1. Khuyini ekufuze siyenze?

UNGATHANDA na ukugijima umjarho nawugulako namkha nawudiniweko? Awa akusinjalo. Umpostoli uPowula wathi amaKrestu asemjarhweni. (Heb. 12:1) Nasizakufumana unongorwana wokuphila okungapheliko esikuthenjiswe nguJehova kufuze sikghodlhelele bekube sekupheleni, kungakhathaliseki ukuthi sibadala namkha sibancani.—Mat. 24:13.

2. Njengombana kuvezwe emtlolweni wesi-2 kaThimothi 4:7, 8, kubayini uPowula anikela iseluleko sokuba netjhaphuluko yokukhuluma?

² UPowula bekanetjhaphuluko yokukhuluma ngombana waphumelela ‘ekugijimeni umjarho bekwaba sekupheleni.’ (Funda yesi-2 kaThimothi 4:7, 8.) Kuhlekuhle uyini umjarho uPowula ebekakhuluma ngawo?

3. Uyini umjarho uPowula akhuluma ngawo?

³ Ngezinye iinkhathi uPowula bekatlola ngezinto ebezenzeka eGirisi bona afundise iimfundo eziqakathekileko. (1 Kor. 9:25-27; 2 Thim. 2:5) Kobunye ubujamo, wamadanisa ukuphila kwamaKrestu nomjarho. (1 Kor. 9:24; Gal. 2:2; Flp. 2:16) Umuntu ungenela “umjarho” nakanikela ukuphila kwakhe kuJehova begodu abhajadiswe. (1 Pit. 3:21) Uzokufika entanjeni nasele uJehova amnikela unongorwana wokuphila okungapheliko.—Mat. 25:31-34, 46; 2 Thim. 4:8.

4. Sizokufunda ngani esihlokwenesi?

⁴ Ngikuphi ukufana okukhona phakathi kokugijima umjarho nokuphila kwamaKrestu? Kunezinto ezimbalwa ezifanako. Akhesifunde ngezintathu zazo. Kokuthoma, kufuze silalele iinqophiso; kwesibili, kufuze sidzimelele entanjeni; kwesithathu, kufuze sihlule nanyana ngiziphi iintjhijilo esihlangabezana nazo.

5. Ngiyiphi indlela yokuphila ekufuze siyilandele begodu kubayini?

⁵ Nabazakufumana unongorwana emjarhweni, abagijimi kufuze balandele imithetho ebekiweko. Ngokufanako, nasifuna ukufumana unongorwana wokuphila okungapheliko kufuze silalele iinqophiso zokuphila kwamaKrestu. (IzE. 20:24; 1 Pit. 2:21) Nanyana kunjalo, uSathana nalabo abamlandelako abafuni siphile ukuphila kwamaKrestu. Kunalokho, bafuna ‘sihlanganyele nabo endlelenabo.’ (1 Pit. 4:4) Bahlekisa ngendlela esiphila ngayo, bathi indlelabo yokuphila ingcono begodu inetjhaphuluko. Kodwana lokho mamala ahlaza.—2 Pit. 2:19.

6. Khuyini oyifunda esibonelweni sakaBrian?

⁶ Labo abagijima endleleni yephasi lakaSathana ngokukhamba kwesikhathi bayalemuka ukuthi indlela abayikhethileko ayibasi etjhaphulukweni, kunalokho ibenza babe ziingqila zakaSathana. (Rom. 6:16) Cabanga ngesibonelo sakaBrian. Ababelethi bakhe bamkhuthaza bona aphile ukuphila kwamaKrestu. Nakasesemutjha, wazibuza ukuthi ukuphilokho kuzomthabisa na. Yeke waqunta ukuphila nabantu ebebanqotjhiswa ziinkambiso zakaSathana. Nakahlathululako uthi: “Kuncani ebengikwazi ngetjhaphuluko ebengiyifisa ngombana beyizongibangela imiraro eminengi ingenze ngithande izinto ezimbi. Ekukhambeni kwesikhathi, ngathoma ukusebenzisa kumbi iindakamizwa nokusela khulu begodu bengiziphatha kumbi ngokwamabhayi. Eminyakeni eyalandelako, ngaragela phambili ngasebenzisa iindakamizwa ngokudluleleko begodu ngaba sigqila sazo. . . . Ngathoma nokuzithengisa ukuze ngifumane imali.” Kwathi kusesenjalo, uBrian waqunta ukuthembela kuJehova begodu wathoma ukuphila ngeenkambiso zeBhayibheli. Watjhugulula indlela ebekaphila ngayo bewabhajadiswa ngo-2001. Sikhuluma nje, uthabe kwamambala begodu umKrestu ovuthiweko. *

7. Ngokomtlolo kaMatewu 7:13, 14 ngiziphi iindlela ezimbili eziphambi kwethu?

⁷ Qala bona kuqakatheke kangangani ukukhetha indlela elungileko. USathana ufuna bona soke silise ukugijima endleleni encani ‘etjhinga ekuphileni,’ kunalokho ufuna seqele endleleni ebanzi ekhanjwa babantu abanengi. Indlela ebanzi le, ithandwa babantu abanengi begodu kulula ukukhamba kiyo, kodwana ‘itjhinga ekubhujisweni.’ (Funda uMatewu 7:13, 14.) Yeke nasizakuhlala endleleni etjhinga ekuphileni kufuze singavumi ukudurhiswa ngilabo abangalaleli iinkambiso zakaJehova.

8. Umuntu ogijimako wenzani nakawako?

⁸ Abantu abagijima ibanga elide baqala endleleni ephambi kwabo ngombana abafuni ukukhutjwa bawe. Ngitjho nanyana, balinga ngamandla kusesenamathuba wokuthi bangakhutjwa ngebanga labantu abagijima nabo namkha bangakhutjwa mgodi osendleleni. Nakwenzeka bawe bayasikima baragele phambili. Abasolo bacabanga ngokuthi khuyini ebawisileko, kunalokho baqala phambili enongorwaneni abafuna ukumthumba.

9. Nange kwenzeka siwe, khuyini ekufuze siyenze?

⁹ Njengombana nathi sigijima, singakhubeka iinkhathi ezinengi ngendlela esikhuluma namkha esenza ngayo izinto. Ngasikhathi abantu esigijima nabo bangenza imitjhapho esizwisa ubuhlungu. Lokho yinto okufuze siyilindele. Akakho kithi onganasono, kuthi kusesenjalo soke sigijima endleleni encani esisa ekuphileni. Yeke ngezinye iinkhathi sizokwenza izinto ezisilinga namkha ezikhuba abafowethu nabodadwethu. UPowula wayibona indaba le nakazakuthi sibekezelelane nanyana ngezinye iinkhathi ‘kungaba khona onesizathu sokunghonghoyila’ ngathi. (Kol. 3:13) Kunokuthi sidzimelele ezintweni ezisiwisako, kufuze sicabange ngomklomelo obekwe phambi kwethu. Nange singawa, kufuze sisikime, sibuyele emjarhweni. Nasizizwa siba nelaka singasafuni nokusikima, angeze safika entanjeni begodu angeze samfumana unongorwana. Ukungezelela kilokho, singaba siqabo kilabo abalinga ngamandla bona bakhambe endleleni encani etjhinga ekuphileni.

10. Singakubalekela njani ukuba “siqabo” kwabanye?

¹⁰ Enye indlela esingabalekela ngayo ukuba “siqabo” kubafowethu nabodadwethu, kukuthi sibavumele benze izinto ngendlela ababona ngayo kunokuthi bazenze ngendlelethu. (Rom. 14:13, 19-21; 1 Kor. 8:9, 13) Nasenza ngendlela le, angekhe sibe njengabagijimi bamambala abaphalisanako. Bona baphalisana ngomnqopho wokuzifumanela unongorwana. Kanengi bazicabangela bona. Bangasunduzela abanye abagijimi ngeqadi ukwenzela bona babadlule. Ngokungafani nabo, thina asiphalisani. (Gal. 5:26; 6:4) Umnqophwethu kusiza abagijimi abanengi bona bafikelele nathi  entanjeni bafumane unongorwana wokuphila. Yeke silinga ukusebenzisa amezwi kaPowula wokobana ‘singatshwenyeki ngehlalakuhle yethu kwaphela kodwana sitshwenyeke nangehlalakuhle yabanye.’—Flp. 2:4.

11. Khuyini umgijimi adzimelela kiyo begodu kubayini?

¹¹ Kunokuthi baqale indlela ephambi kwabo, abagijimi bamambala badzimelela ekufikeni entanjeni. Ngitjho nanyana bangayiboni ngamehlo, bangazicabanga sebafikile kiyo begodu sebafumana unongorwana. Bakhuthazwa kukuthi baragela phambili bacabanga ngokufika entanjeni.

12. Khuyini uJehova asithembise yona?

¹² Emjarhweni lo, uJehova usithembise unongorwana esizowufumana nasiqeda umgijimo, kungaba kuphila ngokungapheliko ezulwini namkha ephasini. ImiTlolo isitjela ngalokho okuzokwenzeka ephasini elitjha, yeke singacabanga ngokuthi ukuphila kwethu kuzokuba mnandi kangangani nasifumana unongorwana. Nasiragela phambili sicabanga ngengomuso uJehova asithembise lona, angekhe sivumele nanyana yini bona isiwise unomphela.

13. Ngikuphi esinakho abagijimi abaphalisanako abanganakho?

¹³ Abagijimi bemidlalo yamaGirigi bekufuze bahlule iintjhijilo ezifana nobuhlungu kunye nokudinwa. Bekufuze bathembele ebandulweni abalifumeneko nemandlenabo. Nathi sifana nabagijimabo ngombana siyabandulwa ukuthi kufuze sigijime njani. Kodwana thina singcono khulu nasimadaniswa nabagijimi abaphalisanako. Sifumana amandla angapheliko avela kuJehova. Nasithembela kuJehova, uthembisa ukuthi angekhe asibandule kwaphela kodwana uzosenza sibe namandla!—1 Pit. 5:10.

14. Umtlolo wesi-2 kwebeKorinte 12:9, 10 ungasisiza njani bona siqalane neentjhijilo?

¹⁴ UPowula waqalana neentjhijilo ezinengi. Ngaphezu kokuhlanjalazwa nokuhlunguphazwa aqalana nakho, ngezinye iinkhathi wazizwa aphelelwa mamandla begodu bekufuze aqalane nobudisi abuhlathulula ngokuthi ‘liliva enyameni.’ (2 Kor. 12:7) Kunokuthi aqale iintjhijilwezo njengebanga lokulisa ukulotjha uJehova, waziqala njengethuba lokuthembela kuJehova. (Funda yesi-2 kwebeKorinte 12:9, 10.) Ngebanga lokuthi uPowula waba nombono omuhle, uJehova wamsiza kizo zoke iintjhijilo aqalana nazo.

15. Nasilingisa uPowula, khuyini esizoyibona?

¹⁵ Nathi singahlanjalazwa namkha sihlunguphazwe ngebanga lokukholwa kwethu. Kungafuze sikghodlhelele ukugula nokuphelelwa mamandla. Kodwana nasingalingisa uPowula, iintjhijilwezo zingaba lithuba lokubona ithando nesekelo lakaJehova.

16. Nawunepilo ebogabogako, khuyini ongayenza?

¹⁶ Kghani uhlezi esitulweni sabarholopheleko namkha ulele embhedeni ngebanga lokugula? Kghani unamadolo abogabogako namkha awusaboni kuhle emehlweni? Nakunjalo, ungakghona na ukulotjha uJehova nalabo abasesebatjha nabanepilo ehle? Iye ungakghona. Inengi labantu abakhulileko nabagulako lisemjarhweni otjhinga ekuphileni. Abawugijimi umjarho lo ngamandlabo kwaphela. Nabasemakhaya bafumana amandla kuJehova ngokulalela imihlangano yamaKrestu basebenzisa abofunjathwako begodu babukele nemihlangano emakhomphyutheni. Bahlanganyela emsebenzini wokwenza abafundi ngokutjhumayela abodorhodere, abahlengikazi neenhlobo.

17. UJehova uzizwa njani ngalabo abanemiraro yezepilo?

¹⁷ Nawungasakghoni ukusebenzela uJehova  ngendlela ebewumsebenzela ngayo, ungadani bewucabange ukuthi angeze usakghona ukukghodlhelela bekube sekupheleni. UJehova uyakuthanda ngebanga lokukholwa kwakho nangomsebenzi omenzele wona esikhathini esidlulileko. Nje, ulitlhoga khulu isizo lakhe begodu angeze akulahla. (Rhu. 9:11) Kunalokho, uzokutjhidela kuwe. Akhutjheje okwatjhiwo ngudadwethu oqalene nemiraro yezepilo, uthi: “Njengombana imirarwami yezepilo iba minengi, amathuba wokukhuluma nabantu ngeendaba ezimnandi ayancipha. Kodwana ngiyazi ukuthi ngitjho nanyana kukuncani engikwenzako bona ngithabise uJehova uyakubona lokho begodu nami kuyangithabisa.” Nawuzizwa ugandelelekile, khumbula ukuthi awusiwedwa. Cabanga ngesibonelo sakaPowula esikhuthazako nakathi: “Ngiyathaba ngokubogaboga, . . . ngombana nangibogabogako, kulapho-ke nginamandla khona.”—2 Kor. 12:10.

18. Ngibuphi ubudisi abanye abaqalene nabo?

¹⁸ Abanye abasemjarhweni otjhinga ekuphileni baqalene nesinye isitjhijilo. Baqalene nobudisi obungabonakaliko ebantwini. Ngokwesibonelo, abanye baqalene nokugandeleleka kunye namazizo wokutshwenyeka. Kubayini iinceku zakaJehovezi ziqalene nobudisobu? Kungebanga lokuthi lokha umuntu nakaphuke umkhono namkha nakahlezi esitulweni sabarholopheleko woke umuntu uyabona ukuthi yini umraro aqalene nawo begodu kubulula bona abantu bamsize. Kuhlukile nakuziwa kilabo abaqalene nemiraro yokungasebenzi kuhle komkhumbulo namkha abanomraro wokuhlala batshwenyekile ngombana bona akusibulula ukubona ukuthi baqalene nani. Ubujamo babo bufana nebomuntu ohlezi esitulweni sabarholopheleko namkha ophuke umkhono, kodwana okuhlukileko ngabo kukuthi akusibulula ukubona imiraro abaqalene nayo. Yeke lokho kwenza bona bangalifumani msinyana isizo nethando abalitlhogako.

19. Khuyini esiyifunda kuMefi-Bhotjhethi?

¹⁹ Nakunezinto ongakghoni ukuzenzela zona ngebanga lokurholophala begodu uzizwa ngasuthi abantu abakuzwisisi, isibonelo sakaMefi-Bhotjhethi singakukhuthaza. (2 Sam. 4:4) Bekasirhole kwathi kusesenjalo kwafuze bona aqalane nokwahlulelwa yiKosi uDavida. Akhenge azibangele imiraro ebekaqalene nayo. Nanyana kunjalo, akhenge avume ukuthi ubujamo bakhe bumdanise, kunalokho bekathabela zoke izinto ezihle ebezenzeka kuye. Bekayithokozela indlela uDavida ebekamphethe ngayo. (2 Sam. 9:6-10) Yeke uMefi-Bhotjhethi nakahlulelwa nguDavida, walinga ukucabanga ngabo boke ubujamo. Akhenge avumele imitjhapho kaDavida imenze abe namavunda.  Akhenge asole uJehova ngesenzo sakaDavida. UMefi-Bhotjhethi wafuna izinto ezihle angazenza bona asekele ikosi ebeyibekwe nguJehova. (2 Sam. 16:1-4; 19:24-30) UJehova wenza bona isibonelo esihle sakaMefi-Bhotjhethi sitlolwe eBhayibhelini ukwenzela bona kuzuze thina.—Rom. 15:4.

20. Ukutshwenyeka khulu kungabathinta njani abanye, kodwana khuyini ekufuze baqiniseke ngayo?

²⁰ Ngebanga lokutshwenyeka okukhulu, abanye abafowethu nabodadwethu baphila ngokusaba qobe lilanga. Bangakufumana kubudisi ukuba hlangana nesiqubuthu kodwana baragela phambili nokuza esifundweni, emihlanganweni yesifunda neyesigodi. Bakufumana kubudisi ukukhuluma nabantu abangabaziko, nanyana kunjalo bakhuluma nabantu abahlukahlukeneko nababatjhumayezako. Nangabe nawe uqalene nobujamo obufanako, qiniseka bona awusiwedwa. Abantu abanengi baqalene neentjhijilo ezifanako. Khumbula ukuthi ukuzidela kwakho kuyamthabisa uJehova. Ukuthi bekubenje awukakalahli itewu kubufakazi bokuthi uJehova uyakubusisa begodu ukunikela amandla owatlhogako. * (Flp. 4:6, 7; 1 Pit. 5:7) Nawuragela phambili ulotjha uJehova naphezu kobuhlungu bangaphakathi namkha ukulinganiselwa okuthileko, qiniseka ngokuthi kuyamthabisa lokho.

21. Khuyini soke esingakghona ukuyenza nasisizwa nguJehova?

²¹ Kuyathabisa ukwazi ukuthi kunomehluko phakathi komjarho wamambala wokuphalisana nomjarho uPowula akhuluma ngawo. Munye kwaphela umuntu owathumba unongorwana emjarhweni wamambala ekukhulunywa ngawo eBhayibhelini. Ngokungafani nalokhu, boke abakghodlhelelako emjarhweni wamaKrestu lo bazokufumana ukuphila okungapheliko. (Jwa. 3:16) Emjarhweni wamambala wokuphalisana kufuze abagijimi baphile kuhle emzimbeni nabazakuthumba iphaliswano. Ngakelinye ihlangothi, inengi lethu linezinto elingakghoni ukuzenza ngebanga lepilo, nanyana kunjalo asipheli amandla. (2 Kor. 4:16) Soke sizokugijima besifikelele entanjeni ngombana sisekelwa nguJehova.