1-2. Ngokomtlolo weRhubo 34:9, singabubona njani ubuhle bakaJehova?

CABANGA umuntu nakakupha into ongakhenge khewuyidle ngaphambilini. Ungazi ngcono ngayo ngokuthi uyiqale, uyinukelele, uthole nokuthi yenzwe ngani namkha ubuze abanye abayaziko. Nanyana kunjalo, ukuthi ukghone ukuyizwa kuhle ukuthi inambitheka njani, kufuze uyidle.

² Singafunda ngobuhle bakaJehova ngokufunda iBhayibheli, iincwadi zethu nangokulalelisisa abanye bakhuluma ngendlela uJehova ababusise ngayo. Ukuthi sizwisise kuhle ukuthi uJehova muhle kangangani, kufuze sizinambithele thina. (Funda IRhubo 34:9.) Akhe sifanekise ukuthi singakwenza njani lokho. Akhe sithi sifuna ukulotjha uJehova isikhathi esizeleko, ukuthi sikghone ukufikelela umnqopho loyo, kufuze senze ukuphila kwethu kube lula. Kungenzeka sihlale sisifunda isithembiso sakaJesu esithi nasibeka umBuso kokuthoma, uJehova uzosinikela lokho esikutlhogako kodwana akhenge sikubone kwenzeka kithi lokho. (Mat. 6:33) Nanyana kunjalo, ngebanga lokuthi sikholelwa esithembisweni sakaJesu, siphungula iindleko zethu sehlise nesikhathi esisisebenza emsebenzinethu wokuziphilisa besidzimelele khulu emsebenzini wokutjhumayela. Njengombana senza njalo, sizibonela thina ukuthi uJehova uyasitlhogomela, sikghona ukuzibonela ngokwethu ubuhle bakaJehova.

3. Ngokomtlolo weRhubo 16:1, 2, bobani abafumana iimbusiso zakaJehova?

³ UJehova “ulungile kibo boke,” nakilabo abangamaziko. (Rhu. 145:9; Mat. 5:45) UJehova ubenzela izinto ezihle khulu labo abamthandako nabenza koke abangakghona ukumenzela khona ekonzwenakhe ukuthi bamlotjhe. (Funda iRhubo 16:1, 2.) Akhe sicabange ngezinye izinto ezihle uJehova asenzele zona.

4. UJehova ubutjengisa njani ubuhle bakhe kilabo abazitjhideza kuye?

 ⁴ Ngaso soke isikhathi nasisebenzisa koke esikufunda kuJehova sizokubona izinto ezihle ekuphileni kwethu. Njengombana safunda ngaye samthanda, wasisiza sakghona ukuhlula imicabango emimbi nemikghwa engamthabisiko esihlukanisa naye. (Kol. 1:21) Lokha nasizinikela kuJehova sibhabhadiswa, sazibonela ngokwethu ubuhle bakhe khulukhulu njengombana wasinikela unembeza omuhle, wasitjhideza kuye sababangani bakhe.—1 Pit. 3:21.

5. Singabubona njani ubuhle bakaJehova ekonzweni yesimini?

⁵ Singaragela phambili nokuzibonela ubuhle bakaJehova ngokuthi sibe majadu emsebenzini wokutjhumayela. Inga-kghani umumuntu oneenhloni? Inengi labantu bakaJehova lineenhloni. Kungenzeka ngaphambi kokuthi ubenguFakazi kaJehova, bewungacabangi ukuthi ungakokoda emzini womuntu ongamaziko ukhulume naye ngeBhayibheli. Nanyana kunjalo, namhlanjesi uhlala ukwenza lokho. Ngaphezu kwalokho, uJehova ukghonile ukukusiza ukuthi uthabele umsebenzi wokutjhumayela wabe wakusiza nangezinye iindlela. Ukusize wehlisa ummoya lokha nawusesimini, uhlangana nomuntu okukgharamejako. Ubuye wakusiza wakhumbula umtlolo ongakghona ukuwusebenzisa nawuhlangana nomuntu onekareko esimini. Ukupha amandla wokuthi uragela phambili utjhumayela nanyana abanye bangafuni ukukulalela.—Jor. 20:7-9.

6. Indlela uJehova asibandula ngayo itjengisa njani ubuhle bakhe?

⁶ UJehova usitjengise ubuhle bakhe, ngokuthi asibandule sikghone ukulungela ukutjhumayela esimini. (Jwa. 6:45) Emihlanganwenethu yaphakathi neveke, sibukela iintjumayelo ezisibonelo ezicatjangelwe kuhle besikhuthazwa ukuthi sizisebenzise esimini. Nasithomako, singaba nevalo lokusebenzisa iindlela ezitjhezi kodwana nasizisebenzisako, singafumana ukuthi ziba nomphumela omuhle ekonzwenethu. Esifundweni nemihlanganweni emikhulu sihlale sikhuthazwa ukuthi sisebenzise iindlela ezihlukahlukeneko zokutjhumayela. Lokho kungasenza sibe nevalo kodwana nasilinga iindlelezi uJehova uzosibusisa. Akhesicoce ngezinye iimbusiso esingazifumana lokha nasilinga iindlela ezitjha zokunikela uJehova koke okusemandlenethu, kungayi ngobujamo esiqalene nabo. Sizokubuye sihlolisise ukuthi ngiziphi ezinye iindlela esingandisa ngazo ikonzwethu.

7. Ngiziphi iimbusiso esizozifumana nasizimisele ukwandisa ikonzwethu?

⁷ Sitjhidelana khulu noJehova. Cabanga ngesibonelo somdala u-Samuel, * okhonza nomkakhe e-Colombia. Abatjhadikazaba bebathabela ukuphayona ebandleni labo kodwana bebafuna ukuthuthukisa ikonzwabo ngokuthi bayokusiza ebandleni la kunetlhogeko khona. Ukuthi bafikelele umnqophwabo bekufuze kube nezinye izinto abazidelako. U-Samuel uthi: “sasebenzisa umtlolo kaMatewu 6:33 salisa ukuthenga izinto ebesingazitlhogi. Into ebeyibudisi ukuzodlula zoke bekukutjhiya indawo ebesihlala kiyo ngombana beyakhiwe ngendlela ebesifuna ngayo begodu besingayikolodi.” Nabafudukela ebandleni labo elitjha, bebangatlhogi ukuphila ngemali enengi njengangaphambili. Ubuye athi: “sibone indlela uJehova anqophisa ngayo amagadangwethu nangendlela  abuye aphendule ngayo imithandazwethu, sizizwa eengazini ukuthi uJehova uthabile ngathi begodu uyasithanda.” Kghani ungakghona na ukwandisa ikonzwakho? Nangabe kunjalo, ungaqiniseka ukuthi uJehova uzokutlhogomela.—Rhu. 18:26.

8. Khuyini okufunda ku-Ivan no-Viktoria?

⁸ Sifumana ithabo ekonzwenethu. Tjheja lokho okutjhiwo ngu-Ivan no-Viktoria, abatjhadikazi abaphayona e-Kyrgyzstan. Benza ukuphila kwabo kwabalula ukuthi bakghone ukuvolontiya kunanyana ngisiphi isabelo kuhlanganise nemaphrojekthini wokwakha. U-Ivan uthi, “sasebenza budisi kizo zoke izabelo zethu. Nanyana bekutjhinga ilanga sidiniwe kodwana besithabile sanelisekile ngombana sazi ukuthi sisebenzise amandlethu ekwenzeni umsebenzi kaJehova. Kuyasithabisa ukwenza abangani abatjha nokuba neenkhathi ezimnandi nabo.”—Mar. 10:29, 30.

9. Khuyini omunye udade ayenzileko ukuthi andise ikonzwakhe nanyana aqalene nobujamo obubudisi begodu ube yini umphumela?

⁹ Sifumana ithabo ekonzweni kaJehova nanyana siqalana neentjhijilo. Ngokwesibonelo, u-Mirreh umhlolokazi okhulileko we-West Africa wathatha umhlalaphasi emsebenzinakhe wobudorhodere, wathoma ukuphayona. U-Mirreh une-arthritis yeke, ukghona ukwenza i-awara linye nakatjhumayela umuzi nomuzi kodwana nakatjhumayela tjhatjhalazi ukghona ukwenza ama-awara amanengi. Unamabuyelo neemfundo zeBhayibheli ezinengi, kuthi ezinye zazo uziraga ngomtato. Khuyini eyakhuthaza u-Mirreh ukuthi enze okungeziweko ekonzweni kaJehova? Uthi, “Ngimthanda khulu uJehova noKrestu Jesu, ngihlala ngithandaza ngibawa uJehova ukuthi angisize, ngikghone ukwenza koke engingakwenza ekonzwenakhe.”—Mat. 22:36, 37.

10. Ngokomtlolo woku-1 kaPitrosi 5:10, khuyini efunyanwa ngilaba abandisa ikonzwabo?

¹⁰ Sifumana ibandulo elengeziweko kuJehova. U-Kenny oliphayona le-Mauritius, ukufumane kuliqiniso lokhu. Lokha nakafumana amaqiniso, walisa eyunivesithi, wabhabhadiswa bewangenela ikonzo yesikhathi esizeleko. Uthi, “Ngilinga ukufana nomphorofidi u-Isaya nakathi ‘Mina ngikhona, thuma mina!’” (Isa. 6:8) U-Kenny wasebenza emaphrojekthini ahlukahlukeneko wokwakha bewasiza nekutjhugululeni iincwadi ngelimu lakhe. Uthi “Ngafumana ibandulo elangifundisa amakghono angisiza ukuthi ngiphethe izabelo zami.” Akhenge afunde ukwenza umsebenzi loyo kwaphela kodwana wafunda nokhunye okunengi. Uragela phambili athi, “Ngafunda ukuthi amakghonwami aphelela kuphi nokuthi ngibuphi ubuntu engibutlhogako ukuze ngibe sikhonzi sakaJehova esingcono.” (Funda yoku-1 kaPitrosi 5:10.) Kubayini ungahlolisisi ubujamo bakho ukubona ukuthi ungazenza ufumaneke ekutheni ubandulwe nguJehova?

11. Ngimiphi imizamo eyenziwe bodadwethu be-South Korea begodu kube namiphi imiphumela? (Qala isithombe esingaphandle)

¹¹ Ngitjho nabantu ekade baboFakazi bayatlhoga ukubandulwa ngeendlela ezitjha zokutjhumayela. Ngesindabelaphi i-COVID-19 abadala bebandla le-South Korea batlola bathi: “Abanye ebebacabanga ukuthi angekhe babe nengcenye ekutjhumayeleni ngebanga lobujamo bepilo, nje sebayakghona ukutjhumayela basebenzisa i-videoconferencing. Abodade abathathu abaseminyakeni yama-80, nje, bafunde indlela etjha yokutjhumayela ngamakhomphyutha begodu sele bathome ukutjhumayela qobe langa.” (Rhu. 92:15,16) Ungakuthabela na ukuthuthukisa ikonzwakho uzibonele ngokwakho ubuhle bakaJehova? Nazi ezinye  izinto ongazenza ukuthi ufikelele umnqopho loyo.

12. Khuyini uJehova ayithembisa labo abathembela kuye?

¹² Thembela kuJehova. Uthembisa ukusibusisa khulu lokha nangesithembela kuye besilinge nokumenzela koke esingakghona ukumenzela khona. (Mal. 3:10) Udade we-Colombia u-Fabiola, uzibonele ngewakhe lokha uJehova nakazalisa isithembiswesi. Bekafuna ukuba liphayona lesikhathi esizeleko msinyana ngemva kokuthi abhabhadiswe. Nanyana kunjalo, ubabakwakhe nabantwana bakhe abathathu bebathembele emrholwenakhe. Nakazokuthatha umhlalaphasi, wathandaza kuJehova abawa isizo. Uthi, “Esikhathini esinengi kuthatha isikhathi ukuthi umuntu afumane iimali zakhe zemsebenzini kodwana ngehlangothini lami, ngakghona ukuthi ngizifumane msinyana ngemva kwenyanga yinye ngiceda ukufaka isibawo. Kwaba ngathi yikarisomraro!” Ngemva kweenyanga ezimbili wathoma ukuphayona. Nje useminyakeni yama-70 begodu sele aphayone iminyaka engaphezu kwema-20. Ukghonile ukuthi asize abantu ababunane babhabhadiswe. Uthi: “Nanyana ngezinye iinkhathi ngiphelelwa mamandla, uJehova uyangisiza ukuthi ngiragele phambili ngiphayona.”

13-14. Ngiziphi iimbonelo ezingakusiza uthembele kuJehova bewandise ikonzwakho?

¹³ Funda eembonelweni zalabo abathembela kuJehova. IBhayibheli lizele iimbonelo zabantu abasebenzela uJehova budisi.  Eenkhathini ezinengi, abantwaba bekufuze kube ngibo abathatha amagadango wokuthoma, ukuthi bazokukghona ukufumana iimbusiso ezikhethekileko kuJehova. Ngokwesibonelo, uJehova wabusisa u-Abrahama ngemva kokuthi atjhiye indawo ebekahlala kiyo akhambe, “ngitjho nanyana bekangazi bona uyaphi.” (Heb. 11:8) NoJakopo wafumana isibusiso esikhethekileko ngemva kokuthi alwe nengilozi kaJehova. (Gen. 32:24-30) Lokha isitjhaba sakwa-Israyeli nasizakungena enarheni yesithembiso, bekufuze abaphristi bayame qangi emlanjeni iJordani ukwenzela ukuthi abanye bazokukghona ukuyama ngemva kwabo.—Jotj. 3:14-16.

¹⁴ Ungafunda neembonelweni zaboFakazi banamhlanjesi abathembele kuJehova bebathuthukisa nekonzwabo. Ngokwesibonelo, umfowethu u-Payton no-Diana, bebakuthabela ukufunda ngabafowethu abandise ikonzwabo, njengalabo abafumaneka eenhlokweni ezimlandelande ezithi “Bazinikela Ngokuzithandela.” * U-Payton uthi: “Nasifunda iinhlokwezi bekufana nokuthi sibukele umuntu odla ukudla okumnandi, lokho bekusibasela ukuthi sifune ‘ukuzizwela nokuzibonela ukuthi uSomnini muhle.’” Ekukhambeni kwesikhathi, u-Payton no-Diana baphetha ngokufudukela endaweni la kunetlhogeko khona. Sele uzifundile na iinhloko ezimlandelandezi? Wabukela namavidiyo afumaneka ngesiZulu athi, Ukushumayela Ensimini Esemajukujukwini—E-Australia nethi Ukushumayela Endaweni Engayodwa—E-Ireland ezifumaneka ku-jw.org? Zoke izintwezi zingakusiza ukuthi uthole iindlela ezingcono ongandisa ngazo ikonzwakho.

15. Ukuba nabangani ababeka umBuso kaZimu kokuthoma kungasisiza njani?

¹⁵ Khetha kuhle abangani. Kulula ukuthi sidle ukudla engakhange sikudle ngaphambilini lokha nasinabantu abakwaziko nabathabela ukukudla. Ngendlela efanako, lokha nasibabangani nalabo abasekonzweni yesikhathi esizeleko, nathi sizokuba sethubeni elihle lokuthi sandise ikonzwethu yokulotjha uZimu. Ngilokho okwenzeka ku-Kent no-Veronica. U-Kent uthi, “Umndenethu nabangani, basikhuthaza ukuthi silinge iindlela ezitjha zokwandisa ikonzwethu. Sitjheje ukuthi ukuba nabangani ababeka umBuso kokuthoma, kusenze sazithemba ekulingeni izinto ezitjha.” U-Kent no-Veronica nje bamaphayona akhethekileko e-Serbia.

16. Njengombana kutjho umfanekiso kaJesu okuLukasi 12:16-21, kubayini kufuze sizimisele ukuzidela?

¹⁶ Zidele ngebanga lakaJehova. Akusizo zoke izinto esizithandako ekufuze sizidele ngebanga lakaJehova. (UMtj. 5:19, 20) Nanyana kunjalo, nasikhetha ukungenzi okungeziweko ekonzweni kaZimu ngebanga lokuthi asifuni ukudela ezinye zezinto esizithandako, singafana nendoda uJesu akhuluma ngayo emfanekiswenakhe, eyabuthelela izinto ezinengi eziphathekako kodwana inganandaba noZimu. (Funda uLukasi 12:16-21.) Umfowethu u-Christian ohlala e-France uthi, “Benginganasikhathi esinengi sakaJehova nomndenami.” Yena nomkakhe baqunta ukuthi babe maphayona. Bona bafikelele umnqophwabo bekufuze balise umsebenzabo. Ukuthi bakghone ukuzitlhogomela, bavula irhwebo elincani lokuhlwengisa begodu baneliseka ngalokhu okuncani ebebanakho. Kghani bayazisola na ngesiqunto abasithathako? U-Christian uthi, “Sikuthabela khulu ukutjhumayela nje kunangaphambilini begodu  sithabela ukubona abantu esifunda nabo iBhayibheli namabuyelwethu bafunda ngoJehova.”

17. Khuyini engenza kube budisi ukuthomisa iindlela ezitjha zokutjhumayela ekonzwenethu?

¹⁷ Zimisele ukulinga iindlela ezitjha zokwandisa ikonzwakho. (IzEnzo 17:16, 17; 20:20, 21) U-Shirley, iphayona le-United States, kwatlhogeka ukuthi ahlele indlelakhe yokutjhumayela hlangana nesindabelaphi i-COVID-19. Ekuthomeni, bekazaza ukutjhumayela ngomtato. Ngemva kokubandulwa ngeveke ekhethekileko, wathoma ukutjhumayela asebenzisa indlela le qobe. Uthi, “Ekuthomeni bengisaba kodwana nje ngiyakuthabela. Sifumana abantu abanengi ukudlula lokha nasingena umuzi nomuzi!”

18. Khuyini engasisiza siqalane neetjhijilo nasilinga ukwandisa ikonzwethu?

¹⁸ Zibekele imigomo bewulinge nokuyifikelela. Nasiqalana nemiraro, siyathandaza sibawe isizo besicabange nokuthi isisombululo sizokubayini. (IzA. 3:21) U-Sonia oliphayona esiqhemeni sesi-Roman, e-Europe uthi, “ngitlola koke lokhu engihlela ukukwenza, bese ngithatha iphepha engitlole kilo ngilibeke la engizolibona khona. Etafuleni lami kunomgwalo oneendlela ezimbili ezitjhinga eendaweni ezihlukahlukeneko. Nangizokuthatha isiqunto, ngiqala iindlelezi, ngicabangisise ukuthi isiqunto engizosithatha sizongisiza ngifikelele umnqophwami namkha awa?” U-Sonia uhlala alinga ukuba nombono omuhle nakaqalana neentjhijilo. Uthi, “kufuze ngithathe isiqunto sokuthi zoke iintjhijilo engiqalana nazo zifana neboda elingivimbela ukufikelela umnqophwami namkha njengebhrorho elingisiza ngifikelele umnqophwami.”

19. Khuyini esifuna ukuyenza?

¹⁹ UJehova usibusisa ngeendlela ezinengi. Singatjengisa ukuthi siyazithokoza iimbusiswezi qobe langa, ngokuthi senze koke okusemandlenethu ukuthi simnikele idumo. (Heb. 13:15) Lokho kungahlanganisa ukufumana iindlela ezitjha zokwandisa ikonzwethu, ezizosenza sifumane iimbusiso ezingeziweko kuJehova. Qobe langa, asiqaleni iindlela ‘zokuzwa ukuthi uSomnini muhle.’ Sizokufana noJesu lokha nakathi, “Ukudla kwami kukwenza intando yongithumileko nokuqeda umsebenzakhe.”—Jwa. 4:34.