1. Abanye balinga njani ukwenza okungeziweko ekonzweni kaJehova?

 MNENGI KHULU umsebenzi ekufuze siwenze njengombana ukuphela kwephaseli kutjhidela. (Mat. 24:14; Luk. 10:2; 1 Pit. 5:2) Soke sifuna ukwenzela uJehova okunengi ngendlela esingakghona ngayo. Abanengi benza lokho ngokuthi bandise ikonzwabo. Abanye bafisa ukuba maphayona, basebenze e-Bethel namkha babe nengcenye ekwakhiweni kwezakhiwo zehlangano. Kuthi abanye abafowethu bazibekele umnqopho wokuthi babe ziinceku ezisizako namkha abadala. (1 Thim. 3:1, 8) UJehova uthaba khulu nakabona abantu bakhe balinga ngazo zoke iindlela ukuthi bamlotjhe!—Rhu. 110:3; Isa. 6:8.

2. Singazizwa njani nange singakghoni ukufikelela eminye yeminqopho ekonzweni kaJehova?

² Kungasidanisa nangabe kuthatha isikhathi eside ukuthi sifikelele imigomwethu ekonzweni kaJehova. Namkha singadana ngebanga lokuthi asikghoni ukufikelela amanye amalungelo, ngebanga lokuluphala namkha obunye ubujamo. (IzA. 13:12) Ngilokho okwenzeka ku-Melissa. * Uyafisa ukusebenza e-Bethel namkha ukuya esikolweni sabaTjhumayeli beVangeli kodwana uthi: “Iminyakami ayisangivumeli. Koke lokhu sekumaphupho nje kwaphela. Ngezinye iinkhathi lokho kuyangidanisa.”

3. Khuyini abanye ekufuze bayenze nabazakufanelekela amalungelo athileko?

³ Abanye abasasebatjha kungatlhogeka ukuthi babe babantu abavuthiweko begodu babe nobuntu obuthileko, ngaphambi kokuthi bakufanelekele ukufumana amalungelo  angeziweko. Ngokwesibonelo, abanye kungenzeka bahlakaniphile, bathatha iinqunto msinyana bebazimisele nokusebenza. Nanyana kunjalo, ngakelinye ihlangothi kungatlhogeka ukuthi bafunde ukubekezela, benze umsebenzabo ngokutjhejisisa bebahloniphe nabanye abantu. Nawudzimelelela ebuntwini obutlhogekako, ungafumana amalungelo lawo ngesikhathi ongakalindeli ngaso. Cabanga ngesibonelo saka-Nick. Nakaneminyaka ema-20, wezwa ubuhlungu khulu lokha nakangabekwa bona abe yinceku esizako ebandleni. Uthi: “Ngazizwa ngasuthi kukhona okungakalungi ngami.” Nanyana kunjalo, u-Nick akhenge alahle itewu. Wenza koke angakghona ukukwenzela ibandla begodu waragela phambili atjhumayela. Namhlanjesi, ulilunga leKomiti yeGatja.

4. Sizococa ngani esihlokwenesi?

⁴ Kghani uphatheke kabuhlungu ngebanga lokuthi awukafikeleli umnqopho othileko wokulotjha uJehova? Nangabe kunjalo, thandaza kuJehova umtjele indlela ozizwa ngayo. (Rhu. 37:5-7) Ukungezelela kilokho, bawa abafowethu abavuthiweko bakuphe imibono yokuthi ungayithuthukisa njani indlela olotjha ngayo uZimu bese ulinga ukukusebenzisa lokho abakuyala ngakho. Nawenza njalo, kungenzeka ufumane amalungelo angeziweko namkha ufikelele umqophwakho. Njengo-Melissa esikhulume ngaye ekuthomeni, kungenzeka ukuthi okwanje angeze wakghona ukusebenzela uJehova ngendlela ofuna ngayo. Alo-ke, ungahlala njani uthabile? Ukuphendula umbuzo lo, isihlokwesi sizokucoca ngokuthi (1) ungalifumanaphi ithabo, (2) ungalingezelela njani ithabo lakho begodu (3) ngimiphi iminqopho ongazibekela yona, engangezelela ithabo lakho.

5. Nasizakuthaba, khuyini ekufuze sidzimelele kiyo? (UMtjhumayeli 6:9)

⁵ UMtjhumayeli 6:9, uhlathulula ukuthi khuyini engasisiza sithabe (Ufunde.) Umuntu othatjiswa ngilokho “okubonwa mamehlo,” uyaneliseka ngalokho anakho, njengobujamo aqalene nabo. Ngokuhlukileko, umuntu ofunana nezinto angekhe azifumane, angekhe aneliseke. Khuyini esiyifundako? Sifunda ukuthi nasizakufumana ithabo, kufuze sidzimelele kilokho esinakho nakilokho esingakghona ukukufikelela.

6. Ngimuphi umfanekiso esizokukhuluma ngawo begodu singafundani kiwo?

⁶ Kuyakghoneka na ukuthi unganeliseka ngalokho onakho? Abantu abanengi bathi akukghoneki ngombana sithanda ukwenza izinto ezitjha esikhathini esinengi. Nanyana kunjalo, kuyakghoneka ukwaneliseka. Angekhe saneliseke kwaphela ngalokhu “okubonwa mamehlo” kodwana singathaba nokuthaba. Singakwenza njani lokho? Akhesihlole umfanekiso kaJesu wamathalende ofumaneka kuMatewu 25:14-30. Sizokufunda ukuthi singalifumana njani ithabo besilingezelele ebujamweni esikibo.

7. Hlathulula umfanekiso kaJesu wamathalende.

⁷ Emfanekisweni kaJesu, indoda beyizokuthatha ikhambo. Ngaphambi kokuthi ikhambe, yabiza iinsebenzi zayo. Yanikela isisebenzi ngasinye amathalende ukuthi senze imali engeziweko. * Indoda le beyazi ukuthi iinsebenzezi zinamakghono angafaniko, yeke yanikela isisebenzi sokuthoma amathalende amahlanu, sesibili, yasinikela amabili kwathi sesithathu, ithalende  linye. Iinsebenzi zokuthoma ezimbili zasebenza budisi ukuthi zenze imali engeziweko. Isisebenzi sesithathu sona akhange sizitshwenye ngokwenza imali engeziweko, yeke ikosi yasiqotjha emsebenzinaso.

8. Isisebenzi sokuthoma besingathatjiswa yini?

⁸ Isisebenzi sokuthoma sathaba khulu lokha ikosaso nayisinikele amathalende amahlanu. Le bekuyimali enengi khulu begodu lokho kutjengisa ukuthi ikosaso beyisithemba kwamambala. Kuthiwani ngesisebenzi sesibili? Besingadana ngebanga lokuthi asikafumani amathalende amanengi njengesisebenzi sokuthoma. Nanyana kunjalo, senzani isisebenzesi?

9. Khuyini uJesu angakhange ayitjho malungana nesisebenzi sesibili? (Matewu 25:22, 23)

⁹ Funda uMatewu 25:22, 23. UJesu akhange aveze ukuthi isisebenzi sesibili sasilingeka ngebanga lokuthi sifumene amathalende amabili. Akhange abe athi isebenzesi sanghonghoyila sathi: ‘Ngilokhu kwaphela engikufumanako mina? Kubayini ngifumane amathalende amancani kangaka ngombana nami ngisebenza budisi? Nangabe ikosami icabanga ukuthi angisebenzi budisi, ngamane ngilise ngiyozisebenzela mina.’

10. Isisebenzi sesibili senzani ngamathalendaso?

¹⁰ Isisebenzi sesibili sazwisisa ukuthi umsebenzi esinikelwe yikosaso uqakatheke khulu, yeke sasebenza budisi. Sangeza amathalendaso amabili, sawenza aba mane. Ngebanga lalokho, ikosaso yasinikela umtlomelo. Ikosaso yathaba beyasinikela umsebenzi ongeziweko!

11. Singalingezelela njani ithabo lethu?

¹¹ Ngendlela efanako, singangezelela  ithabo lethu ngokuthi sisebenze budisi kinanyana ngimuphi umsebenzi esinikelwe wona ekonzweni kaJehova. ‘Zinikele ngokupheleleko’ emsebenzini wokutjhumayela bewusebenze budisi ebandleni. (IzE. 18:5; Heb. 10:24, 25) Lungiselela kuhle nawuya esifundweni ukuthi ukghone ukunikela ngeempendulo ezikhuthazako. Ziqale njengeziqakathekileko zoke izabelo ozifumana emhlanganweni yaphakathi kweveke. Nabakubawa ukuthi usize ngemisebenzi ethileko ebandleni, yenze ngokuzimisela nangokuthembeka. Ungacabangi ukuthi isabelo osifumeneko sizokudlela isikhathi. Sebenza budisi ukuthuthukisa amakghonwakho. (IzA. 22:29) Nawusebenzela uJehova budisi, nizokuba bangani abakhulu begodu uzokuthaba. (Gal. 6:4) Uzokufumana kulula ukuthaba nalabo abafumana amalungelo angeziweko ebandleni.—Rom. 12:15; Gal. 5:26.

12. Khuyini eyasiza u-Nick no-Melissa ukuthi bangezelele ithabo labo?

¹² Usamkhumbula u-Melissa, udade onesifiso sokuya e-Bethel namkha esikolweni sabaTjhumayeli beVangeli? Nanyana angakghoni ukuzalisekisa iimfiso zakhe, uthi: “Ngilinga ukwenza koke engingakghona ukukwenza ekonzwenami yokuphayona begodu ngilinga nokusebenzisa iindlela ezihlukahlukeneko zokutjhumayela. Lokho kungenze ngathaba khulu.” U-Nick yena, wakuhlula njani ukudana kwakhe ngebanga lokungajanyiswa njengenceku esizako? Uthi, “Ngadzimelela kilokho ebengikghona ukukwenza, njengokuya ekonzweni yesimini nokunikela ngeempendulo ezikhuthazako esifundweni. Ngafaka isibawo sokuya e-Bethel, kwathi ngomnyaka olandelako, bangibiza.”

13. Uzokuba yini umphumela nawusebenza budisi esabelweni sakho nje? (UMtjhumayeli 2:24)

¹³ Nangabe usebenza budisi esabelweni onaso nje, kghani lokho kutjho ukuthi ungafumana izabelo ezengeziweko esikhathini esizako? Lokho kungenzeka njengombana kwenzeka ku-Nick. Nakungenzekiko, njengo-Melissa uzokuba nethabo elengeziweko nokwaneliseka ngombana wenzela uJehova koke okusemandlenakho. (Funda uMtjhumayeli 2:24.) Ngaphezu kwalokho, uzokuthaba ngombana uyazi ukuthi uthabisa iKosethu, uJesu Krestu.

14. Khuyini ekufuze sihlale siyikhumbula nasicabanga ngeminqophwethu ekonzweni kaJehova?

¹⁴ Nangabe senzela uJehova koke okusemandlenethu nje, kghani lokho kutjho ukuthi akukafuzi simenzele okhunye okungeziweko ekonzwenakhe? Awa, akusinjalo. Kufuze sizibekele iminqopho ezosisiza sibe batjhumayeli nabafundisi abangcono, besisize abafowethu nabodadwethu. Siphumelela ngokuthi sibe ngilaba abadzimelela ekusizeni abanye, ingasi kithi kwaphela.—IzA. 11:2; IzE. 20:35.

15. Ngimiphi iminqopho ongazibekela yona, engakusiza ungezelele ithabo lakho?

¹⁵ Ngimiphi iminqopho ongakghona ukuzibekela yona? Bawa uJehova akusize ulemuke ukuthi ngimiphi imiqopho ongakghona ukuyifikelela. (IzA. 16:3; Jak. 1:5) Kghani ungakghona na ukufikelela iminqopho ekukhulunywe ngayo  esigabeni sokuthoma sesihlokwesi? Njengokuba liphayona lesikhatjhana namkha lesikhathi esizeleko, ukuyokusebenza e-Bethel namkha ukusebenza ekusizeni ukwakha imakhiwo yehlangano? Ungabe ufunde ilimu elitjha ukuthi ukghone ukuyokutjhumayela endaweni ekukhulunywa khona ilimelo. Ungafumana imininingwana engeziweko ngokuthi ufunde isahluko 10 sencwadi ethi, Ukuhlelelwa Ukwenza Intando KaJehova  efumaneka ngesiZulu nokuthi ukhulume nabadala bebandleni lakho. * Nawulinga ukufikelela iminqopho le, abanye bazokulemuka ukuthi uyathuthuka begodu uzokungezelela ithabo lakho.

16. Khuyini ongayenza nje nangabe awukghoni ukufikelela umnqopho othileko?

¹⁶ Kuthiwani nangabe kwanje siyabhalelwa ukufikelela iminqopho ekukhulunywa ngayo esihlokwenesi? Intatha kukuthi uqale eminye iminqopho ongazibekela yona ongakghona ukuyifikelela. Akhe ucabange ngalokhu okulandelako okungenzeka.

17. Ngokuya ngokomtlolo woku-1 kaThimothi 4:13, 15, umfowethu angayithuthukisa njani indlela afundisa ngayo?

¹⁷ Funda yoku-1 kaThimothi 4:13, 15. Nangabe ungumfowethu obhabhadisiweko, kungatlhogeka ukuthi uthuthukise indlela okhuluma nofunda ngayo. Kubayini? Ngombana ‘nawudzimelela’ ekufundeni, ekukhulumeni nekufundiseni, kuzokuba sibusiso ebantwini abakulaleleko. Linga ukuzibekela umnqopho wokufundisisa nokusebenzisa koke okusencwadini ethi, Zinikele Ekufundeni Nekufundiseni. Funda ikghono ngalinye, uzibandule nawusekhaya ukuthi lokha nawubeka ikulumo, usebenzise lokho okufundileko. Ungabawa isizo kumeluleki omsizi namkha abanye abadala “abasebenza budisi ekukhulumeni nekufundiseni.” * (1 Thim. 5:17) Ungadzimeleli kwaphela kilokho okutjhiwo yincwadi kodwana siza abantu abakulaleleko ukuthi bakghone ukuqinisa ukukholwa kwabo, ngokubakhuthaza ukuthi bathathe amagadango  athileko. Ngokwenza njalo, uzokuthaba begodu nabo bazokuthaba.

18. Khuyini engasisiza sifikelele umnqophwethu ekonzweni yesimini?

¹⁸ Soke sabelwe umsebenzi wokutjhumayela nokwenza abafundi. (Mat. 28:19, 20; Rom. 10:14) Ungathanda na ukulola amakghonwakho ngomsebenzi oqakathekileko lo? Zibekele iminqopho ethileko njengombana ufunda bewusebenzisa lokho okufunde encwajaneni ethi, Zinikele Ekufundeni Nekufundiseni. Ungafumana nokhunye okungakusiza encwajaneni ethi, Ipilo Nomsebenzi WobuKrestu—Ihlelo Lomhlangano Webandla nakumavidiyo weentjumayelo evane siwabukela emhlanganweni waphakathi neveke. Linga iindlela ezihlukahlukeneko ukubona ukuthi ngiyiphi ekhamba phambili. Ngokusebenzisa iindlelezi, sizokuba batjhumayeli abangcono begodu sizokufumana nethabo elingeziweko.—2 Thim. 4:5.

19. Ungabakha njani ubuntu obuthandwa nguJehova?

¹⁹ Lokha nawuzibekela iminqopho, ungalibali ukuzibekela umnqopho wokuba nobuntu obuthandwa nguJehova. (Gal. 5:22, 23; Kol. 3:12; 2 Pit. 1:5-8) Uzokwenza njani ukuthi ufikelele umnqophwakho? Akhe sithi ngokwesibonelo, ufuna ukuba nokukholwa okuqinileko, mhlamunye ungafunda iincwadi zethu ezingakusiza ukuthi uqinise ukukholwa kwakho. Uzokuzuza khulu ngokuthi ubukele iingcenye eziku-JW Broadcasting^® ezitjengisa indlela abafowethu nabodadwethu abatjengisa ngayo ukukholwa nabaqalene neetjhijilo ezihlukahlukeneko. Cabangela indlela ongalingisa ngayo ukukholwa kwabo.

20. Khuyini esingayenza ukungezelela ithabo lethu besiphungule nokudana?

²⁰ Akunakuzaza ukuthi soke sifisa ukwenzela uJehova okunengi ukudlula lokhu esimenzela khona nje. Ephasini elitjha lakaZimu, soke sizokukghona ukwenzela uJehova koke lokhu esifisa ukumenzela khona. Okwanje, asisebenziseni woke amathuba esiwafumanako ukungezelela ithabo lethu besiphungule ukudana. Okuqakatheke khulu, sizokudumisa uJehova ‘uZimethu othabako.’ (1 Thim. 1:11) Yeke, asithabeni ngamalungelo esinawo ehlanganweni kaZimu!