1. Khuyini uJehova ayibawa abantu abamlotjhako ukuthi bayenze? (Qala isithombe.)

 NGUBANI esingambawa lokha nasitlhoga ukududuzwa nesinqophiso? Siyayazi ipendulo yombuzo loyo. Singathandaza kuJehova uZimu. UJehova usibawa bona senze njalo. UJehova ufuna ‘sithandaze qobe.’ (1 Thes. 5:17) Singathandaza ngokunqophileko simbawe isinqophiso sakhe kizo zoke iingcenye zokuphila kwethu. (IzA. 3:5, 6) Njengombana anguZimu onomusa, akasimedeli ukuthi kufuze sithandaze kangakhi.

2. Sizokucoca ngani esihlokwenesi?

² Siyamthokoza uJehova ngombana uyasivumela ukuthi sithandaze kuye. Ngebanga lokuthi kunezinto ezinengi ekufuze sizenze singakufumana kubudisi ukwenza isikhathi sokuthandaza. Singakubona kutlhogeka ukuthuthukisa indlela esithandaza ngayo. Sithokoza khulu ngombana sikghona ukufumana iinkhuthazo neenqophiso emiTlolweni. Esihlokwenesi, sizokucoca ngokuthi khuyini esiyifundako kuJesu ngokuthi singasibekela njani eqadi isikhathi sokuthandaza. Sizokucoca nangokuthi singayithuthukisa njani imithandazwethu ngokuhlolisisa izinto ezihlanu eziqakathekileko esingazifaka emithandazwenethu.

3. Khuyini uJesu ebekayazi ngomthandazo?

³ UJesu bekazi ukuthi imithandazwethu iqakatheke khulu  kuJehova. Kade ngaphambi kokobana eze ephasini, wabona uBabakhe aphendula imithandazo yamadoda nabafazi abathembekileko. Ngokwesibonelo, lokha uJesu nakaseduze noYise wambona aphendula imithandazo kaHana, uDavida, u-Eliya nabanye abanengi abathembekileko. (1 Sam. 1:10, 11, 20; 1 Kho. 19:4-6; Rhu. 32:5) Kungebangelo uJesu afundisa abafundi bakhe ukuthandaza qobe nangokuqiniseka.—Mat. 7:7-11.

4. Khuyini esiyifunda emithandazweni kaJesu?

⁴ Ngendlela uJesu ebekathandaza ngayo kuJehova wabekela abalandeli bakhe isibonelo. Lokha nakenza umsebenzakhe uJesu bekathandaza qobe. Bekufuze azibekele isikhathi sokuthandaza ngombana bekahlala amajadu begodu anabantu abanengi. (Mar. 6:31, 45, 46) Bekavuka ekuseni ukwenzela bona abenesikhathi sokuthandaza ayedwa. (Mar. 1:35) Kwesinye isenzakalo, wathandaza ubusuku boke ngaphambi kokuthi enze isiqunto esiqakathekileko. (Luk. 6:12, 13) UJesu wathandaza ngokubuyelelweko ngaphambi kokuhlongakala kwakhe adzimelele ekuqedeni isabelo sakhe esibudisi sephasini.—Mat. 26:39, 42, 44.

5. Singamlingisa njani uJesu lokha nasithandazako?

⁵ Isibonelo sakaJesu sisifundisa ukuthi nanyana singaba majadu kangangani kufuze sizibekele isikhathi sokuthandaza. NjengoJesu, singazibekela isikhathi sokuthandaza, kungaba sekuseni namkha ebusuku. Ngokwenza njalo, sitjengisa ukuthi simthokoza khulu uJehova ngesipho esiligugu. Udade u-Lynne ukhumbula indlela athokoza ngayo nakathoma ukufunda ngelungelo lokuthandaza. Uthi, “Nangifunda ukuthi ngingakhuluma noJehova nanyana kunini kwangisiza ngambona njengomngani engitjhidelene naye, ngafuna ukuthuthukisa indlela engithandaza ngayo.” Akunakuzaza ukuthi inengi lethu lizizwa njalo. Akhesicoce ngezinto ezihlanu eziqakathekileko esingazifaka emithandazwenethu.

6. NgokwesAmbulo 4:10, 11, khuyini uJehova afanelekela ukuyamukela?

⁶ Dumisa uJehova. Embonweni osabekako, umpostoli uJwanisi wabona abadala abama-24 ezulwini balotjha uJehova. Badumisa uZimu, bathi ufanele ukwamukela  “iphazimulo idumo namandla.” (Funda isAmbulo 4:10, 11.) Iingilozi ezithembekileko nazo zinamabanga amanengi wokudumisa uJehova. ZinoZimu ezulwini begodu sele zimazi kuhle. Zibona ubuntu bakhe ezintweni azenzako. Njengombana zibona indlela uJehova enza ngayo izinto, ziyamdumisa.—Job. 38:4-7.

7. Singamdumisa ngani uJehova?

⁷ Nathi sifuna ukudumisa uJehova emithandazwenethu ngokuveza indlela esimthanda nesimthokoza ngayo. Njengombana ufundisisa iBhayibheli linga ukubona ubuntu bakaJehova obuthandako. (Job. 37:23; Rom. 11:33) Ngemva kwalokho, tjela uJehova ngendlela ozizwa ngayo ngobuntobo. Singadumisa uJehova ngombana uyasisiza begodu usiza nabo boke abafowethu nabodadwethu abamaKrestu. Uhlala asitlhogomela bekasivikele.—1 Sam. 1:27; 2:1, 2.

8. Ngimaphi amanye amabanga esinawo wokuthokoza uJehova? (1 Thesalonika 5:18)

⁸ Thokoza uJehova. Sinamabanga amanengi wokuthokoza uJehova ngomthandazo. (Funda yoku-1 kwebeThesalonika 5:18.) Singamthokoza ngananyana yini into ehle esinayo ngombana zoke izipho ezihle zivela kuye. (Jak. 1:17) Ngokwesibonelo, singamthokoza ngephasi lethu elihle nangezinto ezihle azibumbileko. Singamthokoza ngokuphila kwethu, ngomndenethu, abangani nethemba lethu. Sifuna nokuthokoza uJehova ngokusivumela ukuthi sibe nobungani obuligugu naye.

9. Kubayini kufuze sitjengise ukuthokoza uJehova?

⁹ Kungatlhogeka ukuthi senze umzamo okhethekileko nasizakucabanga ngamabanga asenza sithokoze uJehova. Siphila ephasini elingathokoziko. Esikhathini esinengi abantu badzimelele ezintweni abazifunako kunezinto abangazenza ukutjengisa ukuthi bayathokoza ngezinto abanazo. Nange sithoma ukulingisa umukghwa loyo umthandazwethu uzokuba lirhelo lezinto esizibawako kwaphela. Bona sibalekele umukghwa loyo kufuze siragele phambili sithokoze uJehova ngazo zoke izinto asenzela zona.—Luk. 6:45.

10. Ukuthokoza kwamsiza njani omunye udade wakghona ukukghodlhelela? (Qala isithombe.)

¹⁰ Umukghwa wokuthokoza ungasisiza sikghodlhelele ubudisi. Cabanga ngesibonelo saka-Kyung-sook esifumaneka esiThaleni sakaJanabari 15, 2015. Kwafumaniseka ukuthi unekankere yamaphaphu. Uthi, “Ubujamo bepilobu benza ukuphila kwami kwaba budisi. Ngazizwa ngasuthi ngilahlekelwe ngikho koke begodu bengithukwe khulu.” Yini eyamsiza wakghodlhelela? Uthi qobe ebusuku ngaphambi kokuthi ayokulala bekaya phezulu ephahleni lendlwakhe athandazele phezulu ngezinto ezihlanu ebekathokoza ngazo ngelangelo. Lokho kwamenza wangasatshwenyeka khulu begodu watjengisa indlela athanda ngayo uJehova. Wabona indlela uJehova asiza ngayo abantu bakhe  lokha nabaqalene nemiraro ebudisi begodu wazwisisa ukuthi kuneembusiso ezinengi ekuphileni kwethu ukudlula iintjhijilo esiqalana nazo. Njengo-Kyung-sook sinamabanga amanengi wokuthokoza uJehova nanyana siqalana nemiraro. Ukuveza indlela esimthokoza ngayo emithandazwenethu, kungasisiza sikghodlhelele besihlale sithabile.

11. Kubayini abafundi bakaJesu bebatlhoga isibindi ngemva kokuthi uJesu abuyele ezulwini?

¹¹ Bawa uJehova akuphe isibindi nawutjhumayelako. Ngaphambi kokobana abuyele ezulwini, uJesu wakhumbuza abafundi bakhe ngesabelo sabo sokunikela ubufakazi ngaye “eJerusalema, kiyo yoke iJudiya neSamariya, neendaweni ezikude khulu zephasi.” (IzE. 1:8; Luk. 24:46-48) Ngemva kwesikhatjhana, abadosiphambili bamaJuda babamba umpostoli uPitrosi noJwanisi babaletha ngaphambi kweSanhedrini bayala amadoda athembekileko la bona alise ukutjhumayela, bebawathusela. (IzE. 4:18, 21) UPitrosi noJwanisi basabela njani?

12. NgokwezEnzo 4:29, 31, khuyini abafundi bakaJesu abayenzako?

¹² Ekusabeleni ekuthuselweni badosiphambili bamaJuda, uPitrosi noJwanisi bathi: “Ukuthi kulungile emehlweni kaZimu bona silalele nina kunoZimu, yahlulelani ngokwenu. Kodwana thina, angekhe silise ukukhuluma ngezinto esizibonileko nesizizwileko.” (IzE. 4:19, 20) Lokha uPitrosi noJwanisi nabatjhatjhululwako, abafundi baphakamisa amaphimbwabo bathandaza kuJehova malungana nokwenza intandwakhe. Bathandaza bathi, “Sibawa utjheje ukuthusela kwabo, usize neenceku zakho bona ziragele phambili zikhuluma ilizwi lakho ngesikhulu isibindi.” UJehova wawuphendula umthandazo loyo.—Funda izEnzo 4:29, 31.

13. Khuyini esingayifunda esibonelweni saka-Jin-hyuk?

¹³ Singalingisa abafundi bakaJesu ngokuragela phambili sitjhumayela ngitjho nanyana urhulumende athi silise. Cabanga ngesibonelo saka-Jin-hyuk, umfowethu owabotjhelwa ukungathathi ihlangothi. Ejele, bekabelwe ukutlhogomela ezinye iimbotjhwa ezibotjhwe zizodwa, bekavunyelwe ukukhuluma nazo ngezinto ezizitlhogako kwaphela ingasi okhunye, bekangakavunyelwa ukukhuluma nazo ngeBhayibheli. Wathandazela isibindi nokuthi atjhumayele nakuvela ithuba. (IzE. 5:29) Uthi, “UJehova waphendula umthandazwami ngokunginikela isibindi nokuhlakanipha sokuthoma iimfundo zeBhayibheli ezinengi zemizuzu emihlanu eminyango yejele. Ebusuku bengitlola iincwadi bese ngelanga elilandelako ngizinikele abantu engibotjhwe nabo.” Nathi siqiniseka ukuthi uJehova uzosisiza sikghone ukwenza umsebenzethu. Njengo-Jin-hyuk singathandazela isibindi nokuhlakanipha.

14. Khuyini engasisiza lokha nasiqalene nemiraro? (IRhubo 37:3, 5)

¹⁴ Bawa uJehova akusize ukghodlhelele nanyana uqalene nemiraro. Inengi lethu liqalene nokugula, imiraro engokwamazizo, ukuhlongakalelwa babantu esibathandako, imiraro yemindeni, ukuhlunguphazwa neminye imiraro. Isindabelaphi nezipi zenze kwababudisi khulu ukuqalana nemiraro le. Tjela uJehova ngendlela ozizwa ngayo. Mtjele ngobujamo bakho njengalokha ukhuluma nomngani otjhidelene naye. Qiniseka ukuthi uJehova “uzokuthatha igadango.”—Funda iRhubo 37:3, 5.

15. Umthandazo ungasisiza njani ‘nasingaphasi kwesizi’? Nikela isibonelo.

¹⁵ Ukuphikelela emthandazweni kuzosisiza ‘sikghodlhelele ngaphasi kwesizi.’ (Rom.  12:12) UJehova uyabazi ubudisi abantu bakhe abaqalana nabo “uyabezwa nabalilela isizo.” (Rhu. 145:18, 19) U-Kristie oneminyaka ema-29, oliphayona wakubona lokho. Kungakalindeleki wathoma ukuba nemiraro yepilo. Ngebanga lalokho, wagandeleleka khulu. Ekukhambeni kwesikhathi, wafumana ukuthi ummakhe unokugula okuzombulala. U-Kristie uthi, “Ngathandaza khulu kuJehova ngimbawa bona angiphe amandla engiwatlhogako qobe langa. Akhenge ngilise ukuya qobe esifundweni nokwenza isifundo somuntu mathupha.” Ungezelela uthi: “Ukuthandaza kwangisiza ngakghona ukukghodlhelela iinkhathi ezibudisi. Ngazi ukuthi uJehova uhlala akhona lokho kwangisiza ngazizwa ngcono. Nanyana ubujamo bami bepilo bungakhenge bulunge ngesikhatheso, uJehova waphendula imithandazwami ngokuthi anginikele ukuthula kwangaphakathi begodu ngikghone ukwehlisa ummoya.” Asingalibali ukuthi, “UJehova uyakwazi ukubahlangula esilingweni abantu abathembekileko.”—2 Pit. 2:9.

16. Kubayini sitlhoga isizo lakaJehova nasizakulwisana nesilingo?

¹⁶ Bawa uJehova akusize uhlule isilingo. Njengabantu abanesono, sihlale silwisana nesilingo sokwenza okumbi. USathana uhlale enza kube budisi ukulwisana nesilingwesi. Enye indlela alinga ukuthi sisilaphaze indlela esicabanga ngayo, kuzithabisa okungakahlwengeki. Ukuzithabisa okunjalo kungazalisa imikhumbulwethu ngemicabango engakahlwengeki engasenza singahlwengeki kuJehova besenze nesono esikhulu.—Mar. 7:21-23; Jak. 1:14, 15.

17. Ngemva kokuthandazela isizo lakaJehova khuyini esingayenza ukubalekela isilingo? (Qala nesithombe.)

¹⁷ Sitlhoga isizo lakaJehova nasizakuhlula isilingo sokwenza okumbi. UJesu wafaka isibawo esilandelako emthandazweni osibonelo, othi: “Ungasingenisi esilingweni kodwana usitjhaphulule komumbi.” (Mat. 6: 13)  UJehova uyafuna ukusisiza kodwana kufuze simbawe. Bese senze ngokuvumelana nemithandazwethu. Kufuze silinge ukwenza koke esingakghona ukukwenza ukubalekela ukufunda, ukubukela nokulalela izinto ezingakalungi ezijayeleke ephasini lakaSathana. (Rhu. 97:10) Singazalisa imikhumbulwethu ngokufunda iBhayibheli. Ukuya esifundweni nokutjhumayela lokho kuzokuvikela imicabangwethu. UJehova usithembisa ukuthi angekhe asivumele silingwe ngokungaphezu kwalokho esingakuthwala.—1 Kor. 10:12, 13.

18. Malungana nomthandazo khuyini soke ekufuze siyenze?

¹⁸ Ngamunye wethu kufuze athandaze ukudlula ngaphambilini ukuthi ahlale athembekile kuJehova esikhathini esibudisesi samalanga wamaswaphela. Qobe langa, zibekele isikhathi sokuthandaza ngokudephileko. UJehova ufuna ‘sithululele iinhliziyo zethu kuye.’ (Rhu. 62:8) Dumisa uJehova bewumthokoze ngakho koke akwenzela khona. Mbawe akusize ube nesibindi nawutjhumayelako. Mbawe akusize uqalane nananyana ngimiphi imiraro, uhlule nanyana ngisiphi isilingo okungenzeka uqalene naso. Ungavumeli nanyana yini namkha ngubani akuvimbe bona uthandaze qobe kuJehova. UJehova uyiphendula njani imithandazwethu? Sizokucoca ngombuzo oqakathekileko lo esihlokweni esilandelako.