Imibuzo Evela Ebafundini
Kghani ama-Israyeli lokha nakasemangweni bekanokhunye ukudla ebekakudla ngaphandle kwemana neenkwali?
Imana bekukudla ama-Israyeli akudla khulu iminyaka ema-40 nakasemangweni. (Eks. 16:35) UJehova wawanikela neenkwali ezenzakalweni ezimbili. (Eks. 16:12, 13; Num. 11:31) Nanyana kunjalo, ama-Israyeli bewanakho okhunye ukudla angakudla.
Ngokwesibonelo, ngezinye iinkhathi uJehova wasa abantu bakhe ‘endaweni yokuphumula’ ebeyinamanzi nokudla. (Num. 10:33) Enye yeendawezo beyisendaweni enothileko eserhalawumbeni e-Elimu, “lapho bekunemithombo yamanzi eli-12 nemithi yesundu ema-70.” Le kungenzeka ngeminye yemihlobo yemithi yesundu eneenthelo (date palms). (Eks. 15:27) Incwadi i-Plants of the Bible ithi umuthi lo “sitjalo esiba nokudla erhalawumbeni, sikhupha ukudla, amafutha besibe yindawo yokuhlala abantu abanengi.”
Kungenzeka ama-Israyeli ajama godu endaweni ekulu enothileko eserhalawumbeni namhlanjesi eyaziwa ngokuthi yi-Feiran, eyingcenye yoMrhoba i-Feiran. a Incwadi i-Discovering the World of the Bible ithi, umrhoba lo, “mude khulu, ubude bawo bumakhilomitha ali-130, muhle khulu begodu mrhoba odume khulu eSinayi.” Incwadi le ithi, “Nange umuntu akhamba amakhilomitha ama-45 ukusuka endaweni lapho umrhoba wamanzi lo uhlangana nelwandle, uzokufika endaweni enothileko eserhalawumbeni i-Feiran. Indawo enothileko le eserhalawumbeni ingaba mamitha ama-610 ngehla kwelwandle begodu imakhilomitha ayi-4.8 ubude. Izele imithi yesundu begodu yihle khulu kangangobana ifaniswa nesimu ye-Edeni. Sekuziinkulungwana zeminyaka abantu beza endaweni le ngebanga leenkulungwana zemithi yakhona.”
Imithi yesundu esendaweni enothileko eserhalawumbeni le-Feiran
Lokha ama-Israyeli nakasuka eGibhide, akhamba nehlama yawo, izitja okubhicelwa kizo ihlama kungenzeka neenthoro namafutha. Kuliqiniso ukuthi kungenzeka izintwezi akhenge zihlale isikhathi eside. Abantu beza “neenkomo, izimvu neembuzi, kwaba yifuyo enengi khulu.” (Eks. 12:34-39) Kodwana ngebanga lobujamo obungasibuhle emangweni, kungenzeka iinlwana ezinengi zafa. Ezinye zazo kungenzeka zaba kukudla kwama-Israyeli. Ezinye kwanikelwa ngazo zaba mhlatjelo, zanikelwa ngitjho nakibozimu bamala. b (IzE. 7:39-43) Nanyana kunjalo, amanye ama-Israyeli bekasesenefuyo, lokho sikubona emezwini uJehova awatjela abantu bakhe lokha nabangamlaleli: “Amadodanenu azokuba belusi emmangweni iminyaka ema-40.” (Num. 14:33) Kungenzeka ifuywawo beyiwenzela ibisi ngezinye iinkhathi bebafumana inyama kodwana lokho bekungakaneli bona kungalingana abantu abaziinkulungwana ezintathu iminyaka ema-40. c
Iinlwana bezikufumana kuphi ukudla namanzi? d Ngesikhatheso kungenzeka bekunezulu elinengi begodu kuneentjalo ezinengi emangweni. I-Insight on the Scriptures, Volume 1, ithi eminyakeni ezii-3 500 eyadlulako, “bekunamanzi amanengi khulu endaweni ama-Israyeli ebekakiyo ukudlula namhlanjesi. Sikwazi lokhu ngombana bekunemirhoba eminengi etjhingelako neyomileko ebangelwe mamanzi ebekadlula lapho.” Nanyana kunjalo, ummango bewuyindawo engahlali muntu nethusako. (Dut. 8:14-16) Ngaphandle kwamanzi uJehova abanikela wona ngokusimangaliso, ama-Israyeli nefuywawo bekazokufa.—Eks. 15:22-25; 17:1-6; Num. 20:2, 11.
UMosi watjela ama-Israyeli ukuthi uJehova wawapha imana “bona [azi] ukuthi umuntu akaphili ngoburotho bodwa kodwana uphila nangamezwi aphuma emlonyeni kaJehova.”—Dut. 8:3.
a Qala INqabayokulinda ka-May 1, 1992, kk. 24-25.
b IBhayibheli ikhuluma ngezenzakalo ezimbili lapho ama-Israyeli nakasemangweni anikela khona ngeenlwana bona zibe mhlatjelo oya kuJehova. Isenzakalo sokuthoma senzeka nakubekwa umphristi; sesibili senzeka ngePhasika. Izenzakalo ezimbilezi zenzeka ngo-1512 B.C.E., ngomnyaka wesibili wokusuka kwama-Israyeli eGibhide.—Lev. 8:14–9:24; Num. 9:1-5.
c Nakuzokuphela iminyaka ama-40 asemangweni, ama-Israyeli azithathela amakhulu weenkulungwana zeenlwana epini. (Num. 31:32-34) Nanyana kunjalo aragela phambili adla imana bekwaba kulapho angena eNarheni yesiThembiso.—Jotj. 5:10-12.
d Singaphetha ngokuthi iinlwana akhenge zidle imana ngombana uJehova watjela abantu bona bathathe imana, kuye ngokuthi umuntu udla kangangani akhenge akhulume ngeenlwana.—Eks. 16:15, 16.
