1. Ngimuphi umthwalo uJehova awunikele ababelethi?

UJEHOVA wabumba abatjhadikazi bokuthoma banesifiso sokuba nabantwana. IBhayibheli litjho kufanele ukuthi: “Abantwana balilifa elivela kuSomnini.” (Rhu. 127:3) Kutjho ukuthini lokho? Akhesithi umnganakho otjhidelene naye ukubawa bona umgadele imali enengi. Bewuzozizwa njani? Kungenzeka bewuzozizwa uhlonitjhwa begodu uthembekile. Kodwana ungatshwenyeka ngokuthi uzokukghona na ukuyibulunga ngokuphephileko imalikazi engaka. UJehova uMnganethu omkhulu unikele ababelethi into eqakatheke khulu ukudlula imali bona bayivikele. Ubanikele umthwalo wokuqinisekisa ukuthi abantwana bayatlhogonyelwa begodu bathabile.

2. Sizokucoca ngamiphi imibuzo?

² Ngubani okufuze aqunte ukuthi abatjhadikazi baba nabantwana nokuthi baba nabo nini? Khuyini engenziwa babelethi bona basize abantwana babo baphile ukuphila okuthabisako? Cabanga ngeenkambiso ezifumaneka eliZwini lakaZimu ezingasiza abatjhadikazi abamaKrestu bona bathathe iinqunto ezivuthiweko.

3. (a) Ngubani ekufuze aquntele abatjhadikazi ukuthi babe nabantwana? (b) Ngiziphi iinkambisolawulo zeBhayibheli umndeni nabangani ekufuze bahlale bazikhumbula?

³ Kezinye iinarha, abantu abasaqeda ukutjhada kulindeleke bona babe nabantwana. Umndenabo nabanye ungabagandelela bona balandele isikwelo. UJethro umfowethu ohlala e-Asia uthi, “Ebandleni abanye abatjhadikazi abanabantwana bagandelela abatjhadikazi abanganabo bona babe nabo.” UJeffrey umfowethu ohlala e-Asia, uthi, “Abanye abatjhadikazi  abanabantwana batjela abanganabo ukuthi kufuze babe nabantwana, ukwenzela bona bazobatlhogomela nasele baluphele.” Nanyana kunjalo, abatjhadikazi kufuze baqunte ukuthi bayafuna na ukuba nabantwana namkha awa. Leso siqunto sabo begodu mthwalwabo. (Gal. 6:5) Kuyazwisiseka ukuthi umndeni nabangani bafuna abatjhadikazi bathabe. Kodwana kufuze bakhumbule ukuthi batjhadikazi ekufuze bazithathele isiqunto sokuthi bayafuna ukuba nabantwana namkha awa.—1 Thes. 4:11.

4-5. Ngiziphi izinto ezimbili eziqakathekileko abatjhadikazi ekufuze bakhulume ngazo, kufuze bakhulume ngazo nini? Hlathulula.

⁴ Abatjhadikazi abaqunte ukuba nabantwana kufuze bakhulume ngezinto ezimbili eziqakathekileko: Kokuthoma, bafuna ukuthoma nini ukuba nabantwana? Kwesibili, bafuna ukuba nabantwana abayingakhi? Ngisiphi isikhathi esihle abatjhadikazi abangakhuluma ngaso ngendaba le? Kubayini imibuzo emibili le iqakathekile?

⁵ Abantu abahlela ukutjhada kufuze bakhulume ngendaba yokuba nabantwana ngaphambi kokutjhada. Kubayini kufuze benze njalo? Kungombana ukuba nombono ofanako ngendaba le kuqakathekile. Godu kufuze baqale ukuthi bawulungele na umthwalo lo. Abanye abatjhadikazi baqunte ukuhlala umnyaka namkha emibili ngemva kokutjhada, ngaphambi kokuba nabantwana ngombana ukuba nabantwana kutlhoga isikhathi namandla. Lokho bakwenza ngombana bafuna ukujayela ukuhlala bobabili emtjhadweni. Bathi ukulinda kubanikela isikhathi sokuthi bajayelane begodu nethando labo likhule.—Efe. 5:33.

6. Abanye abatjhadikazi baqunte ukwenzani ngebanga lesikhathi esiphila kiso?

⁶ Abanye abatjhadikazi abamaKrestu bakhethe ukulingisa isibonelo samadodana kaNowa nabafazi bawo. Abatjhadikazabo akhenge babe nabantwana nabaqeda ukutjhada. (Gen. 6:18; 9:18, 19; 10:1; 2 Pit. 2:5) UJesu wafanisa isikhathi sethu ‘nemihla kaNowa’ begodu akunakuzaza ukuthi okwanje siphila ‘emihleni yokuphela okubudisi ukuqalana nayo.’ (Mat. 24:37; 2 Thim. 3:1) Ngebangelo abanye abatjhadikazi baqunte ukungabi nabantwana, ukwenzela bona basebenzele uJehova.

7. Iinkambisolawulo ezifumaneka kuLukasi 14:28, 29 nakuzAga 21:5, zingabasiza njani abatjhadikazi?

⁷ Ngaphambi kokuqunta ukuthi bazokuba nabantwana abayingakhi, abatjhadikazi abahlakaniphileko ‘babala iindleko.’ (Funda uLukasi 14:28, 29.) Abatjhadikazi  abanelemuko lokukhulisa abantwana bathi ukuba nabantwana akutlhogi imali kwaphela, kodwana kutlhoga isikhathi namandla. Kungebangelo kuqakathekile ukuzibuza ukuthi: ‘Kghani kuzokutlhogeka ukuthi bobabili basebenze ukuze bakghone ukutlhogomela umndeni? Siyavumelana na ngokuthi ngiziphi izinto ezitlhogwa mndenethu? Nangabe sobabili sizokusebenza ngubani ozokutlhogomela abantwana bethu? Ngubani ozokuba nomthelela endleleni abacabanga nabenza ngayo izinto?’ Lokha abatjhadikazi nabakhuluma ngemibuzo le, basebenzisa amezwi afumaneka emtlolweni wezAga 21:5.—Ufunde.

8. Ngibuphi ubudisi abatjhadikazi ekufuze babulindele begodu khuyini ezokwenziwa yindoda enethando?

⁸ Umntwana utlhoga isikhathi namandla wombelethi ngamunye. Nangabe abatjhadikazi babanabantwana abanengi abalamana eduze kungaba budisi ukutlhogomela umntwana ngamunye ngendlela efaneleko. Abanye abatjhadikazi abanabantwana abancani abalamanako bathi ngezinye iinkhathi baphelelwa mamandla. Umma angahlala adiniwe ngokomzimba nangokwamazizo. Lokho kungamenza ahlale adiniwe begodu angabi namandla wokufunda, wokuthandaza newokutjhumayela qobe. Esinye isitjhijilo angaqalana naso kukuthi kungenzeka angakghoni ukulalelisisa nakasesifundweni begodu angazuzi. Indoda enethando izokwenza koke okusemandlenayo bona isekele umkayo batlhogomele abantwana, nabasekhaya namkha esifundweni. Ngokwesibonelo, ingasiza umkayo ngemisebenzi yangendlini. Izokusebenza budisi bona iqinisekise ukuthi woke umndeni uyazuza ehlelweni lokukhulekela komndeni. Abobaba abamaKrestu bazokukhamba nemindenabo nabaya esimini.

9-10. Khuyini ekufuze yenziwe babelethi abafuna ukusiza abantwana babo?

⁹ Ngiziphi ezinye izinto ababelethi ekufuze bazenze bona basize abantwana babo bathande uJehova? Bangabavikela njani ekuziphatheni okumbi kwephaseli? Cabanga ngamanye amagadango ababelethi abangawathatha.

¹⁰ Thandaza ubawe isizo kuJehova. Tjheja isibonelo esabekwa nguManowarhi nomkakhe, ababelethi bakaSamsoni. Lokha uManowarhi nakafumana ukuthi bazokuba nendodana, wathandaza kuJehova wabawa isinqophiso sokuyikhulisa.

11. Ababelethi bangasilingisa njani isibonelo sakaManowarhi esifumaneka encwadini yabaKhokheli 13:8?

¹¹ UNihad no-Alma beBosnia, eHerzegovina bafunda esibonelweni sakaManowarhi.  Bayahlathulula bathi, “NjengoManowarhi, sabawa uJehova bona asinikele iinqophiso zokuba babelethi abalungileko. UJehova wayiphendula imithandazwethu ngeendlela ezihlukahlukeneko—ngeBhayibheli, iincwadi ezisekelwe kilo, ngesifundo kunye nemihlangano emikhulu.”—Funda AbaKhokheli 13:8.

12. UJosefa noMariya bababekela siphi isibonelo abantwana babo?

¹² Fundisa ngesibonelo. Iye, okutjhoko kuqakathekile kodwana okwenzako ngikho okuzokuba nomthelela emntwanenakho. Nakuziwa kuJosefa noMariya asizazi nakancani ukuthi bababekela isibonelo esihle abantwana babo kuhlanganise noJesu. UJosefa bekasebenza budisi bona asekele umndenakhe. Ngaphezu kwalokho, bekabasiza bona bathande uJehova. (Dut. 4:9, 10) Nanyana bekungasimthetho ukuthi uJosefa akhambe nomndenakhe emnyanyeni wePhasika ebewugidingwa qobe mnyaka eJerusalema, kodwana wakhamba nawo. (Luk. 2:41, 42) Kungenzeka abanye abobaba bebaqala ikhambweli njengento engatlhogekiko, edla isikhathi begodu eneendleko ezinengi. Nanyana kunjalo, kuyakhanya bona uJosefa bekakuthanda ukufunda ngoZimu begodu wafundisa nabantwana bakhe bona bathande uZimu. Ngokufanako noMariya bekayazi kuhle imiTlolo. Ngamezwi nangezenzo wafundisa abantwabakhe bona bathande iliZwi lakaZimu.

13. Abanye abatjhadikazi basilingisa njani isibonelo sakaJosefa noMariya?

¹³ UNihad no-Alma ekhesakhuluma ngabo, bebafuna ukulandela isibonelo sakaJosefa noMariya. Lokho kwabasiza njani bona bafundise indodanabo ukulotjha nokuthanda uZimu? Bathi, “Kikho koke esikwenzako, silinga ukutjengisa indodanethu ukuthi kuthabisa kangangani ukuphila ngeenkambisolawulo zakaJehova.’ Nakangezelelako uNihad uthi: “Yiba mumuntu ofuna umntwanakho abe nguye nakakhulako.”

14. Kubayini ababelethi kufuze babazi abangani babantwababo?

¹⁴ Siza abantwana bakho bakhethe kuhle abangani babo. Bobabili umma nobaba kufuze bazi ukuthi bobani abangani babantwana babo begodu benzani nabanabo. Lokho kutjho ukuthi ababelethi kufuze bazi ukuthi abantwana babo bakhuluma nabobani nabasebenzisa zokuthintana nabofunjathwako. Kazi abantu abazihlanganisa nabo kezokuthintana bangaba nomthelela endleleni abenza ngayo izinto nabacabanga ngayo.—1 Kor. 15:33.

15. Khuyini ababelethi abangayifunda esibonelweni sakaJessie?

¹⁵ Khuyini ababelethi abangayenza nabangakwaziko ukusebenzisa abofunjathwako namakhomphyutha? Ubaba ohlala ePhilippines ibizo lakhe linguJessie, uthi: “Kuncani khulu ebesikwazi ngetheknoloji. Kodwana lokho akhenge kusikhandele bona silemukise abantwana bethu ngeengozi zokusebenzisa izinto zetheknoloji.” UJessie akhenge abakhandele abantwana bakhe bona bangazisebenzisi ngebanga lokuthi kuncani khulu yena akwaziko ngazo. Nakahlathululako uthi: “Ngiyabavumela abantwana bami ukuthi basebenzise izinto zetheknoloji bona bafunde elinye ilimi, balungiselele imihlangano begodu bafunde iBhayibheli qobe lilanga.” Nangabe umbelethi, ufundile bewacoca nabantwana bakho ngokwaziswa okufumaneka ku-jw.org^® ngaphasi kwesihloko esithi, IZIMFUNDISO ZEBHAYIBHELI “Intsha” okukhuluma ngokulinganisela nawusebenzisa ufunjathwako , nawuthumelela abanye umlayezo nalokha nawubathumelela iinthombe. Kghani sewuwabukele nabo amavidiyo athi, Ngubani Okulawulako —Nguwe Namkha Zizinto Zokuthintana? nethi Sebenzisa Zokuthintana Ngendlela Efaneleko? * Umthombo lo ulisizo khulu nawufuna ukufundisa abantwana bakho bona basebenzise kuhle izinto zetheknoloji.—IzA. 13:20.

16. Khuyini eyenziwe babelethi abanengi begodu umphumela waba yini?

¹⁶ Ababelethi abanengi balinga ngamandla ukwenza amathuba wokuthi abantwana babo bakhe ubungani nabantu abasibonelo esihle ekulotjheni uZimu. Ngokwesibonelo, abatjhadikazi benarheni yeCôte d’Ivoire uN’Déni noBomine bahlala bamema umjikelezi bona ahlale emzinabo. UN’Déni uthi: “Lokhu kwaba nomthelela omuhle endodanenethu. Kwayenza yathoma ukuphayona begodu nje imjikelezi omjaphethe.” Kghani nawe ungabenzela abantwana bakho ilungiselelo elifanako?

17-18. Ababelethi kufuze bathome nini ukubandula abantwana babo?

¹⁷ Thoma msinyana ukubandula abantwana bakho. Kuba ngcono khulu ababelethi nabathoma msinyana ukubandula abantwana babo. (IzA. 22:6) Akhesicabange ngoThimothi, nakakhulako bekakhamba nompostoli uPowula. Unina uYunisi nogogwakhe uLowisi bambandula ‘kusukela aseselisana.’—2 Thim. 1:5; 3:15.

¹⁸ Abanye abatjhadikazi beCôte d’Ivoire, uJean-Claude noPeace bakghona ukukhulisa abantwana babo abasithandathu bona bathande bebalotjhe uJehova. Basizwa yini? Balandela isibonelo sakaYunisi noLowisi. Bathi, “Sathoma ukufaka iliZwi lakaZimu kibo kusukela basesebancani, ngemva kokubelethwa.—Dut. 6:6, 7.

19. Kutjho ukuthini ‘ukufaka’ iliZwi lakaZimu emntwaneni?

¹⁹ Kutjho ukuthini ‘ukufaka’ iliZwi lakaJehova emntwaneni? ‘Ukufaka’ kutjho ‘ukufundisa nokukhumbuza ngokubuyelelweko.’ Nabazakwenza lokhu, ababelethi kufuze babe nesikhathi sokuhlala nabantwana babo. Ngezinye iinkhathi kungatlhoga isineke ukufundisa abantwana. Nanyana kunjalo, ababelethi bangaqala umsebenzi lo njengethuba lokusiza abantwana bazwisise iliZwi lakaZimu begodu balisebenzise.

20. Hlathulula bona iRhubo 127:4, lingasetjenziswa njani ekukhuliseni abantwana.

 ²⁰ Bazi abantwana bakho. IRhubo 127 lifanisa abantwana nemisubela. (Funda iRhubo 127:4.) Njengombana imisubela yenziwa ngezinto ezihlukahlukeneko begodu ingalingani ngobude, ngokufanako nabantwana angeze bafana patsi. Yeke nababelethi kufuze bafune iindlela zokubandula umntwana ngamunye. Abatjhadikazi besikhathini sethu abahlala e-Israel abaphumelela ekubanduleni abantwana babo bona bathande uJehova bathi, “Besiraga isifundo seBhayibheli nomntwana ngamunye.” Enye nenye ihloko yomndeni ngiyo ezokuqunta ukuthi ukufunda ngendlela le kuyatlhogeka na namkha awa.

21. Ababelethi bangalindela liphi isizo kuJehova?

²¹ Ngezinye iinkhathi ababelethi bangezwa ngasuthi kubudisi ukufundisa abantwana babo, kodwana kufuze bakhumbule ukuthi basisipho esivela kuJehova. Uhlala akulungele ukusiza ababelethi begodu uzimisele ukubalalela nabathandazako. Imithandazwabo uyiphendula ngeBhayibheli, ngeencwadi ezisekelwe kilo begodu usebenzisa iimbonelo zababelethi abavuthiweko ebandleni.

22. Ngiziphi izinto ezihle khulu ababelethi abangazinikela abantwana babo?

²² Abanye abantu bathi kuthatha iminyaka ema-20 ukukhulisa umntwana, kodwana umsebenzi wombelethi awupheli. Hlangana nezinye izinto ababelethi abangazipha abantwana babo lithando, isikhathi sabo nokuthi bababandule ngeBhayibheli. Umntwana ngamunye uzokusabela ngokuhlukileko ebandulweni alifumanako. Nanyana kunjalo, inengi labo elikhuliswe boFakazi bakaJehova lizizwa njengoJoanna Mae udadwethu ohlala e-Asia, othi: “Nangiqala emva ebandulweni engalifumana ebabelethini bami, ngizizwa ngibathokoza ngokungibandula nokungifundisa bona ngithande uJehova. Akhenge bamnikele ukuphila kwaphela, banginikela ukuphila okunomnqopho.” (IzA. 23:24, 25) Iingidi zabafowethu nabodadwethu bazizwa ngendlela efanako.