1. Ngisiphi isiqunto esihle ukuzidlula zoke umuntu angazenza?

NGOKUJAYELEKILEKO iinqunto ezithathwa babelethi ziyabathinta abantwababo. Nange ababelethi benza iinqunto ezingasizihle, lokho kungenza abantwana babe nemiraro. Kodwana nabenze iinqunto ezihle basuke banikela abantwana babo ithuba elihle lokuba nepilo ethabisako. Abantwana nabo kufuze benze iinqunto ezihle. Isiqunto esihle omunye nomunye angasenza, kulotjha uJehova uBabethu wezulwini.​—Rhu. 73:28.

2. Ngiziphi iinqunto ezihle uJesu nababelethi bakhe abazithathako?

² Ababelethi bakaJesu bebafuna ukuthi abantwana babo balotjhe uJehova, ngalokho iinqunto abazenzako ngizo ebezitjengisa bona khuyini eqakathekileko. (Luk. 2:40, 41, 52) UJesu naye wenza iinqunto ezihle ezenza bona afeze indimakhe yokulotjha uJehova. (Mat. 4:1-10) UJesu wakhula waba yindoda enomusa, ethembekileko begodu enesibindi, okungenza nanyana ngimuphi umbelethi osaba uZimu athabe.

3. Ngimiphi imibuzo esizokucoca ngayo esihlokwenesi?

³ Esihlokwenesi sizokucoca ngemibuzo elandelako. Ngiziphi iinqunto uJehova azenza malungana noJesu? Ababelethi abamaKrestu bangafundani eenquntweni ezenziwa babelethi bakaJesu? AmaKrestu amatjha wona angafundani eenquntweni uJesu azithathako?

4. Ngisiphi isiqunto esiqakathekileko uJehova asenzako malungana neNdodanakhe?

⁴ UJehova wakhethela uJesu ababelethi abafaneleko. (Mat. 1:18-23; Luk. 1:26-38) Amezwi kaMariya athinta ihliziyo  atlolwe eBhayibhelini atjengisa indlela ebekathanda ngayo uJehova neliZwi lakhe. (Luk. 1:46-55) Indlela uJosefa enza ngayo izinto yatjengisa ukuthi usaba uZimu begodu ufuna ukumthabisa.​—Mat. 1:24.

5-6. Khuyini uJehova avumela bona iNdodanakhe iqalane nayo?

⁵ Tjheja bona uJehova akhange akhethele uJesu ababelethi abanjingileko. Umnikelo uJosefa noMariya abawenzako nakubelethwa uJesu, bewutjengisa bona bababantu abadobha phasi. (Luk. 2:24) Kungenzeka uJosefa bekanendawana asebenzela kiyo njengombana bekambazi eNazaretha hlanu komzakhe. Kungenzeka bebanganayo imali enengi, khulukhulu njengombana besele kunabantwana abalikhomba.​—Mat. 13:55, 56.

⁶ UJehova wavikela uJesu eengozini ebekahlangabezana nazo kodwana akhenge amvikele kizo zoke iinqabo zokuphila. (Mat. 2:13-15) Ngokwesibonelo, amanye amalunga womndeni kaJesu bekangamlotjhi uZimu. Akhucabange indlela okungenzeka kwadanisa uJesu ngayo ukubona amanye amalunga womndenakhe ekuthomeni angakholwa ukuthi unguMesiya. (Mar. 3:21; Jwa. 7:5) Kungenzeka nokuthi uJesu kwafuze abekezelele ukuhlongakalelwa ngusingayise uJosefa. Njengombana uJesu bekalizibulo bekufuze atlhogomele umndenakhe. (Mar. 6:3) Kungenzeka nguye ebekufuze atlhogomele ihlalakuhle yomndenakhe. Kwakufuze asebenze budisi bona abondle. Yeke singatjho ukuthi ukwazi kuhle ukuthi kunjani ukudinwa ngemva kwelanga elide.

7. (a) Ngimiphi imibuzo engasiza abantu abatjhadileko bakhulise abantwana? (b) Umtlolo wezAga 2:1-6 ungasiza njani ekubanduleni abantwana?

⁷ Nangabe nibatjhadikazi abafuna ukuba nabantwana, akhenizibuze naku umbuzo, ‘Inga-kghani sibabelethi uJehova ebekazobakhetha bona bakhulise umntwana?’ (Rhu. 127:3, 4) Akhesithi ungumbelethi, naku umbuzo ekufuze uzibuze wona,’ Inga-kghani ngifundisa umntwanami ukuqakatheka kokusebenza budisi?’ (UMtj. 3:12, 13) ‘Ngenza koke okusemandleni na bona ngivikele abantwana bami bona bangalimali begodu bangaziphathi kumbi njengephasi lakaSathana?’ (IzA. 22:3) Iqiniso kukuthi angeze wakghona ukuvikela abantwana bakho kizo zoke iinqabo abangahlangabezana nazo. Kodwana ungakghona ukuthi kancanikancani ubafundise begodu  ubalungiselele ukuqalana neentjhijilo zephasi, ubafundise ukuthembela eliZwini lakaZimu nabaqalane nobujamo obubudisi. (Funda izAga 2:1-6.) Ngokwesibonelo, akhesithi ilunga lomndenakho likhetha ukutjhiya uJehova, siza abantwana bakho bafunde iliZwi lakaZimu ukwenzela ukuthi babone ukuqakatheka kokuthembela kuJehova. (Rhu. 31:23) Akhesithi nihlongakalelwe mumuntu enimthandako, fundisa abantwabakho ukuthi ukufunda ilizwi lakaZimu kungabasiza bakghone ukuqalana nobujamobo bazokududuzeka begodu babe nokuthula.​—2 Kor. 1:3, 4; 2 Thim. 3:16.

8. Ngokwalokho okusemtlolweni kaDuteronomi 6:6, 7, khuyini ebekufuze uJosefa noMariya bayenze?

⁸ Ababelethi bakaJesu bephasini bamsiza bona athande uZimu. Benza koke uJehova abanqophisa khona. (Funda uDuteronomi 6:6, 7.) UJosefa noMariya bebamthanda khulu uJehova begodu nguye obekeza qangi ekuphileni kwabo, lokho kwakhuthaza nabantwana babo bona benze okufanako.

9. Ngisiphi isiqunto esiqakathekileko uJosefa noMariya abasithathako?

⁹ UJosefa noMariya bahlala batjhidelene noZimu begodu bebenza izinto ezibatjhideza kuZimu bamndeni. Siyaqiniseka ukuthi bebaya qobe eSinagogini bayokulotjha uZimu eNazaretha nokuthi qobe mnyaka bebahlanganyela iPhasika eJerusalema. (Luk. 2:41; 4:16) Kungenzeka ukuthi nabasendleleni eya eJerusalema bebafundisa uJesu nabantwana bekhabo ngomlando wabantu bakaJehova. Kungenzeka nokuthi nabalapho bebakhamba bavakatjhele iindawo ekukhulunywa ngazo emitlolweni. Njengombana umndenabo ukhula kungenzeka bekungasilula bona uJosefa noMariya bafundise abantwababo ngoZimu qobe. Kodwana qala bona bathaba kangangani ngomsebenzi abawenzako. Ngebanga lokobana bebabeka uJehova qangi ekuphileni kwabo, umndenabo wakhula uthanda uJehova.

10. Ngiziphi iimfundo ababelethi abamaKrestu abangazifunda kuJosefa noMariya?

¹⁰ Ababelethi abasaba uZimu bangafundani kuJosefa noMariya? Into eqakatheke ukuzidlula zoke kufundisa abantwana bakho ngamezwi  nangezenzo ukuthi umthanda khulu uJehova. Kufuze utjheje ukuthi isipho esihle khulu ongabapha sona lithuba lokuthanda uJehova. Okhunye okuqakatheke khulu, bafundise ukuqakatheka kokwenza izinto ezikutjhideza kuZimu, ezinjengokufunda qobe, ukuthandaza, ukuya emihlanganweni nokuhlanganyela esimini. (1 Thim. 6:6) Iye khona kuliqiniso ukuthi kufuze ubondle abantwana bakho, ubanikele izinto abazitlhogako. (1 Thim. 5:8) Kodwana khumbula ukuthi, bona abantwabakho basinde nakuphela iphaseli kufuze batjhidelane noZimu, begodu lokho kuzobasiza bangene ephasini elitjha. *​—Hez. 7:19; 1 Thim. 4:8.

11. (a) Isikhuthazo esifumaneka emtlolweni weyoku-1 kaThimothi 6:17-19 sibasiza njani ababelethi bona benze iinqunto ezihle nabakhulisa abantwana? (b) Ngimiphi imigomo imindeni engayicabangela begodu ingafumana ziphi iimbusiso? (Funda ibhoksi elithi, “Ngimiphi Imigomo Ofuna Ukuyifeza?”)

¹¹ Qala bona kuthinta ihliziyo kangangani ukuthi ababelethi abamaKrestu abanengi basiza abantwababo bona bathathe iinqunto ezihle nezithabisa uJehova. Balotjha uJehova qobe baboke, baya emihlanganweni emincani nemikhulu, bahlanganyela boke ekonzweni yesimini. Eminye imindeni itjhumayela esimini engasetjenzwa ngaso soke isikhathi. Abanye bavakatjhela iBethel namkha basize ekwakheni izakhiwo zehlangano. Imindeni nayizokusiza emisebenzini le, kanengi isebenzisa imali ephuma esikhwameni sayo, okungaba budisi ukukwenza ngezinye iinkhathi. Kodwana imiphumela abayifumanako ibenza banothe ethandweni labo ngoZimu. (Funda yoku-1 kaThimothi 6:17-19.) Abantwana abakhulela emindenini enjalo kanengi baba ngilabo abaziphatha kuhle, baragele phambili nemisebenzi emihle abayenzela uJehova begodu abazisoli. *​—IzA. 10:22.

12. Khuyini uJesu ekwafuze ayenze nakakhulako?

¹² UBaba kaJesu wezulwini kuhlanganise nababelethi bakhe bephasini benza iinqunto ezihle. Nanyana kunjalo, uJesu nakakhulako naye kwafuze enze zakhe iinqunto. (Gal. 6:5) Njengombana nathi sinelungelo lokuzikhethela naye bekanalo. Bekangakhetha ukuzithabisa yena qangi, kodwana wakhetha ukuba nobuhlobo obuhle noJehova. (Jwa. 8:29) Ilutjha lingasilingisa njani isibonelo sakaJesu namhlanjesi?

13. Ngiziphi iinqunto eziqakathekileko uJesu ebekufuze azenze lokha nakasakhulako?

¹³ Lokha uJesu nakasephasini wakhetha  ukulalela ababelethi bakhe. Akhange akhethe ukuthi angabalaleli ngombana azitjela bona wazi ngcono kunabo. Kunalokho “waragela phambili azithoba kibo.” (Luk. 2:51) Siyaqiniseka bona uJesu wayamukela indimakhe njengendodana elizibulo. Wasebenza budisi ekufundeni ikghono lokubaza kusingayise bona akghone ukutlhogomela umndenakhe.

14. Sazi njani bona uJesu bekalifundisisa iliZwi lakaZimu?

¹⁴ Kungenzeka bona ababelethi bakaJesu bamtjela ngendlela esimangaliso abelethwa ngayo nokuthi iinthunywa zakaZimu zathini ngaye. (Luk. 2:8-19, 25-38) UJesu akhange agcine ngalokho abamtjela khona kodwana wazifundela naye ngokwakhe okusemtlolweni. Sazi njani bona uJesu bekalifundisisa iliZwi lakaZimu? Ngombana lokha asesemsanyana abafundisi beJerusalema “barareka khulu ngendlela azwisisa naphendula ngayo.” (Luk. 2:46, 47) Nakaneminyaka eli-12 uJesu besele aqiniseka bona uJehova nguBabakhe.​—Luk. 2:42, 43, 49.

15. UJesu watjengisa njani ukuthi ukhetha ukwenza intando kaJehova?

¹⁵ Njengombana uJesu sele azi ingcenyakhe ehlosweni kaJehova, wakhetha ukwamukela isabelo sakhe. (Jwa. 6:38) Bekazi kuhle bona abantu abanengi bazomhloya. Kungenzeka nokuthi bekubudisi ukukwamukela lokho. Kodwana ngaphezu kwalokho wakhetha ukuthobela uJehova. Ngesikhathi uJesu abhajadiswa ngo-29 C.E., okukuphela kwento ebakadzimelele kiyo bekukukwenza intando kaZimu. (Heb. 10:5-7) Ngitjho nangesikhathi ahlongakala esigodweni sokuhlunguphazwa, uJesu akhenge afune ukwenza enye into, wafuna ukwenza intando kaYise.—Jwa. 19:30.

16. Ngisiphi isifundo abantwana abangasifunda kuJesu?

¹⁶ Zithobe ebabelethini bakho. NjengoJosefa noMariya ababelethi bakho abakapheleli, kodwana nanyana kunjalo uJehova ubakhethile bona bakubandule begodu bakunqophise. Yeke nangabe uyasazisa isiyalo sabo begodu uhlonipha ilungelo uJehova abaphe lona, ‘kuzokukhambela kuhle.’​—Efe. 6:1-4.

17. UJotjhuwa 24:15 uthi ngisiphi isiqunto abantu abatjha ekufuze bazenzele sona?

¹⁷ Khetha bona uzokulotjha bani. Kufuze ufunisise begodu uqiniseke bona iyini ihloso kaZimu nokuthi wena uhlangana ngani nayo. (Rom. 12:2) Nawenza njalo, uzokukghona  ukwenza iinqunto ezihle ekuphileni begodu uzokukhetha ukulotjha uJehova. (Funda uJotjhuwa. 24:15; UMtj. 12:1) Nawufunda iBhayibhelakho qobe nezinye iincwadi ezisekelwe eBhayibhelini uzomthanda khulu uJehova begodu nokukholwa kwakho kuzokuqina.

18. Ngisiphi esinye isiqunto abantu abatjha ekufuze basenze, begodu umphumela uzokuba yini?

¹⁸ Yenza intando kaJehova ize qangi epilwenakho. Iphasi lakaSathana lifundisa bona nawusebenzisa amakghonwakho ukuzizuzisa wena uzokuthaba. Iqiniso kukuthi labo abaqale ukuzizuzisa bona “bazibangela ubuhlungu obunengi.” (1 Thim. 6:9, 10) Ngakwelinye ihlangothi, nawukhetha ukwenza intando kaJehova ize qangi epilwenakho, uzokuba ‘nepumelelo.’​—Jotj. 1:8.

19. Khuyini ababelethi ekufuze bayikhumbule?

¹⁹ Babelethi, yenzani koke okusemandlenenu bona nisize abantwabenu balotjhe uJehova. Thembelani kuye bona anisize nenze iinqunto ezivuthiweko. (IzA. 3:5, 6) Khumbulani nokuthi abantwabenu bazokwenza khulu lokho abanibona nikwenza kunalokho enikutjhoko. Yeke thathani iinqunto ezizobasiza benze izinto ezizokwenza uJehova abathande.

20. Ngiziphi iimbusiso abantu abatjha abazozifumana nabakhetha ukulotjha uJehova ?

²⁰ Bantu abatjha, ababelethi benu banganisiza nithathe iinqunto ezivuthiweko. Kodwana kusemandlenenu bona nenze izinto ezizokwenza uZimu anithande. Yeke lingisani isibonelo sakaJesu, nikhethe ukulotjha uJehova uBabenu wezulwini onithandako. Nanenza njalo nizokuba nepilo emajadu, eyanelisako nethabisako. (1 Thim. 4:16) Nizokuba nengomuso elihle begodu nithabele nepilo emnandi.