KGHANI ukufumana kubudisi ukwenza isifundo somuntu mathupha qobe? Kghani ngezinye iinkhathi ufumana ukufunda iBhayibheli kungathabisi? Soke sizizwa njalo ngezinye iinkhathi. Ukuhlamba kumsebenzi begodu kuthatha isikhathi kodwana ngemva kokuthi uhlambile, uzizwa kamnandi begodu uqabulekile. Nokufunda iBhayibheli kungasiqabula, kube ngasuthi ‘sihlanzwa ngamanzi welizwi.’ (Efe. 5:26) Akhesicoce ngezinto ezingasisiza:

• Yenza ihlelo. Isifundo somuntu mathupha sibalwa hlangana ‘nezinto eziqakatheke khulu’ ekungakafuzi umuntu olotjha uJehova azeqisele amehlo. (Flp. 1:10) Into engakusiza ungalibali isikhathi ekufuze ufunde ngaso, ungatlola ilanga nesikhathi ephepheni begodu ulibeke lapha kuzokuba lula khona ukulibona. Ungenza ne-alarm efoninakho bona ikukhumbuze nasele kusikhathi sokufunda.

• Khetha isikhathi nendlela yokufunda ezokusiza uzuze ngokungeziweko. Kghani ukghona ukufunda isikhathi eside namkha esifitjhani? Nguwe obazi kuhle ubujamo bakho. Tjhugulula indlela ofunda ngayo kuye ngalokho okutlhogako. Nawuzizwa udonda ukufunda nakufika isikhathi sakho sokufunda, linga ukufunda imizuzu elitjhumi kwaphela. Ngokwenza njalo, uzokuzuza khulu kunokukhetha ukungafundi. Kungenzeka nasele uthomile ukhuthazeke ukuragela phambili ufunda.—Flp. 2:13.

• Khetha iinhloko ofuna ukuzifunda ngaphambi kokuthi ufunde. Nawuhlala phasi usolo ucabanga ngokuthi ngisiphi isihloko ofuna ukusifunda, kungenzeka ‘ungasisebenzisi kuhle isikhathi sakho.’ (Efe. 5:16) Kubayini ungabekeli eqadi iinhloko ongathanda ukuzifunda? Nakwenzeka uzibuze okuthileko, kutlole phasi. Kuzokuthi ngemva kokufunda, kungenzeka kube neenhloko ezingeziweko ozokufunda ngazo esikhathini esizako.

• Yenza amatjhuguluko nakutlhogekako. Yenza amatjhuguluko esikhathini osisebenzisela ukufunda, njengokuthi uzokuba nesikhathi esingangani ufunda isihloko esithileko namkha iinhloko ozikhethako. Akukaqakatheki khulu ukuthi ufunda ini, ufunda isikhathi esingangani, ufunda ngani, okuqakatheke khulu kukuthi ufunde qobe.

Sizuza khulu nasenza isifundo somuntu mathupha qobe veke, sitjhidela kuJehova, sifunda ukwenza iinqunto ezihle begodu sizizwa siqabulekile.—Jotj. 1:8.