngababelethi bakhe, u-Elie uthi: “Benze koke okusemandlenabo bona badzimelelise ithando ngoJehova neliZwi lakhe iBhayibheli kimi. Nangineminyaka eli-15 ngathoma ukungalaleli.” U-Elie wathoma ukwenza izinto ezingakalungi begodu akhenge alamukele isizo lababelethi bakhe nabalinga ukumsiza atjhidelane noJehova. Ngemva kokuthi akhambe ekhabo, wathoma ukuziphatha kumbi. Nanyana kunjalo, ngezinye iinkhathi bekacoca ngeBhayibheli nomunye wabangani bakhe. U-Elie uthi: “Lokha nangicocela umnganami ngoJehova ngazithola sengicabanga khulu ngoJehova. Kancanikancani imbewu yeqiniso leBhayibheli ebeyisehliziywenami, leyo ababelethi bami abalinga budisi ukuyitjala, yathoma ukukhula. Ngokukhamba kwesikhathi, u-Elie wabuyela eqinisweni. * Akhucabange ukuthi ababelethi bakhe bathaba kangangani ngokuthi balinga ukumfundisa asesemncani ukuthanda uJehova.—2 Thim. 3:14, 15.

18. Uzizwa njani ngababelethi abasebenza budisi ukufundisa abantwana babo ukuthanda uJehova?

¹⁸ Babelethi, ninikelwe ilungelo elihle khulu, ilungelo lokukhulisa abantwana benu bona balotjhe uJehova. (Rhu. 78:4-6) Lo akusimsebenzi omncani begodu siyanibuka ngomsebenzenu obudisi wokubasiza. Nange niragela phambili nokwenza koke okusemandlenenu ukubasiza bathande uJehova benibakhulise ngesiyalo nangesinqophiso sakhe, ningaqiniseka ngokuthi uBabethu wezulwini onethando uzokuthaba.—Efe. 6:4.