1. Ngisiphi isiqunto esiqakatheke khulu ekufuze woke umuntu asithathe?

 ABANTU kufuze bathathe isiqunto esiqakathekileko namhlanjesi. Inga-kghani bazokusekela uJehova uZimu njengomBusi ofaneleko wephaseli namkha bazokusekela inaba lakhe elimbi uSathana uDeveli? Woke umuntu kufuze akhethe. Nanyana ngisiphi isiqunto abantu abasithathako, sizokuthinta ukuphila kwabo okungapheliko. (Mat. 25:31-33, 46) Hlangana ‘nesizi elikhulu,’ bazokufumana itshwayo lokuthi bazokusinda namkha bazokubhujiswa.—IsAm. 7:14; 14:9-11; Hez. 9:4, 6.

2. (a) Incwadi yamaHebheru 10:35-39 isikhuthaza bona senzeni? (b) Incwadi yesAmbulo ingasisiza njani?

² Funda amaHebheru 10:35-39. Nange ukhethe ukusekela ubukhosi bakaJehova ukhethe kuhle khulu. Nje, sele usiza abanye ukuthi bakhethe kuhle. Bona wenze njalo, ungasebenzisa ilwazi elisencwadini yesAmbulo ukuthi ubasize. Incwadi eyikarisomraro le iveza lokho ekuzokwenzeka kilabo abaphikisana noJehova godu iveza neembusiso ezizokufunyanwa ngilabo abafuna ubukhosi bakhe ngokuthembeka. Senza kuhle ngokucabanga ngamaqiniso aqakathekileko la. Ukwenza njalo kuzokuqinisa ukuzimisela kwethu ukuragela phambili nokulotjha uJehova. Ngaphezu kwalokho, singasebenzisa lokho esikufundileko bona sisize abanye bakhethe kuhle begodu banamathele esiquntweni sabo.

3. Khuyini esizokucoca ngayo esihlokwenesi?

³ Esihlokwenesi, sizokucoca nganasi imibuzo: Khuyini elindelwe ngilabo abasekela ubukhosi bakaZimu? Ngakelinye ihlangothi, khuyini ezokwenzeka kilabo abakhetha  ukusekela isibandana esibomvu be, esivezwe encwadini yesAmbulo?

4. Ngisiphi isiqhema uJwanisi asibona sinoJesu eZulwini?

⁴ Embonweni, umpostoli uJwanisi ubona iinqhema ezimbili ezisekela ubukhosi bakaJehova begodu zifumane iimbusiso zokuphila okungapheliko. Isiqhema sokuthoma sizii-144 000. (IsAm. 7:4) Abantwaba bathethwe ephasini ukuthi benze urhulumende namkha umBuso, bazokubusa iphasi noJesu ezulwini. (IsAm. 5:9, 10; 14:3, 4) Embonweni, uJwanisi ubabona bajame noJesu entabeni yezulwini iZiyoni.—IsAm. 14:1.

5. Khuyini ezokwenzeka esikhathini esingaphelisi ihliziyo kilabo abazesiweko abasaphila ephasini?

⁵ Kusukela ngesikhathi sabapostoli bekube nje, iinkulungwana zabantu zikhethwe bona zibe yingcenye yabazii-144 000. (Luk. 12:32; Rom. 8:17) UJwanisi, utjelwa bona kunabantu abambalwa abazesiweko abazabe basaphila ephasini emihleni yokuphela. Labo “abaseleko” bazokufumana “itshwayo” lokwamukelwa nguJehova ngaphambi kokuthoma kwesizi elikhulu. (IsAm. 7:2, 3; 12:17) Ngemva kwesikhathi hlangana nesizi elikhulu, laba abaseleko bazokuthathwa bayiswe ezulwini bayokuhlangana nabanye abazii-144 000, abahlongakele bathembekile. Bazokubusa noJesu emBusweni kaZimu.—Mat. 24:31; IsAm. 5:9, 10.

6-7. (a) Ngisiphi esinye isiqhema uJwanisi asibonako begodu sifundani ngaso? (b) Kubayini kufuze sibe nendaba nalokho okusencwadini yesAmbulo isahluko 7 malungana nabazesiweko ‘nesiqubuthu esikhulu’?

⁶ Ngemva kokubona isiqhema sasezulwini, uJwanisi ubona “isiqubuthu esikhulu.” Ngokungafani nabazii-144 000, isiqubuthwesi asibaleki. (IsAm. 7:9, 10) Khuyini esiyifunda ngabo? UJwanisi uyatjelwa: “Laba ngilabo abavela esizini elikhulu, bahlanze iimphuraphura zabo, bazenza zaba mhlophe ngeengazi zeMvana.” (IsAm. 7:14) Ngemva kokusinda esizini elikhulu, ‘isiqubuthwesi’ sizokuphila ephasini besithabele neembusiso ezikarisako.—Rhu. 37:9-11, 27-29; IzA. 2:21, 22; IsAm. 7:16, 17.

⁷ Akukaqakatheki ukuthi ukhethelwe ukuyophila ezulwini namkha ephasini, okuqakatheke khulu kukuthi uzibone ehlathululweni ekusAmbulo isahluko 7, kghani uyazibona na? Kufuze uzibone. Lesi kuzokuba sikhathi esimnandi kwamambala, kizo zombili iinqhema zeenkhonzi zakaZimu! Kuzosithabisa khulu ukuthi sikhethe ukusekela ubukhosi bakaJehova. Khuyini enye incwadi yesAmbulo esitjela khona malungana nesizi elikhulu?—Mat. 24:21.

8. Lizokuthoma njani isizi elikhulu begodu lizobathinta njani abantu?

⁸ Njengombana khekwatjhiwo esihlokweni esidlulileko, zepolotiki zephaseli, esikhathini esingaphelisi ihliziyo zizokujikela iBhabhiloni eliKhulu, umbuso wekolo yamanga. (IsAm. 17:16, 17) Isenzwesi, sizokutshwaya ukuthoma kwesizi elikhulu. Inga-kghani lokhu kuzokwenza abantu abanengi bafune ukulotjha uJehova? Awa. Ngokuhlukileko kilokho, isAmbulo isahluko 6 sitjengisa ukuthi ngesikhatheso abantu abangamlotjhiko uJehova bazokufuna ivikeleko kezepolotiki, nakezerhwebo zephaseli, ezifaniswa neentaba. Njengombana abantwabo bangeze  babe sehlangothini lomBuso kaZimu, uJehova uzobaqala njengamanaba.—Luk. 11:23; IsAm. 6:15-17.

9. Khuyini ezokwenza abantu bakaJehova bahluke hlangana nesizi elikhulu begodu kuzokuba namuphi umphumela?

⁹ Kwamambala, abantu bakaJehova abathembekileko bazokuhluka hlangana nesikhathi esibudisi sesizi elikhulu. Kuzabe kusesengibo kwaphela abasiqhema sabantu esilotjha uJehova uZimu ephasini begodu esingafuni ukusekela ‘isibandana.’ (IsAm. 13:14-17) Ukudzimelela kwabo kuzokukghabhudlha labo abaphikisana noJehova. Umphumela walokho uzokuba kukuthi iitjhaba ezibumbeneko zihlasele abantu bakaZimu ephasini loke. IBhayibheli libiza ukuhlaselokhu ngokuthi kuhlasela kwakaGogi wakwaMagogi.—Hez. 38:14-16.

10. Njengombana kuhlathululwe ku-IsAmbulo 19:19-21, uJehova uzokusabela njani lokha nakuhlaselwa abantu bakhe?

¹⁰ Khuyini uJehova azoyenza ngokuhlaselokhu? Uthi: “Ilaka lami lizakuvutha.” (Hez. 38:18, 21-23) IsAmbulo isahluko 19 sihlathulula lokho okuzokwenzeka ngokulandelako. UJehova uthumela iNdodanakhe bona iyokuvikela abantu bakhe begodu ihlule amanababo. UJesu uzokuyokuhlasela akhambisana ‘namabutho asezulwini’ iingilozi ezithembekileko kunye nabazii-144 000. (IsAm. 17:14; 19:11-15) Uzokuba yini umphumela wepi le? Kuzokurhayilwa abantu nazo zoke iinhlangano eziphikisana noJehova!—Funda IsAmbulo 19:19-21

11. Ngisiphi isenzakalo esikhethekileko esizokwenzeka ngomvuthondaba wencwadi yesAmbulo?

¹¹ Akhulinge ukucabanga ukuthi labo abathembekileko abasephasini bazozizwa njani ngemva kokusinda nakubhujiswa amanaba kaZimu. Leso kuzokuba sikhathi esithabisa kwamambala! Nanyana kuzokuba nethabo elikhulu ezulwini lokha iBhabhiloni eliKhulu nalirhayilwako, kunokhunye godu okuzokuletha ithabo. (IsAm. 19:1-3) Ekhabolakhona, umvuthondaba wesAmbulo ‘mtjhado weMvana’.—IsAm. 19:6-9.

12. Njengombana kuvezwe ku-IsAmbulo 21:1, 2, uzokuba nini umtjhado wemvana?

¹² Uzokuba nini umtjhado? Boke abazii-144 000 bazabe basezulwini ngaphambi kokuthoma kwepi i-Armagedoni. Nanyana kunjalo, leso ngeze kwaba sikhathi sokuthoma komtjhado weMvana. (Funda IsAmbulo 21:1, 2.) Umtjhado weMvana uzokwenzeka ngemva kwepi ye-Armagedoni nangemva kokobana woke amanaba kaZimu sele abhujisiwe.—Rhu. 45:3, 4, 13-17.

13. Umtjhado weMvana utjho ukuthini kilabo azokutjhada nabo?

¹³ Umtjhado weMvana utjho ukuthini kilabo azokutjhada nabo? Njengombana umtjhado uhlanganisa indoda nomfazi, nomtjhado lo ongokomfanekiso uhlanganisa iKosi, uJesu Kretsu ‘nomakotakhe,’abazii-144 000. Isenzakalwesi esikhethekileko sithoma urhulumende omutjha ozokubusa iminyaka eyi-1 000.—IsAm. 20:6.

14-15. IsAmbulo isahluko 21 sibamadanisa nani abazii-144 000? (Qala isithombe esingaphandle.)

¹⁴ Okulandelako, isAmbulo isahluko 21 simadanisa abazii-144 000 nedorobho elihle khulu elibizwa ngokuthi “IJerusalema eliTjha.” (IsAm. 21:2, 9) Idorobheli lisekelwe ematjeni ‘anamabizo ali-12 wabapostoli abali-12 beMvana.’ Kubayini indaba le idosa ikareko kaJwanisi? Kungombana ubone ibizo lakhe litloliwe  elitjeni linye. Lelo bekulilungelo elihle tle!—IsAm. 21:10-14; Efe. 2:20.

¹⁵ Idorobho elingokomfanekisweli alifani nelinye. Linesitarada esikhulu esenziwe ngegolide, namayege ali-12 weparele, namaboda neensekelo, enziwe ngamatje aligugu begodu belilingana mahlangothi womane. (IsAm. 21:15-21) Nanyana kunjalo, kukhona okutjhodako. Tjheja lokho uJwanisi asitjela khona ngokulandelako: “Akhenge ngibone ithempeli kilo, ngombana uJehova uZimu uMninimandla woke ulithempeli lalo, neMvana ingilo. Idorobheli alitlhogi ilanga namkha inyezi bona ilikhanyisele, ngombana iphazimulo kaZimu iyalikhanyisela, neMvana isibani salo.” (IsAm. 21:22, 23) Labo abakha iJerusalema eliTjha bazokuba noJehova bunqopha. (Heb. 7:27; IsAm. 22:3, 4) Ngaphezu kwalokho, uJehova noJesu balithempeli ledorobhelo.

16. Khuyini ezokwenzeka hlangana nemiNyaka eyiKulungwana yokuBusa komBuso kaZimu?

¹⁶ Kulithabo elikhulu ngabazesiweko ukuthi babe sedorobheneli kodwana nalaba abanethemba lokuphila ephasini kufuze bakuthabele ukwazi idorobheli. Hlangana nemiNyaka eyiKulungwana yokuBusa komBuso kaZimu, iJerusalema eliTjha lizokuletha iimbusiso ezinengi. UJwanisi ubona iimbusiswezo zehla ‘njengomlambo wamanzi wokuphila.’ Emahlangothini amabili womlambo, “kunemithi” amakarawo “bekungewokulapha iintjhaba.” (IsAm. 22:1, 2) Boke abantu abazabe baphila ngesikhatheso bazokufumana ithuba lokuzuza ezintweni ezihlezi. Kancanikancani, boke abantu abalalelako bazokwenziwa bona bangasabi nesono. Ngeze kusaba nokugula, ubuhlungu kunye nesizi.—IsAm. 21:3-5.

17. Njengombana kutlolwe ku-IsAmbulo 20:11-13, bobani abazokuzuza hlangana nemiNyaka eyiKulungwana yokuBusa?

¹⁷ Bobani abazokuzuza eembusisweni ezihlezi? Kokuthoma, siqubuthu esikhulu sabasinde nge-Armagedoni, kunye nabo boke abazokubelethwa ephasini elitjha kodwana isAmbulo isahluko 20 sithembisa ukuthi abafileko bazokuvuswa. (Funda IsAmbulo 20:11-13.) ‘Abalungileko’ abahlongakala bathembekile esikhathini sangaphambili kunye ‘nabangakalungi’ abangakhenge bafumane ithuba elaneleko  lokufunda ngoJehova, nabo bazokuvuselwa ephasini. (IzE. 24:15; Jwa. 5:28, 29) Inga-kghani lokho kutjho ukuthi woke umuntu uzokuvuswa hlangana nemiNyaka eyiKulungwana yokuBusa? Awa. Abakhohlakeleko abangakhenge bafune ukulotjha uJehova ngaphambi kokobana bahlongakale ngekhe basavuswa. Bebanalo ithuba kodwana akhenge balisebenzise, yeke angeze baphile ePharadesi ephasini.—Mat. 25:46; 2 Thes. 1:9; IsAm. 17:8; 20:15.

18. Buzokuba njani ubujamo ephasini ekupheleni kweminyaka eyi-1 000?

¹⁸ Ekupheleni kweminyaka eyi-1 000 boke abaphila ephasini bazabe banganasono. Akekho umuntu ozokuthintwa sisono ebesinaso ekuthomeni ngebanga laka-Adamu. (Rom. 5:12) Umphumela wesono saka-Adamu uzabe ususwe ngokupheleleko. Ngendlela leyo, boke abazabe basephasini ‘bazokuvuswa’ bababantu abanganasono ekupheleni kweminyaka eyi-1 000.—IsAm. 20:5.

19. Kubayini kutlhogeka ukuthi kube nesilingo samaswaphela?

¹⁹ Siyazi ukuthi uJesu walwisana namanga kaSathana wokumenza angathembeki. Wahlala athembekile nangaphasi kokulingwa kodwana inga-kghani boke abantu abanganasono bangahlala bathembekile lokha uSathana nakanikelwa ithuba lokobana abalinge? Omunye nomunye uzokufumana ithuba lokuziphendulela ngokwakhe umbuzo lo, lokha uSathana nakatjhatjhululwako emgodini onganamkhawulo ekupheleni kweminyaka eyi-1 000. (IsAm. 20:7) Labo abazokuhlala bathembekile hlangana nesilingo samaswaphelesi, bazokufumana ukuphila okungapheliko begodu ekugcineni bathabele itjhaphuluko yamambala. (Rom. 8:21) Labo abangekhe balalele bazokurhayilwa bangasaba khona kuhlanganise noDeveli namadimonakhe.—IsAm. 20:8-10.

20. Uzizwa njani ngeemphorofido ezikarisako ezifumaneka encwadini yesAmbulo?

²⁰ Uzizwa njani ngemva kokufunda lokho okusencwadini yesAmbulo? Kghani akukuthabisi na ukuzibona uphila hlangana neemphorofidwezi? Akukwenzi ufune nokumema nabanye ekulotjheni uZimu okuhlwengileko? (IsAm. 22:17) Njengombana imikhumbulwethu neenhliziyo zethu zithintwe zizenzakalo zesikhathi esizakwesi, sikhuthazekile bona sitjho amezwi kampostoli uJwanisi, nakathi: “Amen! Yiza, Kosi Jesu.”—IsAm. 22:20.