1. Ngibuphi ubudisi inengi lethu eliqalana nabo?

 KGHANI khewazibekela umnqopho wokuthuthukisa ubuhlobo bakho noJehova kodwana wahluleka ukuwufikelela? b Nangabe kunjalo, awusiwedwa. Ngokwesibonelo, u-Philip bekafuna ukuthuthukisa indlela athandaza ngayo kodwana bekahluleka ukufumana isikhathi sokuthandaza. Umnqopho ka-Erika bekukufika ngesikhathi emhlanganweni wesimu; kodwana bekahlala afika lada kiyo yoke imihlangano. U-Tomáš ulinge kanengi ukufunda iBhayibheli loke. Uthi: “Bengingakuthabeli ukufunda iBhayibheli. Ngilinge amahlandla amathathu kodwana qobe bengifika kuLevitikusi bese ngiyalisa.”

2. Kubayini kungakafuzi sidane nange sizibekele umnqopho wokuthuthukisa ubuhlobo bethu noJehova kodwana singakawufikeleli?

² Nange unomnqopho ozibekele wona nje ongakawufikeleli, qiniseka ukuthi awukahluleki. Ngitjho nokufikelela umnqopho olula kutlhoga isikhathi nokusebenza budisi. Iqiniso lokobana usafuna ukufikelela umnqophwakho litjengisa ukuthi ubuqala njengobuligugu ubuhlobo bakho noJehova begodu ufuna ukumnikela okungcono. UJehova uyiqala njengeqakathekileko imizamwakho. Kuliqiniso ukuthi akakalindeli bona wenze okungaphezu kwalokho ongakghona ukukwenza. (Rhu. 103:14; Mik. 6:8) Nje-ke nawuzibekela umnqopho, yenza umzamo wokuthi uwufikelele. Ngemva kokuzibekela umnqopho, khuyini ongayenza? Akhesicoce ngezinye iindlela ongazisebenzisa.

3. Kubayini ukuba nesifiso esinamandla kuqakathekile?

³ Kuqakatheke khulu ukuba nesifiso esinamandla sokufikelela umnqophwakho. Nawunesifiso esinamandla sokufikelela umnqophwakho, uzokusebenza budisi bona uwufikelele. Isifiso sethu sokufikelela umnqophwethu singafaniswa nomoya osunduza isikepe bona sifike lapho siya khona. Nange umoya uragela phambili ubetha, umtjhayeli wesikepe uzokufika la aya khona. Nakunomoya onamandla angafika msinyana. Ngendlela efanako, nathi nasinesifiso esinamandla sizokukghona ukufikelela iminqophwethu. U-David umfowethu we-El Salvador uthi, “Nawunesifiso esinamandla ulinga ngamandla. Ulinga ngamandla bona ungavumeli litho likukhandele ekufikeleleni umnqophwakho.” Yeke khuyini ongayenza bona ube nesifiso esinamandla?

4. Khuyini esingayithandazela? (Filipi 2:13) (Qala nesithombe.)

⁴ Thandazela ukuba nesifiso esinamandla khulu. UJehova ngommoyakhe angakusiza ukghone ukufikelela umnqophwakho. (Funda kwebeFilipi 2:13.) Ngezinye iinkhathi sizibekela umnqopho ngombana siyazi ukuthi kufuze senze njalo nokuthi yinto ehle ukwenza njalo. Kodwana kungenzeka asinaso isifiso sokuwufikelela umnqopho loyo. Ngilokho okwenzeka ku-Norina udadwethu we-Uganda. Wazibekela umnqopho wokuraga isifundo seBhayibheli, ngitjho nanyana bekanganaso isifiso esinamandla sokwenza lokhu ngombana bekazibona anganalo ikghono lokufundisa. Khuyini eyamsizako? Uthi: “Ngabawa uJehova qobe langa bona angisize ngandise isifiso sami sokuraga isifundo seBhayibheli. Ngokuvumelana nemithandazwami, ngalwela ukuthuthukisa indlela engifundisa ngayo. Ngemva kweenyanga ezimbalwa, ngalemuka ukuthi isifiso sami sikhulile. Ngomnyaka loyo ngathomisa iimfundo zeBhayibheli ezimbili.”

5. Khuyini esingacabangisisa ngayo bona sikhulise isifiso sethu sokufikelela umnqophwethu?

⁵ Cabangisisa ngalokho uJehova akwenzele khona. (Rhu. 143:5) Umpostoli uPowula wacabangisisa ngomusa uJehova amenzele wona begodu lokhu kwamkhuthaza bona asebenzele uJehova budisi. (1 Kor. 15:9, 10; 1 Thim. 1:12-14) Ngokufanako, nawucabangisisa ngalokho uJehova akwenzele khona, uzokuba nesifiso esinamandla sokufikelela umnqophwakho. (Rhu. 116:12) Cabanga ngalokho okwasiza udadwethu we-Honduras bona afikelele umnqophwakhe wokuba liphayona lesikhathi esizeleko. Uthi: “Ngacabangisisa ngendlela uJehova angithanda ngayo. Ungilethe ebantwini bakhe. Uyangitlhogomela bewuyangivikela. Ukucabangisisa ngalokho kwaqinisa indlela engimthanda ngayo, kwakhulisa nesifiso sami.”

6. Khuyini okhunye okungasisiza sikhulise isifiso sethu sokufikelela iminqophwethu?

⁶ Dzimelela eembusisweni zokufikelela umnqophwakho. Tjheja lokho okwasiza u-Erika ekukhulunywe ngaye ekuthomeni, obekanomnqopho wokufika ngesikhathi. Uthi: “Ngalemuka ukuthi kunengi okungilahlekelako nangifika lada esimini. Ngokufika kusesenesikhathi,  bengizokukghona ukulotjhisa abafowethu nabodadwethu bengibe nesikhathi nabo. Bengizokukghona nokulalela iimphakamiso zabo ezilisizo ezizongisiza ngithabele bengithuthukise indlela engitjhumayela ngayo.” U-Erika udzimelele embusisweni zokufika ngesikhathi, wawufikelela umnqophwakhe. Ngiziphi iimbusiso ongadzimelela kizo? Nangabe umnqophwakho kufunda iBhayibheli namkha ukuthandaza, cabanga ngokuthi lokho kuzobuqinisa njani ubuhlobo bakho noJehova. (Rhu. 145:18, 19) Nange umnqophwakho kukuba nobuntu obuthileko bobuKrestu, dzimelela endleleni ubuntobo obuzobuthuthukisa ngayo ubuhlobo bakho nabanye. (Kol. 3:14) Kubayini ungabi nerhelo lamabanga wokobana kubayini ufuna ukufikelela umnqophwakho? Livakatjhele qobe irhelwelo. U-Tomáš ekukhulunywe ngaye ekuthomeni uthi: “Nanginamabanga amanengi wokufikelela umnqophwami, azokuba mancani amathuba wokuthi ngiphelelwe lithemba.

7. Yini eyasiza u-Julio nomkakhe bona bafikelele umnqophwabo?

⁷ Yiba nesikhathi nalabo abazokusiza ufikelele umnqophwakho. (IzA. 13:20) Tjheja lokho okwasiza u-Julio nomkakhe bona bafikelele umnqophwabo wokwandisa umsebenzabo wokutjhumayela. Uthi: “Sakhetha abangani abasekela umnqophwethu begodu besikhuluma nabo ngawo. Abanengi babo besele bawufikelele umnqopho ofana newethu, nje-ke bebakghona ukusinikela iimphakamiso ezilisizo. Abangani bethu bebasibuza ukuthi amahlelwethu akhamba njani bebasikhuthaze nakutlhogekako.”

8. Kungenzekani nange singalwela ukufikelela umnqophwethu kwaphela nasinesifiso? (Qala nesithombe.)

⁸ Soke kunamalanga lapha sizizwa singanasifiso sokwenza okuthileko khona. Kghani lokho kutjho ukuthi angeze sakghona ukusebenzela ukufikelela umnqophwethu? Awa. Ukufanekisa: Umoya ungaba namandla wokusunduza isikepe siye lapha siya khona. Kodwana amandla womoya awafani, ngezinye iinkhathi kungenzeka kungabi nomoya. Kghani lokhu kutjho ukuthi umtjhayeli wesikepe angeze akghona ukukhamba? Awa, akusinjalo. Ngokwesibonelo ezinye iinkepe zinomtjhini onjenge-enjini, ezinye zisebenzisa amaphehlo. Umtjhayeli angasebenzisa zona bona aye phambili bekafike la aya khona. Isifiso sethu singafaniswa nomoya; ngezinye iinkhathi siba namandla ukudlula amanye amalanga. Kwamanye amalanga singazizwa singarhaleli ukulwela ukufikelela umnqophwethu. Nange silwela ukufikelela umnqophwethu lokha nasinesifiso kwaphela, kungenzeka singakghoni ukuwufikelela. Njengombana umuntu otjhayela isikepe afumana ezinye iindlela zokufika lapha aya khona nathi singasebenzela ukufikelela umnqophwethu nanyana ngezinye iinkhathi singanasifiso sokwenza njalo. Kuliqiniso angekhe kube lula, kodwana sizokuthaba nasifikelela umnqophwethu. Ngaphambi kokucoca ngalokho esingakwenza, akhesicoce ngombuzo ongaba khona.

9. Inga-kghani kumbi ukulwela ukufikelela umnqophwakho nawuzizwa ungarhaleli ukwenza njalo? Hlathulula.

 ⁹ UJehova ufuna simlotjhe sithabile nangokuzithandela. (Rhu. 100:2; 2 Kor. 9:7) Inga-kghani kufuze siragele phambili silwela ukuthuthukisa ubuhlobo bethu noZimu ngitjho nanyana singarhaleli? Cabanga ngesibonelo sompostoli uPowula. Wathi: “Ngiyawudula umzimbami ngiwenze isigqila.” (1 Kor. 9:25-27) UPowula wazikatelela bona enze okulungileko nanyana bekangarhaleli. Kghani uJehova wakuthabela akwenzelwa nguPowula? Iye kunjalo! UJehova wambusisa ngemizamwakhe.—2 Thim. 4:7, 8.

10. Khuyini esizoyifumana nasilwela ukufikelela umnqophwethu ngitjho nanyana singarhaleli?

¹⁰ Nathi ngokufanako uJehova uyakuthabela ukusibona silwela ukufikelela umnqophwethu nanyana singanasifiso sokwenza njalo. Kuyamthabisa ngombana uyazi ukuthi nanyana ngezinye iinkhathi singakuthandi esikwenzako, kodwana sikwenza ngombana siyamthanda. Njengombana uJehova abusisa uPowula, nathi uzosibusisa ngemizamwethu. (Rhu. 126:5) Njengombana sifumana iimbusiso zakaJehova, singathoma ukuzizwa sinesifiso. Udadwethu u-Lucyna we-Poland uthi: “Ngezinye iinkhathi angirhaleli ukuya esimini, khulukhulu nangidiniweko. Nanyana kunjalo, nangiyileko ithabo engiba nalo lisisipho esihle khulu.” Yeke akhesibone ukuthi khuyini esingayenza nasinganaso isifiso sokufikelela umnqophwethu.

11. UJehova angasisiza njani sikghone ukuqinisa ukuzibamba kwethu?

¹¹ Thandazela ukuzibamba. Ukuzibamba esikhathini esinengi kungadlulisela umqondo wokuzikhalima ekwenzeni into embi. Nanyana kunjalo, ukuzibamba kuyatlhogeka lokha nasizakwenza into ehle khulukhulu nange kumsebenzi obudisi namkha nasizizwa singarhaleli ukwenza okuthileko. Khumbula ukuzibamba kuyingcenye yeenthelo zommoya, nje-ke bawa ummoya ocwengileko kuJehova ukusize ube nobuntu obuqakathekilekobu. (Luk. 11:13; Gal. 5:22, 23) U-David ekukhulunywe ngaye ekuthomeni, uhlathulula indlela umthandazo omsize ngayo. Bekafuna ukuba nesifundo sakhe somuntu mathupha saqobe. Uthi: “Bengibawa uJehova angisize ngizibambe. Ngesizo lakhe, ngakghona ukuthomisa ihlelo elihle lokufunda begodu ngidzimelele kilo.”

12. UMtjhumayeli 11:4 usisiza njani sifikele umnqophwethu wokuthuthukisa ubuhlobo bethu noJehova?

¹² Ungalindeli bona izinto zihlale zikhamba kuhle. Ephasineli, angeze salindela bona izinto zizokuhlala zikhamba kuhle. Nange singalindela bona izinto zikhambe kuhle ngaso soke isikhathi, kungenzeka singawufikeleli umnqophwethu. (Funda uMtjhumayeli 11:4.) Umfowethu u-Dayniel uthi: “Akwenzeki izinto zikhambe kuhle. Yeke kufuze sivele sithome.” Umfowethu u-Paul we-Uganda ukhuluma ngelinye ibanga lokobana kubayini kungakafuzi siriyade, uthi: “Lokha nasithomako nanyana kubudisi, uJehova uzosisiza.”—Mal. 3:10.

13. Kubayini kungaba kuhle ukuzibekela iminqopho emincani?

¹³ Thoma kancani. Kungenzeka singabi nesifiso ngebanga lokuthi umnqophwethu ubonakala ubudisi ukuthi singawufikelela. Nangabe kunjalo, ungakghona na ukuphungula umnqophwakho ube mncani? Nangabe umnqophwakho kukuba nobuntu obuthileko, kubayini ungathomi ukubutjengisa kancanikancani? Nange umnqophwakho kukufunda iBhayibheli loke, ungakghona na ukuzibekela isikhathi esincani sokufunda? U-Tomáš, ekukhulunywe ngaye ekuthomeni, bekakufumana kubudisi ukufikelela umnqophwakhe wokufunda iBhayibheli aliqede ngomnyaka. Uthi: “Ngalemuka ukuthi ihlelweli belingigijimisa khulu. Yeke ngaqunta ukulinga godu, kodwana nje ngahlela ukufunda iingaba ezimbalwa qobe langa, ngicabangisise ngazo. Ngebanga lalokho ngathoma  ukuthabela ukufunda kwami.” Njengombana ithabo laka-Tomáš lithoma ukukhula, wathoma ukufunda isikhathi eside. Ngokukhamba kwesikhathi, wafunda iBhayibheli loke. c

14. Khuyini engenza kube budisi ukuthi sifikelele iminqophwethu?

¹⁴ Okudanisako kukuthi nanyana singaba nesifiso esingangani namkha sihleleke kangangani, kungaba nezinto ezenza kube budisi ukufikelela umnqopho esizibekele wona. Ngokwesibonelo, ‘izehlakalo ezingakalindeleki’ zingasithathela isikhathi sokufikelela umnqopho esizibekele wona. (UMtj. 9:11) Singaqalana nobudisi obungasenza sizizwe sidanile begodu singanamandla. (IzA. 24:10) Ngebanga lokuthi sinesono, singenza imitjhapho engenza kube budisi ukufikelela iminqophwethu. (Rom. 7:23) Namkha singazizwa sidiniwe. (Mat. 26:43) Yini engasisiza sihlule izinto ezingenza kube budisi ukuthi sifikelele iminqophwethu?

15. Kubayini kungakafuzi ulise lokha nakunento ekwenza ungakghoni ukufikelela umnqophwakho? Hlathulula. (IRhubo 145:14)

¹⁵ Khumbula ukuthi nakunento ekwenza ungakghoni ukufikelela umnqophwakho akutjho ukuthi ubhalelwe. IBhayibheli lithi singaqalana nemiraro namkha ubujamo obubudisi ngokubuyelelweko. Nanyana kunjalo likwenza kukhanye ukuthi singakghona ukuyifikelela iminqophwethu khulukhulu ngesizo lakaJehova. (Funda iRhubo 145:14.) Umfowethu u-Philip, ekukhulunywe ngaye phambilini, uqala ipumelelo nganasi indlela: “Ukuphumelela kwami angikakuqalisi eenkhathini engihluleke ngazo. Kunalokho ngidzimelela eenkhathini engikghone ngazo ukulinga godu.” U-David ekukhulunywe ngaye phambilini uthi: “Ngilinga ukuqala lokho okungenza kube budisi ukufikelela umnqophwami namkha amalanga angasimnandi ingasi  njengeenqabo kodwana njengamathuba wokutjengisa ukuthi ngimthanda kangangani uJehova.” Ngokuragela phambili ulinga ukufikelela umnqophwakho nanyana kubudisi, utjengisa ukuthi ufuna ukuthabisa uJehova. UJehova uthaba khulu nakakubona uragela phambili ulwela ukufikelela umnqophwakho!

16. Khuyini ongayifunda lokha nakuba nento ekukhandela bona ufikelele umnqophwakho?

¹⁶ Funda eenkhathini la kwaba nento eyenzekako eyakukhandela bona ufikelele umnqophwakho. Cabanga ukuthi yabangelwa yini begodu uzibuze ukuthi, ‘Khuyini engingayenza bona kungenzeki godu?’ (IzA. 27:12) Ngezinye iinkhathi nakuba budisi bona ufikelele umnqophwakho, lokho kungatjengisa ukuthi umnqopho ozibekele wona angekhe ukghone ukuwufikelela ngendlela ebewucabanga ngayo. Nangabe kunjalo nakuwe, cabangisa godu ngomnqophwakho ubone ukuthi ungakghona ukuwufikelela. d UJehova angekhe akuqale njengomuntu ohlulekileko ngebanga lokuthi akhenge ukghone ukufikelela umnqophwakho.—2 Kor. 8:12.   

17. Kubayini kufuze sihlale sikukhumbula esikufikeleleko?

¹⁷ Hlala ukukhumbula lokho okufikeleleko. IBhayibheli lithi, “uZimu akasimumbi bona angakhohlwa umsebenzenu.” (Heb. 6:10) Nathi akukafuzi sikhohlwe. Cabanga ngeminqopho osele uyifikelele—kungaba kukuba nobungani noJehova, ukukhuluma ngaye nabanye namkha ukubhabhadiswa. Njengombana ukghonile ukuthuthuka bewafikelela iminqophwakho yokuthuthukisa ubuhlobo bakho noJehova ngaphambilini, ungakghona ukufikelela umnqopho ozibekele wona nje.—Flp. 3:16.

18. Khuyini okufuze sikhumbule ukuyenza njengombana silwela ukufikelela umnqophwethu? (Qala nesithombe.)

¹⁸ Ngesizo lakaJehova, ungakghona ukufikelela umnqophwakho, njengomtjhayeli wesikepe ofika lapha aya khona. Kodwana khumbula ukuthi abatjhayeli abanengi beenkepe bayalithabela ikhambo labo. Ngendlela efanako njengombana uragela phambi usebenzela ukufikelela umnqophwakho wokuthuthukisa ubuhlobo bakho noJehova, kuthabele ukubona indlela uJehova akusiza nakubusisa ngayo njengombana uraga nomnqophwakho. (2 Kor. 4:7) Nawungaphelelwa mamandla ukuzokufumana iimbusiso ezinengi khulu.—Gal. 6:9.