IINDELA ZOKUFUNDA
Fumana Indawo Efaneleko Ozokufundela Kiyo
Kghani ungathanda ukuzuza ngokungeziweko nawenza isifundo somuntu mathupha? Ungalinga nakhu okulandelako bona ufumane indawo elungileko ongafundela kiyo:
-
Khetha indawo ozokukghona ukufunda nawukiyo. Linga ukufumana indawo ehlwengileko, enomkhanyo olingeneko bona ukghone ukubona nawufundako. Ungahlala esitulweni netafuleni namkha ukhethe indawo ozokutjhaphuluka kiyo.
-
Fumana indawo ozokukghona ukuba wedwa kiyo. UJesu wakhetha ukuthandaza “ekuseni khulu” begodu wakhetha ‘indawo enganamuntu.’ (Mar. 1:35) Nangabe akukghonakali bona ube wedwa, yazisa umndenakho namkha abantu ohlala nabo nasele kusikhathi sokufunda begodu ubabawe bangakuphazamisi.
-
Dzimelela kilokho okufundako. Susa izinto ezingakuthikazisa. Nakwenzeka ufunde ngefowuni namkha i-tablet yenza bona imilayezo ingakuthikazisi nayingenako. Nakwenzeka ucabange ngokuthileko ekufuze ukwenze, kutlole phasi bona ukwenze nawuqeda ukufunda. Nawuzizwa ngasuthi awusakghoni ukudzimelela kilokho okufundako, phumula kancani mhlamunye ukhambakhambe namkha uzilule.