1. IBhayibheli lilihlathulula njani ithando lamambala?

 ‘AMALANGABI wethando amlilo ovuthako, ilangabi lakaJah. Amanzi amanengi angeze akghone ukulicima namkha imilanjana angeze ikghone ukulikhukhula.’ b (Ngom. 8:6, 7) Qala bona ithando lihlathululwa kuhle kangangani! Amezwi la asikhuthazo ebantwini abatjhadileko: Ningathandana kwamambala.

2. Khuyini abatjhadikazi ekufuze bayenze ukuqinisekisa ukuthi ithando labo alipholi?

² Abantu abatjhadileko kufuze benze umzamo nabazakuhlala bathandana ukuphila kwabo koke. Ukufanekisa, umlilo ungaragela phambili uvutha nange kunomuntu owukhwezelako. Nange kunganamuntu owukhwezelako ungacima. Ngokufanako, ithando elihlangana nendoda nomfazi lingahlala liqinile nange bahlala baqinisa ubuhlobo babo. Ngezinye iinkhathi abatjhadikazi bangabona ngasuthi ithando labo liyaphola khulukhulu lokha nabaqalene neentjhijilo zeemali, ukugula namkha ukugandeleleka kokukhulisa abantwana. Nange utjhadile ungaragela phambili njani wenza ‘ilangabi lakaJah’ lihlale livutha emtjhadwenakho? Esihlokwenesi, sizokucoca ngeendlela ezintathu zokwenza umtjhadwakho uhlale uqinile begodu uwuthabele. c

3. Ubuhlobo obuqinileko noJehova bubasiza njani abatjhadileko benze ithando labo lihlale livutha? (UMtjhumayeli 4:12) (Qala nesithombe.)

³ Bona benze ‘ilangabi lakaJah’ liragele phambili livutha, bobabili indoda nomkayo kufuze basebenzele ukuba nobuhlobo obuqinileko noJehova. Ubuhlobo obuqinileko noJehova buwusiza njani umtjhadwabo? Abatjhadikazi nababuqala njengobuligugu ubuhlobo babo noBababo wezulwini, bahlala bakulungele ukusebenzisa iseluleko sakhe esizobasiza babalekele namkha bahlule imiraro engabangela ithando labo liphole. (Funda uMtjhumayeli 4:12.) Abantu abanobuhlobo obuqinileko noJehova benza koke okusemandlenabo ukulingisa ubuntu bakhe obunjengomusa, ukubekezela, nokulibalela. (Efe. 4:32–5:1) Abatjhadikazi nabatjengisa ubuntobu kuzokuba bulula ukuthi ithando labo likhule. Udade u-Lena, osele atjhade iminyaka engaphezu kwema-25 uthi, “Kulula ukuthanda nokuhlonipha umuntu onobuhlobo obuqinileko noJehova.”

4. Kubayini uJehova akhetha uMariya noJosefa bona babe babelethi bakaMesiya ozako?

⁴ Cabanga ngesibonelo esiseBhayibhelini. UJehova nakakhetha abatjhadikazi bona babe babelethi bakaMesiya ozako, wakhetha uMariya noJosefa hlangana neenzukulwana ezinengi zakaDavida. Kubayini? Bobabili bebanobuhlobo obuqinileko noJehova begodu uJehova bekazi ukuthi bazombeka qangi emtjhadwenabo. Bantu abatjhadileko, khuyini eningayifunda kuJosefa nakuMariya?

5. Khuyini amadoda angayifunda kuJosefa?

⁵ UJosefa wasisebenzisa isinqophiso sakaJehova begodu lokho kwamenza waba yindoda engcono. Ezenzakalweni ezintathu, wafumana iinqophiso ezivela kuZimu malungana nomndenakhe. Esenzakalweni ngasinye, walalela msinyana ngitjho nanyana bekubudisi. (Mat. 1:20, 24; 2:13-15, 19-21) Ngokulandela isinqophiso sakaZimu, uJosefa wavikela uMariya, wamsekela bewamtlhogomela. Cabanga ngalokho uJosefa akwenzako ukuthi kwenza uMariya wamthanda bewamhlonipha kangangani. Madoda, ningalingisa isibonelo sakaJehova ngokufuna iinluleko ezisekelwe eBhayibhelini malungana nokutlhogomela imindenenu. d Nawusebenzisa iselulekwesi, ngitjho nanyana kutjho ukwenza amatjhuguluko, utjengisa bona uyamthanda umkakho begodu uqinisa umtjhadwakho. Udade we-Vanuatu, osele atjhade iminyaka engaphezu kwema-20, uthi, “Indodami nayifuna beyisebenzise isinqophiso sakaJehova, ngiyihlonipha khulu. Ngizizwa ngivikelekile begodu ngiyazithemba iinqunto zayo.”

6. Khuyini abafazi abangayifunda kuMariya?

 ⁶ UMariya bekanobuhlobo obuqinileko noJehova, ukukholwa kwakhe akhenge kudzimelele kilokho uJosefa akwenzako. Bekayazi kuhle imiTlolo. (Luk. 1:46) Bekaqinisekisa ukuthi uzipha isikhathi sokucabangisisa. (Luk. 2:19, 51) Singaqiniseka ukuthi ubuhlobo uMariya ebekanabo noJehova bamenza waba mfazi ophuma phambili. Namhlanjesi, abafazi abanengi balwela ukwenza njengombana kwenza uMariya. Ngokwesibonelo, udadwethu u-Emiko uthi, “Lokha ngingakatjhadi, benginehlelo lami lokufunda. Ngemva kokutjhada ngalemuka ukuthi ngebanga lokuthi indodami iyasithandazela begodu idosa phambili ekulotjheni, ukukholwa kwami kwadzimelela kilokho ebekakwenza. Ngabona ukuthi kutlhogeka bona ngiqinise ubuhlobo bami noJehova. Nje ngizipha isikhathi sokuba ngedwa noZimami, ngithandaze, ngifunde imiTlolo bengicabangisise kuhle ngayo.” (Gal. 6:5) Bafazi, njengombana niragela phambili niqinisa ubuhlobo benu noJehova, amadodenu azokuba namabanga amanengi wokunidumisa bekanithande.—IzA. 31:30.

7. Khuyini abatjhadikazi abangayifunda kuJosefa noMariya ngokulotjha ndawonye?

⁷ UJosefa noMariya basebenza ndawonye bona benze ubuhlobo babo noJehova buhlale buqinile. Bayakuzwisisa ukuqakatheka kokulotjha ndawonye uJehova njengomndeni. (Luk. 2:22-24, 41; 4:16) Kungenzeka bekubudisi ukwenza njalo khulukhulu njengombana umndenabo bewukhula kodwana bakghona ukukwenza. Sibonelo esihle kwamambala lesi ebatjhadikazini banamhlanjesi. Nange ninabantwana njengoJosefa noMariya, kungaba budisi ukuya esifundweni namkha ukuhlela isikhathi sokulotjha komndeni. Kungaba budisi ngitjho nokufumana isikhathi sokufunda nokuthandaza ndawonye njengabatjhadikazi. Nanyana kunjalo, khumbulani ukuthi nanilotjha uJehova ndawonye, nitjhidela kuye nani niyatjhidelana. Nje-ke ukulotjha akuze qangi.

8. Khuyini abatjhadikazi abanemiraro emtjhadwenabo abangayenza bona bazuze lokha nabenza ukulotjha komndeni?

⁸ Kuthiwani ke nangabe umtjhadwakho unemiraro? Indaba yokuba ndawonye bona nenze ukulotjha komndeni ndawonye ingabonakala ingathabisi. Nange kunjalo, thoma ngokucabangela izinto ezifitjhani ezithabisako, izinto nobabili enivumelana ngazo ukuthi nicoce ngazo. Lokhu kunganisiza nithandane khulu benifune ukulotjha ndawonye.

9. Kubayini indoda nomfazi kufuze baziphe isikhathi sokuba ndawonye?

⁹ Batjhadikazi, ningenza ithando lenu lihlale livutha ngokuzipha isikhathi sokuba ndawonye. Nanenza njalo, lokho kuzonisiza nihlale nitjhejile ukuthi otjhade naye ucabangani bewuzizwa njani. (Gen. 2:24) U-Lilia no-Ruslan esele baneminyaka engaphezu kweli-15 batjhadile, tjheja lokho abakulemukako msinyana ngemva kokobana batjhadile. Uthi, “Salemuka ukuthi ngeze sibe nesikhathi esinengi ndawonye njengombana besicabanga. Besimajadu khulu ngomsebenzi wokuziphilisa, umsebenzi wekhaya nangabantwana. Safumana ukuthi ngathana besingasenzi isikhathi sokuba ndawonye njengabatjhadikazi bengekhe sitjhidelane.”

10. Abantu abatjhadileko bangayisebenzisa njani ikambisolawulo efumaneka kwebe-Efesu 5:15, 16?

¹⁰ Khuyini abatjhadikazi abangayenza ukuqinisekisa ukuthi baba nesikhathi sokuba ndawonye? Kufuze bazibekele isikhathi sokuba ndawonye. (Funda kwebe-Efesu 5:15,  16.) Umfowethu u-Uzondu we-Nigeria uthi: “Nangenza ihlelo lokwenza izinto, ngifaka nesikhathi sokuba nomkami begodu isikhatheso siza qangi.” (Flp. 1:10) Cabanga ngendlela u-Anastasia umfazi wombonisi wesigodi e-Moldova, asisebenzisa kuhle ngaso isikhathi sakhe. Uthi: “Ngilinga ukwenza izinto engitlhoga ukuzenza lokha indodami nayimajadu ngeminye imisebenzi. Lokho kuzosenza sibe nesikhathi ndawonye nasele siqedile ngemisebenzethu.” Kuthiwani ke nange ihlelo lakho lenza kube budisi bona nifumane isikhathi sokuba ndawonye?

11. Khuyini u-Akhwila noPeresila ebebayenza ndawonye?

¹¹ Abantu abatjhadileko bangafunda esibonelweni saka-Akhwila noPeresila, ebekubatjhadikazi ebebathandwa khulu maKrestu waphambilini. (Rom. 16:3, 4) Nanyana iBhayibheli linganikeli imininingwana eminengi ngomtjhadwabo, liveza ukuthi bebasebenza, batjhumayela basiza nabanye ndawonye. (IzE. 18:2, 3, 24-26) Nanyana kunini lapho iBhayibheli likhuluma ngo-Akhwila noPeresila, lihlala libabala ndawonye.

12. Khuyini indoda nomfazi abangayenza ukuthi babe nesikhathi ndawonye? (Qala nesithombe.)

¹² Abatjhadikazi bangabalingisa njani u-Akhwila noPeresila? Cabanga ngezinto ezinengi ekufuze wena nomuntu otjhade naye nizenze. Ningakghona na ukwenza imisebenzi le njengabatjhadikazi kunokobana niyenze ngamunye ngamunye? Ngokwesibonelo u-Akhwila noPeresila bebatjhumayela ndawonye. Inga-kghani niyahlela qobe ukwenza okufanako? U-Akhwila noPeresila bebasebenza ndawonye. Kungenzeka wena notjhade naye anenzi umsebenzi ofanako kodwana ningakghona na ukwenza umsebenzi wekhaya ndawonye? (UMtj. 4:9) Nanisizanako niba njengesiqhema begodu niba namathuba amanengi wokukhuluma. U-Robert no-Linda sele batjhade iminyaka engaphezu kwama-50. Uthi: “Ukukhuluma iqiniso, asinaso isikhathi sokuzithabisa ndawonye. Kodwana nangihlanza izitja bese umkami azisule namkha nangisebenza ngaphandle emasimini yena eze azokusebenza eduze nami kuyangithabisa. Ukwenza izinto ndawonye kusenza sitjhidelane. Ithando lethu liragela phambili likhula.”

13. Bona indoda nomfazi babumbane khuyini ekufuze bayenze?

¹³ Khumbula ukuthi ukuba ndawonye, akutjho ukuthi ngaso soke isikhathi indoda nomfazi bazokutjhidelana. Omunye umfazi we-Brazil uthi: “Namhlanjesi ukuphila kwethu kumajadu khulu, kulula ukucabanga ukuthi siba nesikhathi ndawonye ngombana sihlala ngendlini yinye. Ngifunde ukuthi ukuba ndawonye akukaneli. Ngitlhoga nokumnaka.” Tjheja indlela u-Bruno nomkakhe u-Tays ebebaqinisekisa ngayo ukuthi bayanakana. Uthi: “Nasindawonye siziphumulele, sibekela amafowuni wethu eqadi sithabele ukuba ndawonye.”

14. Nange abatjhadikazi bangakuthabeli ukuba ndawonye, khuyini abangayenza?

 ¹⁴ Kuthiwani-ke nangabe wena nomlinganakho anikuthabeli ukuba ndawonye? Kungenzeka nithanda izinto ezingafaniko namkha niyasilingana. Khuyini eningayenza? Cabanga ngomlilo ekukhulunywe ngawo ekuthomeni. Umlilo awubi mkhulu nawuthomako. Kufuze unande ufaka iinkuni ezikulu kancanikancani. Ngendlela efanako, kubayini ningathomi ngokuba nesikhathi ndawonye kancanikancani qobe langa? Qinisekani ukuthi nenza into eniyithabelako nobabili ingasi into ezokubanga ukulwa. (Jak. 3:18) Ngokuthoma kancanikancani nizokuthoma ukubona ithando lenu likhula godu.

15. Kubayini ihlonipho iqakathekile ekwenzeni ithando labatjhadikazi lingapholi?

¹⁵ Ihlonipho iqakathekile emtjhadweni. Injengomoya ohlwengileko owenza umlilo uvuthe. Ngaphandle komoya lo umlilo ucima msinya. Ngendlela efanako, ngaphandle kwehlonipho, ithando labatjhadikazi lizokuphola. Ngakelinye ihlangothi, indoda nomkayo abahloniphanako balwela ukwenza ithando labo lingapholi. Khumbula ukuthi akunandaba ukuthi wena ucabanga ukuthi uyahlonipha kodwana okuqakathekileko kukuthi umuntu otjhade naye uzizwa ahlonitjhwa na. U-Penny no-Aret sebatjhade iminyaka engaphezu kwema-25. Uthi: “Ngebanga lokuthi siyahloniphana umuzethu uyindawo ezele ithando. Sizizwa sitjhaphulukile ukuveza imibonwethu ngombana siyazi ukuthi umbono womunye nomunye uqakathekile.” Yeke khuyini ongayenza ukusiza umuntu otjhade naye azizwe ahlonitjhwa? Cabanga ngesibonelo saka-Abrahama noSara.

16. Khuyini amadoda angayifunda esibonelweni saka-Abrahama? (1 Pitrosi 3:7) (Qala nesithombe.)

¹⁶ U-Abrahama bekahlonipha uSara. Bekayilalela imibono kaSara begodu ahlonipha nendlela ebekazizwa ngayo. Kwesinye isenzakalo uSara bekagandelelekile, waveza indlela azizwa ngayo bewasola no-Abrahama. Kghani u-Abrahama waphendula ngokusilingeka? Awa. Bekazi ukuthi uSara mfazi ohloniphako nomsekelako. U-Abrahama wamlalela wabe walinga nokulungisa umraro. (Gen. 16:5, 6) Khuyini esingayifunda? Madoda, ninelungelo lokwenzela umndenenu iinqunto. (1 Kor. 11:3) Into ehle eningayenza kucabangela imibono yabafazi benu ngaphambi kokobana nithathe iinqunto khulukhulu nange zizobathinta. (1 Kor. 13:4, 5) Ngezinye iinkhathi umkakho angazizwa agandelelekile atlhoge ukuveza indlela azizwa ngayo. Uyayihlonipha na indlela azizwa ngayo ngokumlalelisisa? (Funda yoku-1 kaPitrosi 3:7.) U-Angela no-Dmitry sele batjhade iminyaka epheze ibe ma-30. Uhlathulula indlela ubabakwakhe amenza azizwe ahlonipheke  ngayo uthi, “U-Dmitry uhlala akulungele ukungilalela lokha nangisilingekileko namkha ngifuna ukukhuluma kwaphela. Uyangibekezelela ngitjho nalokha ngingakghoni ukuveza indlela engizizwa ngayo ngommoya ophasi.”

17. Khuyini abafazi abangayifunda esibonelweni sakaSara? (1 Pitrosi 3:5, 6)

¹⁷ USara wasekela u-Abrahama ngokusekela iinqunto zakhe. (Gen. 12:5) Kwesinye isenzakalo, u-Abrahama waqunta ukuba nomusa emvakatjhini ebebangakazilindeli. Wabawa uSara ukuthi alise koke akwenzako alungiselele uburotho obunengi. (Gen. 18:6) USara wenza lokho u-Abrahama ambawa ukuthi akwenze. Bafazi, ningalingisa uSara ngokusekela iinqunto zamadodenu. Nanenza njalo niqinisa imitjhadwenu. (Funda yoku-1 kaPitrosi 3:5, 6.) U-Dmitry ekukhulunywe ngaye esigabeni esidlulileko, uhlathulula indlela umkakhe amenza azizwe ahlonipheke ngayo. Uthi: “Ngiyithokoza khulu imizamo ka-Angela yokusekela iinqunto zami, ngitjho nanyana imibonwethu ingavumelani. Nange isinqunto engisithetheko singaphumeleli akangikhombi ngomuno.” Kubulula khulu ukuthanda umuntu okuhloniphako.

18. Abatjhadikazi bangazuza njani ngokulwela ukuthi ithando labo lingapheli?

¹⁸ Namhlanjesi, uSathana ufuna ukuphelisa yoke imitjhado yamaKrestu. Uyazi ukuthi nange abatjhadikazi bangasathandani bangathoma ukutjhidela kude noJehova. Nanyana kunjalo, ithando lamambala angeze laqedwa! Nje-ke kwanga ithando elikhona emtjhadwenenu lingaba njengethando elihlathululwa encwadini yeeNgoma zakaSolomoni. Zimiseleni ukubeka uJehova qangi emtjhadwenenu, niziphe isikhathi sokuba ndawonye nihloniphe amazizo neentlhogo zomunye. Nanenza njalo umtjhadwenu uzokudumisa uJehova uMthombo wethando lamambala begodu njengomlilo otjhejwako ithando lenu lizokuvutha ngokungapheliko.