1-2. (a) Kubayini isibili esiqeda ukutjhada kufuze sithembele kuJehova? (iRhubo 37:3, 4) (b) Sizokudemba yiphi esihlokwenesi?

KGHANI uzokutjhada ingasikade namkha uqeda ukutjhada? Nangabe kunjalo, akunakuzaza ukuthi uqale phambili ekuthabeleni ipilo nomuntu omthanda khulu. Akukafuzi siyibethise ngomoya yokuthi emtjhadweni akuhlali kumnandi ngaso soke isikhathi nokuthi kuneenqunto eziqakathekileko ekufuze zithathwe. Indlela eniqalana ngayo neentjhijilo nenithatha ngayo iinquto izokuthinta ithabo lenu njengesibili esitjhadileko iimnyaka eminengi. Nanithemba uJehova, nizokwenza iinqunto ezihlakaniphileko, umtjhadwenu uzokuqina benizokuthaba khulu. Naningasebenzisi iliZwi lakaZimu, nizokuqalana nemiraro ezokubogabogisa umtjhadwenu, okuzonibangela ukuthi ningathabi.—Funda iRhubo 37:3, 4.

² Nanyana isihlokwesi sizokukhuluma ngabantu abaqeda ukutjhada ingasikade, sizokudemba nemiraro labo ekukade batjhadile okungenzeka baqalana nayo. Sizokuveza nalokho esifukundiswa ziimbonelo zamadoda nabafazi abathembekileko abaseBhayibhelini. Iimbonelwezo zisifundisa iimfundo esingazisebenzisa eengcenyeni ezihlukahlukeneko zokuphila kwethu, kuhlanganise nemtjhadweni. Sizokubona nalokho esingakufunda eembonelweni zabantu abatjhadileko esikhathini sethu.

3-4. Ngiziphi iintjhijilo isibili esitjhadileko esingahlangabezana nazo?

³ Abanye abantu bangakhuthaza isibili esiqeda ukutjhada ukuthi siphile ipilo ejayelekileko ebantwini abanengi namhlanjesi.  Ngokwesibonelo, ababelethi neenhlobo kungenzeka bagandelele isibili ukuthi sirhabele ukuba nabantwana msinyana ngemva kokutjhada. Kungenzeka abangani nomndeni bakhuthaze isibili esiqeda ukutjhada ukuthi sithenge indlu nezinto ezizosenza siphile ipilo emnandi.

⁴ Nasingakatjheji, isibili singenza isiqunto esizosibangela ukuthi sibe neenkolodo. Lokhu kungenza ukuthi indoda nomfazi basebenze ama-awara amade ngombana bafuna ukubhadela iinkolodo zabo. Bagcina sele bangene ngehloko emsebenzini bebabhalelwe kukuba nesikhathi sokufunda iBhayibheli, sokulotjha komndeni nesokuya esimini. Ngezinye iinkhathi, kungenzeka bangabi khona esifundweni ngombana basebenza ama-awara angeziweko, bona bazifumanele imadlana namkha bangalahlekelwa msebenzi. Ngebanga lalokho, adlula ngendlela amathuba wokwandisa ukusebenzela uJehova.

5. Khuyini oyifundako esibonelweni saka-Klaus no-Marisa?

⁵ Iimbonelo ezinengi zitjengisa ukuthi ukudzimelela ekutheni sibe nezinto eziphathekako akusenzi sithabe. Akhesikhulume ngalokho okwafundwa sibili u-Klaus no-Marisa ngendaba le. * Nabaqeda ukutjhada, bathoma ukusebenza bobabili ukuze bakghone ukuphila mabothobotho. Nanyana kunjalo, bebangakathabi. U-Klaus uthi: “Besinakho koke ongakucabanga kodwana naziza ekusebenzeleni uJehova, besingakahleli litho. Nase siyibeka njengoba injalo, ipilwethu beyihlangahlangene begodu sigandelelekile.” Kungenzeka uzibonele ngewakho ukuthi ukudzimelela ekubeni nezinto eziphathekako, akukakwenzi waneliseke. Nange kunjalo, ungapheli amandla. Ukucabanga ngeembonelo ezihle zabanye kungakusiza khulu. Akhesibhule umbethe ngokuthi amadoda atjhadileko angafundani esibonelweni seKosi uJehotjhafathi.

6. IKosi uJehotjhafathi yasisebenzisa njani iseluleko esifumaneka kuzAga 3:5, 6 lokha nayiqalene nebutho elikhulu?

⁶ Madoda atjhadileko, kghani ngezinye iinkhathi nizizwa nigandelelekile ngebanga lemithwalo eninayo? Nange kunjalo, ningafunda litho likhulu esibonelweni seKosi uJehotjhafathi. Njengombana bekayiKosi, ukuphepha kwesitjhaba soke bekuphezu kwamahlombakhe! Khuyini ayenzileko ukuthi afeze isabelo sakhe esikhethekilekwesi? Wenza koke okusemandlenakhe ukuthi avikele isitjhaba. Wakha ubuphephelo obunengi emadorobheni wakwaJuda bewaba neengorho zepi ezingaphezu kwama-1,160,000. (2 Kron. 17:12-19) Ngokukhamba kwesikhathi, uJehotjhafathi waqalana nesitjhijilo esibudisi. Ibutho elikhulu lakwa-Amoni, lakwaMowabi namadoda wentabeni yeSeyiri amthusela, athusela umndenakhe nesitjhaba sakhe. (2 Kron. 20:1, 2) Wenzani uJehotjhafathi  ngendaba le? Wabawa isizo namandla kuJehova. Lokhu kukhambisana kuhle neseluleko esihlakaniphileko esifumaneka kuzAga 3:5, 6. (Ufunde.) Umthandazwakhe osuka ehliziyweni ofumaneka kweyesi-2 yeenKronike 20:5-12 uveza ukuthi bekamthemba kangangani uBabakhe wezulwini onethando. UJehova wawuphendula njani umthandazo kaJehotjhafathi?

7. UJehova wawuphendula njani umthandazo kaJehotjhafathi?

⁷ UJehova waphendula umthandazo kaJehotjhafathi ngokusebenzisa umLevi, uJarhaziyeli. UJehova wathi: “Zihleleni kuhle, nibukele isindiso uSomnini azaninikela yona.” (2 Kron. 20:13-17) Le bekungasiyo indlela ejayelekileko yokulwa ipi! Nanyana kunjalo, iinqophiswezi bezingaveli emntwini, bezivela kuJehova siqu sakhe. Ngebanga lokuthemba uZimakhe, uJehotjhafathi wenza patsi ngendlela ayalwe ngayo. Nakakhamba nabantu bakhe epini, akhange kube ziingorho zepi ezidosa phambili kodwana kwaba babhini ebebangakaphathi iinkhali. UJehova wenza ngendlela ebekathembise ngayo ngokuthi ahlule amabutho wenaba.—2 Kron. 20:18-23.

8. Amadoda atjhadileko angafundani esibonelweni sakaJehotjhafathi?

⁸ Madoda atjhadileko, ningafunda esibonelweni sakaJehotjhafathi. Ninomthwalo wokuthi nitlhogomele ihlalakuhle yomndenenu, ngalokhu nisebenza budisi ukuthi niwuvikele beniwusekele. Naniqalene nemiraro, ningafuna ukuzirarululela yona. Nanyana kunjalo, balekelani ukuzithemba khulu. Kunalokho, thandazelani isizo lakaJehova naninodwa. Ukungezelela kilokho, thandazani ngokusuka ehliziyweni nabomkenu. Funani isinqophiso kuJehova ngokuthi nifunde iBhayibheli neengadangiswa ezifumaneka ehlanganwenakhe benikusebenzise lokho enikufundako. Kungenzeka abanye bangavumelani nesiqunto enisithathako esisekelwe eBhayibhelini, mhlambe bebathi ningesabuya nentambo ekuthezeni. Bangathi imali nezinye izinto eningazithenga zinganikela imindenenu ivikeleko. Nakunjalo, khumbulani isibonelo sakaJehotjhafathi. Wathemba uJehova bewakutjengisa nangezenzo. UJehova akhange ayilahle indoda ethembekileko leyo, yeke nani angekhe anilahle. (Rhu. 37:28; Heb. 13:5) Khuyini engenziwa sibili ukuqinisekisa ukuthi siba nepilo ethabisako?

9. Khuyini esingayitjho ngomphorofidi u-Isaya nomkakhe?

⁹ Into ebeyiqakathekile kumphorofidi u-Isaya nomkakhe bekukulotjha uJehova. U-Isaya bekamphorofidi begodu kungenzaka nomkakhe bekanesakhe isabelo njengombana abizwa ngokuthi ‘mphorofidikazi.’ (Isa. 8:1-4) Bobabili bebabeka ukulotjha uJehova kuze qangi ekuphileni kwabo. Qala bona sibonelo esihle kangangani abasibekela abantu abatjhadileko namhlanjesi!

10. Ukufunda iimphorofido zeBhayibheli kungasisiza njani isibili sifune ukwenza okusemandlenaso ukusebenzela uJehova?

¹⁰ Abantu abatjhadileko namhlanjesi bangasekela ukuphila kwabo ekulotjheni uJehova ngokuthi benze okusemandlenabo bona bamsebenzele. Bangaqinisa ukuthemba kwabo uJehova ngokuthi bafunde isiphorofido seBhayibheli ndawonye bebabone nokuzaliseka kwaso. * (Tit. 1:2) Ngemva  kwalokho, bangacabanga ngalokho abangakwenza ukuthi babe nendima ekuzalisekeni kwezinye iimphorofido zeBhayibheli. Ngokwesibonelo, bangasiza ukuzalisekisa isiphorofido sakaJesu sokuthi iindaba ezimnandi kufuze zitjhunyayelwe iphasi loke ngaphambi kobana isiphelo sifike. (Mat. 24:14) Ukuzimisela kwabantu abatjhadileko ukusebenzela uJehova kukhula khulu lokha nababona ukuzaliseka kweemphorofido zeBhayibheli.

11. Khuyini uPeresila no-Akhwila abakghona ukuyenza begodu kubayini?

¹¹ Abantu abatjha abaqeda ukutjhada bangafunda kuPeresila no-Akhwila, isibili esimaJuda ebesihlala edorobheni leRoma. Bafunda iindaba ezimnandi ngoJesu bebaba maKrestu. Akunakuzaza ukuthi bebanekisekile ngepilo. Nanyana kunjalo, ukuphila kwabo kwatjhuguluka msinyana ngemva kokuthi umBusi uKlawudiyusi akhiphe umyalo wokuthi woke amaJuda kufuze akhambe eRoma. Cabanga ukuthi lokhu bekutjho ukuthini kibo. Bekuzokufuze bakhambe endaweni abayijayeleko, bayokufumana ikhaya elitjha bebathome phasi godu nomsebenzabo wokwenza amatende. Kghani isitjhijilwesi besizobakhandela ukuthi basebenzele uJehova? Kungenzeka uyayazi iphendulo yombuzo loyo. Emzinabo omutjha oseKorinte, bathoma ukusiza ibandla lalapho bebasebenza nompostoli uPowula ukuqinisa amalunga webandla lalapho. Ngemva kwalokho, bafudukela kamanye amdorobho la bekunetlhogeko yabatjhumayeli khona. (IzE. 18:18-21; Rom. 16:3-5) Ipilwabo beyimatasa begodu bathabile!

12. Kubayini isibili esitjhadileko kufuze sizibekele umnqopho wokulotjha uJehova?

¹² Abantu abatjhadileko bangalingisa isibonelo sakaPeresila no-Akhwila ngokuthi babeke iintlhogo zomBuso qangi ekuphileni kwabo. Isikhathi esihle sokuthi isibilli sikhulume ngomnqophwaso kungaphambi komtjhado. Lokha isibili nasenza iinqunto ndawonye besilwele ukufikelela iminqopho esizibekele yona, sinamathuba amanengi wokubona ummoya kaJehova usebenza ekuphileni kwaso. (UMtj. 4:9, 12)  Cabanga ngesibonelo saka-Russell no-Elizabeth. U-Russell uthi, “Ngaphambi kokuthi sitjhade, sacoca ngeminqopho yokusebenzela uZimu.” U-Elizabeth uthi, “Sacocisana ngendaba le ukwenzela bona nasele sitjhadile, sithathe iinqunto engekhe zisivimbele ukulotjha uZimu ngendlela esifuna ngayo.” Ubujamo baka-Russell no-Elizabeth bebubavumela ukuthi bafudekele e-Micronesia bayokusebenzela uJehova la kunetlhogeko yabatjhumayeli khona.

13. Ngokomtlolo weRhubo 28:7, uzokuba yini umphumela wokuthemba uJehova?

¹³ Njengo-Russell no-Elizabeth, amaKrestu amanengi enze ukuphila kwaba lula ukwenzela ukuthi babe nesikhathi esinengi batjhumayela nokufundisa iindaba ezimnandi. Lokha isibili esitjhadileko nasizibekela iminqopho yokulotjha uJehova ndawonye besisebenzele ukuwufikelela, kunengi esingakwenza. Sizokubona indlela uJehova asithanda ngaso, simthembe khudlwana begodu sizokuthaba kwamambala.—Funda iRhubo 28:7.

14. Umpostoli uPitrosi banomkakhe batjengise njani ukuthi bayasithemba isithembiso esifumaneka kuMatewu 6:25, 31-34?

¹⁴ Abantu abatjhadileko kunengi abangakufunda esibonelweni sakampostoli uPitrosi nomkakhe. Ngemva kweenyanga ezisithandathu kuya kezilitjhumi nambili ahlangene noJesu ihlandla lokuthoma, umpostoli uPitrosi kwatlhogeka ukuthi enze isiqunto esiqakathekileko. Bekasebenza ukubamba iimfesi. Lokha uJesu nakambawa ukuthi azokusebenza naye isikhathi esizeleko, kwatlhogeka ukuthi acabangisise kuhle ngomkakhe. (Luk 5:1-11) UPitrosi wakhetha ukuyokutjhumayela noJesu. Wenza isiqunto esihlakaniphileko! Sinamabanga azwakalako wokuthi umkakhe wamsekela ngesiquntweso. IBhayibheli litjengisa ukuthi ngemva kokuvuswa kwakaJesu, uPitrosi wakhamba nomkakhe kamanye amakhambo. (1 Kor. 9:5) Akunakuzaza ukuthi isibonelo sakhe njengomfazi omKrestu, sanikela uPitrosi itjhaphuluko yokutlola iseluleko esiphufumulelweko esitjhinga emadodeni nebafazini abamaKrestu. (1 Pit. 3:1-7) Kuyakhanya ukuthi umndeni lo bewusithemba isithembiso sakaJehova sokuthi uzowutlhogomela, ikani nababeka umBuso qangi ekuphileni kwabo.—Funda uMatewu 6:25, 31-34.

15. Khuyini oyifundako esibonelweni saka-Tiago no-Esther?

¹⁵ Nangabe sele nineminyaka nitjhadile, ningaraga njani nithuthukisa isifiso senu sokusebenzela uZimu khudlwana? Lokhu ningakwenza ngokuthi nifunde ngezinye iimbonelo zabantu abatjhadileko. Ngokwesibonelo, ningafunda umlandelande weenhloko ezithi “Bazinikela Ngokuzithandela.” Iinhlokwezi zisize u-Tiago no-Esther, isibili esitjhadileko se-Brazil, bona sibe nesifiso esiqinileko sokusebenzela uJehova la kunetlhogeko khona. U-Tiago uthi: “Njengombana sifunda iinhlokwezi, sibone indlela uJehova asiza ngayo abantu abamsebenzelako, yeke nathi besifuna ukusizwa isandla sakaJehova sisinqophisa begodu sisitlhogomela.” Ngokukhamba kwesikhathi, bafudukela e-Paraguay, la basebenzela khona uZimu esimini yesiPutukezi kusukela ngo-2014. U-Esther uthi: “Sobabili siwuthanda khulu umtlolo webe-Efesu 3:20. Sikubone kanengi ukuzaliseka kwamezwi lawo njengombana sisebenzela uJehova.” Encwadini eya kwebe-Efesu, uPowula wathembisa ukuthi uJehova uzosinikela  ngokuphuphumako izinto esizibawako. Isithembisweso sazaliseka amahlandla amanengi.

16. Abatjha abaqeda ukutjhada bangasitholaphi iseluleko nabafuna ukuzibekela umnqopho wokulotjha uZimu?

¹⁶ Abantu abatjha abaqeda ukutjhada bangazuza esibonelweni salabo abafunde ukuthembela kuJehova. Amanye amaKrestu atjhadileko asebenzele uJehova iminyaka eminengi. Kubayini ningabawi iseluleko sabo njengombana nicabanga ngeemnqophwenu? Lokhu kuzokutjengisa ukuthi niyamthemba uJehova. (IzA. 22:17, 19) Abadala banendima abangayidlala ekusizeni abantu abatjha abaqeda ukutjhada bazibekele bebafikelele umnqophwabo wokusebenzela uZimu.

17. Khuyini eyenzeke ku-Klaus no-Marisa begodu sifundani kilokho?

¹⁷ Ngezinye iinkhathi, isiqunto sokuthuthukisa ukusebenzela uJehova kungenzeka singakhambi ngendlela thina ebesicabanga ngayo. Cabanga ngesibonelo saka-Klaus no-Marisa, esikhulume ngabo ekuthomeni. Ngemva kweemnyaka emithathu batjhadile, bafuduka emzinabo, bayokuvolontiya esakhiweni egatjeni le-Finland. Nanyana kunjalo, bafumana ukuthi angeze bavunyelwe ukuhlala lapho iinyanga ezingaphezu kwezisithandathu. Ekuthomeni, kwabadanisa lokho. Ngokukhamba kwesikhathi, bamenywa ukuthi bayokufunda ilimi lesi-Arabhu, la esele bathabela ukusebenzela uJehova esimini ekhuluma ilimi lesi-Arabhu kwenye inarha. Lokha u-Marisa nakacabanga ngokwenzekileko, uthi: “Bekungithusa ukwenza into engingakhenge ngiyenze ngaphambilini, bengitlhoga ukuthemba uJehova ngokupheleleko. Ngibonile ukuthi uJehova usisize njani ngeendlela ebesingakazilindeli. Ngemva kokubona zoke iintwezi, ithemba ebenginalo kuJehova laqina ngho.” Njengombana isibonelwesi sitjengisa, singaqiniseka ukuthi uJehova uzosinikela umvuzo nasimthemba ngokupheleleko.

18. Khuyini abantu abatjhadileko abangayenza ukuthi bahlale bathemba uJehova?

¹⁸ Umtjhado sisipho esivela kuJehova. (Mat. 19:5, 6) Ufuna boke abatjhadileko basithabele isiphweso. (IzA. 5:18) Bantu abatjha abatjhadileko, kubayini ningahlolisisi enikwenzako ngepilwenu? Kghani nenza koke okusemandlenenu ukutjengisa uJehova ukuthi niyamthokoza ngesipho aninikele sona? Khulumani noJehova ngomthandazo. Funani iinkambisolawulo ezikhambisana nobujamo benu eliZwini lakhe. Nisilandele iseluleko seBhayibheli. Ningaqiniseka ukuthi nizokuba nokuphila okuthabileko nokwanelisako nanisekela ukuphila kwenu ekulotjheni uJehova.