1. Ithini ingilozi begodu lokho kutjho ukuthini kithi?

 NANGE ingilozi beyingakhuluma nawe, kghani bewuzokulalela lokho ekutjhoko? Namhlanjesi, ingilozi ikhuluma ‘nazo zoke iintjhaba, iinkoro, amalimi nabantu.’ Ithini? “Sabani uZimu, nimphazimulise . . . Lotjhani loyo owenze izulu nephasi.” (IsAm. 14:6, 7) UJehova kuphela kwakaZimu weqiniso boke abantu okufuze bamlotjhe. Sithokoza khulu ukuthi usinikele ithuba eliligugu lokumlotjha ethempelini lakhe elikhulu elingokomfanekiso!

2. Liyini ithempeli lakaJehova elingokomfanekiso? (Qala nebhoksi elithi “ Lokho Elingasikho.”)

² Kuhlekuhle liyini ithempeli elingokomfanekiso begodu singayifumana kuphi imininingwana elihlathululako? Ithempeli elingokomfanekiso alisisisakhiwo samambala. Lilungiselelo lakaJehova lokulotjha okucwengileko elisekelwe emhlatjelweni kaJesu wesihlengo. Umpostoli uPowula wahlathulula okungeziweko ngethempeleli encwadini ayitlolela amaKrestu amaHebheru wangekhulu lokuthoma ebekahlala eJudiya. b

3-4. Khuyini uPowula ebekatshwenyeke ngayo malungana namaKrestu weJudiya amaHebheru begodu wawasiza njani?

³ Kubayini uPowula atlolela amaKrestu amaHebheru ebekahlala eJudiya? Kungenzeka bekumabanga amabili ayihloko. Kokuthoma, bona awakhuthaze. Amanengi wawo ngaphambi kokuthi abe maKrestu bewalandela ikolo yamaJuda.  Abadosiphambili bamasondo wabo waphambilini kungenzeka bawahleka nawaba maKrestu. Kubayini? Ngombana amaKrestu bewanganalo ithempeli alotjhela kilo, anganalo i-aldara angenzela kilo uZimu imihlatjelo, anganabo nabaphristi ababasizako. Lokhu bekungadanisa abafundi bakaKrestu bekubogabogise nokukholwa kwabo. (Heb. 2:1; 3:12, 14) Abanye babo kungenzeka bacabanga ukubuyela ekolweni yobuJuda.

⁴ Kwesibili, uPowula waveza ukuthi amaKrestu amaHebheru bewangenzi imizamo yokuzwisisa ifundiso etja namkha amaqiniso angeneleleko, ‘okukukudla okuqinileko’ okufumaneka eliZwini lakaZimu. (Heb. 5:11-14) Kubonakala ngasuthi amanye wawo bewasalandela umThetho kaMosi. UPowula wahlathulula ukuthi imihlatjelo ebeyifunwa mThetho beyingasusi isono ngokupheleleko. Ngebanga lalokho, umThetho ‘wabekelwa ngeqadi.’ Nje-ke uPowula waragela phambili awafundisa amanye wamaqiniso angeneleleko la. Wakhumbuza amaKrestu la ‘ngethemba elingcono’ elisekelwe emhlatjelweni kaJesu elingawasiza ‘atjhidele kuZimu.’—Heb. 7:18, 19.

5. Khuyini ekufuze siyizwisise encwadini yeBhayibheli yamaHebheru begodu kubayini?

⁵ UPowula wahlathululela abafowabo amaHebheru ukuthi kubayini ukulotjha kwabo kobuKrestu kungcono kunendlela ebebalotjha ngayo ekolweni yamaJuda. Indlela amaJuda ebekalotjha ngayo ngokuvumelana nomThetho ‘bekusithunzi sezinto ezisezako kodwana okungokwamambala nguKrestu.’ (Kol. 2:17) Isithunzi sento siveza indlela into yamambala ebumbeke ngayo. Ngendlela efanako, indlela yekadeni yamaJuda yokulotjha beyisithunzi salokho okungokwamambala okusezako. Kufuze sizwisise ilungiselelo uJehova asenzele lona bona kulitjalelwe izono zethu ukwenzela ukuthi simlotjhe ngendlela ayamukelako. Akhesimadanise ‘isithunzi’ (indlela yamaJuda yokulotjha) ‘nokungokwamambala’ (indlela yamaKrestu yokulotjha), njengombana ihlathululwe kumaHebheru. Ngokwenza njalo, sizolizwisisa kuhle ithempeli elingokomfanekiso nokuthi lisithinta njani.

6. Ithaberinakeli belisetjenziselwa ini?

⁶ Indlela yamaJuda yokulotjha. UPowula wasekela ihlathululwakhe ethaberinakeli langesikhathi sakaMosi ngo-1512 B.C.E. (Qala itjhadi elithi, “Indlela YamaJuda Yokulotjha—Indlela YamaKrestu Yokulotjha.”) Ithaberinakeli  belinjengetende ekuthomeni ama-Israyeli ebekayithwala njengombana asuka kenye indawo aya kenye. Ayisebenzisa bekwaba minyaka epheze ibe ma-500 bekwaba kulapha ithempeli lakhiwa eJerusalema. (Eks. 25:8, 9; Num. 9:22) ‘Itende lokuhlanganeli’ beliyindawo lapho ama-Israyeli bekatjhidela khona kuZimu anikele iminikelwawo begodu amlotjhe. (Eks. 29:43-46) Nanyana kunjalo, ithaberinakeli godu belijamele okuthileko okungcono ebekuzokufikela amaKrestu.

7. Ithempeli elingokomfanekiso lathoma nini ukuba khona?

⁷ Indlela yamaKrestu yokulotjha. Ithaberinakeli lekadeni ‘belisithunzi sezinto zezulwini’ begodu belifanekisela ithempeli elikhulu lakaJehova elingokomfanekiso. UPowula wathi “itendeli [namkha ithaberinakeli] limfanekiso wesikhathi sanje.” (Heb. 8:5; 9:9) Nje-ke ngesikhathi atlolela amaHebheru, ithempeli elingokomfanekiso besele likhona. Laba khona ngo-29 C.E. Ngomnyaka loyo, uJesu wabhajadiswa, wazeswa ngomoya ocwengileko bewathoma ukusebenzela uJehova ‘njengomphristi ophakemeko omkhulu’ ethempelini elingokomfanekiso. c—Heb. 4:14; IzE. 10:37, 38.

8-9. NgokwamaHebheru 7:23-27, ngimuphi omehluko okhona hlangana komphristi ophakemeko wakwa-Israyeli nomPhristi oPhakemeko omkhulu uJesu Krestu?

⁸ Indlela yamaJuda yokulotjha. Umphristi ophakemeko bekajamela abantu phambi kwakaZimu. Umphristi ophakemeko wokuthoma wakwa-Israyeli wabekwa nguJehova lokha nakuvulwa ithaberinakeli. Nanyana kunjalo, njengombana uPowula ahlathulula “abanengi kwatlhogeka ukuthi babe baphristi ngokulandelana ngombana ukufa kwabavimbela bona baragele phambili babaphristi.” d (Funda amaHebheru 7:23-27.) Ngebanga lokuthi bebanesono, nabo bekufuze banikele imihlatjelo yezono zabo. Kunomehluko omkhulu hlangana kwabaphristi abaphakemeko bakwa-Israyeli nomPhristi oPhakemeko omkhulu uJesu Krestu.

⁹ Indlela yamaKrestu yokulotjha. UJesu Krestu njengomPhristi oPhakemeko wethu “usisebenzi . . . setende lamambala, elijanyiswe nguJehova, ingasi mumuntu.” (Heb. 8:1, 2) UPowula wahlathulula wathi “ngebanga lokuthi [uJesu] uragela phambili aphila ngokungapheliko, ubuphristi angekhe budluliselwe kwabanye.” UPowula wangezelela wathi uJesu ‘akakasilaphazwa, uhlukaniswe nezoni’ nokuthi ngokungafani nabaphristi abaphakemeko bakwa-Israyeli, “yena akutlhogeki enze imihlatjelo qobe langa” ngebanga lezono zakhe. Nje akhesihlole umehluko okhona hlangana kwama-aldara nemihlatjelo ebeyisekulotjheni kwamaJuda naleyo esekulotjheni kwamaKrestu.

10. Imihlatjelo ebeyenziwa e-aldareni lekhopha beyijameleni?

¹⁰ Indlela yamaJuda yokulotjha. Ngaphandle ebungenweni bethaberinakeli bekune-aldara lekhopha lapho bekwenzelwa khona imihlatjelo yeenlwana eya kuJehova. (Eks. 27:1, 2; 40:29) Nanyana kunjalo, imihlatjelo leyo beyingenzi bona abantu balitjalelwe izono zabo ngokupheleleko. (Heb. 10:1-4) Ukuragela phambili kwenziwa imihlatjelo yeenlwana ethaberinakeli bekufanekisela umhlatjelo munye ebewuzokususa ngokupheleleko izono zabantu.

11. Ngiliphi i-aldara uJesu azinikela kilo waba mhlatjelo? (Hebheru 10:5-7, 10)

¹¹ Indlela yamaKrestu yokulotjha. UJesu bekazi ukuthi uJehova wamthumela ephasini bona azokunikela ngokuphila kwakhe kube mhlatjelo wesihlengo sabantu. (Mat. 20:28) Nje-ke, nakabhajadiswako, uJesu wazinikela kuJehova bona enze lokhu uJehova afuna akwenze. (Jwa. 6:38; Gal. 1:4) I-aldara uJesu anikela kilo ukuphila kwakhe belijamele ‘intando’ kaZimu yokobana iNdodanakhe inikele ngokuphila kwayo okunganasono njengomuntu kube mhlatjelo. UJesu wanikela ngokuphila kwakhe ‘kwaba kanye kwaphela’ bona agubuzese ngokupheleleko izono zabo boke abatjengisa ukukholwa kuKrestu. (Funda amaHebheru 10:5-7, 10.) Ngokulandelako, sizokuhlola ukuqakatheka kwezinto ezingaphakathi kwethaberinakeli.

12. Ngubani obekangena ekumbeni ngayinye yethaberinakeli?

¹² Indlela yamaJuda yokulotjha. Ithaberinakeli namathempeli akhiwa eJerusalema ngokukhamba kwesikhathi bekafana ngaphakathi. Ngaphakathi bekuneenkumba ezimbili—“yiNdawo eCwengileko” ‘neNdawo eCwengeke Khulu’—ebezihlukaniswa lirharideni. (Heb. 9:2-5; Eks. 26:31-33) Phakathi kweNdawo eCwengileko bekunelithi lesibani legolide, i-aldara lokutjhisela ipepho netafula loburotho bombukiso. ‘Baphristi abazesiweko’ kwaphela ebebavunyelwe ukungena endaweni eCwengileko bona benze imisebenzi ecwengileko. (Num. 3:3, 7, 10) ENdaweni eCwengeke Khulu bekunomfaji wesivumelwano wegolide ebewujamele ukuba khona kwakaJehova. (Eks.  25:21, 22) Mphristi ophakemeko kwaphela obekavunyelwe ukudlulela ngale kwerharideni angene eNdaweni eCwengeke Khulu kanye ngomnyaka ngeLanga lokuLitjalelwa kweZono. (Lev. 16:2, 17) Qobe mnyaka bekangena neengazi zesilwana bona enze umhlatjelo wokulitjalelwa kwezono zakhe nezesitjhaba soke. Ngokukhamba kwesikhathi, uJehova ngomoyakhe ocwengileko wakwenza kwakhanya ukuthi izinto ebezingaphakathi kwethaberinakeli bezitjho ukuthini.—Heb. 9:6-8. e

13. INdawo eCwengileko neNdawo eCwengeke Khulu yethaberinakeli zijameleni ekulotjheni kwamaKrestu?

¹³ Indlela yamaKrestu yokulotjha. Inani elincani labalandeli bakaKrestu lizeswe ngomoya ocwengileko begodu lithabela isingani esikhethekileko noJehova. Laba abazii-144 000 bazokuba baphristi ezulwini noJesu. (IsAm. 1:6; 14:1) INdawo eCwengileko yethaberinakeli ifanekisela ukuba kwabo madodana kaZimu wokumbelekelwa nabasephasini. (Rom. 8:15-17) INdawo eCwengeke Khulu yethaberinakeli ijamele izulu lapho uJehova ahlala khona. ‘Irharideni’ elihlukanisa iNdawo eCwengileko neNdawo eCwengeke Khulu lijamele umzimba kaJesu wenyama ebewumkhandela bona angene ezulwini njengomPhristi oPhakemeko omkhulu wethempeli elingokomfanekiso. Ngokunikela ngomzimbakhe wenyama bona ube mhlatjelo wabantu, uJesu wavulela woke amaKrestu azesiweko indlela yokuya ezulwini. Nawo kufuze anikele ngemizimbawo yenyama bona afumane umvuzwawo wezulwini. (Heb. 10:19, 20; 1 Kor. 15:50) Ngemva kobana uJesu avusiwe, wangena eNdaweni eCwengeke Khulu yethempeli elingokomfanekiso lapho azokuhlangana khona nabo boke abazesiweko.

14. NgokwamaHebheru 9:12, 24-26, khuyini eyenza ilungiselelo lethempeli elingokomfanekiso libe ngcono kunendlela ama-Israyeli ebekalotjha ngayo?

¹⁴ Lokhu kwenza sikubone kuhle ukuphakama kwelungiselelo lakaJehova lokulotjha okuhlwengileko okusekelwe emhlatjelweni wesihlengo nebuphristini bakaJesu Krestu. Kwa-Israyeli, umPhristi oPhakemeko bekangena eNdaweni eCwengeke Khulu eyenziwe mumuntu, aphethe iingazi zemihlatjelo yesilwana kodwana uJesu “wangena ezulwini ngokwalo” indawo ecwengeke ukuzidlula zoke bona avele phambi kwakaJehova. Nakalapho, wanikela ngokuphila kwakhe okunganasono ngebanga lethu “bona aqede isono ngomhlatjelwakhe.” (Funda amaHebheru 9:12, 24-26.) Umhlatjelo kaJesu usula izono ngokupheleleko. Njengombana sizokufunda ngokulandelako, kunganandaba ukuthi ithemba lethu lisezulwini namkha ephasini, soke singalotjha uJehova ethempelini lakhe elingokomfanekiso.

15. Ngubani obekasebenza esirhodlweni sethaberinakeli?

¹⁵ Indlela yamaJuda yokulotjha. Ithaberinakeli belinesirhodlo sinye—indawo ekulu ekantjelweko lapho umphristi bekenzela khona umsebenzakhe. Ngesirhodlwenapho bekune-aldara elikhulu lekhopha lomnikelo otjhiswako nesitja sekhopha samanzi abaphristi ebebahlambela kiso ngaphambi kokuthi benze umsebenzabo ocwengileko. (Eks. 30:17-20; 40:6-8) Amathempeli akhiwa ngokukhamba kwesikhathi, nawo bewanesirhodlo esingaphandle lapho abantu ebebangasibaphristi bebajama khona balotjhe uZimu.

16. Ngubani osebenza eenrhodlweni zethempeli elingokomfanekiso?

¹⁶ Indlela yamaKrestu yokulotjha. Ngaphambi kokuthi abazesiweko bayokuba baphristi noJesu ezulwini, balotjha ngokuthembeka  ephasini esirhodlweni esingaphakathi sethempeli elingokomfanekiso. Ukuba khona kwesitja esikhulu samanzi kusikhumbuzo esiqakathekileko njengombana kunjalo nangawo woke amanye amaKrestu bona kufuze ahlale ahlwengile ngokuziphatha nebuhlotjeni bawo noJehova. Alo “isiqubuthu esikhulu” esibasekela ngokuthembeka abafowabo bakaKrestu abazesiweko, sizomlotjhela kuphi uJehova? Umpostoli uJwanisi wabona isiqubuthu “sijame phambi kwesihlalo sobukhosi” okukhambisana nesirhodlo esingaphandle esisephasini lapho ‘sinikela kuZimu umsebenzi ocwengileko ebusuku nemini ethempelini lakhe.’ (IsAm. 7:9, 13-15) Sithokoza khulu ukuthi uJehova usinikele ithuba eliligugu lokumlotjha ethempelini lakhe elikhulu elingokomfanekiso!

17. Ngimiphi imihlatjelo esinelungelo lokuyinikela kuJehova?

¹⁷ Woke amaKrestu anelungelo lokunikela imihlatjelo ngokusebenzisa isikhathi sawo, amandla nezinto zawo bona amlotjhe. Njengombana umpostoli uPowula atjela amaKrestu wamaHebheru, nathi ‘singahlala sinikela uZimu umhlatjelo wokudumisa okutjho, isithelo semilomethu evuma tjhatjhalazi igama lakhe.’ (Heb. 13:15) Singatjengisa ukuthi silithokoza khulu ilungelo lethu lokulotjha uJehova ngokumnikela imihlatjelo ephuma phambili.

18. NgokwamaHebheru 10:22-25, ngiziphi izinto ekufuze sihlale sizenza nalezo ekungakafuzi sizilibale?

¹⁸ Funda amaHebheru 10:22-25. Nakazokuphetha incwadakhe eya kumaHebheru, uPowula watlola ngezinto ekufuze sihlale sizenza njengombana silotjha uJehova. Lokhu kuhlanganisa ukutjhidela kuJehova ngomthandazo, ukutjhumayeza abanye, ukuhlangana ndawonye njengebandla nokukhuthazana “khulukhulu njengombana [sibona] ilanga [lakaJehova] litjhidela.” Ekupheleni kwesAmbulo, ingilozi kaJehova ikhuluma amezwi alandelako kabili ukutjengisa ukugandelela: “Lotjha uZimu!” (IsAm. 19:10; 22:9) Kwangathi singahlala siwakhumbula amaqiniso angeneleleko amalungana nethempeli elikhulu lakaJehova begodu silithokoze khulu ilungelo esinalo lokulotjha uZimethu omkhulu!