1-2. Siyini isihlengo begodu kubayini sisitlhoga?

LOKHA indoda enganasono u-Adamu nayikhetha ukungalaleli, yazilahlekisela yona nabantwana bayo ukuphila okungapheliko. Bekanganasizathu sokona. Wakwenza ngomabomu. Kuthiwani ngabantwana bakhe? Bebangekho u-Adamu nakonako. (Rom. 5:12, 14) Kghani kukhona ebekungenziwa bona basindiswe ekufeni ebekufanele ababelethi babo kwaphela? Iye! Msinyana nje ngemva kokona kwaka-Adamu, uJehova waveza indlela yokutjhaphulula iingidi esonweni nekufeni. (Gen. 3:15) Ngesikhathi sakhe asibekileko, uJehova bekazokuthumela iNdodanakhe isuka ezulwini bona ‘izokuba sihlengo sabaningi.’—Mar. 10:45; Jwa. 6:51.

² Siyini isihlengo? Nayiqalisela ebizweneli, imitlolo yamaKrestu yesiGirigi ithi isihlengo linani elabhadelwa nguJesu bona abuyise lokho u-Adamu akulahlako. (1 Kor. 15:22) Kubayini sitlhoga isihlengo? Kungombana iinkabisolawulo zakaJehova eziseMthethwenakhe malungana nobulungisa bezithi ukuphila ngokuphila. (Eks. 21:23, 24) U-Adamu walahlekelwa kuphila njengomuntu onganasono. Bona aphelelise ubulungiswa bakaZimu, uJesu kwafuze anikele ngokuphila kwakhe njengomuntu onganasono. (Rom. 5:17) Ngokwenza njalo, waba ‘NguBaba Isiphelani’ kibo boke abotjengisa ikholo esihlengweni.—Isa. 9:6; Rom. 3:23, 24.

3. Ngokomtlolo kaJwanisi 14:13 no 15:13, kubayini uJesu bekazimisele ukudela ukuphila kwakhe okunganasono?

³ UJesu bekazimisele ukunikela ngokuphila kwakhe ngebanga lokuthanda thina noBabakhe wezulwini. (Funda uJwanisi 14:31; 15:13.) Ngebanga lethando, wazimisela ukuhlala athembekile begodu enze intando kaBabakhe bekufikele ekupheleni. UJesu wathembeka bekwaba sekufeni. Lokho kwavula ithuba lokuzaliseka komnqopho kaZimu wekuthomeni malungana nabantu. Esihlokwenesi, sizokucoca ngokuthi  kubayini uZimu avuma bona uJesu ahlunguphazwe kangaka ngaphambi kobana ahlongakale. Sizokucoca godu nangesibonelo somtloli weBhayibheli obekasithokozela isihlengo. Ekugcineni, sizokucoca ngokuthi singatjengisa njani ukuthi nathi sisithokoza khulu isihlengo esasifumana ngebanga lokuzidela kwakaJehova noJesu.

4. Hlathulula indlela uJesu ahlongakala ngayo.

⁴ Akhucabange ngokuthi bewanjani amalanga kaJesu wamaswaphela asephasini. Bekangabiza iingilozi ezimalegiyoni bona zimvikele kodwana khenge azibize, wavuma ukubanjwa nokubethwa kabuhlungu masotja wamaRoma. (Mat. 26:52-54; Jwa. 18:3; 19:1) Bambetha bamdabula isikhumba ngesibebhu esihlabako. Ngemva kwalokho, bamthwalisa isigodo esibudisi emgogodlhenakhe odabukileko. Wathoma ukudosa isigodweso waya naso la bebazosigubhela khona kodwana nakasakhamba naso njalo, bakatelela indoda thileko ebeyizijamele ibukele bona imthwalise isigodweso. (Mat. 27:32) UJesu nakafika la bekazokufela khona, ababulali bakhe babethela izandla zakhe neenyawo esigodweni ngeempikiri. Iimbobo ebezisemzimbenakhe ngebanga lokubethelwa esigodweni zadoseka ngombana umzimbakhe bewubudisi. Abangani bakhe bezwa ubuhlungu, unina wamlilela kabuhlungu khulu kodwa ababusi bamaJuda bebahlekisa ngaye. (Luk. 23:32-38; Jwa. 19:25) Kwaba sikhathi esibuhlungu ngemva kwesinye. Ihliziywakhe namaphaphu kwathwala budisi, khenge asakghona ukuphefumula kuhle. Ummoyakhe wokugcina wawudosa ngokuthi enze umthandazo wokuhlula. Ngemva kwalokho, wahloma ihloko phasi, wahlongakala. (Mar. 15:37; Luk. 23:46; Jwa. 10:17, 18; 19:30) Mbala, wafa kabuthaka, kabuhlungu nangendlela ehlazisako.

5. Khuyini ebeyitshwenya uJesu ukudlula indlela abulawa ngayo?

⁵ KuJesu, indlela ahlongakala ngayo, bekungasiyo into ebeyimtshwenya. Into ebeyimtshwenya, milandu abekwa yona nakazokubulawa. Waleyelwa amala kuthiwa umhlambalazi, umuntu ongamhloniphi uZimu namkha ibizo lakhe. (Mat. 26:64-66) Nakacabanga ngomlando omumbi abekwe wona lo, watshwenyeka khulu kangangokuthi wabe wafisa ngathana uBabakhe angalisusa ihlazweli kuye. (Mat. 26:38, 39, 42) Kubayini uJehova avumela iNdodanakhe ayithandako bona ihlunguphazwe beyihlongakale? Akhesicoce ngamabanga amathathu.

6. Kubayini kwafuze uJesu aphanyekwe esigodweni sokuhlunguphazwa?

⁶ Kokuthoma, uJesu kwakufuze aphanyekwe esigodweni ukuze akwazi ukutjhaphulula amaJuda ekuqalekisweni. (Gal. 3:10, 13) Bebavumile ukukhamba ngoMthetho kaZimu kodwana besele babhalelwa kukwenza ngokwesifungo sabo. Lokho kwenza bona isiqalekiswesi singezelele ekulahlweni kwabantwana baka-Adamu abanesono. (Rom. 5:12) Umthetho kaZimu otjhinga kuma-Israyeli bewuthi lokha umuntu nakenza isono esifanelwe kukufa, kufuze umuntu loyo abulawe. Ngemva kwalokho, umzimbakhe uphanyekwe esigodweni. * (Dut. 21:22, 23; 27:26) Ukuphanyekwa kwakaJesu esigodweni kwenza kwakghoneka ukuthi zoke iintjhaba ebezingamfuniko zizuze emhlatjelwenakhe.

7. Ngiliphi ibanga lesibili elenza ukuthi uZimu avumele bona iNdodanakhe ihlunguphazwe?

⁷ Cabanga ngebanga lesibili elenza uJehova  avumele iNdodanakhe bona ihlongakale. Bekayibandula bona izokudlala indima yokuba mPhristi omKhulu. UJesu wazibonela ngawakhe ukuthi kubudisi kangangani ukulalela uZimu nakangaphasi kwesilingo. Wazizwela yena ukugandeleleka bewathandaza “ngokulila okukhulu nangeenyembezi.” Kwamambala, ngebanga lokuthi khewagandeleleka emmoyeni, uJesu uyazizwisisa iintlhogo zethu begodu “uyakghona ukusiza labo abalingwako.” Kuyasithokozisa ukuthi uJehova ukhethe umPhristi omKhulu, okghonako ‘ukuzwelana nokubogaboga kwethu’!—Heb. 2:17, 18; 4:14-16; 5:7-10.

8. Ngiliphi ibanga lesithathu eletha uZimu wavumela uJesu bona alingwe?

⁸ Kwesithathu, uJehova wavumela uJesu bona ahlunguphazwe kabuhlungu ukuze kuphenduleke umbuzo oqakatheke khulu: Ukhona umuntu ongahlala azinikezele kuJehova ngitjho nanyana alingwa kabuhlungu? USathana uthi awa! Uthi abantu balotjha uJehova ngeenzathu zokuba marhamaru. Ukholelwa ukuthi njengobamkhulwethu, u-Adamu, angekhe sazinikela kuJehova ngokupheleleko. (Job. 1:9-11; 2:4, 5) UJehova wavumela uJesu bona alingwe ngendlela umuntu angakhenge alingwe ngayo ngombana uyamthemba. UJesu waragela phambili wathembeka, ngalokho, watjengisa ukuthi uSathana ungumleyi mala.

9. Umpostoli uJwanisi wasibekela siphi isibonelo?

⁹ Ukukholwa kwamaKrestu amaningi kuqiniswe yifundiso emalungana nesihlengo. Ukwazi ngesihlengo kuwenze aragela phambili nokutjhumayela naphezu kokuphikiswa begodu sele akghodlhelelele iintjhijilo eziningi, sikhuluma nje amanye aluphele. Akhesicoce ngesibonelo sompostoli uJwanisi. Ngokuthembeka watjhumayela ngeendaba ezimnandi malungana noKrestu nesihlengo pheze iminyaka ema-60. Lokha nasele sekayokuqeda iminyaka ema-90, amaRoma bewamqala njengomuntu ozokuthikazisa ubuKhosi bawo, kungebangelo abotjhwa esihlengeleni sePatmosi. Bewuyini umlandwakhe? ‘Ukukhuluma ngoZimu nokufakaza ngoJesu.’ (IsAm. 1:9) Lesi sibonelo esiphuma phambili sokukholwa nokukghodlhelela!

10. Imitlolo kaJwanisi itjengisa njani ukuthi bekasithokozela isihlengo?

¹⁰ UJwanisi waveza indlela amthanda ngayo uJesu nendlela asithokozela ngayo isihlengo, lokho wakuveza emitlolweni ethileko eBhayibhelini. Imitlolo leyo ineenkhombo ezingaphezu kwezili-100 ezimalungana nesihlengo kunye neenzuzo ezikhambisana nesihlengo. Ngokwesibonelo, uJwanisi watlola wathi: “Nakungenzeka kube khona owenza isono, sinomsizi kuBaba, uJesu Krestu, olungileko.” (1 Jwa. 2:1, 2) Imitlolo kaJwanisi, igandelela ukuqakatheka ‘kokunikela ubufakazi obumalungana noJesu.’ (IsAm. 19:10) Kuyakhanya ukuthi uJwanisi bekasithokozela khulu isihlengo. Singatjengisa njani ukuthi nathi siyasithokozela isihlengo?

11. Khuyini engasisiza silwisane nesilingo?

¹¹ Balekela isilingo. Nangabe siyasithokozela isihlengo, ngeze saba nomkhumbulo othi: ‘Akunatlhogeko yokobana ngilwisane nesono. Ngingasenza, kuzokuthi ngemva kwalokho, ngibawe ukulitjalelwa.’ Kunalokho, nasilingwako bona senze isono, kufuze sithi: ‘Awa! Ngingabenza njani ubumbi obungaka ngemva kwazo zoke izinto uJehova noJesu abangenzele zona?’ Ngokuvumelana nalokho, kufuze  sibawe amandla kuJehova, simrabhele sithi: ‘Ungangingenisi esilingweni.’—Mat. 6:13.

12. Singasisebenzisa njani iseluleko esisemtlolweni yoku-1 kaJwanisi 3:16-18?

¹² Thanda abafowenu nabodadwenu. Nasitjengisa ukuthi siyabathanda abafowethu nabodadwethu, sisuke sitjengisa nokuthi siyasithokozela isihlengo. Kubayini sitjho njalo? Kungombana uJesu wanikela ngokuphila kwakhe, ingasi bona kusindiswe thina kwaphela, kodwana nabafowethu nabodadwethu. Nangabe bekakulungele ukubafela, kuyakhanya bona baqakathekile emehlwenakhe. (Funda yoku-1 kaJwanisi 3:16-18.) Sitjengisa ukuthi sithanda abafowethu nabodadwethu ngendlela esibaphatha ngayo. (Efe. 4:29, 31–5:2) Ngokwesibonelo, siyabasiza nabagulako nalokha nabakghodlhelelela isitjhijilo esithileko esibudisi, njengehlekelele yemvelo. Khuyini okufuze siyenze lokha umuntu othileko esilotjha naye nakenza namkha atjho into esiphatha kabuhlungu?

13. Kubayini kufuze silibalelane?

¹³ Inga-kghani unomukghwa wokubambela abafowenu amavunda? (Lev. 19:18) Nakunjalo, lalela nasi iseluleko: ‘Ragelani phambili nibekezelelana begodu nilibalelana ngokutjhaphulukileko ngitjho nanyana kungaba khona onesizathu sokunghonghoyila ngomunye. Njengombana uJehova anilibalela ngokutjhaphulukileko, nani kufuze nenze okufanako.’ (Kol. 3:13) Qobe nasilibalela abafowethu nabodadwethu, sitjengisa uJehova ukuthi mbala, siyasithokozela isihlengo. Khuyini esingayenza ukutjengisa ukuthi sisithokoza khulu isihlengo?

14. Ngiyiphi enye indlela esingatjengisa ngayo ukuthi siyathokoza ngesihlengo?

¹⁴ Mthokoze uJehova ngesihlengo. Udade oneminyaka eyi-83, ibizo lakhe linguJoanna we-India, uthi: “Ngicabanga bona kuqakathekile ukukhuluma ngesihlengo qobe lilanga lokha nangithandazako ngithokoza uJehova.” Emthandazwenakho, cabanga ngobutjhapho obenzileko hlangana nelanga, bese ubawa uJehova bona akulibalele. Iye, obunye ubutjhapho buzokutlhoga ukuthi uye kubadala. Bazokulalela, begodu ngomusa, bazokunikela iseluleko esivela eliZwini lakaZimu. Bazokuthandaza nawe, babawe uJehova ukuthi akusize ubone ukuqakatheka kwesihlengo sakaJesu “ukuze ulapheke.”—Jak. 5:14-16.

15. Kubayini kufuze siziphe isikhathi sokufunda nokuzindla ngesihlengo?

 ¹⁵ Zindla ngesihlengo. URajamani, udade oneminyaka ema-73 uthi, “Nangifunda ngendlela uJesu ahlunguphazwa ngayo, amehlwami azala iinyembezi.” Kungenzeka nawe uzizwa ngendlela efanako nawucabanga ngokuhlunguphazwa kweNdodana kaZimu. Njengombana uzindla ngokuzidela uJesu akwenzako, uzomthanda khulu yena noBabakhe. Bona ukghone ukuzindla ngesihlengo, funda ngokungeneleleko ngendaba le esifundweni sakho.

16. Ukufundisa abanye ngesihlengo kungasizuzisa njani? (Qala isithombe esingaphandle.)

¹⁶ Fundisa abanye ngesihlengo. Ngaso soke isikhathi nawucoca nabanye ngesihlengo, ukuthokozela kwakho isihlengo kuyakhula. Sinamathulusi amahle esingawasebenzisa bona sifundise abanye ngokuthi kubayini kwatlhogeka bona uJesu asifele. Ngokwesibonelo, singasebenzisa isifundo 4 sencwajana ethi, Iindaba Ezimnandi Ezivela KuZimu! Isifundweso sinesihloko esithi, “Ngubani UJesu Krestu?” Namkha sesi-5 sencwadi ethi, Lisifundisani IBhayibheli? Isahlukweso sinesihloko esithi, “Isihlengo Sisipho SakaZimu Esizidlula Zoke.” Qobe mnyaka sithuthukisa ukuthokozela kwethu isihlengo ngokuya esiKhumbuzweni sokufa kwakaJesu begodu simeme abantu abaningi bona bahlanganyele nathi. Mbala, uJehova usiphathise umsebenzi omuhle khulu wokufundisa abantu ngeNdodanakhe!

17. Kubayini isihlengo kusisipho esiphuma phambili uZimu asiphe abantu?

¹⁷ Akunakuzaza bona sinebanga elihle lokuthuthukisa ilwazi lethu nokuthokoza ngesihlengo. Isihlengo senza bona sibe nobuhlobo obutjhideleneko noJehova ngitjho nanyana sinesono. Imisebenzi kaDeveli emimbi izokutjhatjalaliswa ngebanga lesihlengo. (1 Jwa. 3:8) Isihlengo senza bona umnqopho kaJehova wekuthomeni ngephasi uzaliseke. Iplanethi izokuba yipharadesi. Boke abantu bazabe bathanda bebalotjha uJehova. Yeke, malanga woke akhesifuneni iindlela zokutjengisa ukuthi siyasithokozela isihlengo, isipho esihle kunazo zoke uZimu asiphe abantu!