1. Kutjho ukuthini ‘ukwazi bona sitlhoga uZimu’ begodu lokho kuhlobene njani nethabo lethu?

 ITHABO lamambala akusimumuzwa okufikelako bewukhambe. Lihlala ekuphileni komuntu koke. Njani? Etjumayelwenakhe yentabeni uJesu wahlathulula wathi: “Bayathaba abaziko bona batlhoga uZimu.” (Mat. 5:3) UJesu bekazi ukuthi abantu badalwa banesifiso sokwazi nokulotjha uMdalabo, uJehova uZimu. Lokho ‘kutlhoga uZimu.’ Njengombana uJehova ‘anguZimu othabako,’ labo abamlotjhako bazokuthaba.—1 Thim. 1:11.

2-3. (a) NgokwakaJesu bobani abanye ekufuze bathabe? (b) Khuyini esizokucoca ngayo esihlokwenesi, begodu kubayini kutlhogeka?

² Kghani sizokuthaba kwaphela nasinganamraro? Awa. Etjumayelwenakhe uJesu watjho into erarako. Labo “abalilako” mhlamunye ngebanga lokugandelelwa zizono namkha kugandelelwa bujamo obuhlukahlukeneko ekuphileni kwabo, bangathaba. UJesu watjho into efanako nangalabo “abahlunguphazwa ngebanga lokulunga namkha ngebanga lokuba balandeli bakaKrestu. (Mat. 5:4, 10, 11) Kuza njani bona abantu bathabe naphezu kobujamo obunjalo?

³ UJesu wasifundisa ukuthi asithatjiswa kukuthi izinto zisikhambela kuhle ekuphileni kwethu kodwana sithatjiswa kukuthi sanelisa isifiso sethu sokwazi nokutjhidela kuZimu. (Jak. 4:8) Singakwenza njani lokho? Esihlokwenesi sizokucoca ngamagadango amathathu azosenza sifumane ithabo lamambala.

4. Ngiliphi igadango lokuthoma elizosisiza sifumane ithabo lamambala? (IRhubo 1:1-3)

⁴ IGADANGO 1: Nasizakuthaba kwamambala kufuze sifunde besirhubhulule iliZwi lakaZimu. UJesu wamadanisa iliZwi lakaZimu nokudla. Kokubili abantu neenlwana kutlhogeka badle ukudla nabazakuphila. Kodwana babantu kwaphela abakghona ukufunda iliZwi lakaZimu begodu kutlhogeka silifunde. Kungebangelo uJesu athi: “Umuntu akaphili ngesikwa sodwa, kodwana nangawo woke amezwi aphuma emlonyeni kaJehova.” (Mat. 4:4) Yeke, ilanga alingadluli singakalifundi iliZwi lakaZimu eliligugu, iBhayibheli. Umrhubi wathi: ‘Ubusisiwe loyo ifundiso kaSomnini ikuthaba kwakhe, uyihumuza imini nobusuku.’—Funda IRhubo 1:1-3.

5-6. (a) Khuyini esiyifunda eBhayibhelini? (b) Ukufunda iBhayibheli kungasisiza ngaziphi iindlela?

⁵ Ngebanga lokuthi uJehova uyasithanda usebenzise iBhayibheli bona asitjengise ukuthi khuyini esingayenza bona sihlale sithabile. EBhayibhelini sifunda ukuthi uyini umnqophwakhe ngathi. Sifunda nokuthi singatjhidela njani kuye besilitjalelwe nezono zethu. Godu sifunda nangethemba elihle lengomuso. (Jor. 29:11) Amaqiniso esiwafunda eBhayibhelini la asenza sithabe!

⁶ Siyazi ukuthi iBhayibheli lizele iinluleko esingazisebenzisa ekuphileni kwethu kwaqobe. Nasizisebenzisako iinlulekwezo sizokuthaba. Lokha nasizizwa sidanile ngebanga lemiraro eyenzeka ekuphileni kwethu, asizinikeleni isikhathi sokufunda iliZwi lakaJehova besicabangisise ngalo. UJesu wathi:  “Abathabako ngilabo abezwa ilizwi lakaZimu balenze!”—Luk. 11:28.

7. Khuyini engakusiza uzuze ngokungeziweko ekufundeni kwakho iBhayibheli?

⁷ Njengombana ufunda iliZwi lakaZimu, zinikele isikhathi sokukuthabela lokho okufundako. Akhe sifanekise inga-Kghani khekwenzeka kuwe okufana nalokhu? Umuntu othileko ukuphekele ukudla okuthandako. Ngebanga lokuthi awunaso isikhathi esaneleko sokukudla kuhle namkha kunezinto ezithileko ezikuphazamisako, izinto ocabanga ngazo, ukudlokhu ukudla msinyana ngaphandle kokukunambithisisa kuhle. Ngemva kokuqeda ukudla ukhumbula ukuthi ukudlokhu ukudle msinyana, ufisa ngathana uziphe isikhathi sakho wakunambithisisa kuhle. Ngendlela efanako lokha nasifunda iBhayibheli singalifundi msinyana besibhalelwe nakunambithisisa kuhle umlayezwalo. Ziphe isikhathi sokuthabela ukufunda iliZwi lakaZimu, zibone ngelihlo lengqondo izinto ofunda ngazo linga ukucabanga ngetjhada lamaphimbo begodu ucabangisise ngalokho okufundako. Nawenza njalo uzokuthabela ukufunda iliZwi lakaZimu.

8. Inceku ethembekileko nehlakaniphileko iwenza njani umsebenzawo? (Qala umtlolo waphasi.)

⁸ UJesu wabeka “inceku ethembekileko nehlakaniphileko” bona isinikele ukudla ngesikhathi esifaneleko, begodu asisweli litho. b (Mat. 24:45) ImiTlolo ephefumulelweko iziinthako eziveleleko kiyo yoke into ekhutjhwa yinceku ethembekileko. (1 Thes. 2:13) Ukudlokhu kusisiza sazi indlela uJehova acabanga ngayo njengombana ivezwe eBhayibhelini. Kungebangelo sifunda abomagazini isiThala nePhaphama! kunye neenhloko eziku-jw.org. Silungiselela imihlangano yaphakathi neveke neyangepelaveke. Sibukela ihlelo le-JW Broadcasting^® ngalinye. Nange siqinisekisa ukuthi siragela phambili ngokufunda besenze irhubhululo ngeBhayibheli sizokukghona ukuthatha igadango lesibili elizosenza sihlale sithabile.

9. Ngiliphi igadango lesibili elenza bona sithabe kwamambala?

⁹ IGADANGO 2: Bona sithabe kwamambala, kufuze siphile ngeenkambisolawulo zakaJehova. Umrhubi wathi: “Ubusisiwe owesaba uSomnini, okhamba eendleleni zakhe.” (Rhu. 128:1) Ukusaba uJehova kutjho ukuthi siyamhlonipha begodu angeze senza nanyana yini ezomdanisa. (IzA. 16:6) Yeke, senza koke okusemandlenethu bona silandele iinkambisolawulo zakaJehova eziseBhayibhelini malungana nokulungileko nokungakalungi. (2 Kor. 7:1) Sizokuthaba nasenza izinto uJehova azithandako begodu sibalekele ukwenza izinto azihloyileko.—Rhu. 37:27; 97:10; Rom. 12:9.

10. NgokwebeRoma 12:2 sinamuphi umthwalo?

¹⁰ Funda kwebeRoma 12:2. Umuntu angazi ukuthi uJehova unelungelo lokuqunta bona khuyini elungileko nengakalungi kodwana umuntu loyo kufuze yena ngokwakhe azamukele iinkambisolawulo zakaZimu. Ngokwesibonelo, umuntu angazi bona urhulumende unelungelo lokubeka umthetho wendlela. Kungenzeka bona umuntu loyo angafuni ukwamukela imithetho leyo. Umphumela walokho kungaba kukuthi lokha nakatjhayelako atjhayele ngebelo eliphezulu. Sitjengisa ngendlela esenza ngayo bona siyakukholelwa ukuthi ukulandela iinkambisolawulo zakaJehova yindlela ephuma phambili yokuphila. (IzA. 12:28) Kungebangelo uDavida athi ngoJehova: “Wena ungikhombisa  indlela yokuphila. Ukujabula okwanelisako kuphambi kwakho nokwenama kungesidleni sakho isiphelani.”—Rhu. 16:11.

11-12. (a) Nasitshwenyekileko namkha sigandelelekileko khuyini ekufuze siyitjheje? (b) Amezwi asemTlolweni webeFilipi 4:8 angasisiza njani lokha nasikhetha zokuzithabisa?

¹¹ Nasigandelelekileko namkha sitshwenyekileko singatlhoga ukwenza okuthileko okungasisiza bona silise ukutshwenyeka ngemirarwethu. Lokho kuyazwisiseka kodwana kufuze sitjheje bona singadoseleki ekwenzeni into ethileko uJehova ayihloyileko.—Efe. 5:10-12, 15-17.

¹² Encwadini ayitlolela beFilipi umpostoli uPowula wakhuthaza amaKrestu bona aragele phambili acabanga ngezinto “ezilungileko,  . . . ezimsulwa,  . . . ezithandekako, nananyana ngiziphi izinto ezifanelwa kudunyiswa.” (Funda kwebeFilipi 4:8.) Nanyana uPowula bekangatloli malungana nezokuzithabisa, akutlolako kufuze kusenze sicabangisise lokha nasikhetha zokuzithabisa. Akhulinge nakhu: nanyana kukuphi lapha kuvela khona igama elithi “izinto” evesineli, linga ukulijamiselela ngelithi, “iingoma,” “amamuvi,” “iindatjana” namkha “imidlalo yamavidiyo.” Ukwenza njalo kungakusiza ukghone ukubona ukuthi ngiziphi izinto ezamukelekako kuJehova nezingamukelekiko. Sifuna ukuphila kwethu kuvumelane neenkambisolawulo zakaJehova eziphakemeko. (Rhu. 119:1-3) Ngemva kwalokho sinonembeza ohlwengekileko singathatha igadango elilandelako elizosenza sithabe kwamambala.—IzE. 23:1.

13. Ngiliphi igadango lesithathu elizokwenza sithabe kwamambala?

¹³ IGADANGO 3: Qinisekisa ukuthi ukulotjha uJehova kuza qangi ekuphileni kwakho. Njengombana uJehova anguMdalethu kufuze simlotjhe. (IsAm. 4:11; 14:6, 7) Yeke, kuqakathekile bona simlotjhe ngendlela ayamukelako “ngommoya nangeqiniso.” (Funda uJwanisi 4:23, 24.) Sifuna ummoya kaZimu ocwengileko unqophise ukumlotjha kwethu begodu uvumelane namaqiniso afumaneka eliZwini lakhe. Ukumlotjha kwethu kufuze kuze qangi ngitjho nanyana siphila enarheni la umsebenzethu uvinjelwe khona. Bekube nje abafowethu nabodadwethu abangaphezu kwabayi-100 bavalelwe ngemajele ngebanga lokuthi baboFakazi bakaJehova. c Nanyana kunjalo, bathabile benza koke okusemandlenabo bona bathandaze, bafunde begodu batjele abanye ngoZimethu nangombuswakhe! Nasihlunguphazwako namkha umsebenzethu wokutjhumayela uvinjelwe, sizokuthaba nasazi ukuthi uJehova unathi begodu uzosinikela umvuzo.—Jak. 1:12; 1 Pit. 4:14.

14. Kwenzekani kumfowethu osesemutjha weTajikistan begodu kubayini?

¹⁴ Isibonelo samambala esikhathini sethu siyasiqinisekisa ngokuthi amagadango amathathu esifunde ngawo angenza ukuthi sifumane ithabo lamambala, kungayi ngokuthi ubujamo bethu bunjani. Akhesicoce ngalokho okwenzeka kumfowethu oneminyaka eli-19, uJovidon Bobojonov weTajikistan, owala ukuya epini. Ngo-Oktoba 4, 2019, wathathwa ekhabo wathunjwa iinyanga ezimbalwa bewaphathwa njengesigebengu. Indaba yokuphathwa ngokunganabulungiswa le yaziwa nakwezinye iinarha. Kwabikwa ukuthi wabetjhwa, agandelelwa bona enze isifungo sokuya epini bekambathe nezambatho zepi. Ngemva kwalokho, ikhotho yathi  umlandu, yamfaka ngekampeni bekwaba kulapho umongameli wenarha afumana bona akanamlandu bewathi akatjhatjululwe. Kiso soke isikhathesi, uJovidon wahlala athabile. Njani? Ngokuhlala akhumbula bona utlhoga uZimu.

15. UJovidon bekafunda bekarhubhulule njani ngeBhayibheli lokha nakasejele?

¹⁵ Nakasejele uJovidon waragela phambili ngokufunda nokurhubhulula ngeliZwi lakaZimu, ngitjho nanyana bekanganalo iBhayibheli neencwadi ezisekelwe kilo. Wakwenza njani lokho? Abafowethu nabodadwethu ebebamlethela ukudla bebatlola umtlolo welanga eenkhwameni ebeziphethe ukudla. Yeke, wakghona ukufunda iBhayibheli bewazindla ngalo qobe lilanga. Nakaqeda ukutjhatjululwa ngejele wakhipha nasi iseluleko, malungana nalabo abangakaqalani nokuhlunguphazwa: “Kuqakathekile ukuthi usebenzise ikululekwakho ngokuzeleko bona ukhulise ilwazi lakho ngoJehova ngokuthi ufunde iliZwi lakhe neencwadi ezisekelwe kilo.”

16. UJovidon bekacabanga ngani khulu?

¹⁶ Umfowethu lo waphila ngokuvumelana neenkambisolawulo zakaJehova. Kunokudzimelela emfisweni ezimbi begodu abandakanyeke ekuziphatheni okumbi, wadzimelela  kuJehova nakilokho okumthabisako. UJovidon wakarwa bubuhle bendalo kaZimu. Qobe ekuseni bekavuka alalele itjhada lombhino weenyoni, kuthi ebusuku aqale inyanga neenkwekwezi. Uthi: “Iziphwezi ezivela kuJehova zangenza ngathaba bengakhuthazeka.” Nasikuthokozela lokho uJehova asenzela kona bona siphile kunye nelungiselelo lokobana sibe netjhebiswano elihle naye, iinhliziyo zethu zizokuthaba begodu ithabwelo lizokuqinisa ikghono lethu lokukghodlhelela.

17. Amezwi akweyoku-1 kaPitrosi 1:6, 7 angasebenza njani emntwini ongazifumana asebujamweni obufana nebakaJovidon?

¹⁷ Ukulotjha uJehova bekuza qangi kuJovidon. Bekazi ukuthi kuqakatheke kangangani ukuthembeka kuZimu weqiniso. UJesu wathi: “Kufuze ulotjhe uJehova uZimakho, begodu nguye kwaphela okufuze umenzele umsebenzi ocwengileko.” (Luk. 4:8) Iinkhulu zepi namasotja bezifuna ukuthi uJovidon angasaba nguFakazi kaJehova. Kunokulisa, uJovidon wathandaza ngokusuka ehliziyweni qobe ekuseni nantambama, abawa uJehova ukuthi amsize angapheli amandla begodu athembeke kuye. Naphezu kokuphathwa ngokunganabulungiswa uJovidon khenge aphele amandla. Umphumela kukuthi nje uthabe khulu ngombana unokuthileko ebekanganakho ngaphambi kokuthi athunjwe, abetjhwe bekavalelwe ngejele, ukukholwa kwakhe kuzizinyiwe.—Funda yoku-1 kaPitrosi 1:6, 7.

18. Singahlala njani sithabile?

¹⁸ UJehova uyazi bona khuyini esiyitlhogako nasizakuthaba kwamambala. Nasilandela amagadango amathathu asenza sithabe kwamambala, sizokukghona ukuhlala sithabile naphezu kweentjhijilo ezibudisi. Nawe uzokukghona ukuthi: ‘Babusisiwe abantu uZimabo onguJehova.’—Rhu. 144:15.