1. Khuyini ekufuze siyilindele begodu yini esingaqiniseka ngayo?

 KUFUZE sikulungele ukuphikiswa njengombana senza umsebenzi wokutjhumayela. Ukuphikisokho kuzokwenzeka khulu esikhathini esizako. (Dan. 11:44; 2 Thim. 3:12; IsAm. 16:21) Nanyana kunjalo, singaqiniseka ukuthi uJehova uzosinikela isizo esilitlhogako. Kubayini sitjho njalo? UJehova bekasolo asiza iinceku zakhe bona zifeze izabelo zazo nanyana bezibudisi kangangani. Bona sifanekise, akhesicoce ngezenzakalo ezenzeke ekuphileni komphorofidi uHezekiyeli, owatjhumayela amaJuda ebekathunjelwe eBhabhiloni.

2. UJehova wabahlathulula njani abantu uHezekiyeli ebekufuze atjhumayele kibo begodu khuyini esizokucoca ngayo esihlokwenesi? (Hezekiyeli 2:3-6)

² Babantu abanjani uHezekiyeli ebekufuze atjhumayele kibo? UJehova wabahlathulula ngokuthi ‘babantu abadelelako nabanekani’ begodu “bayindlu ehlubukako.” Bebahlaba njengameva begodu bayingozi njengabofezela. Kungebangelo uJehova atjho ngokubuyelelweko kuHezekiyeli ukuthi: ‘Ungabasabi’! (Funda uHezekiyeli 2:3-6.) UHezekiyeli wakghona ukuraga nomsebenzakhe wokutjhumayela ngombana (1) bekathunywe nguJehova, (2) ummoya kaZimu bewumnikela amandla begodu (3) amezwi kaZimu aqinisa ukukholwa kwakhe. Izinto ezintathwezi zamsiza njani uHezekiyeli? Zingasisiza njani thina namhlanjesi?

3. Ngimaphi amezwi ekungenzeka aqinisa uHezekiyeli begodu uJehova wamqinisekisa njani ukuthi uyamsekela?

³ UJehova wathi kuHezekiyeli: ‘Ngiyakuthuma.’ (Hez. 2:3, 4)  Amezwi la kungenzeka amqinisa uHezekiyeli. Kubayini? Akunakuzaza ukuthi wakhumbula ngesikhathi uJehova asebenzisa amezwi afanako lokha nakakhetha uMosi no-Isaya njengabaphorofidi bakhe. (Eks. 3:10; Isa. 6:8) UHezekiyeli bekayazi indlela uJehova asiza ngayo abaphorofidi ababilaba bona bahlule iintjhijilo ebebaqalene nazo. Yeke, lokha uJehova nakatjela uHezekiyeli kabili athi: ‘Ngiyakuthuma’ umphorofidi lo bekanamabanga amahle wokuthemba ukuthi uJehova uzomsekela. Ngaphezu kwalokho, encwadini kaHezekiyeli, sifumana amezwi la iinkhathi ezinengana, athi: “Ilizwi lakaJehova leza kimi.” (Hez. 3:16) Ukungezelela kilokho amezwi athi, ‘Ilizwi lakaJehova leza godu kimi’ avela ngokubuyelelweko. (Hez. 6:1) Yeke, uHezekiyeli bekaqiniseka ukuthi uthunywe nguJehova. Ukungezelela kilokho njengombana bekayindodana yomphristi, uHezekiyeli kungenzeka wafundiswa ngubabakhe indlela uJehova asekela ngayo abaphorofidi bakhe esikhathini esidlulileko. UJehova wasebenzisa amezwi athi, “Nginawe” ku-Isaka, kuJakopo nakuJoromiya.​—Gen. 26:24; 28:15; Jor. 1:8.

4. Ngimaphi amezwi aduduzako okungenzeka aqinisa uHezekiyeli?

⁴ Ama-Israyeli bekazokusabela njani nakatjhunyayezwa nguHezekiyeli? UJehova wathi: “Indlu yakwa-Israyeli angekhe ikulalele, ngombana ayifuni ukungilalela.” (Hez. 3:7) Ngokwala ukulalela uHezekiyeli, abantu bebatjengisa ukwala ukulalela uJehova. Amezwi la aqinisekisa uHezekiyeli ukuthi ukwala kwabantu bekungatjho ukuthi ubhalelwe njengomphorofidi. UJehova godu waqinisekisa uHezekiyeli ngokuthi lokha izahlulelo azitjhumayelako naziba liqiniso, abantu ‘bebazokwazi ukuthi bekunomphorofidi phakathi kwabo.’ (Hez. 2:5; 33:33) Akunakuzaza ukuthi ukukhumbula lokho kwamduduza uHezekiyeli bekwamnikela namandla ebakawatlhoga ukuthi enze umsebenzi wokutjhumayela.

5. Ngokwaka-Isaya 44:8, siwafumana kuphi amandla?

⁵ Ngendlela efanako nathi sifumana amandla ngokwazi ukuthi sithunywe nguJehova. Uyasihlonipha ngokusibiza ngokuthi ‘sibofakazi bakhe.’ (Isa. 43:10) Lelo lilungelo elikhulu khulu esinalo! Njengombana uJehova akhuthaza uHezekiyeli wathi: ‘Ungasabi,’ uJehova nathi usikhuthaza ngokuthi: ‘Singathukwa begodu singahlengezeli.’ Kubayini singanabanga lokusaba abaphikisi bethu? NjengoHezekiyeli sithunywe nguJehova begodu sisekelwa nguye.​—Funda u-Isaya 44:8.

6. (a) UJehova usithembisa njani ukuthi uzosisekela? (b) Khuyini esikhuthazako?

⁶ UJehova usithembisa bona uzosisekela. Ngokwesibonelo, ngaphambi kokuthi athi: ‘Nibofakazi bami,’ wathi: “Nawukhamba hlangana namanzi ngizokuba nawe hlangana nemilambo angeze urhurhuleke. Nawukhamba hlangana nomlilo, angeze ukutjhise namalangabi angeze akurhabule.” (Isa. 43:2) Njengombana siragela phambili nomsebenzi wokutjhumayela, ngezinye iinkhathi sihlangana neenqabo ezifana neenkhukhula siqalane neentjhijilo ezifana nomlilo. Nanyana kunjalo, ngokusizwa nguJehova siragela phambili nokutjhumayela. (Isa. 41:13) Njengesikhathi sakaHezekiyeli, inengi labantu aliwamukeli umlayezo esiwuphetheko. Siyakhumbula ukuthi ukungalaleli kwabo akutjho ukuthi sibhalelwe njengaboFakazi bakaZimu. Kuyasikhuthaza begodu sifumana amandla ngokwazi ukuthi kuyamthabisa uJehova ukusibona sithembekile besiragela phambili sitjhumayela umlayezwakhe. Umpostoli uPowula wathi: “Umuntu ngamunye uzokufumana umvuzwakhe ngokuvumelana nomsebenzakhe.” (1 Kor. 3:8; 4:1, 2) Omunye udadwethu osele anesikhathi eside aliphayona uthi: “Kuyangithabisa ukwazi ukuthi uJehova uyayibusisa imizamwethu.”

7. UHezekiyeli wazizwa njani nakacabanga ngombono awubonako? (Qala isithombe esingaphandle.)

⁷ UHezekiyeli wabona ukuthi ummoya kaZimu unamandla kangangani. Embonweni, uHezekiyeli wabona ummoya ocwengileko usiza iingilozi ezinamandla bona zikhambise ikarana enamavili amakhulu. (Hez. 1:20, 21) Wasabela njani uHezekiyeli kilokhu? Wakutlola phasi lokho akubonako. “Nangilibonako, ngaguqa.” Ararekile, uHezekiyeli wawela phasi. (Hez. 1:28) Ngokukhamba kwesikhathi, bekuthi qobe uHezekiyeli nakacabanga ngombono lo, kungenzeka bekumnikela amandla nokuqiniseka ukuthi ngokusizwa mumoya kaZimu uzokuphumelela ekufezeni umsebenzakhe wokutjhumayela.

8-9. (a) Khuyini uJehova ayitjela uHezekiyeli? (b) UJehova waragela phambili njani nokuqinisa uHezekiyeli bona enze isabelo sakhe esibudisi sokutjhumayela?

⁸ UJehova wathi kuHezekiyeli: “Ndodana yomuntu, sikima ujame ngeenyawo bona ngikhulume nawe.” Amezwi la anikela uHezekiyeli amandla namkha ‘ummoya’ ebekawutlhoga bona asikime njengombana awele phasi. UHezekiyeli watlola wathi: “Ummoya wafika kimi, wajama phambi kwami wangenza ngajama ngeenyawo.” (Hez. 2:1, 2) Ngokukhamba kwesikhathi nakiwo woke umsebenzakhe wokutjhumayela, uHezekiyeli bekanqotjhiswa ‘sisandla’ sakaZimu, okumumoya ocwengileko kaZimu. (Hez. 3:22; 8:1; 33:22; 37:1; 40:1) Ummoya kaZimu waqinisa uHezekiyeli esabelweni asifumanako sokutjhumayela, ‘abantu abanekani neenhliziyo eziqinileko.’ (Hez. 3:7) UJehova watjela uHezekiyeli wathi: “Ngenze ubuso bakho baqina njengobuso babo nesiphongo sakho saqina njengeemphongo zabo. Ngenze isiphongo sakho saba njengedayimani, saqina ukudlula ilitje eliqinileko. Ungabasabi namkha uthuswe bubuso babo.” (Hez. 3:8, 9) Ekhabolakhona, uJehova watjela uHezekiyeli wathi:  ‘Ungasabi namkha uthuswe bubuso babo. Ngizokuqinisa.’

⁹ Ngemva kwalokho, ummoya kaZimu waraga nokusiza uHezekiyeli emsebenzinakhe wokutjhumayela. UHezekiyeli watlola wathi, “Isandla sakaJehova seza phezu kwami.” Kwathatha umphorofidi lo isikhathi esingangeveke bona afunde bekazwisise umlayezo lo ukwenzela bona awutjhumayele ngokuqiniseka. (Hez. 3:14, 15) Ngemva kwalokho uJehova wamnqophisa emrhobeni onganalitho la ‘ummoya wangena kuye.’ (Hez. 3:23, 24) UHezekiyeli bekakulungele ukuthoma umsebenzi wokutjhumayela.

10. Ngiliphi isizo esilitlhogako bona senze umsebenzi wokutjhumayela begodu kubayini?

¹⁰ Ngiliphi isizo esilitlhogako bona senze umsebenzi wokutjhumayela? Ukuphendula umbuzo lo, akhesicabange ngalokho okwenzeka kuHezekiyeli. Ngaphambi kokuthi athome umsebenzakhe wokutjhumayela, ummoya kaZimu wamnikela amandla awatlhogako. Namhlanjesi, njengombana bekunjalo kuHezekiyeli, nathi singakghona ukwenza umsebenzi wokutjhumayela kwaphela nasisizwa mumoya kaZimu. Kubayini? Ngombana uSathana ulwisana nathi bona asikhandele ukwenza umsebenzi wokutjhumayela. (IsAm. 12:17) Ngombono wabantu, kubonakala ngathi uSathana unamandla khulu begodu angekhe sikghone ukumhlula. Kodwana ngokwenza umsebenzi wokutjhumayela, siyakghona ukumhlula! (IsAm. 12:9-11) Njani? Nasicoca nabantu emsebenzini wokutjhumayela sitjengisa ukuthi asimsabi uSathana. Qobe nasitjhumayelako, uSathana uyahlulwa. Yeke, ngisiphi isiphetho ekufuze sifikelele kiso nasicabanga bona siyakghona ukwenza umsebenzi wokutjhumayela nanyana siphikiswa? Kufuze siphethe ngokuthi ummoya kaJehova ocwengileko usipha amandla begodu uJehova nguye osinqophisako.​—Mat. 5:10-12; 1 Pit. 4:14.

11. Yini ummoya kaZimu ozosenzela yona begodu singaragela phambili njani siwufumana?

¹¹ Ngisiphi esinye isiqinisekiso esisifumana ngokwazi ukuthi uJehova waqinisa ubuso nesiphongo sakaHezekiyeli ngokomfanekiso?  Ummoya kaZimu ungakghona ukusisiza bona siqalane nananyana ngisiphi isitjhijilo esiphambi kwethu esisikhandela bona senze umsebenzi wokutjhumayela. (2 Kor. 4:7-9) Khuyini engasenza bona siqiniseke ukuthi sizokuhlala siwufumana ummoya kaZimu? Kufuze siragele phambili nokuthandaza singalisi, siqiniseke ukuthi uJehova uzoyizwa imithandazwethu. UJesu wafundisa abafundi bakhe wathi: “Ragelani phambili nibawa, . . . ragelani phambili nifuna, . . . ragelani phambili nikokoda.” UJehova uzosiphendula ngokuthi ‘asinikele ummoya ocwengileko nasiwubawako.’​—Luk. 11:9, 13; IzE. 1:14; 2:4.

12. NgokwakaHezekiyeli 2:9–3:3, umsongo bewuvelaphi begodu bewuphethe ini?

¹² UHezekiyeli akhenge aqiniswe kwaphela mumoya kaZimu kodwana waqiniswa namamezwi kaZimu. Embonweni, uHezekiyeli wabona isandla siphethe umsongo. (Funda uHezekiyeli 2:9–3:3.) Bewuvelaphi umsongo lo? Bewuphethe ini? Wakuqinisa njani ukukholwa kwakaHezekiyeli? Akhesibone. Umsongo lo bewuvela esihlalweni sakaZimu sobukhosi. Kungenzeka uJehova wasebenzisa enye yeengilozi zakhe ezine ezabonwa nguHezekiyeli phambilini bona zimnikele umsongo lo. (Hez. 1:8; 10:7, 20) Umsongo lo bewunamezwi kaZimu aphethe isahlulelo ebekufuze uHezekiyeli asidlulisele kuma-Israyeli angalaleliko. (Hez. 2:7) Umlayezo lo bewutlolwe phambili nangemva komsongo.

13. Khuyini uJehova ayitjela uHezekiyeli bona ayenze ngomsongo begodu kubayini bewumnandi njengeliju?

¹³ UJehova watjela umphorofidakhe ukuthi adle umsongo lo ‘azalise amathumbakhe ngawo.’ Alalela uJehova, uHezekiyeli wawudla ngokupheleleko. Ingcenye yombono lo beyitjho ukuthini? Bekutlhogeka uHezekiyeli awuzwisise ngokupheleleko umlayezo ebekufuze awudlulisele ebantwini. Bekufuze ube yingcenyakhe, uthinte ingaphakathi lakhe nendlela azizwa ngayo. Kunokhunye okurarako okwenzekako. UHezekiyeli wafumana ukuthi umsongo “bewumnandi njengeliju.” (Hez. 3:3) Kubayini? KuHezekiyeli, ilungelo lokujamela uJehova bekulilungelo elimnandi njengeliju. (Rhu. 19:8-11) Bekakuthabela ukuthi uJehova wamvumela bona abemphorofidi.

14. UHezekiyeli wasizwa yini ukuthi akulungele ukwenza isabelo sakhe?

¹⁴ Ngokukhamba kwesikhathi uJehova watjela uHezekiyeli ukuthi: ‘Faka ehliziyweni begodu ulalele woke amezwami engiwakhulume kuwe.’ (Hez. 3:10) Ngeenqophiswezo, uJehova watjela uHezekiyeli bona afake amezwi la ehliziyweni nemkhumbulwenakhe njengombana bekatlolwe emsongweni begodu acabangisise ngawo. Ukwenza njalo bekuzokunikela uHezekiyeli amandla bekumkhuthaze. Godu ukwenza njalo kwamnikela umlayezo onamandla ebekufuze awutjhumayele ebantwini. (Hez. 3:11) Njengombana umlayezo kaZimu bewusehliziyweni neemlonyenakhe, uHezekiyeli besele akulungele ukwenza isabelwesi.​—Madanisa neRhubo 19:14.

15. Bona sikghodlhelele, khuyini ekutlhogeka ‘siyifake ehliziyweni’?

¹⁵ Bona sikghodlhelele emsebenzinethu wokutjhumayela, kufuze siragele phambili siqiniswa mamezwi kaZimu. Kutlhogeka ‘sifake ehliziyweni’ woke amezwi uJehova awakhuluma kithi. Namhlanjesi uJehova ukhuluma nathi ngeliZwi lakhe, iBhayibheli. Singaqiniseka njani ukuthi amezwi kaZimu aragela phambili athinta indlela esicabanga ngayo, esizizwa ngayo bekayasikhuthaza?

16. Khuyini ekufuze siyenze ngeliZwi lakaZimu, begodu singakufaka njani eenhliziyweni zethu lokho esikufundako?

¹⁶ Njengombana siqina emzimbeni lokha nasidla  ukudla bekugayeke, siyaqina ebuhlobeni bethu noZimu lokha nasifunda besicabangisise ngeliZwi lakhe sikhumbule nalokho esikufunda emsongweni. Naziza eliZwini lakaZimu, uJehova ufuna bona ‘sizalise amathumbethu’ ngalo, lokho kutjho ukuthi silizwisise kuhle. Singakwenza lokho ngokuthandaza, ngokufunda nangokucabangisisa ngalo. Kokuthoma, siyathandaza bona silungise iinhliziyo zethu ukuthi zamukele imicabango kaZimu. Sifunde lokho okuseBhayibhelini bese sijama kancani sicabangisise ngalokho esikufundileko. Uzokuba yini umphumela? Lokha nasicabangisisako, iinhliziyo zethu ezingokomfanekiso zizolizwisisa kuhle iliZwi lakaZimu.

17. Kubayini kuqakatheke khulu ukuthi sicabangisise ngalokho esikufunda eBhayibhelini?

¹⁷ Kubayini kuqakathekile ukufunda iBhayibheli besicabangisise ngalokho esikufundako? Ukwenza njalo kusinikela amandla esiwatlhogako ukuthi sitjhumayele ngomBuso nje, besikghone nokukhupha isahlulelo esinamandla okungenzeka sisirhatjhe ingasikade. Godu, nasicabangisisa ngobuntu obuhle bakaJehova, ubuhlobo bethu naye buyakhula bebuqine. Umphumela uzokuba kukuthi, sizokuthabela into emnandi khulu kwamambala, ukuthula kwangaphakathi nokwaneliseka.​—Rhu. 119:103.

18. Khuyini abantu esibatjhumayezako ekuzokufuze bayivume begodu kubayini?

¹⁸ Ngokungafani noHezekiyeli, thina asikaphefumulelwa bona siphorofide ebantwini. Nanyana kunjalo, sizimisele ukuragela phambili sidlulisela umlayezo onamandla, uJehova awutlole eliZwini lakhe iBhayibheli, bekube kulapho umsebenzethu wokutjhumayela uphelele khona. Lokha nakufika isikhathi sesahlulelo, abantu esibatjhumayezako ngeze babe namabanga wokuthi akhenge basifumane isiyeleliso nokuthi uZimu akanandaba nabo. (Hez. 3:19; 18:23) Kunalokho, kuzokubakhanyela ukuthi umlayezo ebesiwutjhumayela bewuvela kuZimu.

19. Khuyini ezosinikela amandla wokwenza umsebenzi wokutjhumayela?

¹⁹ Khuyini ezosinikela amandla wokwenza umsebenzi wokutjhumayela? Zizinto ezintathu ezaqinisa uHezekiyeli. Siragela phambili nokutjhumayela ngombana siyazi ukuthi sithunywe nguJehova, sifumana amandla ngommoya ocwengileko kaZimu, besiqiniswa ukukholwa ngeliZwi lakaZimu. Ngesizo lakaJehova, siyakukhuthalela ukwenza umsebenzi wokutjhumayela besikghodlhelele bekube “sekupheleni.”​—Mat. 24:13.