ISIKHULU samaNazi satjela isiqubuthu saboFakazi bakaJehova hlangana nePi yePhasi Yesi-II sathi: “Nange omunye wenu ala ukulwa epini esizoyilwa neFrance namkha ne-England noke kuzokufuze nife.” Ngitjho nanyana bekunamasotja we-SS aphethe iinkhali eduze kwabo, akekho namunye umfowethu owavuma ukuyokulwa. Bebanesibindi kwamambala! Isibonelwesi, siwuveza kuhle umbonwethu njengaboFakazi bakaJehova: Siyala ukulwa izipi zephaseli. Ngitjho nanyana basithusela ngokusibulala, asifuni ukuthatha ihlangothi eendabeni zephaseli zepikiswano.

1. BOKE ABANTU BAKAZIMU BEKUNGEBESITJHABA SINYE

Ekadeni, uJehova wakhetha isitjhaba sinye bona sibe babantu bakhe, isitjhaba sakwa-Israyeli. Wabiza ama-Israyeli ngokuthi ‘ngabakhethekileko bakhe phakathi kwezizwe zoke.’ (Eks. 19:5) UZimu godu wabanikela inarha ethileko. Yeke, uZimu nakathi u-Israyeli kufuze aye epini nezinye iintjhaba bekangalwi namkha abulale abantu abalotjha uJehova kunye naye. a

Namhlanjesi, abantu abalotjha Jehova kwamambala bavela ‘kizo zoke iintjhaba, iinkoro, abantu namalimi.’ (IsAm. 7:9) Ngathana abantu bakaZimu bebahlanganyela epini, bebazokulwa bebabulalane bodwa.

 2. UJEHOVA WAKHIPHA UMYALO WOKOBANA AMA-ISRAYELI AYE EPINI

Ekadeni, uJehova nguye obekaqunta ukuthi ama-Israyeli kufuze aye nini epini begodu kubayini: Ngokwesibonelo, uZimu wayala u-Israyeli bona alwe namaKhanana, ebewenza izenzo ezimbi zomseme begodu alotjha namadimoni bewanikele nangabentwana kibozinyana babo. Godu uJehova wayala u-Israyeli bona asuse boke abantu abambi eNarheni yesiThembiso ukuze bangadoseli u-Israyeli ekwenzeni izinto ezimbi. (Lev. 18:24, 25) Ngemva kokuhlala eNarheni yesiThembiso uZimu bekabavumela bona baye epini ngezinye iinkhathi ukwenzela bona amanababo angabagandeleli. (2 Sam. 5:17-25) Nanyana kunjalo, akukho la uJehova avumela khona ama-Israyeli bona aziquntele ukuya epini. Nabebenza njalo, umphumela bewuba mumbi khulu.—Num. 14:41-45; 2 Kron. 35:20-24.

Namhlanjesi, uJehova akabavumeli abantu ukuthi baye epini. Iintjhaba zilwa ukwenzela bona zizithuthukise zona kunokwenza iintando kaZimu. Iintjhaba zilwa ngebanga lokuthi zifuna ukuba nenarha enengi, ukwenza imali enengi namkha zifuna ukuthuthukisa zepolotiki enarhenazo. Kuthiwani ngalabo abathi balwa ngebizo lakaZimu begodu bavikela nokulotjha kwabo namkha babulala amanaba kazimu? UJehova uzobavikela labo abamlotjha kwamambala begodu arhayile amanabakhe esikhathini esizako esingaphelisi ihliziyo, epini ye-Arimagedoni. (IsAm. 16:14, 16) Epini leyo, amasotja kaZimu kuzokuba mabutho wezulwini kwaphela, ingasi ibutho abantu.—IsAm. 19:11-15.

3. AMA-ISRAYELI BEWANGABABULALI LABO EBEBATJENGISA UKUKHOLELWA KUJEHOVA

Ekadeni, ibutho lama-Israyeli kanengi belingababulali labo ebebatjengisa ukukholelwa kuZimu kodwana bebabulala kwaphela labo uJehova ebekathi bafanelwe kukufa. Tjheja iimbonelo ezimbili zalokho. Nanyana uJehova wakhupha umyalo wokobana kurhayilwe iJerikho, ama-Israyeli khenge ambulale uRarhabhu nomndenakhe ngebanga lokukholwa kwabo. (Jotj. 2:9-16; 6:16,  17) Ngokukhamba kwesikhathi, idorobho loke leGibhiyoni khenge lihlaselwe ngemva kobana beGibhiyoni batjengise ihlonipho nokusaba uZimu.—Jotj. 9:3-9, 17-19.

Namhlanjesi, iinarha ezinengi ezilwako azinandaba nalabo abatjengisa ukukholwa. Ngezinye iinkhathi abahlali abanganamlandu bayabulawa hlangana nezipi zeenarha.

4. AMA-ISRAYELI BEWALANDELA IMITHETHO KAZIMU YEPI

Ekadeni, uJehova bekafuna bona amasotja wakwa-Israyeli alandele iinqophiso zakhe lokha nawaya epini. Ngokwesibonelo, ngezinye iinkhathi uZimu bekabawa u-Israyeli bona nakayokulwa nedorobho elithileko athome “ngokubekelana nalo imibandela.” (Dut. 20:10) UJehova bekalindele bona amasotja wakwa-Israyeli kunye nekampa yawo ahlale ahlwengekile khulukhulu ngokokuziphatha. (Dut. 23:9-14) Iintjhaba ebezibhode u-Israyeli bezithi lokha naziqeda ukuhlula inarha ethileko, zigagadlhele abomma benarha leyo, uJehova wakhandela ama-Israyeli bona enze okufanako. Ekhabolakhona, bewangatjhada nomuntu wenarha ethunjiweko leyo kodwana bebangakwenza ngemva kokuthi kundlule iinyanga yinye idorobhelo lithunjiwe.—Dut. 21:10-13.

Namhlanjesi, iinarha ezinengi zitlikitle isivumelwano semibandela yokulwa izipi. Nanyana isivumelwanesi sihloselwe ukuvikela abahlali benarha, kuyadanisa ukuthi imithetho le ayihlonitjhwa.

5. UJEHOVA BEKAYILWELA INARHAKHE

Ekadeni, uJehova bekalwela u-Israyeli begodu kanengi bekuba yikarisomraro indlela ebebathumba ngayo izipi. Ngokwesibonelo, kghani uJehova wawasiza njani ama-Israyeli bona ahlule idorobho leJerikho? Ngemva kokukhipha kwakaJehova isinqophiso lokha ama-Israyeli ‘nawahlaba umkhosi, umthangala weJerikho wabhusuka phasi,’ okwenza kwaba bulula bona bathumbe idorobho. (Jotj. 6:20) Kghani bayithumba njani ipi nabalwa nama-Amori? “USomnini wawululela iingiditjha zesinanja phezu kwabo . . . Abafa ngebanga leengiditjha zesinanja baba banengi ukudlula ababulawa ma-Israyeli ngesabula.”—Jotj. 10:6-11.

AMAKRESTU WEQINISO BABENZI BOKUTHULA

Njengombana sibonile, ubujamo bethu namhlanjesi buhluke khulu kunobujamo bama-Israyeli wekadeni. Nanyana kunjalo, ukuhlukokhu akusizo kwaphela iinzathu zokobana singayi epini. Kunezinye godu. Ngokwesibonelo, uZimu wabikezela ukuthi emalangeni wokuphela, labo abafundiswa nguye ‘angekhe bazibandulela ipi,’ ingasabalwa yokuhlanganyela kiyo. (Isa. 2:2-4) Ukungezelela kilokho uKrestu wathi abafundi bakhe ‘abasiyingcenye yephaseli,’ bazokuhlala bangathathi ihlangothi kwezepolotiki neempini zephaseli.—Jwa. 15:19.

UKrestu wakhuthaza abafundi bakhe godu bona benze okungeziweko. Wabakhuthaza bona babalekele izinto ezizobenza babe nehloyo, ilaka begodu bathande ipi. (Mat. 5:21, 22) Ngaphezu kwalokho, wanqophisa abafundi bakhe bona babe ‘babenzi bokuthula’ bebathande namanababo.—Mat. 5:9, 44.

Kuthiwani ngathi namhlanjesi? Kungenzeka bona asinaso nesincani isifiso sokulwa nanyana ngiyiphi ipi kodwana inga-kghani kukhona izinto ezithileko ezingaphakathi eenhliziyweni zethu ezingenza bona silwe namkha kube nokuhlukana ebandleni? Asirageleni phambili silwela ukususa nanyana ngimuphi umuzwa ongakafaneli ngepi, okungenzeka ungaphakathi kithi.—Jak. 4:1, 11.

Kunokuhlanganyela eempini zeenarha, sithuthukisa ukuthula nethando hlangana nathi. (Jwa. 13:34, 35) Kwangathi singahlala sizimisela bona singathathi ihlangothi njengombana siqale phambili elangeni la uJehova azokususa khona yoke ipi ngokungapheliko.—Rhu. 46:9.