Ngabelethelwa e-Netherlands ngo-1948. Emnyakeni olandelako, safudukela e-São Paulo, e-Brazil. Ababelethi bami bebalithanda khulu isondo begodu besijayele ukufunda iBhayibheli soke njengomndeni ngemva kokudla kwantambama. Safuduka godu ngo-1959 saya e-United States, sahlala e-Massachusetts.

Ubaba bekasebenza budisi bona atlhogomele umndenethu onamalunga abunane. Bekasebenza imisebenzi eminengana enjengokuthengisa, ukusebenza endleleni nekhamphanini yeemphaphamtjhini. Soke besithabile ekhaya lokha ubaba nakasebenzela ikhamphani yeemphaphamtjhini ngombana besikghona ukukhamba.

Nangisafunda isikolo, bengihlale ngizibuza ukuthi, ‘Ngizokwenzani ngokuphila kwami nangikhulako?’ Abanye abangani bami bakhetha ukuya eYunivesithi, kwathi abanye bakhetha ukuba masotja. Bengingafuni ukuba lisotja ngombana bengingakuthandi ukuphikisana, ingasaphathwa yokulwa. Ngaqunta ukuya eYunivesithi ukwenzela ukuthi ngingayi ebusotjeni. Benginesifiso sokusiza abantu ngombana bengicabanga ukuthi ngizokufumana ipilo enomnqopho.

EYunivesithi, ngakarwa ziimfundo eziphathelene nendabuko namasiko wabantu njengombana benginekareko yokuthi ukuphila kwavelaphi. Safundiswa ngokusombuluka kwemvelo begodu abotitjhere bebafuna siyamukele njengeliqiniso. Ebebasifundisa khona bekutlhoga ihlathululo begodu bekulindeleke ukuthi sikukholelwe ngaphandle kobufakazi.

Kiwo woke amaklasi ebesiya kiwo, akhenge sifundiswe ngemikghwa emihle yokuziphatha. Kunalokho, safundiswa ukuthi senze nanyana yini ukuthi sifumane imiphumela emihle eYunivesithi. Bekungithabisa ukukhamba nabangani bami emaphathini besibheme neendakamizwa kodwana ithabelo belingahlali isikhathi. Bengizibuza ukuthi, ‘Kghani ukuphila kwami kunomnqopho?’

Ngokukhamba kwesikhathi, ngafudukela e-Boston bengafunda neyunivesithi yalapho. Bona ngibhadele iimfundo zami, ngafumana umsebenzi nakuvalwe iinkolo, lapho ngahlangana nomunye waboFakazi bakaJehova kokuthoma. Umuntu ebengisebenza naye loyo wangitjela ngesiphorofido esikuDanyela isahluko 4 ebesikhuluma ‘ngeenkhathi ezibuyelelwe kalikhomba’ bewangihlathululela nokuthi siphila eenkhathini zokugcina. (Dan. 4:13-17) Ngalemuka ukuthi nangiragela phambili ngikhuluma naye ngeendaba zeBhayibheli bengizikholelwe, kuzokufuze ngenze amatjhuguluko ekuphileni kwami. Yeke, ngathoma ukumbalekela.

EYunivesithi, ngathatha iimfundo ebezizongilungiselela umsebenzi wokuvolontiya e-South America. Bengicabanga ukuthi ukusiza abantu abatlhoga ukusizwa kuzonginikela umnqopho ekuphileni. Ngalemuka ukuthi nomsebenzi lo bewungekhe unginikele umnqopho ekuphileni. Bengidanile bengalisa eyunivesithi.

NgoMeyi 1970, ngafudukela e-Amsterdam, e-Netherlands, bona ngiyokusebenza ekhamphanini yeemphaphamtjhini lapha ubaba bekasebenza khona. Umsebenzi bewungenza ngikhambe khulu ngivakatjhela iinarha ezise-Africa, e-Americas, e-Europe, ne-Asia. Ngalemuka msinyana ukuthi nanyana ngiyiphi inarha engiyivakatjhelako, boke bebanomraro begodu besingekho isisombululo. Bengisafuna ukuba nomnqopho epilweni, yeke ngaqunta ukubuyela e-United States ngiyokufunda godu.

Ngalemuka ukuthi neyunivesithi ayingisizi bona ngiphendule imibuzo emalungana nokuphila. Bengingazi ukuthi ngenzeni, yeke ngabuza omunye wabophrofesa. Ipendulwakhe yangirara ngombana wathi: “Kubayini uragela phambili nokufunda? Kubayini ungalisi?” Ngakuthabela ukuthatha isiyalo sakhe. Ngayilisela futhi iyunivesithi.

Ukuphila kwami bekusolo kunganamnqopho, ngalokho ngathoma ukuba lilunga lesiqhema ebesingafuni ukuphila ngendlela ejayelekileko nebesibonakala sithuthukisa ukuthula nethando. Mina nabangani bami sayikhamba yoke i-United States besehlela e-Acapulco, e-Mexico. Besihlala nabantu abangaphili ngendlela ejayelekileko begodu bebabonakala ngasuthi ukuphila kwabo akunamraro. Nangisahleli nabo njalo, ngalemuka ukuthi ukuphila kwabo bekunganamqopho begodu akulethi ithabo. Ngalemuka ukuthi abanengi babo bebangakathembeki begodu baleya amala.

Ingasikade, ngathoma ukucabanga ngesifiso enganginaso nangimntwana. Bengifuna ukukhamba ngesikepe elwandle, ingasi njengomthayi kodwana njengokapteni. Bona ngenze njalo, kwakutlhogeka ukuthi ngibe nesikepe okungesami. Umnganami u-Tom bekanesifiso esifanako, ngalokho saqunta ukukhamba sobabili. Bengizifunela isihlengele esiyipharadesi, la ebengizokuhlala khona bengilibale ngendlela ejayelekileko yokuphila.

Sino-Tom saya e-Arenys de Mar, eduze ne-Barcelona, e-Spain. Nasifika lapho, sathenga isikepe esibizwa ngokuthi yi-Llygra esimamitha ayi-9.4. Savuselela isikepe esincaneso bona sikwazi ukukhamba ngaso siphephile elwandle. Njengombana besingakarhabi ukufika la siya khona, sakhipha i-enjini bese safaka amanzi wokusela amanengi. Ukuthi sikhambise isikepe, sathenga amaphehlo wokugwedla angaba mamitha ayi-5. Msinyana, sathoma ikhambo le-Seychelles, ese-Indian Ocean. Besihlele ukukhamba magega neligu elisetjingalanga ye-Africa ne-Cape of Good Hope, eseSewula Afrika. Besisebenzisa iinkwekwezi, umebhe, iincwadi nokhunye bona zisinqophise. Yangirara indlela esakghona ngayo ukufumana indawo ebesiya kiyo.

Ingasikade, salemuka ukuthi isikepe sethu esidala bengekhe sikghone ukukhamba elwandle. Amanzi angaba malitha ayi-22 bekangena esikepeni i-awara ngalinye! Njengoba ngitjhwile esingenisweni, kwaba nesiwuruwuru esikhulu, ngathoma ukusaba ngabe ngathandaza kokuthoma ngemva kweminyaka eminengi, ngithembisa uZimu ukuthi nasingasinda, ngizokulinga ukumazi. Isiwuruwuru sathula, kwakufuze ukuthi ngenze ngokwesithembiso sami.

Ngathoma ukufunda iBhayibheli ngiseseselwandle. Akhucabange bona bekumnandi kangangani ukuzihlalela esikepeni sami elwandle le-Mediterranean ngibona imihlobohlobo yeemfesi nalapho kuphelela khona amehlwami. Ebusuku, bengikarwa ziinkwekwezi ezinengi ebengizibona begodu lokho kwangenza ngaqiniseka ukuthi kunoZimu othanda abantu.

Ngemva kweemveke ezimbalwa siselwandle, safika ethekwini e-Alicante, e-Spain, la salinga khona ukuthengisa isikepe sethu bona sifumane esingconywana. Akhange kungirare ukuthi kwaba budisi ukufumana umuntu ozosithenga ngombana besisidala, singana-enjini begodu sivuza! Ngakelinye ihlangothi, lesi bekusikhathi esihle khulu sokufunda iBhayibheli.

Njengombana bengiraga nokufunda iBhayibheli, ngalemuka ukuthi liyincwadi eneenqophiso ezingasenza sithabe. Kwangikara ukubona indlela iBhayibheli ekukhanyisa ngakho ukuphila ipilo ehle ehlwengileko begodu ngazibuza ukuthi kubayini abantu abanengi, kuhlanganise nami, sizibiza ngamaKrestu kodwana singakulaleli lokho.

Bengizimisele ukuthatha amagadango wokuhlwengisa ukuphila kwami, yeke ngalisa ukubhema iindakamizwa. Ngathoma ukucabanga ukuthi kungenzeka kunabantu abaphila ngeenkambisolawulo zeBhayibheli begodu bengifuna ukubazi. Ngathandaza ihlandla lesibili, ngibawa uZimu ukuthi angisize ngibafumane.

Ngakubona kunehloko ukuhlolisisa ikolo ngayinye qobe sikhathi bengifumane ikolo  yeqiniso. Njengombana bengikhambakhamba endleleni ye-Alicante, ngabona amasondo amanengi. Ngebanga lokuthi kamanengi wawo bekulotjhwa iinthombe, bengazi ukuthi akasiyikolo yeqiniso.

Ngomunye uSondo entambama, bengisentabeni ngifunda uJakopo 2:1-5, oyelelisa ngokuthanda abantu abanemali kwaphela. Nangibuyela esikepeni, ngadlula indawo enetshwayo elithi: “IWolo LomBuso LaboFakazi BakaJehova.”

Ngacabanga ngathi, ‘Akhe ngibalinge. Ngifuna ukubona ukuthi bazongamukela na.’ Yeke nganena eWolweni lomBuso ngikhamba ngenyawo phasi, ngineendevu nebrugu lami lidabukile. Kwafika umlindi, wayongihlalisa eduze komma osele akhulile owangisiza ukufumana imitlolo edzujulwa sikhulumi. Ngemva kwesifundo, wangirara khulu umusa abantu ebebangilotjhisa abebanawo. Enye indoda yangimemela emzinayo bona sizokucoca kodwana ngebanga lokuthi bengingakaqedi ukufunda IBhayibheli, ngathi kuye, “Ngizokwazisa nasele ngikulungele.” Ingasikade, ngathoma ukuya esifundweni qobe.

Ngemva kweemveke ezimbalwa, ngavakatjhela indoda leya eyangimemela kwayo begodu yaphendula imibuzo ebenginayo ngeBhayibheli. Evekeni elandelako, yangipha isikhwama esizele izembatho ezihle. Yangitjela ukuthi umnikazi wezembathwezo bekabotjhiwe ngebanga lokulalela iBhayibheli nalithi sithandane nokuthi singasayifunda ipi. (Isa. 2:4; Jwa. 13:34, 35) Njeke, bengiqiniseka ukuthi ngikufumene ebengikufuna, abantu abalalela lokho iBhayibheli elikutjhoko ngokuphila okuhlwengekileko! Yeke, besele ngingasafuni isihlengele esiyipharadesi kodwana bengifuna ukufunda iBhayibheli bengilizwisise. Ngabuyela e-Netherlands.

Kwangithatha amalanga amane ukuya edorobheni le-Groningen, e-Netherlands. Bekufuze ngifumane umsebenzi ukuthi ngizitlhogomele. Ngabawa umsebenzi kesinye isitolo sokubaza, banginikela iforomo ebelibuza ukuthi ngikuyiphi ikolo. Ngatlola ukuthi, “Fakazi kaJehova.” Ngemva kokuthi umnikazi wesitolo afunde lokhu engikutlolileko, ngalemuka ukuthi ubuso bakhe batjhuguluka. Wathi, “Ngizokufownela” kodwana akhange.

Ngadlulela kesinye isitolo sokubaza, ngabuza umnikazi ukuthi utlhoga isizo na. Wafuna ubufakazi bokuthi ngiwufundele na umsebenzi lo nabantu abangakufakazela lokho. Ngamhlathululela ukuthi ngikhe ngalungisa isikepe sami  seplanka. Okwangirarako kukuthi wathi, “Ungathoma ukusebenza ngemva kwamadina kodwana kunombandela munye. Angifuni umuntu ozongibangela umraro esitolo sami ngoba mina ngingomunye waboFakazi bakaJehova begodu ngiphila ngalokhu iBhayibheli elikutjhoko.” Amezwakhe angirara, ngaphendula ngathi, “Nami nginguye!” Ngebanga lokuthi bengineenhluthu ezide neendevu, walemuka ukuthi angisuye bewathi, “Ngibawa ukufunda nawe iBhayibheli!” Ngathabela ukusamukela isibawo sakhe. Besele ngithoma ukubona ukuthi kubayini esitolo esidlulileko bangakangiqatjhi. UJehova bekaphendula umthandazwami. (Rhu. 37:4) Ngasebenza esitolo sakamfowethu lo umnyaka munye. Ngesikhatheso, ngafunda naye iBhayibheli, ngemva kwalokho ngabhajadiswa ngoJanabari 1974.

Ngemva kwenyanga, ngathoma ukuphayona, okunginikele ithabo elikhulu. Inyanga elandelako, ngafudukela e-Amsterdam la bengiyokusiza isiqhema esitjha sesi-Spanish. Bekungithabisa ukuraga iimfundo zeBhayibheli ngelimi lesi-Spanish nesiPutukezi! NgoMeyi 1975, ngafumana ilungelo lokuba liphayona elikhethekileko.

Ngelinye ilanga, udadwethu oliphayona elikhethekileko u-Ineke weza esifundweni sethu sesi-Spanish azokwethula isifundo sakhe seBhayibheli esivela e-Bolivia. Sino-Ineke saqunta ukwazana ngconywana ngokuthi sitlolelane iincwadi begodu msinya salemuka ukuthi sineminqopho efanako. Satjhada ngo-1976 saraga nokuba maphayona akhethekileko bekwaba ngo-1982 lokha nasimenyelwa ukuya eklasini lesi-73 le-Gilead. Kwasirara kodwana sakuthabela ukwabelwa ePumalanga ye-Africa, lapho sahlala iminyaka emihlanu eMombasa, eKenya! Ngo-1987, sabelwa ukuya eTanzania, lapho bekuqedwa ukususwa ukukhandelwa komsebenzi wokutjhumayela. Sahlala lapho iminyaka ema-26 ngaphambi kokubuyela eKenya.

Ukusiza abantu abathobekileko bona bafunde iBhayibheli kwanikela ukuphila kwethu umnqopho. Ngokwesibonelo, ngahlangana nesifundo sami sokuthoma seBhayibheli eMombasa lokha nangitjhumayela tjhatjhalazi. Ngemva kokumnikela abomagazini ababili, wathi, “Nangiqeda ukufunda abomagazinaba ababili, alo ngenzeni?” Ngeveke elandelako, sathoma ukufunda iBhayibheli sisebenzisa incwadi ethi You Can Live Forever in Paradise on Earth, ebeyiqeda ukutjhatjululwa ngesiSwahili. Ngemva komnyaka, wabhajadiswa bewaba liphayona lesikhathi esizeleko. Kusukela ngesikhatheso, yena nomkakhe basize abantu abali-100 bona bazinikele bebabhajadiswe.

Nangithoma ukuzwisisa umnqopho wokuphila, ngazizwa njengomrhwebi owafumana iparele elikhethekileko begodu bekangafuni ukuthi limlahlekele. (Mat. 13:45, 46) Bengifuna ukusebenzisa ukuphila kwami bona ngisize nabanye bafumane umnqopho wamambala wokuphila. Mina nomkami sazibonela ngewethu ukuthi uJehova uyabasiza abantu bakhe ukuthi baphile ipilo enomnqopho.