ISIHLOKO SAMA-42
Indlela yokusiza Isifundo Sakho Sibhajadiswe—Ingcenye 2
“Hlala uzitjhejile wena nokufundisa kwakho.”—1 THIM. 4:16.
INGOMA 77 Ukukhanya Ebumnyameni Bephaseli
OKUZOKUCOCWA NGAKHO *
1. Sazi njani bona umsebenzi wokwenza abafundi usindisa ipilo?
UMSEBENZI wokwenza abafundi usindisa ukuphila kwabantu! Sazi njani? UJesu nakatjho amezwi asemtlolweni kaMatewu 28:19, 20, wathi: ‘Khambani niyokwenza, . . . abafundi, nibabhabhadise.’ Kuqakatheke ngani bona umuntu abhajadiswe? Kuqakathekile nangabe umuntu ufuna ukuphila okungapheliko. Umuntu ofuna ukubhajadiswa kufuze akholelwe bona singafumana ukuphila okungapheliko kwaphela ngebanga lokuthi uJesu wasifela. Kungebangelo umpostoli uPowula atjela amaKrestu bona: “Ibhabhadiso liyanisindisa . . . ngokuvuswa kwakaJesu Krestu.” (1 Pit. 3:21) Lokha umuntu nakabhajadiswako uzibeka ethubeni lokufumana ukuphila okungapheliko.
2. Umtlolo wesi-2 kaThimothi 4:1, 2 uthi kufuze sibe bafundisi abanjani?
2 Nasizakwenza abafundi, kufuze sibe ‘nekghono lokufundisa.’ (Funda yesi-2 kaThimothi 4:1, 2.) Ngombana uJesu wathi: ‘Khambani niyokwenza abafundi . . , nibafundise.’ Umpostoli uPowula wathi “phikelela” emsebenzini lo, “ngombana ngokwenza lokhu uzokusindisa kokubili wena nabakulalelako.” Yeke singatjho ukuthi uPowula wakutjho kufanele ukuthi, “Hlala uzitjhejile wena nokufundisa kwakho.” (1 Thim. 4:16) Kufuze sikwazi ukufundisa abantu.
3. Esihlokwenesi, khuyini esizokucoca ngayo ngokuraga iimfundo zeBhayibheli?
3 Sifundisa amamiliyoni amanengi amaqiniso afumaneka eBhayibhelini. Njengombana sifundile esihlokweni esidlulileko, sifuna ukwazi bona singenza njani abanengi bona babe balandeli bakaJesu Krestu begodu babhajadiswe. Esihlokwenesi sizokufunda ngezinto ezihlanu ekufuze umfundi azenze bona asize isifundo sakhe sithuthuke besibhajadiswe.
SEBENZISA IBHAYIBHELI BONA UFUNDISE
Bawa umfundisi onelemuko bona akusize uthuthukise indlela ofundisa ngayo uvumele iBhayibheli kube ngilo elifundisako (Funda iingaba 4-6) *
4. Kuqakatheke ngani bona umfundisi angakhulumi khulu nakaraga isifundo seBhayibheli? (Qala umtlolo waphasi.)
4 Siyakuthanda esikufunda eliZwini lakaZimu. Lokho kungasenza sifune ukukhuluma isikhathi eside ngalokho esikuthandako khulu eBhayibhelini. Umuntu nakaraga isiThala, isifundo seBhayibheli seBandla, namkha nakafundela umuntu iBhayibheli ekhaya, oragako akukafuzi akhulume khulu. Bona avumele iBhayibheli kube ngilo elifundisako umfundisi kufuze azibambe begodu angalingi ukuhlathulula koke akwaziko ngevesi elithileko. * (Jwa. 16:12) Madanisa ilwazi ebewunalo lokha nawubhajadiswako nelwazi onalo nje. Kungenzeka ngesikhatheso wafunda izinto ezisisekelo. (Heb. 6:1) Kwakuthatha iminyaka bona ukufunde koke okwaziko, ngebangelo ungalingi ukufundisa isifundo sakho izinto ezinengi ngesikhathi sinye.
5. (a) Ngokomtlolo weyoku-1 kwebeThesalonika 2:13, khuyini esifuna abantu esibafundelako bayizwisise? (b) Singamkhuthaza njani umuntu esifunda naye acoce ngalokho akufundako?
5 Sifuna umfundi azwisise ukuthi akufundako kuvela eliZwini lakaZimu. (Funda yoku-1 kwebeThesalonika 2:13.) Singakwenza njani lokho? Khuthaza umfundi bona acoce ngalokho akufundileko. Kunokobana umhlathululele woke amavesi, mbawe bona kube nguye owahlathululako. Msize abone ukuthi iBhayibheli lingamsiza njani nakalisebenzisako. Ungambuza imibuzo ezomenza aveze indlela azizwa ngayo ngalokho akufunda emtlolweni. (Luk 10:25-28) Ngokwesibonelo, ungambuza ukuthi umtlolo awufundileko: “Umsize njani wabona ubuntu bakaJehova?” “Uzuze ini ngokufunda iqiniso alifumane eBhayibhelini?” “Uzizwa njani ngalokho akufundileko?” (IzA. 20:5) Akukaqakatheki khulu ukuthi umfundi wazi izinto ezinengi kangangani, kodwana okuqakatheke khulu lithando analo ngalokho akufundako bekakusebenzise epilwenakhe.
6. Kubayini kungaba kuhle ukukhamba nomtjhumayeli okwaziko ukufundisa nawuyokuraga isifundo seBhayibheli?
6 Nawuyokuraga isifundo seBhayibheli, inga-kghani ukhamba nabarhuweleli abakwaziko ukufundisa? Nangabe wenza njalo, ungababuza ukuthi usiraga njani isifundo begodu ulisebenzisa kuhle na iBhayibheli nawufundisako. Bona uthuthuke endleleni ofundisa ngayo, kufuze uthobeke. (Madanisa nezEnzo 18:24-26.) Ngemva kwalokho, ungabuza umtjhumayeli okhamba naye bona, ucabanga ukuthi umuntu omfundelako ubonakala akuzwisisa akufundako na. Nawunamabanga athileko namkha unekhambo elingakuthatha iveke namkha ngaphezulu, ungabawa bona asale akuragela isifundo sakho lokha nawungekho. Lokho kuzokwenza umfundi abone ukuqakatheka kokufunda kwakhe iBhayibheli. Ungacabangi bona sifundo ‘sakho’ kwaphela akekho omunye umuntu ongasiraga. Sifuna umuntu esimfundelako athuthuke begodu enze amatjhuguluko atlhogekako.
TJENGISA BONA UYAKUTHANDA BEGODU UYAKUKHOLELWA OKUFUNDISAKO
Tjela umuntu ofunda naye ngeembonelo ekhezenzeka ekuphileni kwamanye amaKrestu ukumsiza azwisise ukuthi ukuphila ngeenkambisolawulo zeBhayibheli kuyazuzisa (Funda iingaba 7-9) *
7. Khuyini engasiza umuntu omfundelako akuthabele ukufunda iBhayibheli?
7 Umuntu ofunda naye kufuze abone ukuthi uyakuthanda begodu uyakukholelwa lokho omfundisa khona. (1 Thes. 1:5) Nawenza njalo, uzokuthanda akufundako. Nakukghonekako mtjele ngamatjhuguluko owenzileko ekuphileni kwakho ngokufunda iBhayibheli. Lokho kuzomsiza abone ukuthi iBhayibheli lineenqophiso ezihle naye ezingamzuzisa.
8. Khuyini ongayenza bona usize umuntu ofunda naye iBhayibheli?
8 Nanifundako, mcocele ngeembonelo zabantu abaqalana nezinto yena aqalene nazo, umtjele nokuthi bakghone njani ukuzihlula. Mhlamunye ungakhamba nomuntu owakhe waqalana nobujamo obuthileko obungasiza umuntu ofunda naye. Okhunye ongakwenza kufunda ngekhekwenzeka emaphilweni wabantu ku-jw.org ngaphasi kwesihloko esithi “IBhayibheli Lishintsha Ukuphila.” * esifumaneka ngesiZulu Iinhlokwezo namavidiyo kuzokusiza umuntu ofunda naye abone ukuthi kuyinto eqakathekileko ukuphila ngeenkambiso zeBhayibheli epilwenakhe.
9. Ungamkhuthaza njani umuntu ofunda naye iBhayibheli bona acoce ngalokho akufundako nomndeni nabangani?
9 Nangabe umuntu ofunda naye utjhadile, umlinganakhe naye uyafunda na? Nangabe akafundi, ungammema bona ahlale nani nanifundako. Khuthaza ofunda naye bona acoce ngalokho akufundako nomndeni nabangani bakhe. (Jwa. 1:40-45) Ungambuza imibuzo enjengokuthi: “Ungakuhlathulula njani lokhu emndeninakho?” namkha “Umtlolo lo ungawusebenzisa njani ukutjela umnganakho iqiniso?” Nawenza ngalendlela, ubandula umuntu ofunda naye bona abemfundisi omuhle. Kuzokuba bulula nasele alungele ukuthoma ukutjhumayela. Ungabuza umuntu ofunda naye bona ukhona na umuntu amaziko ofuna ukufunda iBhayibheli. Nangabe akhona, thintana naye ngokurhabako uthome ukufunda naye iBhayibheli. Mbukelise ividiyo ethi, Kwenzekani Esifundweni SeBhayibheli? *
MKHUTHAZE ENZE ABANGANI EBANDLENI
Khuthaza umuntu ofunda naye bona enze abangani ebandleni(Funda iingaba 10-11) *
10. Njengombana kutlolwe kweyo-1 kwebeThesalonika 2:7, 8, umfundisi angasilingisa njani isibonelo sakaPowula?
10 Abantu abaneemfundo zeBhayibheli, kufuze batjengise bona banendaba nabantu ababafundelako. Babaqale njengabantu abazokulotjha nabo uJehova. (Funda yoku-1 kwebeThesalonika 2:7, 8.) Akusibulula kibo ukulisa abangani abangalotjhi uJehova nokwenza amatjhuguluko abenze bafanelekele ukulotjha uJehova. Kufuze sibasize bafumane abangani ebandleni. Iba mngani womuntu ofunda naye ingasi lokha nanifundako kwaphela, kodwana nakezinye izinto. Ungamfonela, umtlolele umlayezo namkha umvakatjhele lokho kuzomtjengisa bona unendaba naye.
11. Khuyini esifuna abantu esifunda nabo iBhayibheli bayifumane ebandleni, begodu kubayini?
11 Kunesitjho esithi: “Umntwana ukhuliswa mphakathi.” Thina-ke singatjho sithi: “Libandla elenza umtjhumayeli.” Kungebangelo-ke abafundisi abahle bazokuletha umuntu abafunda naye ebandleni bamazise kabanye abantu ukwenzela bona bamkhuthaze. Nabenza njalo umfundi uzokuthabela ukuba hlangana nabantu bakaZimu, abazomkhuthaza bakhulise ithando analo ngaye begodu bamsekele ekuphileni kwakhe. Sifuna umfundi ngamunye azizwe alilunga lebandla. Sifuna ukumdosa ngethando esinalo. Ithandwelo ngilo elizomsiza bona alise ukuba nabangani abangamthandiko uJehova. (IzA. 13:20) Abangani bakhe abangalotjhi uJehova nabamjikelako, kuzoba bulula ukuthi atjhidele ebanganini abalotjha uJehova.—Mar. 10:29, 30; 1 Pit. 4:4.
MFUNDISA NGOKUZINIKELA NOKUBHAJADISWA
Kancanikancani, umfundi ozimiseleko angakghona ukufikelela esiquntweni sokubhajadiswa! (Funda iingaba 12-13)
12. Kubayini kufuze sikhulume nabantu esifunda nabo ngokuzinikela nokubhajadiswa?
12 Khuluma ngokutjhaphulukileko nomuntu ofunda naye ngokuzinikela nokubhajadiswa. Ihloswethu kukuthi simsize azinikele bekabhajadiswe. Ngemva kwenyanga ezimbalwa nifunda, begodu aba khona emihlanganweni qobe, msize azwisise ukuthi ihloswethu yokufunda naye kukumsiza alotjhe uJehova ngendlela eyamukelekako.
13. Ngimaphi amagadango umfundi ekufuze awathathe bona athuthuke bekabhajadiswe?
13 Kancanikancani umfundi ozimiseleko, uzokufikelela ezingeni lokuthi abhajadiswe! Uthoma ukumazi kuhle uJehova nokumthanda begodu abe akholwe Kuye. (Jwa. 3:16; 17:3) Umfundi uba nobuhlobo obuhle noJehova, athome nokutjhidelana namalunga webandla. (Heb. 10:24, 25; Jak. 4:8) Ngokukhamba kwesikhathi, umfundi ubalekela ukwenza izinto ezimbi begodu aphenduke ezonweni zakhe. (IzE. 3:19) Ngesikhathi esifanako ukukholwa kwakhe kumenza afune ukukhuluma nabanye ngeqiniso alaziko ngoJehova. (2 Kor. 4:13) Ngokukhamba kwesikhathi uyazinikela kuJehova akubonakalise lokho ngokuthi abhajadiswe. (1 Pit. 3:21; 4:2) Lelo kuzoba lilanga elithabisa woke umuntu! Njengombana umfundi athatha amagadango amenza athuthuke, iba nomusa begodu umbuke ngokusuka ehliziyweni lokho kuzomsiza bona athuthuke ukuyaphambili.
KWENZE UMUKGHWA UKUQALA ITUTHUKO YOMUNTU OMFUNDELAKO
14. Umfundisi angakuhlola njani ukuthuthuka emntwini afunda naye?
14 Kufuze sibekezele nasizakusiza umfundi bona athuthuke, azinikele bekabhajadiswe. Kodwana ngasikhathi kuzokufuze sihlolisise bona unaso isifiso sokulotjha uJehova uZimu. Akhona na amatshwayo atjengisa bona umuntu lo uyawulalela umyalo kaJesu? Namkha sekamane uthanda ukufunda nawe?
15. Ngimaphi amatshwayo wetuthuko ekufuze umfundisi awaqale emntwini afunda naye?
15 Hlola indlela umuntu ofunda naye athuthuka ngayo. Ngokwesibonelo, Inga-kghani uyayiveza indlela azizwa ngayo ngoJehova? Uyathandaza na kuJehova? (Rhu. 116:1, 2) Uyakuthanda na ukufunda iBhayibheli? (Rhu. 119:97) Uyakuthabela ukuya esifundweni qobe? (Rhu. 22:22) Uyawenza amatjhuguluko ekuphileni kwakhe? (Rhu. 119:112) Sekathomile ukukhuluma ngalokho akufundako emndenini nebanganini bakhe? (Rhu. 9:1) Okuqakatheke kikho koke uyafuna na ukuba nguFakazi kaJehova? (Rhu. 40:8) Nange angawenzi amatjhuguluko la, kuzokufuze ukhulume naye ube nomusa, uthembeke umbuze bona kubayini angenzi amatjhuguluko nokuthi ungamsiza njani bona awenze. *
16. Khuyini ezokutjengisa bona umuntu ofunda naye kufuze uragele phambili ufunda naye?
16 Hlolisisa bona kuyatlhogeka uragele phambili nomuntu ofunda naye. Zibuze: ‘Umuntu engifunda naye uyalungiselela ngaphambi kokuthi sifunde? Uyakuthanda ukuya esifundweni? Unemikghwa emimbi asaraga nayo? Inga-kghani usazibandakanya nekolo yamala?’ Nangabe uphendula ngo iye emibuzweni le, ukufunda nomuntu onjalo kufaniswa nokufundisa umuntu ukududa khisibe akafuni ukuba manzi! Nangabe umfundi akakuthabeli akufundako begodu akakazimiseli ukwenza amatjhuguluko, kubayini usafuna ukuragela phambili ufunda naye?
17. Ngokuya ngeyoku-1 kaThimothi 4:16, khuyini ekufuze boke abafundisi beBhayibheli bayenze?
17 Siwuthathela phezulu umsebenzethu wokwenza abantu babebafundi, nokubasiza bona bathuthuke bebabhajadiswe. Kungebangelo sivumela iBhayibheli kube ngilo elibafundisako, begodu sibafundisa ngomfutho nangokukholwa sibatjengise nokuthi siyakuthanda esikufundisako. Sizokukhuthaza abantu esifunda nabo bona benze abangani ebandleni. Sizobakhumbuza ngokuqakatheka kokuzinikela kuJehova nangokubhajadiswa, besiqale nendlela abathuthuka ngayo. (Qala ibhoksi elisekhasini 13, elithi “ Lokho Ekufuze Umfundi Akwenze Nakazakuthuthuka Begodu Abhajadiswe.”) Kuyasithabisa ukuba emsebenzini osindisa amaphilo wabantu lo! Kwanga singenza koke okusemandlenethu bona sibe neemfundo esiziraga ngokuphumelelako bezifikele eqophelweni lokubhajadiswa.
INGOMA 79 Bafundise Ukuzijamela
^ isig. 5 Lokha nasiraga isifundo sisuke sinethuba elihle lokusiza abantu bona bafunde indlela uJehova afune bacabange ngayo, bazizwe ngayo, begodu benze ngayo izinto. Isihlokwesi sizosisiza bona singathuthuka njani endleleni esifundisa ngayo.
^ isig. 4 Funda isihloko esithi “Balekela Izinto Ezingaba Yingozi Nawuraga Isifundo SeBhayibheli” esitholakala encwajaneni kaSeptemba 2016 ethi, Ipilo Nomsebenzi WobuKrestu.
^ isig. 8 Tjhinga kwesithi OFAKAZI BAKAJEHOVA > EXPERIENCES OF JEHOVAH’S WITNESSES.
^ isig. 9 Tjhinga ku-jw.org/nr ABOFAKAZI BAKAJEHOVA > BAWA ISIFUNDO SEBHAYIBHELI.
^ isig. 15 Funda iinhloko ezithi “Ukuthanda UJehova Kuzosenza Sifune Ukubhajadiswa” nesithi “Sewukulungele Na Ukubhajadiswa?” esiThaleni sakaMatjhi 2020.
^ isig. 77 IHLATHULULO YEENTHOMBE: Ngemva kwesifundo, udade okghonako ukuraga isifundo usiza udade obekafundela umuntu iBhayibheli, bona akukafuzi akukhulume khulu nakaraga isifundo.
^ isig. 79 IHLATHULULO YEENTHOMBE: Hlangana nesifundo, umfundi ubona indlela angaba mfazi ongcono ngayo. Ngokukhamba kwesikhathi, wabelana nobabakwakhe ngalokho akufundileko.
^ isig. 81 IHLATHULULO YEENTHOMBE: Umfundi nobabakwakhe, bathabela ukucoca, nokudla kamnandi emzini womnganakhe ahlangane naye eWolweni lomBuso.
