1. Ngiliphi ilungelo elihle esinalo?

KUTHABISA khulu kwamambala ukuba yingcenye yebandla lakaJehova. Sinabantu abakaZimu abanethando, abanokuthula nabathabileko. Kghani uyayazi indawakho ebandleni?

2. Ngimuphi umfanekiso umpostoli uPowula awusebenzisa kwezinye zeencwadi zakhe?

² Isibonelo sakaPowula sizosisiza khulu nasiza endabeni le, khulukhulu njengombana atlola iincwadi ezinengi malungana nendaba le. Eencwadini zakhe ezinengi, uPowula wafanisa ibandla nomzimba womuntu. Wafanisa godu omunye nomunye umuntu osebandleni nelunga lomzimba.—Rom. 12:4-8; 1 Kor. 12:12-27; Efe. 4:16.

3. Ngiziphi iimfundo ezintathu esizokucoca ngazo esihlokwenesi?

³ Esihlokwenesi sizokucoca ngeemfundo ezintathu esizifunda emfanekisweni kaPowula. Kokuthoma sizokufunda ukuthi omunye nomunye kithi unendawo * ebandleni lakaJehova. Kwesibili sizokucoca ngokuthi yini esingayenza nakubudisi ukufumana indawo ebandleni. Kwesithathu sizokucoca ngokuthi khuyini ekufuze siyenze emsebenzini uJehova asinikele wona.

4. Sifundani emtlolweni Roma 12:4, 5?

⁴ Isifundo sokuthoma esisifumana emfanekisweni kaPowula  kukuthi soke sinendawo eqakathekileko emndenini kaJehova. UPowula uthoma umfanekiswakhe ngokuthi “Sinamalunga amanengi emzimbeni munye, kodwana amalunga lawo awenzi umsebenzi ofanako woke, nathi, nanyana sibanengi, simzimba munye ebunyeni noKrestu, kodwana soke simalunga welinye nelinye.” (Rom. 12:4, 5) UPowula bekakhuluma ngani? Bekatjho ukuthi ngamunye wethu unendima eqakathekileko kodwana ehlukileko ebendleni begodu ngamunye wethu uqakathekile.

5. Ngiziphi ‘izipho’ uJehova azinikele ibandla?

⁵ Nawucabanga ngabantu abanendawo ebandleni kungenzeka ucabanga ngalabo abadosa phambili ebandleni. (1 Thes. 5:12; Heb. 13:17) Kuliqiniso ukuthi ngoKrestu uJehova unikele, “ngezipho ezibabantu” ebandleni lakhe. (Efe. 4:8) ‘Izipho ezibabantwezi’ zifaka hlangana amalunga wesihlopha esibusako, abasizi besihlopha esibusako, amalunga wekomidi yegatja, ababonisi abajikelezako, abanqophisi bekonzo, abadala bamabandla kunye neenceku ezisizako. Boke abafowethwaba bakhethwe mumoya kaJehova ocwengileko bona batlhogomele izimvu begodu baqinisa ibandla.—1 Pit. 5:2, 3.

6. Ngokomtlolo weyoku-1 kwebeThesalonika 2:6-8 khuyini abafowethu abakhethwe mumoya abalwela ukuyenza?

⁶ Abafowethu bakhethwa mumoya ocwengileko bona benze umsebenzi ohlukahlukeneko ebandleni. Njengombana umzimba unamalunga ahlukahlukeneko, anjengezandla neenyawo ukuthi nazisebenzisanako zizuzisa umzimba woke, abafowethu basebenza budisi bona bazuzise ibandla loke. Abafuni ukuzidumisa bona. Kunalokho basebenza ngamandla bona baqinise abafowethu nabodadwethu ebandleni. (Funda yoku-1 kwebeThesalonika 2:6-8.) Sithokoza uJehova ngabafowethu abangazicabangeli bona kwaphela kodwana ababeka ibandla phambili.

7. Ngiziphi iimbusiso abafowethu nabodadwethu abazifumanako ngokuthi balotjhe uJehova isikhathi esizeleko?

⁷ Abanye ebendleni bangakhethwa bona babe ziinthunywa zevangeli, amaphayona akhethekileko namaphayona wesikhathi esizeleko. Eqinisweni abafowethu nabodadwethu ephasini loke benza umsebenzi wokwenza abafundi uze phambili ekuphileni kwabo. Ngokwenza njalo, basize abantu abanengi balandela uJesu Krestu. Ngitjho nanyana abatjhumayeli besikhathi esizeleko banganazinto ezinengi kodwana uJehova ubanikele ukwaneliseka. (Mar. 10:29, 30) Siyabathanda abafowethu nabodadwethwaba begodu siyathokoza ngokuthi bamalunga webandla.

8. Kubayini woke umtjhumayeli weendaba ezihle aqakathekile kuJehova?

⁸ Inga-kghani abafowethu abakhethiweko nalabo abasekonzweni yesikhathi esizeleko kwaphela abanendawo ebandleni? Awa akusinjalo. Woke umtjhumayeli weendaba ezimnandi uqakathekile kuJehova begodu unendawo ebendleni. (Rom. 10:15; 1 Kor. 3:6-9) Ekhabolakhona enye yezinto eziqakatheke khulu ebandleni, kukwenza abalandeli beKosethu uJesu Krestu. (Mat. 28:19, 20; 1 Thim. 2:4) Boke abantu abanesandla ebandleni, ababhajadisiweko nabangakabhajadiswa balinga ukwenza umsebenzi wokutjhumayela uze qangi ekuphileni kwabo.—Mat. 24:14.

9. Kubayini sibathanda abodadwethu abamaKrestu?

⁹ UJehova utjengisa ithando lakhe ngokunikela abafowethu nabodadwethu umsebenzi oqakathekileko ebandleni. Uyabathanda begodu baqakathekile kuye abafazi,  abomma, abahlolokazi nabodadwethu abangakatjhadi abamlotjha ngokuthembeka. Kanengi imitlolo ikhuluma ngabomma abaphuma phambili abathabisa uZimu. Bayathokozwa ngokuba ziimbonelo ezihle zokuhlakanipha, zokuba nokukholwa, ukukhuthala, isibindi, umusa nokwenza imisebenzi emihle. (Luk. 8:2, 3; IzE. 16:14, 15; Rom. 16:3, 6; Flp. 4:3; Heb. 11:11, 31, 35) Angeze sakghona ukumthokoza ngokwaneleko uJehova ngabafazi abamaKrestu emabandlenethu, abanobuntu obuhle kangaka.

10. Kubayini sibathanda abafowethu nabodadwethu abakhulileko?

¹⁰ Kuyasithabisa ukuba nabantu abakhulileko emabandleni. Kwamanye amabandla kunabafowethu nabodadwethu esele bakhulile abalotjhe uJehova ngokuthembeka iminyaka eminengi. Abanye abafowethu nabodadwethu abakhulileko akusikade bafunde iqiniso ngoJehova. Kinanyana ngibuphi ubujamo, abafowethu nabodadwethu abakhulileko kungenzeka baqalene nokubogaboga kwepilo okubangelwa kukhula. Lokho kungabakhandela bona basebenzele uJehova ngendlela abathanda ngayo. Nanyana kunjalo benza koke okusemandlenabo esimini, ekukhuthazeni abanye nekubabanduleni. Siyazuza ekuhlakanipheni kwabo. UJehova uyabathanda begodu nathi siyabathanda.—IzA. 16:31.

11-12. Abantu abatjha abasebandleni lakho bakukhuthaze ngayiphi indlela?

¹¹ Akhesicoce nangabantu abatjha. Zinengi iinqabo abahlangabezana nazo ezibangelwa nguSathana uDeveli. (1 Jwa. 5:19) Abantwabatjhaba bayasikhuthaza nasibona indlela abaphendula ngayo esifundweni, abahlanganyela ngayo esimini nendlela abatjengisa ngayo isibindi ekuvikeleni ukukholwa kwabo. Kuyakhanya ukuthi abantu abatjha banendawo eqakathekileko ebandleni lakaJehova.—Rhu. 8:2.

¹² Abanye abafowethu nabodadwethu bakufumana kubudisi ukukholwa ukuthi banendawo eqakathekileko ebandleni lakaJehova. Khuyini engasiza ngamunye kithi abone  ukuthi unendawo eqakathekileko ebandleni? Akhesibone.

13-14. Kubayini abanye bangazizwa banganandawo ebandleni?

¹³ Tjheja isifundo sesibili esisifunda emfanekisweni kaPowula. Ukhuluma ngomraro inengi lethu elinawo namhlanjesi, umraro wokungakholwa ukuthi siqakathekile ebandleni. UPowula watlola: “Inyawo nalingathi, ‘Ngombana angisisisandla, angisiyingcenye yomzimba,’ lokho akulenzi bona lingabi yingcenye yomzimba. Godu indlebe nayingathi, ‘Ngombana angisililihlo, angisiyingcenye yomzimba,’ lokho akuyenzi bona ingabi yingcenye yomzimba.” (1 Kor. 12:15, 16) Bekatjho ukuthini uPowula ngalokhu?

¹⁴ Nawuzimadanisa nabanye abantu ebandleni, kungenzeka ungakuboni ukuqakatheka kwakho. Abanye ebandleni kungenzeka banekghono lokufundisa, ukuhlela kuhle izinto namkha lokwelusa umhlambi. Kungenzeka ubabona bawenza ngcono kunawe umsebenzi loyo. Lokho kutjengisa ukuthi uthobekile begodu uyazi lapho amandlakho aphelela khona. (Flp. 2:3) Kodwana tjheja. Nawusolo uzimadanisa nabantu abanamakghono adlula wakho uzokudana. Ungazizwa njengombana uPowula atjhwile, uzizwe unganandawo ebandleni. Yini engakusiza ebujamwenobo?

15. NgokomTlolo weyoku-1 kwebeKorinte 12:4-11 khuyini ekufuze siyitjheje ngezipho esinazo?

¹⁵ Akhucabange nganaku: UJehova wanikela amaKrestu wangeenkhathi zabapostoli izipho ezimangalisako zommoya ocwengileko kodwana amaKrestu lawo akhenge afumane izipho ezifanako. (Funda yoku-1 kwebeKorinte 12:4-11.) UJehova wabanikela izipho namakghono ahlukahlukeneko kodwana woke amaKrestu lawo bewaqakathekile kuye. Namhlanjesi asinazo izipho ezisimangaliso esizifumana emmoyeni ocwengileko. Nanyana kunjalo sisalandela ikambiso efanako. Sinamakghono ahlukehlukeneko kodwana soke siqakathekile kuJehova.

16. Ngisiphi isiyalo sakampostoli uPowula ekungaba kuhle ukusilalela?

 ¹⁶ Kunokuzimadanisa namanye amaKrestu, kungaba kuhle silalele isiyalo sakampostoli uPowula esithi: “Omunye nomunye akahlole lokho yena akwenzako, begodu uzokuba nebanga lokuthaba malungana naye ayedwa, ingasi ngokuzimadanisa nomunye umuntu.”—Gal. 6:4.

17. Sizokusizeka njani nasilalela isiyalo sakaPowula?

¹⁷ Nasilandela isiyalo sakampostoli uPowula esiphefumulelweko begodu sitjhejisise amakghono esinawo, singalemuka ukuthi nathi kungenzeka sinezipho abanye abanganazo. Ngokwesibonelo, umdala othileko kungenzeka angabi mfundisi ophuma phambili kodwana kungenzeka ukuthi nakasesimini ufundisa kuhle khulu. Kobunye ubujamo kungenzeka bona omunye umdala akakahleleki njengabanye abadala kodwana ufumane bona ebandleni waziwa njengomelusi onethando begodu abatjhumayeli bazizwa batjhaphulukile ukukhuluma naye. Namkha kungenzeka waziwa ngokuba nomusa nokwenza abantu bazizwe batjhaphulukile. (Heb. 13:2, 16) Nasibona izinto esizenza kuhle, okuzizipho nathi esinazo, lokhu kuzosenza sithabe begodu sizizwe sinendawo ebandleni. Lokho kuzosenza singabi nomrhobholo ngalokho abafowethu abakghona ukukwenza thina esingakghoni ukukwenza.

18. Singawathuthukisa njani amakghono esinawo?

¹⁸ Soke sinendawo ebandleni lakaJehova begodu soke kufuze sifune ukuthuthuka kilokho esimenzela khona. Sifuna nokuthuthukisa amakghonwethu. UJehova ufuna ukusisiza kilokho, usebenzisa ihlanganwakhe bona asibandule. Ngokwesibonelo, emihlanganweni waqobe veke sinikelwa iinqophiso zokuthi singakghona njani ukutjhumayela ngendlela ephumelelako. Uyalinga na ukusebenzisa okufundako esimini?

19. Khuyini engakusiza ufikelele umgomo wokuya esiKolweni sabaTjhumayeli beVangeli lomBuso?

¹⁹ Elinye ibandulo eliphuma phambili esinalo ngesilifumana esiKolweni sabaTjhumayeli beVangeli lomBuso. Isikolwesi ngesabafowethu nabodadwethu abasekonzweni yesikhathi esizeleko abahlangana kweminyaka ema-23 nema-65. Kungenzeka uzibona ungeze waya esikolwenesi. Kunokobana usolo ucabanga ngezinto ezizokwenza ungakghoni ukuya esikolweni, kubayini ungacabangi ngezinto ezizokwenza ufune ukuya esikolwenesi? Ngemva kwalokho hlela izinto ezizokusiza ufikelele imibandela yokuya esikolwenesi. Ngesizo lakaJehova nokusebenza ngamandla, ungakghona ukwenza izinto ebekubonakala zingekhe zakghonakala.

20. Khuyini esiyifunda emTlolweni webeRoma 12:6-8?

²⁰ Isifundo sesithathu esisifunda emfanekisweni kaPowula sifumaneka kwebeRoma 12:6-8. (Ufunde.) Lapha uPowula godu utjengisa ukuthi woke umuntu ebandleni unezipho ezingafaniko. Kilokhu uveza ukuthi kufuze sisebenzise iziphwezi ukwakha nokuqinisa ibandla.

21-22. Sifundani kuRobert noFelice?

²¹ Akhesicoce ngesibonelo somfowethu esizombiza ngokuthi nguRobert. Ngemva kokusiza kwenye inarha, wabelwa bona ayokusebenza eBethel yenarheni yekhabo. Nanyana aqinisekiswa ukuthi isabelo sakhe asikatjhugululwa kukuthi akakenzi kuhle kodwana yena uthi: “Kwaphela iinyanga ngisolo ngizizwa ngisehluleki. Bekuneenkhathi lapha ngizizwa kwanga ngingalisa ukusebenza eBethel.”  Yini eyamsiza wathaba godu? Omunye umdala wamkhumbuza ukuthi uJehova bekasisiza ezabelweni ebesizenza ngaphambilini bona silungele izabelo esizenza namhlanjesi. URobert walemuka ukuthi kuzokufuze alise ukucabanga ngezinto esele zidlulile, athome ukuthanda izinto esele azenza nje.

²² Umfowethu uFelice Episcopo waqalana nento efanako. Banomkakhe baya eGiliyadi ngo-1956 bayokuba bajikelezi eBolivia. Ngo-1964 bafumana umntwana. UFelice uthi; “Kwaba budisi ukulisa isabelo ebesisenza ngombana besiligugu kithi. Kwaphela isikhathi esingangomnyaka solo ngidanile. UJehova wangisiza ngakghona ukutjhugulula indlela engicabanga ngayo, ngamukela umthwalwami wokuba mbelethi.” Inga-kghani wakhe wazizwa njengoRobert noFelice? Inga-kghani uzizwa udanile ngebanga lokungasabi nelungelo lokusebenzela uJehova ngendlela ebewenza ngayo phambilini? Nakunjalo, kungakuthabisa ukutjhugulula indlela ocabanga ngayo, uthatjiswe ngilokho okghona ukukwenza njenganje ekulotjheni uJehova nabafowenu babodadwenu. Iba majadu usebenzise izipho namakghonwakho ekusizeni abanye, uzokuthaba njengombana wakha ibandla.

23. Khuyini ekufuze sithathe isikhathi sethu siyenze begodu sizokucoca ngani esihlokweni esilandelako?

²³ Soke siqakathekile kuJehova. Ufuna sibe malunga womndenakhe. Nasizindla ngesikghona ukukwenzela abafowethu nabodadwethu, bese sisebenza ngamandla ekufumaneni indawethu ebandleni, sizozizwa sithandwa. Sibaqala njani abanye ebandleni? Singabatjengisa njani ukuthi siyabahlonipha begodu siyabathanda? Esihlokweni esilandelako sizokucoca ngayo indaba eqakathekileko le.