Kubayini uJesu adzubhula amezwi kaDavida asemtlolweni weRhubo 22:2 ngaphambi kobana ahlongakale?

Amanye amezwi uJesu awakhulumako ngaphambi kokuhlongakala kwakhe asemtlolweni kaMatewu 27:46 athi: “Zimami, Zimami, ungitjhiyeleni na?” Ngokutjho amezwi la, uJesu bekazalisa amezwi womrhubi uDavida asemtlolweni weRhubo 22:2. (Mar. 15:34) Kungaba kumbi ukuphetha ngokuthi uJesu wadzubhula amezwi la ngebanga lokuthi bekadanile namkha bekanekholo elincani. UJesu bekazwisisa ukuthi kubayini kufuze ahlongakale begodu bekazimisele ukwenza njalo. (Mat. 16:21; 20:28) Bekazi nokuthi ngesikhathi azokuhlongakala ngaso, uJehova uzokususa ‘umthangala ambiyele’ ngawo. (Job. 1:10) UJehova wavumela uJesu azibonakilise ukuthi uzokuhlala athembekile bekube sekufeni.—Mar. 14:35, 36.

Nangabe kunjalo, kubayini-ke uJesu adzubhula amezwi asemtlolweni werhubo? Nanyana singayazi yoke indaba, akhesikhulume ngezinto okungenzaka zamenza wadzubhula amezwi lawo. *

Ngokutjho amezwi la, kghani uJesu bekaveza ukuthi uJehova angeze angenela ekuhlongakaleni kwakhe? UJesu bekufuze abhadele isihlengo ngaphandle kwesizo lakaJehova. Bekamumuntu onganasono, ngebangelo bekutlhogeka bona afe, “anambithe ukufa ngebanga labo boke.”—Heb. 2:9.

Ngokudzubhula amezwi asemtlolweni werhubo, kghani uJesu bekafuna ukuthi abantu bacabange ngesahlukwesi soke? Bekujayelekile ngesikhatheso  bona amaJuda abambe eminye imitlolo yerhubo ngehloko. Ngokukhunjuzwa ngevesi linye lomtlolo werhubo, abantu bebakghona ukucabangisisa ngesahluko soke. Nangabe uJesu bekanalokhu emkhumbulwenakhe, bekangakghona ukusiza abalandeli bakhe abamaJuda bona bakhumbule iimphorofido ezinengi ezisencwadini yerhubo nangezinto ebezizokwenzeka nakazokuhlongakala. (Rhu. 22:7, 8, 15, 16, 18, 24) Godu, irhubweli naliphethako lithi umbuso kaZimu uzokuthumba emaphethelweni wephasi.—Rhu. 22:27-31.

Ngokudzubhula amezwi kaDavide, kghani uJesu bekazama ukuveza ukuthi akanamlandu? UJesu nakazokuhlongakala, kwafuze akghodlhelelele ukuthweswa umlandu wokusilaphaza ibizo lakaZimu. (Mat. 26:65, 66) Icala lakhe ladenjwa ebusuku, okuyinto ebeyingasisemthethweni ngesikhatheso. (Mat. 26:59; Mar. 14:56-59) Ngokudzubhula amezwi la njengombuzo ongatlhogi ipendulo, kungenzeka uJesu bekazama ukuveza ukuthi akunanto embi ayenzileko bona angafumana isigwebo esibuhlungu kangaka.

Kghani uJesu bekakhumbuza abanye ngokuthi umtloli werhubweli uDavida, njengombana naye atlhaga, lokho bekulitshwayo lokulahlwa nguJehova? Umbuzo kaDavida bewungavezi ukuthi utlhoga ukukholwa. Ngemva kokubuza umbuzo lo, watjengisa ukuthi uthembele emandleni kaJehova begodu uJehova waragela phambili ambusisa. (Rhu. 22:23, 24, 27) Ngendlela efanako, nanyana uJesu, “iNdodana kaDavida,” yahlunguphazwa esigodweni sokuhlunguphazwa, lokho bekungatjho ukuthi uJehova akamthandi uJesu.—Mat. 21:9.

Kghani uJesu bekaveza ukuthi uzwa ubuhlungu ngebanga lokuthi uJehova akhange amvikele ukwenzela bona aveze ukuthi uthembeke kangangani? Bekungasi yihloso kaJehova bona indodanakhe itlhage beyihlongakale. Lokho kwenzeka ngemva kokuhlubuka kwabantu bokuthoma. UJesu akunalitho elimbi alenzako kodwana bekutlhogeka bona ahlunguphazwe bekahlongakale ukuze kuphenduleke imibuzo eyabuzwa nguSathana nokuthi abe yimbadelo yesihlengo sokuthenga koke u-Adamu akulahlako. (Mar. 8:31; 1 Pit. 2:21-24) Lokho bekungenzeka kwaphela nangabe uJehova bekangasusa isivikelo sakhe kuJesu.

Inga-kghani uJesu bekazama ukusiza abakandeli bakhe ukuthi badzimelele ephuzwini lokuthi kubayini uJehova amvumele ukuthi ahlongakale ngendlela le? * UJesu bekazi ukuthi ukufa njengesilelesi esigodweni sokuhlunguphazwa bekungakhipha abantu abanengi ekholweni. (1 Kor. 1:23) Nangabe abalandeli bakhe bebadzimelele ebangeni lamambala lokuhlongakala kwakhe, bebazokuzwisisa ukuqakatheka kwesenzakalwesi. (Gal. 3:13, 14) Bebazokuqala uJesu njengoMsindisi, ingasi njengesilelesi.

Nanoma kungaba ngisiphi isizathu esenza uJesu adzubhule amezwi la, bekalemuka bona koke lokhu kwenzeka ngombana kufuze kuzaliseke umnqopho kaJehova. Msinyana ngemva kobana adzubhule irhubweli, uJesu wathi: “Kuphethiwe!” (Jwa. 19:30; Luk. 22:37) Ukuthi uJehova ususe isivikelo sakhe kuJesu, lokho kwenza bona uJesu aphethe isabelo sakhe ebekathunyelwe sona ephasina. Lokho kwenzeke bona kuzaliseke zoke izinto ebezitlolwe ngaye “emThethweni kaMosi nakubaPhorofidi namaRhubo.”—Luk. 24:44.