1-2. Khuyini esingazibuza yona ngemithandazwethu?

 WAKHE wazibuza ukuthi uJehova uyayiphendula imithandazwakho? Nange kunjalo, awusiwedwa. Abafowethu nabodadwethu abanengi bakhe bazibuza umbuzo lo, khulukhulu lokha nabaqalene nemiraro. Nasiqalene nemiraro, singakuthola kubudisi ukubona ukuthi uJehova uyayiphendula imithandazwethu.

² Sizokubona ukuthi singaqiniseka bona uJehova uyayiphendula imithandazo yabantu bakhe. (1 Jwa. 5:15) Sizokucoca nangemibuzo elandelako: Kubayini ngezinye iinkhathi kungabonakala ngasuthi uJehova akayiphenduli imithandazwethu? UJehova uyiphendula ngaziphi iindlela imithandazwethu namhlanjesi?

3. Kubayini uJehova afuna sithandaze kuye?

³ ImiTlolo iyasiqinisekisa ukuthi uJehova usithanda khulu begodu siligugu kuye. (Hag. 2:7; 1 Jwa. 4:10) Kungebangelo asimema bona sibawe isizo lakhe ngomthandazo. (1 Pit. 5:6, 7) Ufuna sihlale siseduze naye begodu siqalane nobudisi ngokuphumelelako.

4. Sazi njani bona uJehova uyayiphendula imithandazo yabantu bakhe? (Qala nesithombe.)

⁴ EBhayibhelini, kanengi sifunda ngendlela uJehova aphendula ngayo imithandazo yabantu bakhe. Sikhona isibonelo osicabangako? Sibonelo seKosi uDavida. Bekanamanaba ayingozi ukuphila kwakhe koke begodu bekahlala abawa isizo lakaJehova ngomthandazo. Kesinye isenzakalo, wancenga uJehova wathi: “Maye! Jehova, yizwa umthandazwami; Ngilalela  nangibawa isizo. Ngiphendula ngokuthembeka kwakho nangokulunga kwakho.” (Rhu. 143:1) UJehova waphendula umthandazo kaDavida wokumsindisa. (1 Sam. 19:10, 18-20; 2 Sam. 5:17-25) UDavida bekangatjho ngesibindi athi: “UJehova utjhidelene nabo boke abambizako.” Nathi singaqiniseka ngalokho.—Rhu. 145:18.

5. Kghani abantu bakaJehova esikhathini esidlulileko imithandazwabo beyihlala iphendulwa ngendlela abalindele ngayo? Nikela isibonelo. (Qala nesithombe.)

⁵ UJehova kungenzeka angaphenduli imithandazwethu ngendlela esilindele ngayo. Ngilokho okwenzeka kumpostoli uPowula. Wabawa uZimu bona asuse “iliva enyameni.” UPowula wathandazela ngokunqophileko ubujamo obubudisobu iinkhathi ezintathu. UJehova wayiphendula imithandazo leyo? Iye kodwana ingasi ngendlela uPowula egade alindele ngayo. Kunokobana asuse umraro loyo, uJehova wamnikela amandla awatlhogako wokobana aragele phambili amlotjha ngokuthembeka.—2 Kor. 12:7-10.

6. Kubayini ngezinye iinkhathi kungabonakala ngasuthi uJehova akayiphenduli imithandazwethu?

⁶ Nathi ngezinye iinkhathi singafumana iimpendulo ezihlukileko kilezo esizilindeleko. Singaqiniseka ukuthi uJehova uyazi kuhle indlela angasisiza ngayo. Angakghona ‘nokwenza okukhulu ngokungalinganisekiko ngaphezu kwazo zoke izinto esizibawako namkha esizicabangako.” (Efe. 3:20) Kungebangelo, indlela aphendula ngayo imithandazwethu ingafika ngesikhathi namkha ngendlela esingakayilindeli.

7. Kubayini kungatlhogeka sitjhugulule lokho esikuthandazelako? Nikela isibonelo.

⁷ Kungatlhogeka bona sitjhugulule lokho esikuthandazelako nasilemuka bona kwenzeka intando kaZimu. Cabanga ngesibonelo saka-Martin Poetzinger. Msinya ngemva kokuthi atjhadile, wabotjhwa ekampeni yama-Nazi. Ekuthomeni, wabawa uJehova amkhuphe ekampeni yama-Nazi ukwenzela bona azokukghona ukutlhogomela umkakhe bekarage nokutjhumayela. Nanyana kunjalo, ngemva kweemveke ezimbili bekunganatshwayo elitjengisa ukuthi uJehova uzomkhupha. Yeke wathoma ukuthandaza wathi: “Jehova, ngibawa ungitjengise bona ngenzeni.” Wathoma ukucabanga ngalokho abafowethu ekampeni ebebakukghodlhelelela. Abanengi bebatshwenyeke khulu ngabafazi nabantwababo. UMfowethu u-Poetzinger wathandaza wathi: “Jehova, ngiyakuthokoza ngesabelo  sami esitjha. Ngisiza ngiqinise bengikhuthaze abafowethu.” Wahlala ekampeni iminyaka elithoba enza lokho!

8. Ngiyiphi into eqakathekileko ekufuze siyikhumbule nasithandazako?

⁸ Kufuze sikhumbule ukuthi uJehova unomnqopho begodu uzowuzalisa ngesikhathi asiquntileko. Umnqopho loyo uhlanganisa ukususa ngokupheleleko yoke imiraro ebangela ukutlhaga namhlanjesi—imiraro enjengeenhlekelele zemvelo, ukugula nokufa. UJehova uzokuzalisa umnqophwakhe ngomBuswakhe. (Dan. 2:44; IsAm. 21:3, 4) Nanyana kunjalo, bekube sikhatheso, uJehova usavumela uSathana bona abuse iphasi. b (Jwa. 12:31; IsAm. 12:9) Nange uJehova angalungisa yoke imiraro yabantu nje, kungabonakala ngasuthi uSathana ulibusa kuhle iphasi. Nange sisalinde bona uJehova azalise iinthembiso ezithileko, lokho akutjho ukuthi angekhe asisize kwanje. Akhesihlole ezinye iindlela uJehova asisiza ngazo.

9. UJehova angasisiza njani nakufuze senze iinqunto? Fanekisa.

⁹ Usinikela ukuhlakanipha. UJehova uthembisa ukusinikela ukuhlakanipha esikutlhogako bona senze iinqunto ezihle. Sitlhoga ukuhlakanipha kwakaZimu nasenza iinqunto, khulukhulu nazizosithinta ukuphila kwethu koke, njengokuqunta ukuthi sizokuhlala singakatjhadi namkha sizokutjhada. (Jak. 1:5) Cabanga ngalokho okwenzakalela u-Maria, c udadwethu ongakatjhadi. Bekaliphayona lesikhathi esizeleko nakazakuhlangana nomfowethu. Uthi: “Njengombana ubungani bethu bukhula, sathoma ukuba nekareko komunye nomunye. Bengazi ukuthi kufuze ngithathe isiqunto. Ngathandaza isikhathi eside ngendaba le. Bengitlhoga isinqophiso sakaJehova kodwana bengazi ukuthi angekhe angenzele isiqunto.” Uzizwa ngasuthi uJehova uyiphendulile imithandazwakhe yokubawa ukuhlakanipha. Njani? Wenza irhubhululo eencwadini zethu, wafumana iinhloko ebezikhuluma ngalokho ebekakufuna, zamsiza wakghona ukufumana iimpendulo zemibuzo ebekanayo. Walalela nesinqophiso esihlakaniphileko sakanina othembekileko. Isinqophisweso sasiza u-Maria wahlolisisa indlela egade azizwa ngayo. Ekugcineni, wakghona ukwenza isiqunto esihlakaniphileko.

10. NgokwebeFilipi 4:13, khuyini uJehova azoyenza bona asize abantu bakhe? Nikela isibonelo. (Qala nesithombe.)

¹⁰ Usinikela amandla wokukghodlhelela. Njengombana enza kumpostoli uPowula, nathi uJehova uzosinikela amandla wokuthi sikghodlhelelele iinlingo zethu. (Funda kwebeFilipi 4:13.) Cabanga ngendlela uJehova  asiza ngayo umfowethu u-Benjamin owakghodlhelela ubujamo obubudisi. Pheze ubutjha bakhe boke, u-Benjamin nomndenekhabo bebahlala ngekampeni yababaleki e-Afrika. U-Benjamin uthi: “Bengithandaza qobe kuJehova ngimbawa bona angiphe amandla wokwenza okumthabisako. UJehova wayiphendula imithandazwami ngokungipha ukuthula komkhumbulo, isibindi sokuragela phambili ngitjhumayela neencwadi ezingisiza ngihlale nginobuhlobo obuqinileko naye.” Uraga uthi: “Ukufunda ngalokho okwenzakalela abanye aboFakazi nokufunda ngendlela uJehova abasiza ngayo bakghodlhelela kwaqinisa ukuzimisela kwami ukuhlala ngithembekile.”

11-12. UJehova angabasebenzisa njani abafowethu nabodadwethu esilotjha nabo ukuphendula imithandazwethu? (Qala nesithombe.)

¹¹ Usebenzisa abafowethu nabodadwethu esilotjha nabo. Ngobusuku bangaphambi kobana anikele ngokuphila kwakhe, uJesu wathandaza ngokusuka ehliziyweni. Wancenga uJehova bona avimbele ihlazo lokubizwa ngokuthi umhlambalazi. Kunokobana uJehova avimbele ihlazwelo, wasiza uJesu ngokuthumela enye yeengilozi zakhe bona imqinise. (Luk. 22:42, 43) UJehova angasisiza ngokusebenzisa abafowethu namkha abodadwethu ukuthi basidosele umtato basikhuthaze namkha basivakatjhele. Soke singafuna amathuba wokunikela “ilizwi elimnandi” kilabo esilotjha nabo.—IzA. 12:25.

¹² Cabanga ngalokhu okwenzeka kudadwethu u-Miriam. Ngemva kweemveke ezimbalwa ahlongakalelwe yindodakhe, u-Miriam bekayedwa kwakhe, azizwa alahliwe begodu agandelelekile. Bekalila khulu, atlhoga umuntu angakhuluma naye. Uthi: “Benginganamandla wokudosela omunye umtato, nje-ke ngathandaza kuJehova. Kuthe ngisalila njalo bengithandaza, kwalila ifoni. Bekumdala, omngani.” U-Miriam waduduzwa mdala lo nomkakhe. Uyaqiniseka ukuthi uJehova nguye owenza umdala wamfonela.

13. Nikela isibonelo ukutjengisa ukuthi uJehova angasebenzisa abantu abangamlotjhiko bona aphendule imithandazwethu.

¹³ Angasebenzisa abantu abangamlotjhiko. (IzA. 21:1) Ngezinye iinkhathi, uJehova  uphendula imithandazo yabantu bakhe ngokusebenzisa abantu abangamlotjhiko bona babasize. Ngokwesibonelo, wenza iKosi u-Aritarhitjhasta yavuma isibawo sakaNerhemiya sokubuyela eJerusalema ayokusiza ngokuvuselela idorobho. (Nerh. 2:3-6) Nanamhlanjesi uJehova angasebenzisa abantu abangamlotjhiko bona basisize nasitlhoga isizo.

14. Lokho okwenzakalela u-Soo Hing kukukhuthaze njani? (Qala nesithombe.)

¹⁴ Udade u-Soo Hing wabona ngasuthi uJehova wamsiza asebenzisa udorhoderakhe. Indodanakhe inemiraro eminengi yokugula komkhumbulo. Indodanakhe yabandakanyeka engozini embi khulu, nje-ke yena nendodakwakhe balisa ukusebenza bona bazokukghona ukuyitlhogomela. Ngebanga lalokho baba nemiraro yezeemali. U-Soo Hing uthi wazizwa ngasuthi angekhe asakghona ukukghodlhelelela ukugandeleleka aqalene nakho. Wathululela uJehova indlela azizwa ngayo, ambawa bona amsize. Udorhodere ebebaya kuye waqunta ukufumana indlela angamsiza ngayo yena nomndenakhe. Bakghona ukufumana isibonelelo sakarhulumende, bafumana nendawo engabizi khulu. Ngemva kwalokho, u-Soo Hing wathi: “Sabona isandla sakaJehova endabeni le. Nangambala ‘umuMuzwi wemithandazo.’”—Rhu. 65:2.

15. Khuyini eyasiza omunye udade walemuka ukuthi uJehova bekayiphendula imithandazwakhe?

¹⁵ Esikhathini esinengi imithandazwethu ayiphenduleki ngokusimangaliso. Kodwana iimpendulo esizifumanako zingilokho esikutlhogako bona sihlale sithembekile kuBabethu wezulwini. Yeke tjhejisisa indlela uJehova aphendula ngayo imithandazwakho. Udade u-Yoko wazizwa ngasuthi uJehova akayiphenduli imithandazwakhe kodwana wathoma ukuzibhala phasi izinto azibawa kuJehova. Ngemva kwesikhathi waqala incwadakhe walemuka ukuthi uJehova uphendule imithandazwakhe eminengi neminye esele alibele ngayo. Ngaso soke isikhathi kuhle ukuthi sijame kancani siqale indlela uJehova aphendula ngayo imithandazwethu.—Rhu. 66:19, 20.

16. Singakutjengisa njani ukukholwa malungana nemithandazwethu? (Hebheru 11:6)

¹⁶ Sitjengisa ukukholwa ingasi ngokuthandaza kwaphela kodwana nangokwamukela indlela uJehova aphendula ngayo imithandazwethu  kunganandaba ukuthi uyiphendula njani. (Funda amaHebheru 11:6.) Cabanga ngesibonelo saka-Mike nomkakhe u-Chrissy. Bebazibekele umnqopho wokuya e-Bethel. U-Mike uthi, “Safaka isibawo njengabatjhadikazi iinkhathi ezinengi sabesathandaza kanengi ngomnqopho lo kodwana akhenge basibize.” U-Mike no-Chrissy bahlala baqiniseka ukuthi uJehova nguye owaziko ukuthi uzobasebenzisa njani ngokuphumelelako emsebenzinakhe. Baragela phambili benza koke abangakghona ukukwenza, bamaphayona wesikhathi esizeleko endaweni la kunetlhogeko yabarhuweleli khona begodu basekela nemsebenzini wokwakha. Namhlanjesi benza umsebenzi wokuvakatjhela amabandla. U-Mike uthi, “UJehova bekangahlali aphendula imithandazwethu ngendlela esilindele ngayo kodwana wayiphendula ngendlela engcono khulu kunale ebesingayicabanga.”

17-18. NgokweRhubo 86:6, 7, khuyini esingaqiniseka ngayo?

¹⁷ Funda iRhubo 86:6, 7. Umrhubi uDavida waqiniseka ukuthi uJehova bekayizwa bekayiphendule imithandazwakhe. Nawe ungaqiniseka ngalokho. Iimbonelo esicoce ngazo esihlokwenesi zingasiqinisekisa ukuthi uJehova angasinikela ukuhlakanipha namandla bona sikghodlhelele. Angasebenzisa abafowethu nabodadwethu namkha abantu abangamlotjhiko ukuthi basisize.

¹⁸ Njengombana singekhe sahlala silindele ukuthi uJehova aphendule imithandazwethu ngendlela esilindele ngayo, siyazi ukuthi uzoyiphendula. Uzosinikela lokho esikutlhogako ngesikhathi esikutlhoga ngaso. Yeke ragela phambili uthandaza ngokukholwa, uqiniseka ukuthi uJehova uzokutlhogomela nje nokuthi ‘uzokwanelisa isifiso sakho koke okuphilako’ ephasini elitjha elizako.—Rhu. 145:16.