1. Sazi njani ukuthi uJehova ufuna ukutjhidela kithi?

 UJEHOVA usimema bona sitjhidele kuye. (Jak. 4:8) Ufuna ukuba nguZimethu, uBabethu noMnganethu. Uyayiphendula imithandazwethu begodu uyasisiza ngeenkhathi ezibudisi. Usebenzisa ihlanganwakhe ukusifundisa nokusivikela. Khuyini ekufuze siyenze nasizakutjhidela kuJehova?

2. Singatjhidela njani kuJehova?

² Singatjhidela kuJehova ngokuthandaza kuye, ngokufunda iliZwi lakhe nangokucabangisisa ngalo. Nasenza njalo, sizomthokoza besimthande khulu. Sizozimisela bona simlalele besimnikele idumo elimfaneleko. (IsAm. 4:11) Lokha nasiragela phambili nokwazi uJehova, kulapho la sizomthemba khona besithembe nehlanganwakhe ayisebenzisako bona asisize.

3. UDeveli ulinga njani ukusihlukanisa noJehova kodwana khuyini engasisiza ukuthi singamlahli uZimethu nehlanganwakhe? (IRhubo 31:13, 14)

³ UDeveli uzama ngakho koke okusemandlenakhe bona asihlukanise noJehova, khulukhulu lokha nasiqalene nobudisi. Ukwenza njani lokho? Kancanikancani, ubogabogisa ukuthemba kwethu uJehova nehlanganwakhe. Singakghona ukuzivikela. Lokha ukukholwa kwethu, ukuthemba kwethu uJehova nehlanganwakhe nakuqinileko, angeze samlahla uZimethu nehlanganwakhe.​—Funda IRhubo 31:13, 14.

4. Sizokucoca ngani esihlokwenesi?

⁴ Esihlokwenesi sizokucoca ngeentjhijilo ezintathu ezingavela ngaphandle kwebandla; ngasinye sazo singabogabogisa ukuthemba kwethu uJehova nehlanganwakhe. Iintjhijilwezi zingasenza njani bona sifulathele uJehova? Khuyini esingayenza bona silwisane noSathana?

5. Iintjhijilo zingakubogabogisa njani ukuthemba kwethu uJehova nehlanganwakhe?

⁵ Ngezinye iinkhathi siqalana neentjhijilo ezinjengokuphikiswa mndeni namkha ukulahlekelwa msebenzi. Iintjhijilo ezinjalo zingakubogabogisa njani ukuthemba kwethu uJehova nehlanganwakhe bezisihlukanise naye? Nasiqalene neentjhijilo isikhathi eside, singazizwa siphelelwa lithemba namandla. USathana usebenzisa amathuba anjalo begodu ufuna sizaze ithando lakaJehova ngathi. UDeveli ufuna sicabange ukuthi nguJehova namkha yihlanganwakhe abasibangela bona sitlhage. Kwenzeka into efanako kwamanye ama-Israyeli ebekaseGibhide. Ekuthomeni bewakholelwa bona uJehova ukhethe uMosi no-Aroni bona bawatjhaphulule ekugqilazweni. (Eks. 4:29-31) Kwathi lokha uFaro nakawagandelela khulu, asola uMosi no-Aroni ngeentjhijilo ebewaqalene nazo, athi: “Nenze uFaro neensebenzi zakhe basihloya benabeka nesabula ezandleni zabo bona basibulale.” (Eks. 5:19-21) Asola iinceku zakaZimu ezithembekileko. Lokho bekudanisa! Nangabe ukghodlhelele iintjhijilo isikhathi eside, ungaragela njani phambili uqinisa ukuthemba kwakho uJehova nehlanganwakhe?

6. Sifundani kilokho okwenzeka emphorofidini uRhabakhukhu endleleni yokuqalana neentjhijilo? (Rhabakhukhu 3:17-19)

⁶ Tjela uJehova lokho okusehliziywenakho ngomthandazo begodu uthembe ukuthi uzokusekela. Umphorofidi uRhabakhukhu waqalana neentjhijilo ezinengi. Kobunye ubujamo wakhe wazibuza nokuthi inga-kghani uJehova unendaba naye na. Yeke wathandaza, watjela uJehova indlela ebekazizwa ngayo. Wathi: “Kuzabe kube kunini Jehova ngisolo ngibawa isizo kodwana ungangizwa? . . . Kubayini ubekezelela abantu abagandelela abanye?” (Rhab. 1:2, 3) UJehova wawuphendula umthandazo osuka ehliziyweni wencekwakhe ethembekileko. (Rhab. 2:2, 3) Ngemva kokuthi uRhabakhukhu acabangisise kuhle ngendlela uJehova asindise ngayo abantu bakhe, wathaba godu. Wabubona ubufakazi bokuthi uJehova unendaba naye begodu uzomsiza akghodlhelele nanyana ngisiphi isitjhijilo. (Funda uRhabakhukhu 3:17-19.) Sifundani thina? Nawuqalana neentjhijilo, thandaza kuJehova umtjele indlela ozizwa ngayo. Linda yena bona akusekele. Nawenza njalo, ungaqiniseka ngokuthi uJehova uzokunikela amandla owatlhogako bona ukghodlhelele. Nawubona indlela uJehova akusekela ngayo, ukukholelwa kwakho kuye kuzokuqina.

7. Khuyini iinhlobo zakaShirley ebezilinga ukumenzisa yona begodu khuyini eyamsiza bona angakulahli ukukholwa kwakhe kuJehova?

⁷ Kukhuthalele ukufunda ngoZimu. Akhesihlole ukuthi lokho kwamsiza njani udadwethu wePapua New Guinea, uShirley lokha nakaqalene neentjhijilo. b Umndeni wekhaboShirley bewudobha phasi begodu ngezinye iinkhathi bekubudisi bona ufumane ukudla. Esinye isihlobo sakhe salinga ukubogabogisa ukuthemba kwakhe uJehova. Sathi: “Uthi ummoya kaZimu uyakusiza kodwana liphi isizwelo nakunje? Umndenakho usatlhaga, umorosa isikhathi sakho ngokutjhumayela.” UShirley uyavuma: “Ngazibuza: ‘Kghani uZimu unendaba nathi namkha awa?’ Msinyana ngathandaza kuJehova ngamthulela okusehliziywenami. Yeke ngaragela phambili nokufunda iBhayibheli neencwadi ezisekelwe kilo, ngatjhumayela begodu ngaya nemihlanganweni yebandla.” Wathoma ukubona ukuthi uJehova bekawutlhogomela  umndenakhe. Umndenakhe akhenge ulale ungakadli begodu bewuhlala uthabile. UShirley uthi: “Ngabona ukuthi uJehova bekayiphendula imithandazwami.” (1 Thim. 6:6-8) Nawukhuthalele ihlelo lakho lokufunda ngoZimu, nawe angeze wavumela iintjhijilo namkha ukuzaza kukuhlukanise noJehova.

8. Khuyini engenzeka kubafowethu abadosa phambili ehlanganweni kaJehova?

⁸ Asebenzisa zokuthintana namkha zethungelelwano, amanabethu arhatjha amala namkha imininingwana engasiliqiniso ngabafowethu abadosa phambili ehlanganweni kaJehova. (Rhu. 31:13) Abanye abafowethu babotjhiwe bebabekwa umlando ngasuthi ziingebengu. AmaKrestu wekhulu lokuthoma nawo aqalana nobujamo obufanako lokha umpostoli uPowula nakamangalelwa ngamala bewabotjhwa. Asabela njani?

9. Khuyini amanye amaKrestu ayenzako lokha umpostoli uPowula nakabotjhwako?

⁹ Amanye amaKrestu wangekhulu lokuthoma alisa ukusekela uPowula lokha nakabotjhwako eRoma. (2 Thim. 1:8, 15) Kubayini? Kghani bebaneenhloni ngoPowula ngebanga lokuthi umphakathi besele umqala njengesigebengu? (2 Thim. 2:8, 9) Inga-kghani bebasaba ukuthi nabo bebazokuhlunguphazwa? Akunandaba ukuthi bebanamaphi amabanga, akhucabange indlela uPowula azizwa ngayo. Wakghodlhelela iintjhijilo ezinengi wabeka nokuphila kwakhe engozini ngebanga labo. (IzE. 20:18-21; 2 Kor. 1:8) Asingafani nabantwabo, abangakhenge basize uPowula ngesikhathi ebekabatlhoga ngaso! Khuyini ekufuze siyikhumbule abafowethu abadosa phambili nabahlunguphazwako?

10. Khuyini ekufuze siyikhumbule ngabafowethu abadosa phambili lokha nabahlunguphazwako, begodu kubayini?

¹⁰ Khumbula ukuthi kubayini sihlunguphazwa nokuthi ngubani obangela lokho. Yesibili kaThimothi 3:12 ithi: “Boke abafisa ukuphila ngokuzinikela kuZimu njengabafundi bakaKrestu Jesu nabo bazokuhlunguphazwa.” Yeke akukafuzi kusimangaze uSathana nakasahlela abafowethu abadosa phambili. Ihloswakhe  kuqeda ukuthembeka kwabo nokuthi asithusele.​—1 Pit. 5:8.

11. Khuyini esiyifunda kilokho okwenziwa ngu-Onesiforu? (2 Thimothi 1:16-18)

¹¹ Ragela phambili nokusekela abafowenu begodu unamathele kibo ngokuthembeka. (Funda yesi-2 kaThimothi 1:16-18.) UmKrestu wangekhulu lokuthoma u-Onesiforu wenza okuhlukileko lokha uPowula nakabotjhiweko. “Akhenge abe neenhloni ngokubotjhwa kwami [kwakaPowula] ngeenketani.” Kunalokho, u-Onesiforu waragela phambili nokufuna uPowula, kwathi lokha nakamfumanako, wafuna iindlela ebekangamsekela ngazo. Ngokwenza njalo, bekafaka ukuphila kwakhe engozini. Sifundani thina? Akukafuzi sivumele ukusaba abantu kusikhandele bona sisekele abafowethu abahlunguphazwako. Kunalokho, asibavikeleni besibasize. (IzA. 17:17) Batlhoga ithando nesekelo lethu.

12. Khuyini esiyifunda kilokho okwenziwa bafowethu nabodadwethu eRussia?

¹² Akhesifunde endleleni abafowethu beRussia abasekele ngayo abafowabo ababotjhiweko. Lokha abanye nabayokugwetjwa, inengi labafowethu laya ekhotho bona liyobasekela. Sifundani thina? Lokha abafowethu abadosa phambili nabahlanjalazwako, babotjhwa namkha bahlunguphazwa, ungakuvumeli lokho kukuthuse. Bathandazele, tlhogomela amalunga wemindenabo begodu ufune iindlela ongabasekela ngazo.​—IzE. 12:5; 2 Kor. 1:10, 11.

13. Ukuhlekiswa ngathi kungakubogabogisa njani ukuthemba kwethu uJehova nehlanganwakhe?

¹³ Iinhlobo zethu ezingakholwako, abantu esisebenza nabo namkha esifunda nabo, bangahlekisa ngathi ngebanga lomsebenzi wokutjhumayela namkha ngokuphila ngeenkambiso zakaJehova zokuziphatha eziphakemeko. (1 Pit. 4:4) Bangathi: “Yazi wena ngiyakuzwisisa, kodwana ikolwakho iyagandelela begodu ngeyakade.” Abanye bangasinyefula ngendlela esiphatha ngayo abantu abasusiweko ekuhlanganyeleni, bangabe bathi: “Utjho njani ukuthi umumuntu onethando?” Amezwi anjengalawa angenza bona sizaze. Singathoma ukuzibuza: ‘Kghani uJehova ufuna okungaphezu kwamandlami? Inga-kghani ihlangano kaJehova iyagandelela?’ Nawuqalene nobujamobu, ungahlala njani utjhidelene noJehova nehlanganwakhe?

14. Kufuze sisabele njani lokha abanye nabahlekisa ngathi ngebanga lokuphila ngeenkambisolawulo zakaJehova? (IRhubo 119:50-52)

¹⁴ Zimisele ukuphila ngeenkambisolawulo zakaJehova. UJobho wakghona ukuphila ngeenkambisolawulo zakaJehova ngitjho nanyana abanye bebahlekisa ngaye. Enye yamadoda ebeyizibiza ngomngani kaJobho, yalinga ukwenza uJobho akholelwe ukuthi akunandaba kuZimu ukuthi uJobho uphila ngeenkambisolawulo zakhe namkha awa. (Job. 4:17, 18; 22:3) UJobho akhenge afune ukuwakholelwa amala la. Bekazi ukuthi iinkambisolawulo zakaJehova malungana nokulungileko nokungakalungi, ngizo ezifaneleko begodu bekazimisele ukuphila ngazo. Akhenge avumele abanye bona bamenze angathembeki. (Job. 27:5, 6) Sifundani thina? Ungavumeli ukuhlekiswa ngawe kukwenze uzaze iinkambisolawulo zakaJehova. Cabanga ngalokho okwenzeke ekuphileni kwakho. Akhenge ubone na ukuthi iinkambisolawulo zakaJehova zilungile begodu ziyazuzisa? Zimisele ukusekela ihlangano ekhamba ngeenkambisolawulwezo. Akunandaba ukuthi  abantu bahlekisa ngathi kangangani, angeze salisa ukulotjha uJehova.​—Funda IRhubo 119:50-52.

15. Kubayini bekuhlekiswa ngoBrizit?

¹⁵ Akhesicoce ngalokho okwenzeka kudadwethu uBrazit we-India. Amalunga womndenakhe ahlekisa ngaye ngebanga lokukholwa kwakhe. Msinyana ngemva kokubhajadiswa kwakhe ngo-1997, ubabakwakhe ongakholwako walahlekelwa msebenzi. Yeke, ubabakwakhe waqunta bona yena, uBrizit namadodakazabo bakhambe bayokuhlala nababelethi bakhe, ebebahlala kwelinye idorobho. Lokho kwenza bona uBrizit aqalane nezinye iintjhijilo. Ngebanga lokuthi ubabakwakhe besele angasasebenzi, kwatlhogeka ukuthi yena asebenze isikhathi esizeleko bona atlhogomele umndenakhe. Ngaphezu kwalokho, ibandla ebekahlanganyela kilo belikude ngamakhilomitha ama-350 ukusuka la ahlala khona. Okubuhlungu kukuthi umndeni wendodakhe bewumphikisa ngebanga lokukholwa kwakhe. Ubujamo baba bumbi khulu kangangokuthi uBrizit nomndenakhe kwafuze bafuduke godu. Kwathi kusesenjalo, ubabakwakhe wahlongakala bangakalindeli. Ngokukhamba kwesikhathi, enye yamadodakazakhe yahlongakala ngebanga lekankere ineminyaka eli-12. Okwathela itswayi esilondeni kukuthi iinhlobo zakhe zasola yena ngazo zoke izehlakalwezi. Bezithi, ngathana akhenge abe nguFakazi kaJehova, izehlakalwezi bengekhe zibehlele. Nanyana kunjalo, waragela phambili nokuthemba uJehova begodu wahlala aseduze nehlanganwakhe.

16. Ukunamathela kwakaBrizit kuJehova nehlanganwenakhe kwabusiswa njani?

¹⁶ Njengombana uBrizit bekahlala kude nebandla, umbonisi okhambako wamkhuthaza bona atjhumayele esiminekhabo begodu arage nemihlangano ekhaya. Ekuthomeni wazizwa agandelelekile, kodwana walandela isinqophiso. Wacocela abanye iindaba ezimnandi, wabamba imihlangano kwakhe begodu wazibekela nesikhathi sokuraga ukulotjha komndeni namadodakazakhe. Waba yini umphumela? UBrizit wakghona ukuthoma  bewaraga iimfundo zeBhayibheli ezinengi begodu inengi leemfundo zakhe labhajadiswa. Ngo-2005, waba liphayona lesikhathi esizeleko. Ukuthemba kwakhe uJehova nehlanganwakhe kwamlethela iimbusiso. Amadodakazakhe alotjha uJehova ngokuthembeka begodu nje sele kunamabandla amabili endawenekhabo! UBrizit ukukholelwa kwamambala ukuthi nguJehova omnikele amandla wokuqalana neentjhijilo zakhe nawokukghodlhelelela ukuhlekwa mndenakhe.

17. Khuyini ekufuze sizimisele ukuyenza?

¹⁷ USathana ufuna sikholelwe ukuthi uJehova angeze asisekela lokha nasiqalene neentjhijilo begodu ihlangano kaJehova angeze yasisekela lokha ubujamo nabuba budisi ukuya phambili. USathana ufuna singenwe mamanzi emadolweni lokha abafowethu abadosa phambili nabahlanjalazwako, bahlunguphazwa namkha bafakwa ngemajele. Ngokuhlekisa ngathi, ufuna ukubogabogisa ukuthemba kwethu iinkambisolawulo zakaJehova nehlanganwakhe. Sizazi kuhle iindlela zakhe ezimbi begodu angeze zasibamba. (2 Kor. 2:11) Zimisele ukubalekela amala kaSathana begodu uhlale uthembekile kuJehova nehlanganwenakhe. Khumbula, uJehova angeze akulahla. (Rhu. 28:7) Yeke, ungavumeli litho likuhlukanise noJehova!​—Rom. 8:35-39.

18. Khuyini esizokucoca ngayo esihlokweni esilandelako?

¹⁸ Esihlokwenesi sicoce ngeentjhijilo esingaqalana nazo ezivela ngaphandle kwebandla. Ukuthemba kwethu uJehova nehlanganwakhe kungalingwa naziintjhijilo ezivela ngaphakathi ebandleni. Singaqalana njani ngokuphumelelako neentjhijilwezo? Sizokucoca ngendaba le esihlokweni esilandelako.